آغاینان نوکر

بیری وار ایدی، بیری یوخ ایدی، اوچ قارداش بیر باجی وار ایدی. قارداشلار سوداگرلیک ائلردیلر. بیر گون بونلار سوداگرلیگه گئتدیلر. قیز دا دویو آریتلاییردی کی خورک بیشیرسین. گؤردو یئرده بیر گؤی مونجوق وار. گؤتوردو بو گؤی مونجوغو قویدو آغزینا. نئجه اولدوسا اؤزونو اونوتدو، بیردن گؤی مونجوغو اوددو. بیر مدّت کئچندن سونرا، بو قیز گؤردو حامله¬دی. او ساعات باشا دوشدو کی، هر نه انگل اولدوسا همین گؤی مونجوقدان اولدو. بیلمه¬دی نئیله¬سین.
بونو بوردا قویوم، سیزه کیمدن خبر وئریم … قیزین قارداشلاریندان. قارداشلار سودالارینی قورتاریب ائوه دؤندولر، گؤردولر کی باجیلارینین قارنی شیشیب، لاپ آغزینا دگیر. باجیلارینا دئدیلر:
- باجی، دوزون دئگینن، بو نه ایشدی؟
قیز نه قَدَر آند ایچدی، قارداشلاری اینانماییب دئدیلر:
– یالان دئییرسن!
بؤیوک قارداش کیچیک قارداشینی چاغیریب دئدی:
- آپار، بو چپلی اؤلدور! بیزی بی ناموس ائله¬ییب، پاپاغیمیزی یئره سوخدو.
بالاجا قارداش قیزی گؤتوروب چیخدی بیر مئشه¬نین کنارینا، ایسته¬دی قیزی اؤلدورسون، قیز آغلایا-آغلایا دئدی:
- قارداش، منیم گوناهیما باتیب ناحاق قان ائله¬مه! من هئچ بیر کیشی خئیلاغی گؤرمه¬میشم. آنجاق دویو آریتلایاندا بیر گؤی مونجوق تاپیب آغزیما آتدیم، بیلمه¬دیم اوددوم، هر نه اولدوسا، او گؤی مونجوقدان اولدو.
اوغلانین قیزا یازیغی گلیب دئدی:
- باجی، باش گؤتور قاچ بو ماحالدان.
قیز آغلایا-آغلایا قارداشیندان آیریلدی. آز گئتدی، چوخ گئتدی، بیر بیابانا چیخدی. گؤردو بوردا بیر قالاچا وار. گیردی بو قالاچایا. گؤردو بورادا دویو، یاغ، هر نه دئسن وار، آنجاق هئچ بیر انسان اثری یوخدو. قیز فیکیرلشدی، دئدی:
- هر نه ایسه بو ائوین صاحبی وار. هارا گئدیبسه، قاییداجاق.
او ساعات قیز قوللارینی چیرماییب اوجاغی قالادی، بیر قازان خورک بیشیردی، قویدو دمه اؤزو ده گیزلندی. ائله کی، آخشام اولدو، قیز گؤردو بودو، ناهموار بیر دیو گلدی، قاپینی آچدی، گیردی ایچری. باخدی، گؤردو نه؟ ائو سیلینیب، سوپورولوب، چیچک کیمی تمیزلنیب. خورک حاضرلانیب، قازان دا دمه قویولوب. دیو چوخ شاد اولوب های ووردو:
- هر کیمسن چیخ، سننن ایشیم یوخدو.
قیز خلوت یئردن چیخدی. دیو گؤردو، پاهو بو بیر قیزدی کی، یئمه، ایچمه خطّ خالینا، گول جمالینا تاماشا ائله. دیو قیزا دئدی:
– قیز، سن بوردا نه گزیرسن؟
قیز باشینا گلن احوالاتی دیوه سؤیله¬دی.
دیو دئدی:
- نئینک، هر نه دئسن بورادا وار. سن اول منیم باجیم، من ده اولوم سنین قارداشین. سن اوتورارسان بوردا، من هر گون گئدرم، اوولارام قوشلارام، گتیره¬رم دولاناریق.
قیز چوخ شاد اولوب خؤره¬گی چکدی سوفره¬یه دوزدو، یئدیلر. سوفره¬نی قیز ییغیشدیردی. دیو بیر طرفده، قیز دا بیر طرفده یاتیب صاباحی آچدیلار. بئله کی، هر گون دیو گئدیب اوولاییردی، قوشلاییردی، یئییب، ایچیب باجی-قارداش کیمی دولانیردیلار. بیر مدّت بئله دولاندیلار، قیزین وعده¬سی تامام اولدو، بیر اوغلان دوغدو، آدینی قویدولار گؤی مونجوق. بلی، گؤی مونجوق بیر یاشیندان بئش یاشینا، بئش یاشیندان اون یاشینا چاتدی، پهلوان کیمی بیر اوغلان اولدو. قاباغینا نه بویدا بؤیوک آغاج گلسه، قوپاریب کنارا توللایاردی. دیو بونو هر گون اؤزو ایله اووا آپاراردی. جیراندان، مارالدان اوولاییب یئنه گلیردیلر ائولرینه.
بونلار بورادا قالسین، سیزه کیمدن خبر وئریم بو قیزین قارداشلاریندان. بونلار یئنه ده سودایا گئتمیشدیلر. اوستلرینه حرامی دوشوب، وار-یوخلارینی اللریندن آلدی. بونلار قالدیلار لات-لوت. قارداشلارین هره¬سی بیر ایشه گئتدی. کیچیک قارداش اؤز-اؤزونه دئدی:
- گئدیم، باجیمی آختاریم.
او یئردن کی، قیزی اؤتورموشدو، اوز قویدو قیز گئدن طرفه، گزه گزه گئدیب چیخدی همین قالاچایا کی، باجیسی اوردایدی. ایچری گیردی گؤردو باجیسی خورک حاضرلاییر. باجیسی اونو گؤرن کیمی تانیدی، بوینونو قوجاقلاییب دئدی:
- آی قارداش، سن خوش گلمیسن. نه عجب؟
قارداشی بوتون احوالاتی باجیسینا ناغیل ائله¬دی. قیز دا باشینا گلنلری قارداشینا دانیشدی. بو صحبتده ایکن دیوله گؤی مونجوق اوودان گلدیلر. گؤی مونجوق آناسیندان سوروشدو.
- آنا، بو کیمدی؟
آناسی دئدی:
- بالا، بو همین کیچیک داییندی کی، منی اؤلدورمه¬دی، بوراخدی. بونلار تزه¬دن اؤپوشدولر، گؤروشدولر، گئجه¬نی شادلیقلا کئچیردیلر.
سحر قارداش-باجی قالدی ائوده، دیوله گؤی مونجوق گئتدی اووا. بیر مدّت بئله کئچدی آخیردا اوغلان فیکیرلشدی کی: “نه واختا قَدَر من بوردا قالاجاغام؟. گرک گئدم اؤزومه بیر ایش تاپام”. ایسته¬دی گئتسین، باجیسی دئدی:
- دایان، گؤی مونجوقلا دیو گلسین، گؤروش سونرا گئدرسن.
بلی، ائله کی آخشام اولدو، چؤله گئدنلر گلیب چیخدی. قیز احوالاتی اونلارا ناغیل ائله¬دی دیوله گؤی مونجوق نه قَدَر یالواردیلار، اونو اگلندیرمک ایسته¬دیلر، اوغلان راضی اولمادی. آخیردا گؤی مونجوق دئدی:
- دایی، ایندی کی گئدیرسن، نباده، گؤی گؤز ساری ساققال کیشییه نوکر اولاسان.
باشیندان بیر توک چکیب وئردی، دئدی:
- نه واخت دارا دوشسن، بو توکو آت اوجاغا او ساعات حاضر اولارام. او گئجه¬نی کئچیردیلر سحر گؤی مونجوغنان دیو اووا گئتدی.
قیزین قارداشی دا اوز قویدو گون چیخانا. او قَدَر گئتدی کی آخیردا چیخدی بیر شهره. گؤردو بیر گؤی گؤز، ساری ساققال کیشی چیغیریر:
– آی نوکر اولان، آی نوکر اولان!
اوغلان دئدی:
- من اولارام.
کیشی دئدی:
- بالا، اوندا گل، گئدک ائوه.
گئتدیلر ائوه. چؤره¬کدن-زاددان یئییب یاتدیلار. سحر تئزدن کیشی اونو دورغوزوب دئدی:
- دی دور، ایشه گئده¬جکسن. آنجاق سنینله بیر شرطیم وار، گرک ایتیم هاردا دورسا، توخومو اورا سپه¬سن. اؤکوزوم هاردا دوردو اورانی اکه¬سن. قاتیغی یارالاما، چؤره¬گی پارالاما دوغرا دویونجا یئ
اوغلان دوردو، اؤکوزلری بویوندوروقلاری توخومو، خیشی دا گؤتوروب چیخدی ایشه. اؤکوزلر دوز گئدیب دوردولار بیر کوللوقدا. ایت ده گئدیب دوردو چایین اورتاسیندا. اوغلان قالدی معطل. فیکیر ائله¬دی کی، کوللوق یئری اکمک اولماز، توخومو دا سویا سپمک اولماز. علاجی کسیلیب گئری قاییتدی. کیشی گؤردو بودو اوغلان قاییدیب، دئدی:
- نیه قاییتدین؟
اوغلان دئدی:
- اؤکوز گئتدی دوردو کوللوقدا، ایت ده دوردو چایین لاپ اورتاسیندا، اورالاری دا اکمک اولماز. اونون اوچون قاییتدیم.
کیشی دئدی:
- منیم شرطیم شرطدی، گرک اکه¬یدین.
کیشی اوغلانی سوپورله¬ییب ایسته¬دی باشینی کسسین. اوغلان تئز گؤی مونجوق وئردیگی توکو آتدی اوجاغا. توک یانینجا کیشی اوغلانین باشینی کسدی. گؤی مونجوق اوندا یئتیشیب گؤردو کی داییسینی کیشی اؤلدوروب. تا بیر سؤز دئمه¬دی. کیشی باخیب گؤردو، یانیندا بیر جاوان اوغلان دایانیب، دئدی:
- بالا، نه قوللوغون وار؟
گؤی مونجوق دئدی:
- عمی، نوکر اولاجاغام.
کیشی دئدی:
- نئینک، ائله منه نوکر لازمدی. آنجاق منیم بیر نئچه شرطیم وار، گرک قبول ائله¬یه¬سن. یئرینه یئتیرمه¬سن، سنی اؤلدوره¬جگم.