یاسلی ساوالان
اکبرسعادت
بابالاردان بیزه قالمیش بو مثل هاممی بیلیر
سو گلن آرخا دئییبلر یئنه بیرگون سو گلر
فلکین داش اورگین آه اوخو آخیردا دلر
“بارز” اوغلوندا یئتر سئودیگی یاره او زامان
آی یاغان باشینا غملر اودو، یاسلی ساوالان
آنا دیلیمیز: آذربایجان چاغداش مدنیتی باسیلماز بیر قالا دیرکی هئچ توفان، سئل اونا صدمه- یئتیره بیلمه‌ییب و یئتیره بیلمه‌یه جکدیر. بوقالانی آذربایجان ادبییات و مدنتینی یارادانلار، شاهلیق رژیمی نین بوغونتولو و سیخیتی‌لی دوورونده قورخماییب، سوسماییب و شئعردن بیر قالا تیکیب لر
آذربایجان ادبیاتیندا اوز حماسی روحلو غزل‌لریله و لیریک قوشمالاریلا تانینان قاراداغ شاعری اوستاد عباس بارز ۱۲۹۸نجی گونش ایلینده قاراداغ ماحالی‌نین “آی پیرزان” کندینده دونیایا گوز آچمیش و گنج یاشلاریندان ادبیاتا خصوصیله فارس و آذربایجان دیلینده شعر یازماغا باشلامیشدیر.
بویا باشا یئتندن سونرا آتاسی شیخ الاسلام میرزه جعفرین مکتبینده دینی، حوزه وی و میللی مکتبلرین باشا ووردو. نئجه شئعره آلیشدیغینی اوزو بئلنچیک دیل.ینه گتیریر؛ »منیم شاعیر اولماغیما بیر جان یاندیران داستان سبب¬دیر. آتامین عمواوغلانلاریندان بیریسی ایکینجی بین¬الخالق سویّه¬سینده اوز وئرن دویوشدن سونرا گنجه¬دن ایرانا ساری گلمه¬یه مجبور اولدو. او اوزیلن ایکی قیز گتیرمیشدی، اونلار جولفادان تبریزه گلیب بیزده بو خبری ائشیدن چاغی رحمتلیک آتام و بویوک قارداشیم اونلاری قوناق گتیرمک اوچون تبریزه ساری یولا دوشدوک. او قیزلارین بیریسی دوققوز یاشیندا و بیریسی یئددی یاشیندا ایدی، ایلک گوروشده بو دوققوز یاشیندا قیزین عشقی و محبتی منی مفتون ائله¬دی و جانیما بیر یانار اود سالدی کی ایندیده آلوولاری اوره ییمده گورسه¬نیر. منیم او زامان اون¬دورد یاشیم وارایدی، من اونا بیر اور¬ک وئررکن، او منه مین اور¬ک وئردی، محبت هر ایکی طرفدن گوجلویدیر، من اونونلا ائولنمک ایسته¬ییردیم آمما منیم آداملاریم بو ایشه راضی اولمادیلار، بئله سی بیر یانار اورک¬له بئش ایلدن آرتیق، عومرومون گنج چاغلارین گئچیردیم. او یادلاردا قالان ایللرده من بئله بیر گوجلو عشقیلن شاعیر اولدوم.«
ایلک گونلرین مهجورو و ایندینین بارزی بیرینجی شئعرین اون آلتی یاشیندا یازیر. بو اولایدان سونرا اوز عمی قیزیسینه(خدیجه خانیما) اورک باغلاییر، بیر اوغول و بیر قیز آتاسی اولور. آما یازیقلار اولسون فلک بو سئوگی یه ده ماجال وئرمه ییر و شاعیر بوتون عومور بویو بو ایتگی نی اوزیله داشییر. سونرالا ایندی کی حایات یولداشی فاطیمه آذر خانیمیلا سئوگی یوواسین باغلاییر ، قیام ایسلامی وبابک ایسلامی کیمین شاعیر بالالار ائلیمیزه پای وئریر. اونوتمامیش دئمه لی ییم کی ایلک حیات یولداشیندان اولان مسعود اسلامی دا اوز آتاسینین یولون گئدنلردن اولور و گوزل گوزل یازیلار یازیر.۱۳۴۰-جی ایلده اویرتمنلییه باشلاییر و اوتوز ایلدن سونرا بو ایشده تقاعدلیک مقامینا چاتیر.
»آتاسی¬نین علمی، ادبی و تاریخی اثرلری ۱۳۲۰- جی گونش ایلی، ایکینجی بین¬الخالق محاربه¬سی، شهریورین اوچونده اوروس قوشونو ایرانا کئچنده یاندیریلیب.
بو اولایین تاییدا ۱۳۵۷جی ایلده تیکرار اولوب، آتاسینین باشینا گلن، بالاسینین باشینادا گلیب. همین زامان بارزین ییرمی مین بیت شعری محو اولوب کی اوزو دئییر؛ شاه زامانی قویلامیشدیم و بیر زامان چیخارداندا گوردوم نؤیود دامجی¬لارینین آلتیندا چورویوب و یالنیز اپریمیش کاغاذ الیمه گلدی.«، “کاغیذلاری چیخارتیدق گوردوک نوقطه لری گؤز یئکه لیکده اولوب داها اوخونمور”.
” گلهای رنگارنگ” ایلک کیتابینین آدی دیر. ائل دایاغینا سلام(۱۳۴۶){بو کیتاب بارز اوزو دئمیشکن ۱۳۳۳جو گونش ایلینده یازیلمیشدیر و حیدربابایا یازیلان ایلک نظیره دیر}، ۱۰جیلدیلیک ساتیریک شئعرلری(مؤسسه مطبوعاتی یزدانی تبریز)، قیزیل قوش۱۳۵۷ و ۱۳۷۹جو ایلده یاسلی ساوالان بارزین یاییلمیش کیتابلاریدیر. آی آشیقلار یاسا گلین، چوبان قارداش، ساری¬داش، شئیور پوییماسی، بایاتی¬لار، ساری و سوسن داستانی و… کیمی کیتابلار بارزین هله یاییلمامیش کیتابلارینین آدیدیر. بارز حضرتلری بیزدن آیریلسادا اونون اثرلری بیزه اورک وئره جکدیر. اونون غزللری و باشقا ائل داغینا سلام کیمی منظومه لری قالارغی یادگار دیر. بارزین ادبی فعالیتی بیر آندا اولسون دایانمیر و شعر اونون حیاتی‌نین آیریلماز حصه‌سینه چئوریلیر. آنجاق ۱۳ ایل سونرا ۱۳۴۶نجی ایلده ایشیق اوزو گورور. ۵۰نجی ایللرده عباس بارزین “یاسلی ساوالان”شعری دیللر ازبری اولور، بو شعرله یاناشی باشقا سعرلری کاسئت‌لر واسطه‌سیله خالق ایچینه یاییلیر و بیر چوخ شعرلری آذربایجان عاشیقلاری‌نین سازیندا نغمه‌لشیر. ۱۳۵۷نجی ایل بیر سیرا شعرلرینی احتوا ائدن “قیزیل قوش” عنوانلی کتابی ایشیق اوزو گورور و دیللر ازبری اولان “یاسلی ساوالان” شعری بیر سیرا دیگر شعرلریله برابر ۱۳۷۹نجی ایلده کتاب شکلینده یاییلیر.
تاسوفله اوستاد بارزین هله‌ده چاپ اولمامیش بیر چوخ اثرلری قالیر. اونلارین بیر سیراسی کتاب شکلینده حاضرلانیب، هله‌لیک هانکی بیر زاماندا ایشیق اوزو گوره‌جگی معلوم دئییل. او جمله‌دن: “آی عاشیقلار یاسا گلین”، “چوبان قارداش”، “ساری داش”، “شئیور پوئه‌ماسی”، “بایاتی لار”، “ساری و سوسن داستانی”
سئویملی ائل شاعیری و آذربایجانین پارلاق اولدوزلاریندان اولان ، اوستاد عباس اسلامی ( بارز ) ، ( ۱۳۹۰ هـ ش)، چرشنبه آخشامی ، آبان آیی نین ییرمی دوردونده کی او گون غدیر بایرامی ایله مصادف ایدیر، اهر شهرستانیندا، اوز ائوینده دونیادان گوز یومدو.
روحو شاد اولسون.
نوشته شده توسط admin در شنبه, ۱۹ دی ۱۳۹۴ ساعت ۱۱:۱۲ ق.ظ
