هِیوا

داود_پیرعلیلو
آنادیلیمیز:بالابگیم! قادان آلیم قوناق ایسته‌میرسن؟
بونو دییه- دییه گلیر. بالابگیم بالدیزینین سسینی ائشیدجک کورسودن دوروب ائوین قاپیسینی آچاندا گؤردو بالدیزی‌دیر، همان بالدیز کی بالابگیمی قارداشینا تیکه توتموشدو. اؤپوش، گؤروش، گئچیب کورسوده اوتوروب دئدی:
– آی بالابگیم هاوا چوخ سویوقدور، ایندی ایستی چای یامان یاپیشار، منه بیر ایستی چای تؤک ایچیم.
بالابگیم بالدیزینا تئز بیر چای وئردی، باشلادیلار گئچنلردن دانیشماغا. صحبت یامان شیرین گلیردی، بالابگیم- ین اوغلو بابک، شیرین- شیرین قولاق آسیر. سؤز سؤزو گئتیریر آرشین بئزی.
سؤز گلدی چاتدی بالابگیم- ین آناسی هِیوانین قایناناسیندان قالان خاطره‌یه. باشلادی حاجی لِیلگین خاطره‌سینی دئمگه. بابک ایکی قولاق دا بورج ائیلییب قولاق آسیر. خاطره قورتولاندان سونرا بابک دئدی:– آنا همان آغاج گؤره‌سن قالیر؟ حاجی لِیلکلر گؤره‌سن دیریدیلر؟
بالابگیم دئدی:– بالا بیلمیرم کی. نئچه ایل بوندان قاباق بیر دفعه کنده گئدیب گؤردوم. اوندان بو یانا بیلمیرم اؤلوبلر قالیبلار،آغاج قالیر یا یوخ.بابک دئدی:– آنا منه بیر سؤز وئررسن؟
بالابگیم دئدی:– نه سؤزو اوغول؟!
بابک دئدی:– آنا منی کندینیزه آپاراسان باهم گئدک هم سیزین کندی گؤروم هم ده ائویزی. بلکه حاجی لِیلک ده دیری اولدو، اونو دا اوردا گؤردوک.بالابگیم دئدی:– انشالله، سؤز وئریرم یایدا سنی ده گؤتوروب کندیمیزه آپارام. هم ده آنا- آتاما بیر فاتحه وئررم. ائویمیزه ده بیر باش ووراریق، بیلمیرم ایندی اوچوب یا قالیر. حتما ده کی صاحبسیز یئر اوچوب داغیلار، اورا دا اوچوب داغیلیبدیر ایندی.
او گئجه بابک-ه چوخ خوش گئچدی.
بابک او گئجه‌دن هی حاجی لِیلکلره فکرلشیردی. بابک هم درس اوخویور، هم ده آتاسینا- آناسینا ایشلرینده یاردیم ائدیر. آتا- آناسینی چوخ- چوخ ایسته‌ییر. ائله اولوب کی، هر کیم اوشاغینا نصیحت وئرنده بابک-ی مثال وورورلار، اوشاقلارینا دییرلر “اودو با، بابک کیمی بیر اوغول اولون، هم درسینی یاخشی اوخویور هم ده آتا- آناسینا بؤیوک بیر یاردیمجی اولوب”.بابک آناسینین غریب اولدوغونا گؤره، هم او آنایا قیز اولوب، هم اوغول اولوب، هم یولداش اولوب.قیش فصلی باشا چاتدی. بایرام آیی گلدی. بابک داوارلاری اؤزو اوتاریر. داواری چؤله آپاراندا بیر کتاب دا اؤزو ایله گؤتورور. داوار اوتلایاندا او دا کتاب اوخویور. یازدیر، هر یئر گول- چیچگه بورونوب.
داغلارا باخیرسان، سانکی یاشیل گئییم اَیینلرینه گئییبلر. بابک ده داورای یاییب کنده گیرن یئرده بیر یاماجین اتگینه اوتاریر . اؤزو ده بیر کتاب الینده اونا باخیر. اوزاقدان گؤردو دومان- توزون ایچینده بیر آرابا گلیر. اوندا دا آرابا چوخ آز ایدی. پیکان ماشینی دا لاپ تازا چیخمیشدی. او آرابا گلیب بابکین برینده ساخلاییب، بابکدن آتاسی آلماس‌ین ائوینی سوروشدولار. بابک اگیلیب آرابانین ایچینه بیر گؤز سالدی، گؤردو بیر گؤزل خانیم، ایکی اوشاق یانیندا او آرابادا اوتوروب . آرابانی سورن آدامدان سوروشدو:– آلماس ایله نه ایشینیز وار دیر؟آرابانین دال صندلینده اوتوران خانیم دئدی:– آی قارداش تانییرسان یا یوخ؟
بابک دئدی:– آلماس منیم آتامدیر، خانیمی دا بالابگیم-دیر، او دا منیم آنام.
بئله‌ده او خانیم تَلَسیک سئوینجک آرابادان ائنیب، بابک-ین آیاقدان باشینا بیر سای سالیب، بیردن بابکین بوینونو قوجاقلاییب آغلایا- آغلایا سئوینجک دئدی:– سن بالابگیم‌ین اوغلوسان؟
بابک مات قالا دئدی:– هن، من اونون اوغلویام!
خانیم بیردن گؤزلرینی سیلیب دئدی:– من سنین باجینام، من ده بالابگیم‌ین قیزیام.
بابک باجیسینی تانییب، گؤزلری دولدو، دئدی:
– بیلدیم منیم باجیمسان! چون منی باغرینا باساندا دئدیم بس، آنام باغرینا باسدی!
بابک بیلیردی ایکی باجیسی واردیر، چون آناسی اونلارین گوزَم آرخالیقلارینی کی، او زمان توخوموشدو صاندیقی و بیر صاندیقدا ساخلامیشدی، هله ده هر دن خلوت ائدنده، صاندیغین باشینا گئدیب او آرخالیقلاری چیخاردیب باغرینا باسیب اوخشاییب آغلایاردی.بابک سئوینجک ائولرینی اوزاقدان باجیسینا گؤستریب، دییر:– اورا بیزیم ائویمیزدیر. سیز گئدین ائوه، من ده داوارلاری ییغیب گلیم.
باجیسی او آرابانین کرایه سینی چیخاردیب اوردا وئردی. وسایللرینی گؤتوروب آراباچینی یولا سالیب گئتدی. بابک داوارلاری بیر یئره ییغییب باجیسی و اوشاقلار ایله کنده گلدیلر. آناسی اوزاقدان بابکی گؤروب دئدی:
– اوغول بوگون داواری نیه تئز گتیرمیسن، قویایدین اوتلاسینلار، تئزدیر آخی.
بابک آناسینی اوجادان چاغیریب دییر:– آنا! آی آنا! سنه بیر دورنا گتیرمیشم! اونا گؤره تئز گلدیم دئدیم دورنا داریخار.
آناسی یاواش- یاواش بابکه یاخینلاشیب گؤردو بیر خانیم، یانیندا دا ایکی گؤزل قیز، اوشاغی بابک ایله دانیشا- دانیشا، گوله- گوله گلیر. اوزاقدان دئدی:– بابک اونلار کیمدیر؟
بابک دئدی:– آنا دئدیم کی دورنا گتیرمیشم!
آناسی یاخینلاشاندا، قیزی اؤزونو آناسینین قوجاغینا سالدی. سانکی ایکی یاغینتی بولودو بیر- بیرینه چاتیب،سوواشدی آناسینین قوینونا. آناسی نئچه ایللر ایدی گؤرمه‌میشدی اما بالاسینی تانییب باغرینا باسدی. بیر- بیرینه اوردا یئتیشدیلر…
سوواشدی آناسینین قوینونا. آناسی نئچه ایللر ایدی گؤرمه‌میشدی اما بالاسینی تانییب باغرینا باسدی. بیر- بیرینه اوردا یئتیشدیلر…
او گون، بالابگیمه بیر گؤزل، مقدس گون ایدی. بیلمیردی نه ائیله‌سین، نه دئسین.
بابکین ده کی، سئوینجکدن چیچگی چاتلاییر. او گئجه، بالابگیم دونیایا یئنیدن دوغولموشدو. بالاسی ایله، نوه‌لری ایله سحره کیمی دانیشیب، دییب، گولدولر. بیر طرفدن ده کی، قیزی درس اوخویوب معلّم اولموشدو، اونا دا لاپ سئوینیردی.یاز دا قورتاردی، یای گلدی. بابک آناسینا دئدی:– آنا منه بیر سؤز وئرمیسن، یادیندادیر؟
آناسی دئدی: نه سؤزو اوغول؟
بابک دئدی:– آنا چیلله گئجه‌سی نه دئدین منه؟ گئدک سیزین کندینیزه.بابک اونلار باخا باخا گئدیردی بیردن گؤردو ایکی حاجی لِیلک بالاسی آغاجدان دوشوب یئره بیر دنه کؤپک ایسته‌ییر او بالالاری آپاریب یئسین. اونا گؤره آتا آنالاری آغاجین اوستونده قرارسیزلیق ائدیرلر. بابک قاچیب او بالالاری کؤپگین الیندن قورتاریب، باخدی گؤردو بیرینین ده قیچی سینیبدیر. تئز جورابینی چیخاردیب قیچی سینانین قیچینی باغلاییب، بیر توربایا سالیب، ایسته‌دی چیخاردا آغاجین اوستونه قویا یووالارینا.
اما آناسی قویمور آغاجا چیخسین، آغاج چوخ اوجادیر، آناسی قورخور اوردان دوشوب بیر زاد اولار. بابک ال چیکمیر، قاچیب قاپیلارین بیرینی دؤیوب بیر نردبان آلیب گتیریر. نردبانی آغاجا دایاییر، توربانی آتیب چینینه آغاجا چخارتدی. مین مصیبت ایله او بالالاری یووالارینا یئتریب، آغاجدان ائندی. ائنمک نه ائنمک! داها بالابگیم- ین اوره‌گینده یاغ قالماییب، رنگی اولوب آغ آپباغ. ائله کی بابک یئره ائنیب گلدی، بیر درین نفس چکیب، دئدی، “الهی مصلحتینه چوخ شکر، بالاما بیر زاد اولمادی، سلامت او آغاجدان ائنیب گلدی”.بابک بیردن دئدی:– آنا هله دئ گؤرک سیزین ائوینیز هانسیدیر؟آناسی دئدی اوغول ائله بیر ایش گؤردون کی ائو ده منیم یادیمدان چیخمیشدی، اوزوم ده. باخ! او آغاجین دیبینده‌کی خرابه‌لیق ائو بیزیم ائویمیزدیر.بابک ایله آناسی او اوچوق حیطده دولانیردیلار،گؤردولر بیر قوجا قادین، عصا الینده گلدی بونلاردان سوروشدو کی:– بالا سیز کیمسیز؟ بوردا نه ائدیرسیز؟