داغلار ییخیلیب دره‌لر دولاجاق

داغلار ییخیلیب دره‌لر دولاجاق

روح‌انگیز پورناصح
آنادیلیمیز:بیر ساعاتدان آرتیق کئچمیش اولسایدی دا، یئنه تؤوشه‌ییردیم. باشیما نه گلدییینی تخمین ائده بیلمیردیم. اوره‌ییم سیخیلاندا دا ائشییه چیخا بیلمه‌جه‌یم دئیه، جانیما قورخو اوتوردو.
پری دئیه‌ردی‌ها گله‌جک‌ده هر شئی ترسینه اولاجاق، داغلار ییخیلیب، دره‌لر دولاجاق، ایت‌لر سوسوب، کوچوک‌لر هوره‌جک، آمما بونجا شورلوغونو اینانا بیلمزدیم. بلکه ده دوز بمباسی پارتلامیشدی بیر یئرده. بو فیکیرلر لاپ قورخودوردو منی.
اؤزومو چتین‌لیکله الیندن قورتاریب ائوه سالدیم. قاپینی ایشکیلله‌ییب، قورخودان قیفیللادیم دا. آغیرـ آغیر نفس آلیردیم، بیر آز دینجلیم دئیه ایشکیللنمیش قاپییا دایاندیم. آغیرلاشمیشدیم. حالیم قاریشیق‌ایدی. گؤوده‌مین هر یئری گؤینه‌ییردی. اؤزومو هر یئره چیرپمیشدیم. گؤزلریمین آجیشماسیندان، اولجه قورخموشدوم کور اولماغیمدان. پالتارلاریم نئچه یئردن ایلیشیب، جیریلمیشدی. هله نه یاخشی کی یاخیندایدیم، یوخسا…
اؤزومو اله آلماقدا، الیمی‌دیوارا سورته ـ سورته یوخاری چیخدیم. ائو قارانلیق‌ایدی. گون اورتا چاغینین قارانلیغیندان اوره‌ییم سیخیلدی. چیراغی یاندیریب، کئچیب پنجره‌نین اؤنونده دایاندیم. آغارتی‌دان هئچ نه گؤرسنمیردی، گؤرمزلیک رمانیندا اولان، هر یئری آغ گؤرنلر یادیما دوشوب، جانیمی‌سیخدی.
شیریق پارچالارلا پنجره‌نین بوتون دلیک‌ – دئشیک‌لرینی توتوب، بویالی اؤرتوک‌لرینی چکدیم. بوغازیمین گؤینرتی‌سیندن گؤزلریمین یاشی دورمادان، آخیردی. ال اوزومو یویوب، بیر لیوان دولوسو سوت ایچندن سونرا، پالتارلاریمی‌یوخلادیم، تاختا کیمی‌ایدی. کفن بویاسینا چؤنموش گئییمیمده جیریق‌لار بیلینمیردی. اونلاری دییشرکن، یاشیل دؤشه‌نک آغاریردی.
صندل‌ده اوتوردوم. آیاقلاریمی‌ماسانین اوستونه اوزاتدیم، باشیمی‌دایاناجاغا دایاییب اویدوم.آز کئچدی، چوخ کئچدی، بیلمه‌دیم. قالخیب دیک اوتوردوم. لپ‌تاپیمی‌آچیب شکیل‌لرله، فیلیم‌لرین فولدرین آچیب،‌هامیسینی سِلِکت ائله‌دیم. آغاجلی، سولو، یاشیل منظره‌لرین ایچینده گزمه‌یه باشلادیم. ان گؤزل یئرلرینده دوروب شکیل چکدیردیم.
بلکه بو یئرلره هی بیرده گلمه‌دیم …. ماهنیسینی میزیلدایا ـ میزیلدایا، ال تلفونومو اؤزومه ساری توتدوم. اوچ، ایکی، بیر، شکیلیم تار اولماسین دئیه ترپنمه‌دیم.

نوشته شده توسط admin در دوشنبه, ۱۷ مهر ۱۳۹۶ ساعت ۹:۳۰ ق.ظ

دیدگاه


− سه = 6