بير ايشيق اولماليدير
رقيههاشمزاده
آناديليميز: دوستاقدانمي قورتارميشديم دوستاغامي آتيلميشديم بيلميرم. ميليونجا همقاطارلاريمين هئچ بيري بيلير کيمي گؤرونموردو. بيزي بوراخيب گئدن قاطار بيرداها قاييداجاقميايدي؟ بيلميرديم.
هئچ بيريميز بيلميرديک. سادهجه بوتون گوجوموزله وعده وئريلن مقصده و هدفه قاچيرديق. اورا چاتان يئني و مؤحتشم بير حايات قازانميش اولوردو. بونو کيم ايستهمز؟ قارانليقدان قارانليغا بير يولچولوق اولسادا ايشيق وعدهسي وئريلميشدي. باجاريقلي اولان قازاناجاقايدي. ياريشا بنزهر بير حالايدي. کيمسه دالي قالماق ايستهميردي. ايچيمي شوبهه چولغاميشدي. بو وعده يالان اولسا؟ بوتون بونلار بير اويون اولسا؟ بللي بير مقصد اولماسا؟ هئچ بير ايشيق مني گؤزلهمهسه و. . .
ايستي سولارين ياتاغيندا دالغالارلا رقص ائدن يوسونلارين آراسيندان يول آچيرديق. بير چوخو يورولوب دوشوردو. بير چوخو يالاندير سونو اؤلومدور دئييب دايانيردي. چوخو ايتيردي يوسونلارين آراسيندا. توپالاشيب دوام ائديب ائتمهمهيه قرارلاشانلار وارايدي حتي. ايستييه تابي اولماييب دايانانلار و هله ده ايناملا هدفي دوشونهرک قاچانلار. بعضن ياپيشقان ديوارلار اوستوموزه گلير بير چوخونو اسير ائديردي بعضن ايش بيرلييي ائديب يول وئريرديلر. ديوارلارا سؤيکهنيب دينجهلنلرين ده دالدان گلمهلرين گؤرمهديم هئچ.
اؤنوموزه بير يول آيريجي چيخدي. گؤرونن ايکي تونئل وارايدي. بيزي ايشيغا يئتيرن هانسيدير دئيه آراميزدا ولوله دوشدو. سونرا بئله بير قرارا گلديک: »هر کس اؤز ظنيجه سئچيب يولا دوشسون«
من و مينلري ساغداکي يولو سئچميشديک. يول داها تهلوکهلي داها يوروجو اولموشدو و بو بيزي بونالتماغا بس ائدردي.
اؤنومجه گئدن چوخو وارايدي. اولارا چاتيب بيرينجي اولماغا چاليشيرديم. باشيمي بوتون فيکيرلردن بوشالتديم. يقين بير ايشيق وار دئييب سورعتيمي چوخالتديم. هه بير ايشيق اولماليدير.بيرينجي سيرايا يئتيرميشديم اؤزومو. اوچ بئش نفرله بير خطده گئديرديک. هئچ بيريميز اسگيييه وئرن دئييلديک. بير آندا تونئل بيتدي گئنيش بير مئيدانا دوشدوک.
اورتادا توپپوزا بنزر ائيبهجر بير شئي وارايدي. بيزدن يوز قات هوندور يوزقات يئکه. اؤزل چکيمي وارايدي. سانکي او دالغالي حرکتلرله بيزي چاغيريردي.
يوخسا دئييلن ايشيق بومويدو؟ ايستر-ايستهمز اونا ساري گئتديک.
گيريش اوچون بير يولو، قاپيسي يوخايدي. يول تاپماق اوچون بوتون توپپاغين اطرافينا داغيليشديق. تاپان اوبيريلري خبردار ائتمهليايدي. آنجاق هئچ کيمدن سس چيخميردي. بيردن نه واختسا دويدوغوم بير سؤزو خاطيرلاديم »قازانماق اوچون ديرنمک لازيم«.
بير نقطهني سئچيب گوجومو ووردوم. او نقطهدن گيرمک ايستهديم. يولو اوردانميش کيمي راحاتجا ايچهري آتيلديم. قيسا بير يول گئتديم. بير پارلاق توپپاق داها چيخدي قارشيما. گؤردويوم ايشيق دئييلدي. من ايچ_ايچه، قاپيسيز دار و قورخونج بير دوستاغا دوشموشدوم. ايشيغا و مؤحتشم حياتا دايير بوتون خياللاريم بوشا چيخميشدي. اسير اولموشدوم. اؤزومو قاپيسيز ديوارلارا چيرپيرديم. بير حيس مني قالماغا زورلامايا باشلادي ايچدن بير حيس دئييلدي تام جيسم ايستهييايدي. او توپ مني مغناتيس کيمي اؤزونه چکيردي. اوندان کيم اولدوغونو سوروشدوم.گونلردير اوردا گؤزلهدييني سؤيلهدي.– يئني دونيان سسسيزجه اوتوروب گؤزلهمکدن باشلايير دئديلر. مؤحتشم بير حيات سنه قوجاق آچيب. ايشيغا چيخاجاقسان.
اوزگون گؤرونوردو. منده بير حاللار اولوردو اورتادان ايکييه بؤلوندوم جيسميمين باش طرفي اونا ياخينلاشدي. ايچيمدن باشقا بير من چيخدي. قابيق سالديم. من ده اونا بنزهميشديم. ياخينلاشيب توخانديم. ايچ-ايچه گيرديک. اونونلا قاريشديم و بيرداها قوپا بيلمهديم.
آياغيميزين آلتينداکي يئر تيترهدي. سونرا سانکي يولا دوشدو. بير اوچوروما دوشر کيمي حاللار ياشاديق. بيردن ايچينده اسير اولدوغوم قات-قات ديوارلار آچيلدي اورتادا قالديق. کيمسه گؤرونموردو. نظره ايستي و راحات بير يئر گليردي. اودا بونو دوشونوردو. هر ثانيه بيراز چوخ ياپيشيرديق.
نه قدر زامان کئچدييني بيلميرم آما بيز آرتيق آيريلماز اولموشدوق سانکي هر بيريميز او بيرينين ديگر ياريسي. نئچه گون بير ديواردا ياپيشيب قالديق. سونرالار بير تاپبيلتي دويماغا باشلاديق. او هئچ بيتمهدي. اوراسي وعده وئريلن ايشيغا هئچ بنزهميردي آما حاليمدان راضيايديم. أيلنجهلي و ايلگينج بير وضعيتايدي. هرگون بيراز داها يئکهليب دؤنوشوردوک. ايندي بيزدن بيراز آرالي آما بيزه باغلي بيرينين حوضورون فرق ائديرديک. ترپنه بيليرديک. بوداقلانميشديق. اعضالاريميز گون به گون چوخاليب بؤيويوردو. بؤيويوردوک.
ايچيميزده ايستي بير شي زوق آتيردي بوتون ووجودوموزا. هردن آنلاشيلماز سسلر دويوردوق.
اوزون زامان کئچدي. مين ايله ياخين بلکه!
تام و بام باشقا بيري اولموشدوق. مستقيل بير وارليق. او بيزدن يارانميشدي. يوخسا بيز اوندا ياشاييرديق؟نهديرسه آرتيق او مکانا سيغيشميرديق. ايشيق وعدهسينه
آلدانيب اسير دوشدويوموزو دوشونوردوک. هر ترپندييميزده بير باشي بيزه بير باشي اؤنوموزدهکي ديوارا باغلانان ايپ بيزي سارسيديردي. اسکي حاليميزدان خبر يوخايدي. بام باشقا بير مؤوجود اولموشدوق.
عاغلينا بير سؤز گلدي. بونو هارداسا دويموشدو. هارداسا ياشاميشدي. ديرنمک. سونرا بوتون گوجويله اؤزونو ديوارا چيرپدي. اولمادي. بيرده و تکرار بو ايشي گؤردو. او ديواري ياراجاغينا اينانيردي. چيغيرتي سسي دويدو. قلبي چيرپينماغا باشلادي. سس گئتديجه اوجاليردي. هيجقيرتي، سيزيلتي،باغيرتي ، عجله ايله دانيشيق ،قاچ ها قاچ و بو کيمي سسلر. اؤزونو راحات حيس ائتميري. يئر ترپنمهيه باشلاميشدي. بوغولوردو. سسي چيخميردي. سون گوجونو توپلادي. چيغيراراق اؤزونو ديشاري آتدي.ونش گؤيون دوز اورتاسيندايدي. . .
تاریخ: 1404/10/08 09:16 ق.ظ | دفعات بازدید: 1753