فرويدانسان پسيخولوژيسينين استروکتورو حاقّيندا
فلسفی دوشونجهلر
کؤچورن و چئویرن: حمید بخشمند
آنادیلیمیز:»شعور نهدیر؟« سوآلینا بئله جاواب وئرمک اولار: بیلدیییمیزی بیلمک.
یعنی من بیر شئیی دوشوننده و اونو دوشونمهده اولدوغومو بیلنده پروسس شعوردا بیلینجده گئدیر.آنجاق انسانین ایچ دونیاسیندا روحوندا ائله سوْراقلار، اوْبرازلار، ایستکلر چاغیریشلار دا وار کی، انسان شعورونون اونلاردان خبری یوخدور.
قروید ثبوت ائدیر کی، اونلارین بیر چوخو بیلینجآلتیندا دورور، اونا گؤره ده شعور اونلاری بیلمیر.
بس شعورآلتی نئجه یارانیر؟فرویدا گؤره کؤرپهلیکدن بیزده لیبیدو، یعنی حظّ آلماق ایستهیی گوجلو اولور.
اؤزو ده بو حظّ آلماق ایستهیی بیر چوخ حاللاردا یاساق ائدیلمیش شئیلره یؤنهلیر.
بونون سببی اودور کی، انسانا یاساغی پوْزوب قاداغان ائدیلمیش شئیلری الده ائتمک آیریجا لذّت وئریر. اونا گؤره ده مثل وار: قاداغان ائدیلمیش مئیوهلر لذّتلی اولور.
بو سببدن ده لیبیدو تئز – تئز انسانی یا اورهیینده، یا دا ائتدییینده بعضی اخلاق قایدالارینی پوْزماغا زوْرونلاییر. آنجاق، آخی انسان ائتدییی و یا دوشونوب ایستهدییی عاییبین عاییبلیغینی یاخشی بیلیر.
شعورون دا بئله بیر خاصیّتی وار، بیر شئیی اؤزونده عاییب ساییرسا، پیس، دؤزولمز ساییرسا، بیر آز کئچیر اونو اونودور.
دوْغرودان دا، کیمسه باش وئرمیش فاجیعهنی اونوتماسا، یا دَلی اولور، یا دا اوزولوب اؤلر.
بس عاییبلی، پیس شئیلری اونوتماق نه دئمکدیر؟ فرویدا گؤره، اونوتماق شعور آیدینلیغیندان، شعور ایشیغیندان، سیخیشدیریب چیخارماقدیر. بیلینج اونا اذیّت وئرن، اونو اوتاندیران شئیلری سیخیشدیریب اؤزوندن چیخاریر.
بس سیخیشدیریب هارا آتیر؟ سؤزسوز، انسان بدنیندن قیراغا یوخ. عاییب، آغریلی دوشونجهلر پیس ایستکلر بیلینجدن سیخیشدیریلیب چیخاریلاندا روحون ایشیقلی بؤلگهسیندن قارانلیق بؤلگهسینه، – بیلینجآلتینا دوشور.
شعوردان سیخیشدیریلانلار شعورآلتینا ییغیلیر.بیلینجآلتی قارانلیق بیر عالمدیر، جهنّمدیر، چونکی بورادا پیس، عاییبلی، سالدیرقان (تجاووزکار) ایستکلر، جانآتیملار توپلانیب. بوتون بو ایستکلر شوپنهاورین کور و کار گوج اولوب قایناشان دونیا ایستهمینه چوخ اوخشاییر.
فرویدا گؤره، بیلینجآلتیندا دهشتلی پسیخی انرژی توپلانیر.
بیلینجده اولانلار آچیق – آیدین ایشلهنیر، ایشلهییر، اونا گؤره ده اؤز پسیخیکی انرژیلرینی اصراف ائدیب بوشالدیرلار.
بیلینجآلتیندا اولانلار ایسه چیخیب ایشلنمهدیکجه پسیخی انرژیلرینی ساخلاییرلار. پسیخی انرژینین ییغیلیب آرتماسی ایسه او درجهیه چاتا بیلر کی، آخیردا ووروب بوتون معنویّاتی دارماداغین ائدن قورخونج، قارانلیق گوج اولار.
اونا گؤره ده شعور آلتیندا اولانلار شعورا دوشوب اورادا ایشلمهیه، اونلاری قوورولدان انرژیدن یاخالارینی قورتارماغا جان آتیرلار. آنجاق ایش اوندادیر کی، شعورلا شعورآلتی (یعنی »من« ایله »او«) آراسیندا گؤزتچی قاراوولچو، سنزور کیمی اوست من دورور. او ائله بیل انسانین ایچینده توپلومون گؤزودورهدهلهییجی بارماغیدیر.
اوست من بیلینجآلتیندان چیخان عاییب – عاییب ایستکلری، اوبرازلاری آغزیندان ووروب گئری قایتاریر.
اونا گؤره ده ییغیلمیش انرژیسیندن آزاد اولماق ایستهین بیلینجآلتی ایستکلرین بیر علاجی قالیر، اوست منی آلدادان اَیین – باشا، دونا گیریب شعورا کئچمک.
زیگموند فروید بیلینجآلتیندا اولانلارین اؤز انرژیلرینی ایشلتمک اوچون، بئلهجه، دونلارینی دییشیب اوزه چیخارماسینا، گئرچکمهسینه سوبلیماسیون دئییر.
او بئله حساب ائدیر کی، صنعتکارلارین اثرلرینده اونلارین بیلینجآلتی ایستکلری اوبرازلاری سوبلیمه اولونور. فرویدا گؤره فانتزیالار، خیاللار و بیر چوخ یوخولار سوبلیماسیونون تؤرهمهلریدیر.
نوشته شده توسط admin در شنبه, ۱۹ مهر ۱۳۹۳ ساعت ۷:۰۷ ق.ظ