دیلیمیزی اؤیرنیب اؤیرتمه لییک

دیلیمیزی اؤیرنیب اؤیرتمه لییک

حاضیرلایان:اکبر سعادت
آنادیلیمیز:بیز واریق وارسا وطن وارایسه دوغما دیلیمیز
اؤیره نیب بیلمه لیدیراؤز دیلینی تورک ائلیمیز
آنا دیلده آنانین سئوگیسی عطری دادی وار
آنا دیلده وطنین شانلی شرفلی آدی وار…
ایلک اونجه دئمه لیییک دیلین اینسانلار آراسیندا ایلیشگی آراجی اولاراق باشلیجا رولو واردیر.دئمک اولار دیلین ایلکین بلکه ده ان اونملی گوروی ائله بودور.اما بعضی لرینین دئدییی و دوشوندویو کیمی،ایلگی قورماق دیلین بیرجک گؤروی دیرمی؟ بئله دیرسه دیل تئلئفون، مکتوب یا بونلارکیمی بیر شئی دیرمی؟ بئله بیر گوروشلری ایرلی سوروب دیلی بیر آراج سوییه سینه دک آلچالدانلارین آماجلاری نه اولا بیلر؟ بونلارین یالنیز اوزل بیر دیله و یا دیللره باخیشلاری بئله دیر، یوخسا بوتون دیللری یالنیزجا ایلگی آراجی کیمی دیرلندیریرلر؟
بو کیمی فیکیرلری اورتایا قویانلار یا آسیمیله حالیندا اولان، تاپدالانمیش و وارلیقلاری تالانمیش اولوسلارا باغلی اولان مانقورتلاشمیش اینسانلار اولور یا دا اونلارین ترسینه، باشقالارینی اوز کولتورلرینده اریتمه یه، وارلیقلارینی تالاماغا، دیللرینی باشقالارینا تحمیل ائتمه یه چالیشان دوولتلر، اولوسلار و یاخود کیمسه لر اولورلار. قویون دریسینه گیرمیش بو جاناوار باسقینچیلار،آسیمیله ائتمه سینه چالیشدیقلاری اولوسون دانیشدیغی دیلین یارارسیز و ننه- بابالارینا عایید اولمایان بیر دئییم، هم ده تحمیل اولموش، یابانجی بیر دیل کیمی گوسترمه یه چالیشیرلار ( البته اونودمامالیییق بابالاریمیز ” آغاجی اوز ایچیندن قورد یئیر ” دئمیشلر. یئرلی ساتقینلار دا بونلارا قاتیلیب دستک اولورلار ). بونلار گاهدان دا مذهبی توپلوملاردا دینی اورتایا قویوب دیلینی و کیملییینی قوروماق ایسته ینلره سویچولوق دامغاسی وورورلار. دین دونونو گئیمیش بو دینسیزلر، سوزده اینسانلارین تن اولدوغونو دئسه لر ده، دئدیکلری سوزه هئچ اینانمادان اوزلرینی باشقالاریندان باش، باشقالارینی ایسه آلچاق سانیرلار. اونلار، اینسانلار آراسیندا باریش دوستلوق و برابرلیک ایسته ین دینی، فاشیستی و شیطان سال آماجلاری و ایستکلری اوغروندا قوللانیرلار. دینی بئله قوللانانلار دونیانین چئشیدلی یئرلرینده، دییشیک دینلرینده و موختلیف چاغلاردا گورونوب، گورونمک ده دیرلر. بو سوزلری یازدیقدا دین و دیلله ایلگیلی اولان بیر سوزو یا داها دوغروسونو دئسک بیر آتا سوزونو آنیرام. ” دیلینی دانان دینینی دانار” دوغرودان دا بئله دیر. دیلینی دانان وارلیغینا یییه اولماز. منجه دیلی و ائلی سئومه یه هئچ بیر اولچو و چرچیوه یوخدور. بو سئوگی دینله یاسایا قارشی دئییل. وارلیغینی سئویب، قوروماق ایسته ین ده سویچو دئییل. اوزونو آیریلاریندان اوستون بیلیب،باشقالارینی آشاغیلاییب خور باخان اینسانلارا بو سوز داها اویغون دور دیل هر کیمسه نین و هر بیر اولوسون ان بویوک وارلیقلاریندان یوخ، بلکه ان بویوک وارلیغی و بیر توپلوم و اوندا یاشایان کیمسه لرین کولتور و کیملییینین تملی دیر. بئله لیکله هر اولکه ده اولان دیل و دئییملری او اولکه نین و حتا بوتون دونیانین معنوی یاتیریمی سایساق هئچ ده یانیلمامیشیق.
کولتورون سویدان- سویا ان اونملی داشیییجیسی دیلدیر و بیر اولوسون دیلی اونودولوب آرادان گئدیرسه او دیلسیز اولوسون ایلگیسی کئچن نسیللرله قیریلاجاق و بو اولوس کولتورسوز اولوسا چئوریله جک. کولتورسوز اولوس ایسه کیملیک سیز بیر اولوس اولاجاق. بئله لیکله دئمه لیییک، هر بیر کیمسه و اولوسون دیلینی اوندان آلماقلا یاخود اوزو دیلینی دانیب آتماقلا، اونون کیملییی پوزولور و کسینلیکله دئمه لیییک : دیلین اولمه سی ائلین اولمه سی دیر. روس بیلگین و پئداقوقو ” اوشینسکی ” دئییر:
بیر اولوسون اوزگورلویونو اوندان آلیب،شهرلرینی اوچوروب، یوردوندان سورگون ائتسه لر ده، او اولوس اؤلمه یجک.اما آنا دیلینی اوندان آلماقلا قیسا بیر زاماندا محو اولماغا اوغرایاجاق.دیل جانلی دیر و زامان- زامان دییشیلمکده دیر. هر دیل زامان سوره سینده دوغال بیر گئدیشده باشقا دیللردن ائتگی له نیر ( اوزللیکله قونشو دیللردن). بو پروسئس دیلین موکمل لشمه سینه و گلیشمه سینه یاردیم ائده بیلر. آما بو آخیم دیلین قورولوشونو ائتگی له دییی زامان داها بیر فاجیعه باش وئریر. بونو دا بیلمه لیییک کی، بو کیمی اولایلار بوتون زامان و یئرلرده دوغال بیر اولای اولا بیلمز. بلکه بیر چوخ زامان لار، اوزللیکله سون یوز ایلده بعضی اولوسلار و دوولتلر ساواشی و یوروشو یارارسیز گوردوکده، اوز دیل و کولتورلرینی باشقا اولوسلارا تحمیل ائدیرلر. بونلار داها ژئوپلوتیکی سینیرلاری یوخ، کولتورل سینیرلاری الده ائتمه یه چالیشیرلار.ماراقلی دیر کی، بعضی دوولتلر ده سینیرلاریندا اولان دیل و حتی دئییم لردن بیریسینه هر تورلو یاردیم ائدرک باشقا ائل و اولوسلارین دیلینی و کولتورونو آرادان قالدیرماغا چالیشیرلار. داها دا ماراقلیسی بو کی، یوخاریدا سویله دیییمیز کیمی، بعضی دوشونجه سیز و آنلاقسیز کیمسه لر ده یارینی بوگوندن اودوزورلار. اونلار” بو گون ده اولماسا یارین اریییب گئتمه لیییک ” دئییب، دوشونمزجه سینه تحمیل اولان دیل وکولتورون قارشیسیندا قولایجاسینا باش ائندیریرلر. یعنی اوزلری کونوللو اولاراق یا هئچ بیلمه دن آسیمیلاسیون پروسئسینین گئدیشینه یاردیم ائدیرلر.
بو گون بیر بیتگی، حئیوان و حتی بیر بوجه یین نسیلینین آرادان گئتمه سیندن و اونا نئجه قارشی دورماقدان سوز گئدیر. اما نه یازیق کی، هر گون دونیانین بیر بوجاغیندا نئچه دئییم و دیلین اولومونه تانیق ( شاهید ) اولوروق. دئیلنلره گوره گلن ایللرده دونیانین بوتون دیللری آرادان گئدیب، یالنیزجا بارماقلارین ساییسیندان آز اولان نئچه دیل قالاجاق. یعنی دونیادا اولان ۳۰۰۰ دیل محو اولماق تهلوکه سینده دیر. بیلدیییمیز کیمی هر دیلین وحتی دئییمین آرادان قالدیریلماسی ایله بشرین وارلیغینین بیر بولومو محو اولور. ائله بو اوزدن ده اونا قارشی دورماق گرکلی دیر.
اما بو آرادا باشلیجا بیر سورو تورنیر. دیلی کیم و یا کیملر و نئجه قورومالیدیرلار؟ بو سورونون یانیتیندا دئمه لیییک : هر کیمسه، ائل و اولوس اوز دیلینه یییه اولوب، اونو قورومالی دیر.بونونلا یاناشی هر دوولت بیر بورج اولاراق ان آزیندان سینیرلاریندا یئرله شن بوتون ائل و اولوسلارین دئییم و دیللرینی هر تور اولورسا قورویوب، ساخلامالی دیر. هم ده بو گون دیلی قوروماق اوچون هر اولوسون یازیلی ادبیاتی دا اولمالی دیر. بو یازیلی ادبیات اوخولون بیرینجی سیراسیندان سون صینیفینا دک ائله جه ده بیلیم اوجاقلاریندا اوخونولمالی دیر. یوخسا زامان سوره سینده چئشیدلی ندنلره گوره دیل آرادان گئدجک.
دین و قوتسال کیتابین آچیسیندان دا باخماق ایسته سک، دیلین اونمی و اونون قوروماغینین نه قدر اونملی اولدوغونا گوره اولو تانریمیز گویسل کیتابیمیز قرآن- کریم ده روم سوره سینین ۲۲- جی آیت ینده اینسانلارین چئشیدلی دیللرله دانیشدیغی و دییشیک ائللردن و ائتنوسلاردان اولدوغونو یئر و گویه تای اوز ایز و گوسترگه لریندن بیریسی بیلدیریر. بئله لیکله دیلی آرادان گوتورمک ایسته ین، تانرینین یئر اوزونده اولان ایزینی محو ائتمه یه چالیشیر. یوخاریدا سؤیله نیلن آیته اساسلاناراق بیر جومله ده دئمه لی ییک: دیل دوشمنی، دین دوشمنی دیر.
منجه شوونیزم گوزلویو گوزلردن گوتورولورسه و اینسانلارین هانسی ائلدن اولوب،هانسی دیلده دانیشدیغینا باخمایاراق،تن اولدوقلارینی اینانساق، دیللره ده بشرین معنوی وارلیغی و تانرینین گوسترگه سی کیمی باخساق، بوتون دیللر بیزه گوزل اولوب باریش و دوستلوق دونیادا حوکم سورجک.
اما سون سوز اولاراق دئمه لیییک:وارلیغیمیزی ( دیلیمیز، یوردوموز، تاریخیمیز، کیملیییمیز، کولتوروموز، اویقاریمیز و… ) قوروماق اوچون، دیلیمیزی قورومالیییق، دیلیمیزی ده قوروماق اوچون اونو دوزگون و موکمل اویرنیب، اویرتمه لیییک.

نوشته شده توسط admin در شنبه, ۰۸ آذر ۱۳۹۳ ساعت ۷:۴۳ ق.ظ

دیدگاه


− یک = 1