ورانلي گونلرين اونوتقانليغي
بيرنجي بولوم
رحيم خياوي
آناديليميز: يايين سون آيي ايدي. ايلين بو چاغيندا آخشام اوستو لر شيديرغي ياغيش ياغاردي؛ کوچه- خياباني سئل باشينا آلاردي؛ قارا بولودلار ياييليب، آردينجا گؤي گورولداييب، قارانليق هر يئره چؤکردي.
آنجاق بير آز سونرا يئنه هاوا آيازلاشاردي؛ گؤي قورشاغينين قيرميزي و بنؤشهيي قووسلاري گؤي اوزونو بزهرکن، هر شئيين رنگي آچيليب، پامبوق بولودلار پار-پار پاريلداردي.
هميشه ياغيش ياغاندا باييرا چيخيب، ياغيشين آلتيندا سوسقون- سوسقون دايانيب، بير نقطهيه دونوخوردو. بو گونده نه زامان ائودن چيخيب ياغيش آلتيندا حسرتله کوچهنين سونسوزلوغونا گؤز تيکيب «اونون» يوخلوغونو آختارديغيني هئچ اؤزو ده حيس ائتمهميشدي. جيم- جيلاق سواولموشدو.
غضبلي بير تانيش سس قولاغينا ديدي. قانريليب آرخايا قارداشي «يحيي»ني گؤردو. ائوه قاييتسين، يوخسا «اونون» دالينجا گئتسين سئچيمينين اورتاسيندا قالميشدي. گؤيون گورولتوسو و ياغيشين شيديرغي ياغماسي اورهگينده قورخونج حيسلر ياراتميشدي؛ ائوه قاييتماغا چکيليردي. گئرييه قاييديب. اؤز ائولرينه يوخ، قونشونون قاپيسيني دؤيدو.
«سارا»بوتون قاپيلاري اؤز ائولرينين قاپيسي سانيردي. او اوزون زامان ايدي بير چوخ شئيلره و ان باشليجاسي اؤزونه يانيليردي. هله ائولري قالسين، بعضا اؤزونو ده ترس ساليردي.
يحيي اليندن ياپيشيب اؤز ائولرينه ساري گتيره- گتيره -«نهدن بو شيديرغي ياغيشدا کوچهيه چيخميسان؟ سن نه واخت قاناجاقسان اوقاييتماياجاق داها» – دئيهرک، باجيسيني ائولرينه ساري چکدي. سارا کؤنولسوز گولومسهيرک -«او چينار آغاجينين آلتيندا اوتوروب مني گؤزلهيير» دئدي. بير آن قولوندان ياپيشان يحيينين بيگانه بير شخص اولدوغونو ظن ائتدي. دوداغي آلتيندا -«ياني من بير غريبه آداملا بير ائوده ياشاييرام؟» ميزيلدادي. سونرا آغير سکوته دالدي. سانکي بئينينده بير پرده آچيليب باغلاناراق، يحييني گاه غريبه بير آدام، گاه دا اؤز دوغما قارداشي ظن ائديردي. بير آن جانينا اوشوتمه دوشدو: – «من نييه ساياقلاييرام؟ اولمايا يانيليرام؛ قارداشيمي دا ترس ساليرام» دئدي. سانکي بو سواللاري باشقا بير آدام اولان اؤزوندن سوروشوردو. بو فيکيرلردن يايينماغا چاليشدي؛ آنجاق اونلارين اليندن ياخا قورتارماغي باجارمادي.
بوتون بو حاللارکئچميشده باش وئرن دهشتلي بير بورانلي گوندن باشلانميشدي. جاماعات ايچينده«قتله» گونو آدلانان بو بورانلي گون سارانين عؤمرونو قارا کؤلگهسي آلتينا آلميش، اونون گنجليک رؤيالاريني پرن- پرن ائتميشدي. هله ده«اونون» حيط قاپيسيندان شهرين اورتاسينداکي قوجا چينارين آياغينا قدر اوباشلارين رحمسيزجهسينه ائنديرديگي ضربهلر آلتيندا ييخيليب دورماسيني اونوتماميشدي. هلهده قوجا چينارين آنا بوداغيندان آسيلي قالان هيکلين، قالديريلميش بايراغ کيمي دالغالانماسي گؤز اؤنونده ايدي. هيکلين هر بير ترپنيشي ايله سارانين دا اورهيي تيترهييردي.
***
ياغيش داها کسيلميشدي؛ گؤي قورشاغي قيرميزي و بنؤوشهيي قووسونو گؤيون بو باشيندان او باشينادک چکميشدي؛ هاوادان تورپاق قوخوسو ياييليردي. سارانين اورهيينين باشينا دوشن آغيرليق آزالميشدي. اؤزونو يونگول حيس ائديردي. آينانين قارشيسيندا اولان چارپايادا اوتوروب، اؤزونه دونوخدو. سانکي اونو بير آن دا بوراخمايان او ايکينجي شخصي آرتيق تانيماق ايستهييردي. ساچلارينا اليني چکدي. بورانلي گونده ياغان قار دنهلري کيمي اونوندا ساچلارينا قار ياغميشدي. جاني اوشودو. آذر آيينين سون گونلرينين سويوقلوغونو بير داهادا حيس ائتدي. گؤزو، بارماغينداکي نيشان اوزوگونه ساتاشدي. نه واخت آداخلانديغيني بئله اونوتموشدو. تعجبله: – «من نه واخت نيشانلانديم آخي؟!» اوزونو سورغولاييردي. يئنه اؤزو و ايچينده اونونلا ائکيزلشن ايکينجي شخصله دانيشيغا گيرميشدي. شاشغين وضعيتده گؤزلري پنجرهدن کوچهنين سونسوزلوغونا توشلاندي. ياشاديغي او کيچيک شهرين اورتاسينداکي چينار آغاجينا قووشان بو سونسوز کوچه سارايا قارداشينين دفعهلرله دئديگي- «داها يورولموشام. اولسئيدين جانيم دينجهلردي. سني آراليقدان ييغيشديرماقدان ياخام قورتاراردي. » سؤزونو و سونرا باجي قارداش قول- بويون اولوب آغلاديقلاريني خاطيرلاتدي. -«آخ… کئشگه آنام ديري اولايدي و بوگونلرده قوينونا سيغينايديم» دئدي.
***
گئجه قارا چارشابيني باشينا چکميشدي. اوزاقلاردان آرا-سيرا ايتلرين هوروشمه سسي گليردي. يحيي ياتماق اوچون يورقان-دؤشک ايشگافينا ساري يونلدي؛ آنجاق سارا قوللاريني ايشگافين قاپيسينا داراقلاييب: -«بونلار منيم جاهازيمدي، تويوم ياخينلاشير. » دئيهرک، اونا مانع اولدو. يحيي آجي بير تبسومله باشين توولاييب، دريندن کؤکسو اؤتوردو. ساراني سوزوب، اوتاغين بير کونجونده اللرين باشينين آلتينا چارپازلاييب، داش کيمي يوخويا دالدي.
سارا کوچهيه باخان پنجرهيه ساري گئديب، کوچهنين سونسولوغونا گؤز تيکدي. شهرين اورتاسينداکي چينار آغاجينا قووشان بو سونسوز کوچه اونو اؤزونه سسلهييردي. گاهدان باشيني قووزاييب گؤيدهکي سولغون اولدوزلاري سوزوردو. کوچهده کيمسه قالماميشدي، آنجاق اوزاقلاردان قارما- قاريشيق سسلر ائشيديليردي. سارانين بئينينه يئنه ده سايسيز سورغولار هجوم گتيرميشدي. «اونون» اللري سارايا ساري اوزانميشدي. قوجا چينارين آنا بوداغيندان آسيلان هيکلين هر ترپنيشي ايله سارانين دا آدديملاري شهرين مرکزينه دوغرو يول چکيردي. مئيدانين گيريشينده کيمسه يوخ ايدي. قانشاردا يالنيز باغلي ماغازالارين قاباغيندا ايکي اليني چليگينه سؤيکهييب، هيکل کيمي دايانان بير قوجا کيشي گؤرسهنيردي.
آردي وار
تاریخ: 1404/12/16 09:57 ق.ظ | دفعات بازدید: 1723