بالاجا آغ بالیق
ائلمان موغانلی
آنادیلیمیز: قارا ناققانین دیش لری آراسیندان یاشاما قاییتمیش بالاجا آغ بالیق، دنیزین دینج یئرینده قوملارین اوستونه سپه لنمیش آغ یومرو داشلارین آراسیندا آلا جان دوشدو، آغیر بیر یوخودان آییلاندان سونرا، یاواش- یاواش جانلانیردی، آنجاق هله ده قورخو جانیندایدی. داشلار اونون اؤز رنگینده اولدوغونا اونو دوشمن گؤزوندن ایتیریردیلر، اونا گؤره ده کیمسه سیز بالیغین گؤزونده او یومرو داشلار دنیز دیبینین ان سئومه لی شئی لری ایدیلر. گونو – گوندن، بالیق اونلارا آرتیق اوره ک باغلاییردی، اونلارین آغ بویاغی بالیغین تکجه دلخوشلوغو ایدی. اونون اوچون ده سحردن آخشاما بالیغین ایشی دالغالار قوندوران توز- تورپاغی داشلارین اوزوندن سیلمک ایدی، بالاجا آغ بالیغین قولاغی سانیردی آغ داشلار دانیشیرلار، یازیق بالا بالیق سئوینجدن اوچماغا قاناد چیخاردیردی، او سسلر هر گون داها آرتیق گوجله نیردیلر، بالاجا بالیق یاواش- یاواش قورخونو اونوتموشدو، یئنی بیر یاشام یاشاماقدایدی، قولاغینی توتوردو داشلارین قارنینا، اونلاری ائشیدیردی اونلارلا دانیشیردی و گونلری گؤز قیرپیمی کیمی باشا ووروردو.
آنجاق بیر گون، گون اورتاغا چاغی دونیا اوچماغا باشلادی بالیغین باشینا، یومورتالار بیر- بیر سینیردیلار؛ بالاجا بالیغا تانیش گلمه ین قورخونج حئیوانلار چیخیردیلار دنیزه، بالاجا بالیق گؤزلرینه اینانا بیلمیردی، آغ یومرو داشلارین ایچیندن چیخان چیرکین حئیوانلار بالیغین بورنوندان گتیریردی آغ داشلارین یانیندا داددیغی آغ گونلری، یازیق بالیق گؤردوگو هر بیر شئیین ایچینده نه اولدوغونا فیکیرله شیردی. اوره یینده دئییردی: باشقا داشلارین ایچینده کیلر نه دیر؟ قوملارین ایچ بویاسی نه؟
دنیزده کی تپه لرین ایچی نئجه؟
بالیغین بئینینه جومموش بونلارا تای فیکیرلر، اونو دلی ائتمکده ایدیلر، هر بیر ساعات بیر ایل کئچیردی آغ بالیغا، گئجه یارییا چاتمیشدی، آی دنیزین دیبینی ائله ایشیقلاندیرمیشدی سانکی آی دا بالیغین ایچینده کی فیکیرلری بیلمک ایستیردی، پلمه آیین قاباغینی کسن همن، بالاجا بالیق یورغون گؤزلرینه دینجلیک وئرمه میش، اؤزگه لشمیش ساحیل قیراغی نین داشینی بیر یوللوق آتیب، لئی کیمی سیخدی دنیزین اوره یینه.
نوشته شده توسط admin در دوشنبه, ۲۹ مرداد ۱۳۹۷ ساعت ۹:۲۹ ق.ظ
