بایرامدا اورمونون تاریخی آبیده لرینه باش چکه ک
جمعه مسجدی
بو تاریخی مسجد اورمو شهرینین بازارینین یانیندا یئر آلیر.
بو دگرلی آبیده هجری قمری یئددینجی عصره عائددیر و اونون باش تاقلاری و محرابی اؤزونه مخصوص و موغول حکومتینین یوردوموزدا یاپدیغی اونودولماز اثرلردن بیری دیر.
بو تاریخی آبیده ده کئچمیشلرده اورمونون جمعه نمازلاری قیلیندیغینا گؤره جمعه مسجدی آدلاندیریلیبدی. کئچنلرده اؤز دگرینی بیر سیرا باخیمسیزلیقلار نتیجه سینده الدن وئریردیرسه ده، آما ایندی لیکده بیر سیرا اطرافیندا آبادلاشدیرما ایشلری نتیجه سینده گئتدیکجه گؤزللیگینی الده ائدیب گؤرنلری حیران ائدیر.
دوققوز پله بوزلاغی
بو بوزلاق آدی عینی اولان محله ده یئرآلیبدیر. دوققوز پله آبیده سی قاجار دورونده تیکیلیبدیر . کئچمیشلرده بورادا حاضرلانان بوزلاری ایستی چاغلاردا چیخاردیب ایشله درمیشلر.
ایندی لیکده غربی آذربایجانین کولتورل ارثلر اداره سی یئنی دن انشا ائتمک ایشلرینی آپاریر.
سردار مسجدی
غلامخان راستاسی ایله اوزبه اوز اولان بو مکان اورمونون ان قدیم مسجدلریندن بیری دیر. بو مسجد کرپیجله ایشله نیب و اسکی ستونلارا مالکدیر. قاجار دورونده تیکیلن بو بینانی عظیم السلطنه(شهید سردار) انشا ائدیبدیر.
۱۳۳۱-جی هجری قمری ایلینده بو مسجدین اوستونه بیر بؤیوک ساعات قوراشدیریلدی . بو سببدن ده اونا ساعاتلی مسجدده دئیه رلر.
اورمو بازاری
اورمو شهرینین مرکزی بؤلمه لرینده یئرآلان بو تاریخی بازار، صفویه دؤورونده انشا ائدیلیب سونرالار افشارلار و قاجارلارین واسطه سی ایله یئنی دن برپا ائدیلیب و تیکینتی ایشلری اوستونده آپاریلیب.
اؤزونه مخصوص معمارلیقلا، یایلاردا سرین بیر هاوا بو بازارین ایچینده اورادا اولانلارین اوره کلرین سرینله دیر.
نئچه نئچه راستاسی وار و مختلف گئییم یئمک، خالی و موکت، قیزیل، قاب قاشیق و … بو بازاردا ساتیلیر و نئچه یوز ایلدیر کی اورمونون تجارت مرکزی ساییلیر.
نوشته شده توسط admin در سه شنبه, ۲۷ اسفند ۱۳۹۲ ساعت ۵:۴۸ ق.ظ
