آللاه قدیم کیشی‌لره رحمت ائله‌سین
رقیه کبیری
آنادیلیمیز: اوزان بویورور، قاری‌لار دؤرد دورلودور: طولدورون توی، صولدورون سوی، بایاغی، دایاغی، دئدی استاد. کلاس همیشه‌کی واختدان گئج تعطیل اولدو. یوبانمیشام. تله‌سیرم. اوستادین ائوی بوروق-بوروق دربندلرین ایچینده. عنتیقه کوچه‌لرین دیبینده، اسکی بیر ائو. یئر تاپیب ائو آلیب، کیشی‌نین اوغلو – دئییرم. آددیم‌لاریمی بؤیوک گؤتورورم. قاچماسام دا، زمانلا ماراتونا گیرمیشم. هامی اوتورورب، کلاسدان قیراق سؤز-صحبته دوام ائدرکن، من قالخیب، کلاسی ترک ائتدیم. تؤوشه‌ییرم. خیابانین او بیری تایینا کئچه-کئچه هانسی جرگه‌ده اولدوغوما فیکیرله‌شیرم. او تایدان کئچن بیر تاکسی‌یه بارماغیم‌لا اشاره ائدیب، دئییرم:
»باغمئشه؟«
باغمئشه سؤزونون سس آهنگی عاغلیمدا تکرار اولان اوزان سؤزلرینین آهنگینه قاریشیر. الیمده دئییل. یاشادیغیم محله‌نین آدینی دیلیمه گتیرنده، طبیعتی ذهنیمده جانلاندیرماقدان علاوه، سس آهنگی خوشوما گلر. اصلینده منیم اوچون سؤزون اؤزو، معناسی بیر یانا، سس آهنگی ده بیر یانا.
تاکسی‌نین قاپیسین آچیب قاباق صندلده اوتورا-اوتورا، دؤرد جرگه‌نین آدینی خوشاگلیم بیر موسیقی کیمی ذهنیمده تکرار ائلیرم. »اوزان«ین بؤلدویو دؤرد جرگه‌نین سس آهنگ‌لری، منده خوش بیر حس یارادیب.
»طولدورن توی، صولدورون سوی، بایاغی، دایاغی… طولدورن توی، صولدورون سوی، بایاغی، دایاغی…«
–»باغمئشه‌نین هاراسی؟« سوروشور شوفر.
–»گول تپه.«
– »آللاه قدیم کیشی‌لره رحمت ائله‌سین، کولدن تپه‌جیک اولماز، دئییب‌لر.«
تعجبله»گول‌تپه«نی »کول‌تپه« ائشیدن شوفره ساری دؤنورم. ساری‌وزدی. نظریمه تانیش گلیر. سس آهنگی هئچ خوشوما گئتمیر. سسی خیشیلداییر. کول‌تپه اونون آغزیندان چیخاندا، دئیه‌سن بیر آغیز دولو کول پوفله‌نیر ذهنیمده سسله‌نن خوش آهنگلی سؤزلرین اوستونه.
–»آغا! کول تپه یوخ، گول تپه!«
– »آخیسروو! اسکی پامبیقدان بئز اولماز، بو دا سن دئدییین مثله آیری بیر تمثیلدی.«
دالی صندلده اوتوران بیر کیشی سسی‌ایدی. حزین بیر سس، تیترک اولسایدی دا، سؤزو ائله آهنگین دئدی کی، اؤزومو ساخلایا بیلمه‌ییب، دؤنوب شوفرین سؤزونه تمثیل دئین کیشی‌یه باخدیم. گؤروندویونه گؤره، دئیه‌سن شوفرله هم تانیشدی هم ده یاشید. آما قارا بیغ‌لاری بوغدایی ساچینا یاراشمیر. قارایلا بوغدایی رنگی سس همنوالیغینین ترسینه اونون سیماسیندا ضدیت یارادیب. بونونلا بئله باشا دوشمورم بو آدام کول، تپه و اسکی بئزی نئجه بیر-بیرینه یاراشدیریب، تمثیل دئییر.
ماشین‌لار آدام کیمی گئدیرلر؛ آددیم-آددیم. قاش قارالیب، ائوه گئج یئتیشمه‌ییمین هؤووشنه‌سی ایچیمی سیخیر. خیابانین ترافیکینده، ایکی-اوچ جرگه‌ده دوزولموش ماشین‌لارا باخاراق، خانیم‌لارین هانسی جرگه‌سیندن اولدوغوم عاغلیمدان چیخمیر. هؤووشنه‌مه بئله اوستون گلیر. تاریخ بویو خانیم‌لارا چوخ صفت‌لر نسبت وئریلیب. عرشه چیخاریب، گؤیده اوچوردوب، تانریچا صفتینی باغلاییبلار قانادلانمیش آدینا؛ یئره چیرپیب، ساتقین صفتینی دویونله‌ییب‌لر اَته‌یینه؛ یئرآلتی دونیاسینا گؤنده‌ریب، عجوزه صفتی ایله توک‌لریندن ایلان ساللاییب، سوپورگه‌نین بئلینه میندیریبلر. آما «اوزان» لاپ ائله یئر اوزونونده، گونده‌لییی یاشایان خانیم‌لاری دؤرد جرگه‌یه بؤلوب. نه گؤیدن آسلانیب، نه یئر آلتینا توخونوب.
«طولدورن توی، صولدورون سوی، بایاغی، دایاغی…»
سؤزلرین تک‌به‌تک اؤزلرینه گؤره اؤزل بیر معنا داشیدیق‌لارینا باخمایاراق، منه گؤره «بایاغی… دایاغی» سؤزلری بیر موسیقی‌نین هارمونیسی کیمی «طولدورون توی… صولدورون سوی» ملودیسینی تکمیل ائدیب، سونوندا خوشاگلیم بیر موسیقی کیمی ذهنیمده تکرار اولور.
طولدورون توی جرگه‌سیندن دئییلم. بونو قطعین بیلیرم. مجلیس دولدوران سیر-صیفتیم یوخدور. نه گؤزه‌گلیم گؤزللیییم وار، نه ده گؤزلری قاماشدیران گئیینیشیم. صولدورون سوی جرگه‌سی نئجه؟ فیکیرله‌شیرم. دانیشماق‌لا چوخ مسأله‌لری آرادان قالدیرماغا اینانیرام. دانیشیقدان قاچان دئییلم. آرا-سیرا یئری دوشنده دانیشارام.
ایش یئریمین آدی، شوفرین آغزیندان داش کیمی بوراخیلیر تاکسی‌نین ایچینه. فیکریم جرگه‌لردن چاشیر. گؤزوم ترافیکده، سایمازیانا اوتوروب، شوفرین خشلی سسینه قولاق وئریرم.
– «بیر قیزیم دؤهتوردی. هیندیستاندا درس اوخویوب. علوم آزمایشگاهی دؤهتورودی. پولوم اولمویاندا، زعفران گؤند‌رردیم بیله‌سینه؛ ساتیب، خرجینی تاپسین.»
یاغیش آستا-آستا تاکسی‌نین شوشه‌سینه چیله‌ییر. گؤز آلتی شوفره باخیرام. بو آدامی هاردا گؤرموشم، بیلمیرم.
یانی بو بیزیم آزمایشگاهدا ایشله‌ین هندوستانلی خانیم دؤهتور »سالکا«نین آتاسیدی؟ هله دوغما تورکجه دانیشماغی قالسین بیر یانا، هندوستانین شمالیننان جنوبونوجان فرقی وار شوفرینن خانیم دؤهتور سالکانین دری رنگینده.
شوفر آینادان اونا تمثیل دئین کیشی‌یه باخیب دئییر:– »آقای پنبه‌چییان! بی نوکریز ده وار، پرواز مهندیسیدی. دئیر آجان! وئلله بو تاکسینی. سن بو تاکسی‌ینان بیزیم باشمیزی دوست-دوشمن یانیندا یئره تیکیسن.«
–»آللاه غیرتیوی الیننن آلماسین آ خیسرو«
»اوزان« کیشی‌لره جرگه آییرماسا دا، بو شوفر دئیه‌سن »دایاغی« جرگه‌سیندنمیش. یاشا دولوب قوجالسا دا، هله ده ایشله‌ییر. دئدییینه گؤره ائوینین دیرک-دایاغی اؤزودور. اولادلارینا ال آچماییر.
– »اوتوز ایل کرخانادا توز یئدیم، جان قویدوم؛ بازنشست اولدوم، ائوده اوتوروب کئفه باخیم، آما آرواد منی اؤزونه خاناشاییرد ائله‌دی. چؤرح آل؛ چؤرح بوغازیمدان گئتمه‌میش سوغان آل، سود آل، دینجیمی آلمامیش یئرآلمامیز قورتولوب.«
– »سنی بیلمیرم، من بازنشست اولاننان بانک‌لاردا قبیض وئرن، قیسط وئرن اولموشام. آددیم‌لاری اؤشسم، بوستان‌آوادان اویانا کئچر!«
یاغیش شوشه‌نی ایسلادیب. شوفر شوشه‌سیلنین دویمه‌سینه باسیر. شوشهسیلیجینین نازیک قول‌لاری تاکسی‌نین قارنیندان ائشییه چیخیب، ساغ-سولا گلدی-گئدرده‌دیر. شوشهسیلیجینین حرکتی خوشوما گلیر. اونون هماهنگ حرکتی ایله ذهنیمده‌کی سؤزلر اویناییر.
»دایاغی، بایاغی…دایاغی، بایاغی…دایاغی، بایاغی«
شوفر دورمادان دانیشیر. دانیشمیر، سؤکور دئسم داها یاخجی اولار. هیندوستاندان باشلاییب، پروازدان، طیاره‌دن گلیب چاتیب آتاسینا. دال‌بادال دانیشدیغی ذوقوما توخونور. سؤزلرین سس بیرلشمه‌سینه دقت ائده بیلمیرم.
ترسه-ترسه شوفره باخیرام. بلکه مقید اولوب دانیشماغین کسدی. بیردن-بیره خاطیریمدا قالان بیر شئی گلیر گؤزومون قاباغینا. خاطیره‌دن بیلگی‌یه دؤنور. ایش یئریمده، همکاریم مینا ایله آتاسینین دئییشمه‌سی.
مینا میکروسکوپ باشیندا، آتاسی ایسه آزمایشگاهین گیرده، فیرلانان صندلینین دایاغینی قوجاقلامیش کیمی ایدی. لاپ ائله ایندی ماشینین فرمانین قوجاقلایان کیمی. قاپی دؤیمه‌میش ایچری گیرمیشدیم. آتاسینین اوردا اولدوغوندان خبریم یوخویدو. اونلارین احوالینی گؤرونجه، بیر آددیم گئتمه‌میش اتاقدان ائشییه چیخمیشدیم.بیر داها شوفره باخیرام. دئیه‌سن مینا اؤزودو. ساری‌وز، یاپبا بورنویلا لاپ ائله مینانین بورنوندان دوشوب بو شوفر. آما اصلینده مینا اونون بورنوندان دوشوب.آنام ائویمیزین دایاغیدی. اولماسایدی، بیزلر هاردان درس اوخویا بیلردیخ!
آجان وئردییی بئش-اون شاهینی جادوگرلر کیمی ائله بؤلوشدورردی کی، ایین-باشیمیزا، ائوین خرجینهآللاه اؤلننریزه رحمت ائله‌سین! رحمتدیخ دده‌م همیشه دئیردی، اَر آدام خاناشاییرد اولماغا دؤزمز. دئدیم گونده بیر-ایکی ساعت پارکا گئدیم. گئتدیم. شیلدن، فلجدن، قولو اَیریدن، باشی تیتره‌یندن…آنجاق دوز-عمللی آدام یوخیدی پارکدا. گؤردوم من بولارینان اوتورب-دورسام، ایکی گونده اؤلرم. دئدیم ائله گل بیر تاکسی آل، گونووو تاکسی‌یلا کئچیت؛ هم باشین قاریشسین، هم ده بئش-اون تومن الینی توتسون.«
–»آ خیسروو! آخی منیم یادیما گلننن سنین تاکسین وار. اولمویا من کیریخیرام؟ هه؟! دوز دئییرم؟ سن آ خیسروسان داا؟ یووو؟ کلبه جعور آنین اورتانجیل اوغلی.«
مسافرین خیسرو دئمه‌سی بئله خوشوما گلیر. سس اونون حنجره‌سینده یونتالانیب، آغزیندان ائشییه چیخیر. بم، ووقارلی، دوروشوقلو بیر سس‌دیر.
–»هه بابام… قاباخلار ایشله‌مزدیم کی، اوننان ایشه گئدیب گلردیم. حوصله‌م چحمزدی قیشین شَخته‌سینده، یایین جیزلاماسیندا چیخیب، خیابان باشیندا سرویس گؤزلویوم. ایندی ده خاناشاییردلیخدان قاچیب، بونا پناه گتیمیشم. بیر شئی چیخمیر کی، یالاننان چاققاچوق ائلیرم. یوخسا منیم روزومو آللاه آیری یئردن حواله ائلر.«
مینا ایچینی چکه-چکه دئمیشدی: »آجان ائوله‌نیب؛ بیلمیرم هانسی آلاشانین گیرینه کئچیب گئنه؛ بو اوچونجو صیغه‌سیدی.«
شوفر: »هله بیر قیزیم دا فوق لیسانس زبان فرانسه‌دی، وئرمیشم بیر استاد دانشگاها…«
مینا :»منه ضامین اولارسان؟ وام گؤتورورم. باجیمین دانشگاه شهریه‌سینه«
شوفر: »ایندی اوشاق‌لار آتا-آنا دوشمانیدی. بیر قاریش بویلاریینان من یئکه‌لیخدا کیشی‌یه یول اؤرگه‌دیللر…«
گئت-گئده شوفرین سس خیشیلتیسینا آرتیر. آقای پنبه‌چیان‌دان سس چیخمیر. تاکسیدن ائنمه‌میش، اونون آهنگین سسینی بیر ده ائشیتمه‌ییم گلیر.
باغمئشه‌یه چاتمیشیق. یاغیش هله ده چیسگین-چیسگین یاغیر. بلوارین اورتاسینداکی چیراق‌لارین ایشیغیندا هاشور چکیر هاوانین قارانلیغینا. شوشهسیلیجینین قول‌لاری دورمادان گلدی-گئدرده‌دیر. لاپ منیم عاغلیمدا اوینایان سؤزلر کیمی.
»بایاغی، دایاغی… بایاغی، دایاغی…«
گول تپه خیابانینین باشیندا تاکسیدن ائنیرم. میدانین ایچینده تپه-تپه ایسلانمیش مینا گول‌لری چیراق‌لارین ایشیغیندا ایشیلداییر. کرایه‌می شوفرین الینه وئرنده، ال‌لرین آغریماسین دئمیرم. »مینایا سلام یئتیرین!« – دئییب ائنیرم. آیاغیم آسفالتین چوخوروندا جومالانمیش سویا باتیر. باشماغیمین ایچینه سو دولور. آرخامدان باخان شوفرین باخیشینی گؤرمه‌ییم گلیر.
دؤنوب بیر ده تاکسی‌یه باخیرام. باخیشینی گؤره بیلمیرم. شوفر آیاغین گازا باساراق، کوچه‌میزین باشیندان اوزاقلاشیب. ائوه ساری گئدیرم؛ هانسی جرگه‌دن اولدوغومو دوشونورم. یوبانمیشام. ماراتون یاریشچیسی کیمی آددیم آتیرام. ائوه داها دا تئز یئتیشمه‌یه تله‌سیرم. بئش-اون دقیقه‌یه اَر آدامیم ایشدن دؤنه‌جک…
Arazazarbaijan.khanevdeh@gmail.com
نوشته شده توسط admin در شنبه, ۰۱ اردیبهشت ۱۳۹۷ ساعت ۱۲:۵۵ ب.ظ
