توی پایی
فاطمه_خوشاخلاق
آنادیلیمیز:معدهمه صابون چکیپ حیطده اوتورموشدوم. آنامی گوزلوردوم. آتا-آنام قَردشیمین توی بازارلیغینا گئتمیشدیلر. آنام منه یاغلی بیر توی پایی سوزونو وئرمیشدی.آخشام قاش قَرالان وقت گلدیلر.گلمک همان نَنَم (آتامین آناسی) قاوالی گوتوروپ باشلادی چالیب اوخوماغا:»ای گولی ریحان،ریحان بیچَرم من/ داماد یولوندا جاندان گئچرم من…..«
آنام یاخین قثهوم- قونشولاری چاغیرمیشدی »خونچا باخدئ«یا. ائوده ائله سس وار ایدی کی،آدم اوز سسینی ائشیتمیردی. ائله بیل قَرهچی کوچون سو آپاریر!آنام، گلین وسایلینی دوشهدی اوتاغا کی، قوناقلار باخسینلار. قوناقلار دا دقّتلی باخیب کیمیسی آغزینی بوزوردی، کیمیسینین ده گوزلری ایشیقلانیردی. سونرا وقت یئتیشدی توی پایلارینی پایلاماغا.آنام،”بویور بو سیزین!” ، “آل بو دا سنین!”، “آزیمیزی چوخ حسابلیین!”… دیییپ، توی پایلارینی پای بولوش ائیلهدی. اما منیم پاییمدان خبر چیخمادی! دوزنمهدیم دئدیم:
-به هانی منیم پاییم؟!ننَم گوله-گوله دئدی:
-مَلهمیهنه سوت یوخدی بالا!آنام تئز منه باخیپ دئدی:-گور سنه نه آلمیشام قیزیم؟!سونرا گلین دونونا بَنزر بیر دون وئردی منه باشماغی، تئل گولی اوستونده. من اوغلان سایاغی بیر قیز ایدیم. همیشه بلوز شلوار،کُت شلوار گییَردیم اگنیمه. دون ا?تک سئومزدیم.هاییمی آتدیم باشیما دئدیم:
-بو نهدیر آلمیسان؟! من دون زاد ایستهمیرم! ائله یاغلی توی پایین بو ایدی؟!هر نه قدر آنام و قوناقلار دئدیلر کی:»بالا چوخ قشنگدی اللّه ساغلیغیوا قسمت ائلهسین.گییی ا?گنیوه گور نئجه اولورسان!«اما من قبول ائلمهدیم.آنام حرصلنیپ دئدی:گوروسوز سیز اللّه؟! بو قیز آدمی اودسوز اوجاغسیز یاندیریر!خلاصه توی گونی آتام ایله گئتدیم بازارا اوزومه بیر دست کُت شلوار آلدیم! اما آنام تویدا زور ایله دونی گییدیردی ا?گنیمه، دئدی:-گئت آینادا باخ گور نئجه گویچک اولدون!
قاچدیم آینادا باخدیم اوزومه، نئچه دقیقه مات قالدیم. سونرا اوز اوزومه دئدیم:-من بئله گوزل ایدیم؟!!!!
نوشته شده توسط admin در دوشنبه, ۱۵ آذر ۱۴۰۰ ساعت ۹:۰۶ ق.ظ