آذربایجان جوانلاری ایشسیزدیر
حاضیرلایان: اکبرسعادت
اوندا آتامین ایشی وارایدی
منه آلاردی چوخلو اویونجاق
ایندی بئکاردیر پولو یوخ آنجاق
ایش تاپسا منه باشماق آلاجاق
آنا دیلیمیز: باش سوز:آذربایجان یوخسولوق، فقیرلیق، ایشسیزلیق هله بوگونلرده توپلومسال( اجتماعی) سورونلارلا قارشی قارشیادیر.آذربایجان دا ایش مسئله سی بیر مبهم چالیشه تبدیل اولوب.مسئول لار دا بو مسئله دن چوخ راحت رد اولول لار.اما چاره نه دیر؟
بو آرادا کیمدیر گوناهکار …ایندی کی دوروم دا جوانلارین ان بویوک مشکلات لارین دان بیریسی همن بو ایشیسز لیق دیر.بیزیم اولکه ده (غربی آذربایجان دا)چوخلی پتانسیل لر وار..چوخلی استعداد لار مکتب لریمیز ده گورونور.اما ندنسه اونلار گوزه گلمیر.
دانشگاهلاریمیزین چوخالماسی اولکه یه بویوک ضررلر آرتیر دی.آنجاق هرکس بیر آینا داراق تحصیل ائله دی ایندی جامعه ده ایش آختاریر.بو آرادا یاش دا یاندی قورونون اودونا.
اوجسوز بوجاقسیز و توکنمز ثروتلرین صاحبی اولان “آذربایجان” نعمت لر ایچریسینده اولدوغو حالدا محرومیت لر پنجه سینده ازیلیب تحقیر اولونور. بو گونلرده دولت باشچییلری، آذربایجانین مجلیسده اولان نماینده لری، وزیرلر قورولو، جمهور باشقانی باشچیلیقینده اورمودا توپلانیب، آذربایجاندا گئدن اقتصادی و سیاسی پروسسی گوزدن گئچیرجه ک و ینئی تدبیرلر آلیناجاق دیر. آذربایجان اقتصادی دئمک اولارکی چوخ آغیر و چتین گونلرین گچیدیر. اونا گوره ده ، هر گچن گون بیراز داها گری قالیب اولکه سیرالاماسیندا چوخ گریلره انیبدیر. بو وضیعت سون گون و آیلاردا اوزینی دگیشیک بیچیملرده گوستریبدیر. بو یوزدن دولت آداملارینین توپلانماسی ، آذربایجان خلقینین اوز اراده سیله بیرلشمه سه و یا آذربایجان خلقینین حقلی ایستکلرینه قولاق ورمه سه بیر سونوچ ورمه یه جه ک و مسئللر داهادا درینله شه جک دیر.
آذربایجان ،تاریخین چوخ چتین گونلرین یاشیر . بیر طرفدن وکونومیسی، کولتور یاپیسی داغیلماقتا دیگر طرفتن سیاسی فعالیتلر تاپتالانیپ، کولتور اوجاقلاری باغلانیبب روزنامه لر و درگیلرین یازارلاری و آیدین لر گوز آلتینه آلینیب .. بو خشونت هاواسی اسن اورتامدا ، تهران دان گلن هیئت آذربایجانین باشقا شهرلرینده ، اوز یانداشلاری ایله گوروش آپاراجاق ، گل دییب ، گل ائشیده جک لر. آذربایجانین اساس مسئللری گینه گوز آردی قالاجاق و یا دیله گتیریلیب، بیر نچه گوندن سونرا یادان چیخاجاق ،سان کی هیچ بیر شی اولمامیش کیمی قالدیغی یردن دوام ادجاقدیر. آذربایجانین مسئله سی ۱۳۲۴ ده نه ایسه بو گون ده اودور، مسئله لر و ایستکلر فرقه نین مشهور ۱۲ شهریور بیان نامه سینده هم فارس دیلینده، هم ده تورک دیلینده یازیلمیشدیر. بو ایستکلر دگیشممیش، او گون آذربایجان اوز اداره سینی ایستیردی بو گون ده ایسیر . او گون اوینانان اویونلارلا آلدلتیلیب یورولموشسا ، بو گون ده گیدرک یورولماختادیر. آذربایجانلی آرتیخ بیلیر کی دالی قالمیشلیق، یوخسولوق، باشی چیینینده ایش تاپماق اوچون باشقا یرلری اسیر کیمی دولاشماق، آیریمجیلیق(تبعیض) ، پیس و چرکین سوزلر ائشیتمه ک، سویوش کیمی باخیشلار گورمک اونون قدری دئییل. اونون اوچون دونن چالیش لر نه ایسه ،بو گون ده اودور.
بونون یگانه چیخیش یولی دئیشمه دیر. یاپیسال( ساختار) دئیشمه، اداری رفورم و خلقین اراده سینه دایاق سیاسی اشتراک دیر. بونا هیچ کسین اعتراضی یوخدور بو استقامت ده ، بیریکن سرمایه، تکنیک ایش ، علمی فعالیتلر ، تهرانا و یا دیگر یرلره قاچماختادیر. هر زمان هرکسین دیلینده اولان بیر سوز وار . آذربایجانلیلار بوتون ایرانی آلیبلار ! تهران بازاری، اقتصادی فعالیتلر، اوردو منسوبلاری و دانشگاه استادلاری و دیگر آلانلار تورک لرله دولوبدور. بو سوزلر دوغرودور. بوتون ایشلر ، اشاقیدان یوخاریه آذربایجان ایشچیسی ایله اداره اولونور. فقط بو وضعیت آذربایجان میلتینی چوخ دا راضی سالمیر . آذربایجان دا بویوک حادثه لر جریان آلیر. بیر چوخ حقسیزلیقلار یاشانیر. بولارین هامیسینی بوردا یازماغ ممکن دئییلدیر.
یالقیز بونا اکتفا اولونورکی آذربایجان آغیر اقتصادی، اجتماعی(توپلومسال) کولتور و سیاسی بحران لا قارشی قارشیادیر. بو وضیعت دقته آلینماسا بحران گون به گون آرتیراجاق و کنترل ائدیلمه سی زورلاشاجاقدیر. آذربایجان دا ، ناگوار حادثه لرین قاباغینین آلینماسی اوچون اقتصادی ایستکلرین اهمیتی چوخدور. بونون یانیندا سیاسی پلاتفورمون گئنیشلمسی و دموکراسی نین یاییلماسی گرکلیدیر. اقتصادی فعالیت لرده بعضی آلان لاراونجه لیک داشیر.
بیرینجیسی بیلگی و خبر آخیشی ساغلامالی و بو استقامت ده اعتراض اسناسینده توتوخلانانلار ، گوزتیم آلتینا آلینانلار آزاد اولونمالی و آذربایجان دا باریش هواسی اسملیدیر.بو وضعیت نتیجه سینده ، چالیشما اورتامی حاضیرلانیر بولگه و اولکه گلیشمه سی حیز قازانیر. آذربایجان دا ایش آلانلاری خصوصیله توریسمه مناسب یرلر اورتایا چیخاریلمالی، اورمو دنیزی(گولی) سراب ایسی سولاری، تاریخی یرلر ، قارا کلیسا، کلیبر، بابک قلعه سی و دیگر یرلر خصوصی سرمایه باشچیلیغینده گلیشملی، هتل،خسته خانا و تداوی مرکزلری قورولمالیدیر. سایدیغیمیز یرلر تداوی توریسمی اوچون ال وریشلی یئرلی و خاریجی توریسلردن بویوک ایلگی گورجک یای و قیش آذربایجانین قارلی داغلاری و ایسی سولاری و ییلاقلاری بو ایشلره چوخ مناسیبدیر. آذربایجانین بویوک شانسی سینیر( مرز) اوته سینده یاشیان سویداشلاری و دیل بیرلیغی دیر. بو دوقرولتودا سینیر بازارلاری( بازار های مرزی) قورولابیلیر. بو بازارلاردا هیچ بیر چتینلیک گورولمز. بو فعالیت لر دیل بیرلیگی ، کولتور یاخینلیغی، دوسلوق و قارداشلیغی گلیشدیریر و اقتصادی گلیشمه یه یاردیم ادر. یوخاریدا آذربایجان جمهوریتی، نخجوان خود مختاریتی و باتی ده( غرب) ترکیه جمهوریتی وطن داشلاری و یاتیریمجیلاری( سرمایه گذاران) آنلاشمالی اولاراخ آذربایجانا و آذربایجان لیلاردا او اولکه لره گلیش گئدیش ایله سه لر اقتصاد جانلانیر ، آلیش وریش امکانلاری آرتار، قورولان بازارلاردا اصتیحصال اولان مالار و ینیلیکلر گوستریلیر. آخیر سوز دئمه ک اولار کی، آذربایجان هم اقتصادی هم ده سیاسی جهتدن بویوک بحران ایچینده دیر. بو بحران گیدرک گنیشلیر، بونا گوره آذربایجان قیسا مدت ده بویوک سورونلارلا قارشی قارشیا قالاجاق.
آذربایجان جوانلاری ایشسیزدیر، بئکار دیر، بحران ایچنده سیاسی و اجتماعی مسئله لری واردیر. اگر تئزلیکله بیر چاره تاپیلماسا باشقا مسئله لر ده اورتیا چیخاجاقدیر. جوانلار چالیشلرین دیله گتیرمک اوچون آزاد تریبون ایستییر. توتماق، ورماق، زندان، بهتان، افترا و اصیلسیز بیانات ورماق، مسئله نی داها دا چتینلشتیریر. راحت و خطرسیز یول آذربایجان میلتینین یولونو آچماق و اولارین ایستکلرینه قولاق آسماق دیر. آذربایجان میلتی اوز اوزونو اداره ائتمک اوچون بوتون فاکتورلارا صاحیبدیر. بونون یانیندا آذربایجان جماعتی ایران دا یاشیان باشقا جماعاتلارله دوسلوق و قارداشلیق ایچینده بیر آرادا یاشاماق ایستیر، بو استقامت ده بوتون خلقلرین حق و حقوقونا سایغیلیدیر، اونا گوره ده اوز حق وحقوقونا سایغی و حرمت ایستیر.
نوشته شده توسط admin در دوشنبه, ۲۵ خرداد ۱۳۹۴ ساعت ۴:۳۶ ق.ظ
