يارالي بوراخيلميش اينسان‌لار

ايل‌لر بويو ياشاديغيميز اناميزي، بآجيميزي، قارداشيميزي، اتاميزي، بالاميزي و حتتا ياشام يولداشيميزي بئله، اراميزدا درين بير اوز-اوزه‌ليک اوز وئرمزسه، تانييا بيلميريک، تانيساق دا، چئشيدلي چتينلي، آجيلي، شيرينلي گون‌لر گليب چاتمايينجا، اونلاري سيناماق اولمور، سيناماق اولمازسا دا، سايکولوق‌لارين کليشه‌لرينه سيغينيب، دگيشکن اولاي‌لارا، کسگين قرار وئرمک، کائيناتين حاققيندا بئله حاق‌سيزليق اولور، هاندا قالسين قارشيميزداکي اينسان اولا.
اينسان دئديگيميز يالنيز بير گؤوده‌دن اولوشمايير کي اونو ات ايله سوموک سانيب، واختي ايله آشپازلارين اؤنرگه‌لري ايله اونو يارقيلاييب، دادسيزدير دئيه، چؤپ کيمي قيراغا قوياق. اينساندا روح وار و اونون روحونو سايمازليقدان گليرسک، هَمَن گؤوده‌ني تورپاغا تاپشيرماق دا اولا بيلَر.
سايکولوق‌لارين روتين سؤزلريني کليشه‌لره سيغينديريب، نيسبي اولاي‌لارا باغلاييب، کسگين قرارا گلمک، اولا بيلَر کي قارشيميزداکي اينساني، عؤمورلوک اولاراق، بير دؤنه دگيل، گونده مين دؤنه اؤلدورَک. اينسان بيريني گؤزله‌ييب، اونا چاتماق يولوندا، بوتون چَتين‌ليک‌لره دؤزورسه، دئمک او آدامي تانييير و اوره‌گي اونون اوچون چيرپينيب، اونو دريندن سئوير.
اونا بو دؤزمک اولا بيلَر کي ياريم ساعات تئلئفون آرخاسيندا اولسون، ساعات‌لارجا خيابان قيراغيندا و يا آيلارجا ائوي‌نين بير کؤشه‌سينده اولسون و اوندان داها اوستونو بو دؤزمک بير عؤمورلوک ذئهنينده يووا قوروب، ابدي ياشاسين. بئله بير اينسان‌لار هَمَن او سايکولوق‌لارين کليشه‌لرينه سيغينمايان‌لارديرلار.
اونلار ائله دگيل کي بير يئمک کيمي سئويب، گؤيلونوزو چکديگي آنا کيمي، اونلار ايله اولوب، چيرگيييب، اوره‌گينيزي ووران آندان بري، اونلاري بو دَهشتلي دونيادا اؤز باش‌لارينا بوراخاسينيز.
اونلاردا دا احساس وار، شخصيت وار، غرور وار. سيزي اودوزماسينلار دئيه، سيزي اوووج‌لاريندا ساخلاماق اوچون ساواشديق‌لاري او دئمک دگيل کي اونلار چوخ آشاغي و دوشوک اينسان‌لاردير، ترسينه اونلارين بو يولدا ساواشديق‌لاري سيزه قارشي اولان سئوگي و دگردن‌دير.
بعضن اونلار دا يانليش ائده بيليرلر و بو اونلارين پيس‌ليک‌لريندن قايناقلانمايير، نه‌دن کي اونلار يالنيز سيزي الدن وئرمه‌سينلر دئيه او يانليشا اوز قويورلار و اونو سيزين الدن وئرمه‌مک يولدان ساواش يؤنته‌مي گؤزونده گؤرورلر.
بعضن سايکولوق‌لارين کليشه‌لرينه اينانيب، بئله اينسان‌لاري اؤز اليميزله اؤلدورسک، بير گون اؤزوموزه گليب باشا دوشه‌ريک کي، بو بؤيوکلوکده ياشامدا، اونلاردان چوخ و اونلاردان تميز، سيزي سئويب، دگر وئريب، سيزه ماراقلانان يوخ ايميش و سيز بئله بير اينساني بير دؤنه دگيل، گونده اونو قبيره گؤموله‌نه‌جن مين دؤنه اؤلدوروبسونوز.
بو ياشامدا هئچ اينسان ياريم قالماز، بلکه ياريم بوراخيلار، ياري يولدا بوراخيلار، بئله اولدوقدا يارالي بوراخيلار و يارالي بوراخيلان اينسانين طالئعي، اؤلدورولَن اينساندان نئچه قات آجي اولار. يارالي بوراخيلان اينسانين حالي دا اؤزلوگونده ماراقلي اولار.
سئوگيسي‌نين اوغروندا داريخان بير اينسانين حالي، هئچ خوش اولا بيلمَز، اؤزوندن کئچيب، دليجه‌سينه وورقون اولان بيريسي‌نين حالي اوندان دا داها پيس اولار. بو آرا يارالي بوراخيلان بير اينسانين حالي، بونلاردان دا يوز قات داها آجيناجاقلي اولار.
نه‌دن کي او اينسان بيري‌سينه گؤره داريخيردي دا، اونا وورقون ايدي ده، سونرا گليب يارالي بوراخيلاندا، اؤلومدن داها آجيناجاقلي دوروم‌لاردا دَهشتجه‌سينه هر ثانيه‌سينده اؤلمگي تجروه ائده‌جک.
او اينسان بو آجي يارالاري‌نين اورتاسيندا ياشام بويو جان وئره‌جک. اصلينده اونون روحو، اوره‌گينده جان وئره‌جک و بئله دوشونه‌جک کي بوغولور، دوز دار اغآجيندان آسيلان کيمي، آنجاق دار اغآجيندان آسيلان اينسان، بير دؤنه اؤلوب بيتير، اما يارالي بوراخيلميش اينسان، ياشام بويو آسيلماقدا اولاجاق. بو اينسان‌لار ايلک اؤنجه عاغيل‌لاري ايله بو يولا چيخيرلار، سونرا اورک‌لري ايله اولدوغو يول‌لارينا اينانيرلار.
بئله دگيل کي عاغيل ايله تيجارته چيخيب، اوره‌گي گؤرمَزدن گله‌لر، يا دا لاپ ترسينه اورک ايله وورولوب، عاغيل‌سيزجا داوام ائده‌لر. اونلارين بو يولدا غرورلاريني آياق آلتينا آليب، يالوارمالاري اونلارين دوشوکلوک‌لريندن دگيل، اونلار گرچکدن سئويرلر و او سئوگي تيجارته سيغيليب، عاغيل ايله اؤلچو-بيچم اولا بيلمَز.
او سئوگيني و سئون اينساني سايکولوق‌لارين تيجارتده اولان ساري يازي‌لاري ايله اؤلچو-بيچيم ائتمک اولماز. او اينسان سيزسيز ياشاديغي بوتون ثانيه‌لرينده، ساعاتي دا، اوره‌گي ده، دونياسي دا گؤينه‌يير.
او هر آنيندا سيزي ياشايير، يان-يووره‌سي اينسان‌لارلا دولو اولسا بئله. او زامان بئله بير اينسانين پايي، يارالي بوراخيلماق دگيل. سايکولوق‌لارين کليشه‌لري، اونلاري داها بيلگين گؤرسه‌ديب و اونلاري بو يولدا داها زنگين ائتمه قونولار اوزره يازيلير و اؤزلري بئله ياشام‌لاريندا دئييب، يازديق‌لارينا اينانج‌لاري اولماييب و بونلاري بيلمک اوچون بارماق سايي‌لارينا گؤز يومساق، چوخ‌لاري‌نين ياشامينا باش ووروب، بئله بير پارادوکس‌لاري ايزله‌مک اولار، حال بو کي گرچک‌لر هئچ ايکي اينساندا عئيني دگيل و بو کليشه‌لره سؤيکنمک، ييخيب، ييخيلماغين ايلک آدديمي ساييلا بيلير.
بيري‌سيني اؤلدورمک اوچون، ايلک اؤنجه اونا محبت ائدين، اونون‌لا اورتاق خاطيره‌لر يارادين، ساعات‌لارجا اونون قولاغينا سس و سسينه قولاق اولون. چئشيدلي بهانه‌لرله اونو شاشيرديب، اونا شن‌ليک باغيشلايين. اونا دؤزون، صبير داشي و سيرداشي اولون. سيز بو ايش‌لرله اونا ياشام باغيشلاييرسينيز و تام او زامان کي ياشاميندا سيزدن باشقا هئچ کيمي يوخ دير و ياشامي‌نين آنلامي تکجه سيزين آدينيزدان اولوشور، اونو بوراخين، لاپ ياشامي‌نين ان چتين گون‌لرينده. سيزه هر زاماندان داها چوخ احتيآجي اولان چاغدا، يارالاييب، اونو يالقيز بوراخين. سونرا اونا ياشامي اوزره خوشبخت‌ليک آرزيلايين. شوبهه‌سيز او اؤله‌جک، هر گون يئني‌دن اؤله‌جک و ياشام وارکن او داها ياشامين خوش اوزونو گؤره بيلمه‌يه‌جک.