غدیرخم
غدیر دینج بیر گؤل اولا‌راق کاروان‌لارین دینجلمه‌سی اوچون مناسب بیر یئر ساییلیردی.تاریخ بو کیچیک گؤلو درین بیر دنیزه چئویردی و امامت مراجعتینی بوتون دونیایا یایدی. امامت و رهبرلیک مقامی بؤیوک بیر حادثه‌ده غدیر وادی‌سینده علی(ع) وئریلدی و بو اوزدن بو آد تاریخده ابدیلشدی.
۱۰-جو هجری ایلی‌نین ذیحجه آیی‌نین ۱۸-ده حجدن قاییدان کاروان پیغمبرین امری ایله دایاندی و جماعت غدیرده توپلاشدیلار. هامی بیر بیرینه باخیردی و سوروشوردو: نه حادثه باش وئریب؟ پیغمبرین نه ایشی وار؟ پیغمبر هوندور بیر یئره چیخیب علی(ع)-ی مولا و اؤزونه جانشین آدلاندیردی و علی (ع) تبریک‌لره جواب وئره‌رک پیغمبرین وارثی سئچیلدی.
غدیر گونونو بایرام کیمی قئیده آلماق اسلام دونیاسی‌نین عنعنه‌لرین‌دندیر و شیعه‌لره حصر اولونمور. تاریخه استناداً پیغمبرین یاشادیغی زاماندان بو گون مسلمانلار اوچون بؤیوک بایرام ساییلیب و پیغمبر اهل بئیتی اونو قوروموشلار. بؤیوک اسلام عالیمی ابوریحان بیرونی آثار الباقیه کتابیندا یازیب: غدیر بایرامی اسلامین دقت مرکزینده اولان بایرام‌لارداندیر.
مشهور سوننو شخصیت‌لردن اولان طلحه شافعی¬ده بو باره‌ده سؤیله‌ییب: بو گون پیغمبر(ص)، علی(ع) ولایت مقامینا چاتدیردیغینا گؤره بایرام اولموشدور.
غدیر واقعه‌سی او قدر مشهوردور کی، چوخلو تاریخچی‌لرین دقتینی جلب ائتمیشدیر.
علامه امینی شیعه عالملرین‌دن علاوه سوننو عالم‌لرین باره‌سینده اعتبارلی سؤزلرینی ۳۶۰ سند کیمی الغدیر کتابیندا توپلامیش‌دیر.
غدیرین نئچه جهت‌دن اهمیتی وار. بو جهت‌لرین بیری علی(ع)- ین میثیل‌سیز فضیلت‌لری و امتیازلارینا دقت یئتیرمکدیر. غدیر وادی‌سینده بو ماجرانی مشاهده ائدنلرین چوخو یاخیندان علی‌نین فضیلت‌لری ایله تانیش ایدی‌لر و بیلیردی‌لر کی، او ان اوستون شجاعت، ایمان سداقت و عدالت‌سئورلیک خصوصیت‌لرینه مالک اولدوغونا گؤره رهبرلیک اوچون ان مناسب سئچیم‌دیر.
مسلمان عالم ابن ابی الحدید بیر تاریخچی‌دن نقل ائدیر کی، پیغمبر (ص)، علی(ع)-آ بویورموشدور: اگر بوندان قورخماسایدیم کی عیسی¬نین طرفدارلاری‌نین عیسی حاقیندا دانیشان سؤزلری جماعت، سنین باره¬نده ده دئیه‌جک‌لر سنینله علاقه‌دار بیر سؤز دئیه¬ردیم کی، هر یئردن کئچنده جماعت سنین آیاغی‌نین تورپاغینی موبا‌رک سایسینلار.
قوران کریمده ده علی(ع)- ین فضیلت‌لری عزیزلنیب. شیعه و سوننو تفسیرچی‌لرین برابر نظری اولان علی(ع)- ین شأنینده¬کی آیه‌لردن بیری مائده سوره‌سی‌نین ۵۵-جی آیه‌سی‌دیر. بو آیه‌ده اوخویوروق: اولسون کی سیزین ولی¬نیز الله و اونون پیغمبری ایمان گتیریب رکوع حالیندا صدقه وئرنلردیلر.
بو آیه مباهله و تطهیر آیه‌لری کیمی هامی‌سی پیغمبر اهلی بئیتی و اونلارین باشیندا علی(ع) ین یوکسک مقامینی و ولی کیمی تقدیم اولونما‌لارینی گؤستریر.ابوذر غفاری دئمیش‌دیر: پیغمبر علی‌نین رکوع حالیندا اوزوگونو دیلنچییه باغیشلاماسیندان خبردار اولدوقدان سونرا بویوردو: ایلاهی قارداشیم موسی سندن ایسته‌دی کی، ایشلری اونا آسانلاش‌دیراسان و اونون سؤزلرینی خالقا دوشون‌دوره‌سن . او ایسته‌دی کی، قارداشی هارونو اونا وزیر و یاردیمچی ائده‌سن. ایلاهی! من محمد، سنین پیغمبرین و سئچیلمیشینم . منیم ایشلریمی آسانلاشدیر و علی¬نی منه وزیر ائت کی، آرخام اولسون. پیغمبرین دعاسی سونا چاتمامیش‌دیر کی جبراییل نازیل اولوب مائده سوره‌سی‌نین ۵۵-جی آیه‌سینی اونا چاتدیرمیشدیر.
اصلینده غدیرین ان اهمیت‌لی جهتی علی(ع) این ولایتی و رهبرلیگی‌دیر.
اسلام اجتماعیتینده ولایت آللاها و پیغمبره عاییددیر . بونا گؤره ده علی (ع)- ی ولایت مقامینا چاتدیرماق اونون یوکسک موقعینی گؤستریر.
ایران اسلام رئسپوبلیکاسی‌نین رهبری حضرت آیت العظمی خامنه ای نین تعبیرینجه: غدیرین درین فلسفه‌سی و اولو پیغمبرین موبا‌رک الی ایله علی(ع)- ین رهبرلیک مقامینا تعیین ائدیلمه‌سی بو ایدی کی انسانلارین تربیه‌سی ایله بوتون یئر کوره‌سینده عدالته اساسلانمیش سعادتلی بیر اجتماعیتی تشکیل ائدیلسین . بوتون ایلاهی پیغمبرلرین سئچیلمه‌سینه مقصد انسانین تربییه‌سی اولموشدور و سونونجو پیغمبر بو حرکتی داوام ائتدیریب ابدیلشدیرمک اوچون امیر المؤمنینی اؤزونه جانشین تعیین ائتدی کی، بشر ائمه نین واسطه‌سی ایله تدریجاً تربییه ائدیلسین و بشر اجتماعیتی حقیقی یاشاییش نقطه‌سینه چاتا بیلسین.
بونا گؤره ده اجتماعیتین ولی‌سی اولماق ایسته‌ین شخصین اؤزو پاک انسانی دگرلره مالک اولما‌لی‌دیر. عدالتلی اولماق ولایتین ضرورتلریندندیر. اگر اجتماعیتین رهبری آیری-سئچی‌لیک و ظلمه یول وئررسه ولایت مقامی اوندان آلینما‌لی‌دیر. باشقا سؤزله اسلامدا ولایت سؤزو و پرهیزکار شجاعت‌لی اؤزونو اله آلان و مدرک انسانلارین حاکمیتی معناسیندا‌دیر. رهبر او شخص‌دیر کی، اجتماعیتین اساس سیاست‌لرینی اسلام پرینسیپلرینه اساسلاندیرا بیلسین.
ایشلرده اینکیشافا نائل اولان مرکب مسئله‌لرله اوزلشنده اونا مراجعت لازم‌دیر کی، عدالته اساسلانماقلا پروبلئم‌لر حل ائدیلسین . علی (ع) بو خصوصیت‌لره مالیک اولا‌راق الله طرفیندن ولایته سئچیلمیشدیر.
بئله لیکله غدیرین موضوعسو اعتقاد اوچون بیر باشلانغیج ساییلیر. قوران کریمین مائده سوره‌سی‌نین ۳-جو آیه‌سینده اوخویوروق: بو گون کافرلر سیزین دینیزی یاییندیرماقدان اومیدسیز اولوبلار، بو گون سیزین دینیزی کامیللشدیردیم، نعمتی سیزه کامللشدیردیم و سئوینیرم کی، اسلام سیزین آیینیز اولسون. امام رضا(ع) غدیرین اهمیتی باره‌سینده بویوروب: آللاها آند اولسون کی، اگر انسان‌لار غدیر گونونون دگری ایله تانیش اولسا‌لار ملک‌لر هر گون ۱۰ دفعه اونلارلا ال وئرردیلر.
نوشته شده توسط admin در چهارشنبه, ۰۱ آبان ۱۳۹۲ ساعت ۷:۵۱ ق.ظ
