بوردان بیر جیران گئچر

بیراینجی بولوم
شهریار گلوانی
آنادیلیمیز: دیزلرینده طاقت قالمامیشدیر. ایکی گونوز بیر گئجه آج- سوسوز یول کسیردی. قاش قارالیردی یاواش یاواش. گئجه گلیب چاتمامیشدان کنده چاتمالی ایدی. گئجه لر کند ایتلرینی سربست بوراخیردیلار کندلیلر. اوندا کنده گیرمک چتین اولوردی. بو فیکیرلرله دالاشیب یورقون آیاقلارینی یئرده سوروتله¬ییردی. بیر تک قوشدا گؤیده یوخودی. ایللر اونجه بو یئرلرده هر بیر طرفدن سولار آخاردی. بولاقلار قایناردی. ایندی ایسه قورو آغاجلار بؤش اللرینی عبث یئره گؤیه اوزاتمیشدیلار. اؤزونی چؤخ یالنیز و پناهسیز حس ائدیردی. ایندی آج و سوسوز گؤیه باخاندا قوشلارین ندن گلمه مه لرینی آنلاییردی.
گونه باخدی. گون آز قالیردی باتسین. آغیرلیغینی دیزلرینه ییغدی. یئریمه یه داوام ائتدی. بیرده ساغینا باخاندا گونشین سون ایزلرینی ایتیردی. اوزاقلاردا یئر و گؤی بیربیرلرینه قُووشوردی. اوره یی قارانلیغین گلمه سیندن سیخیلان زامان آختاردیغی کندین قارالتیسین گؤردو. بیردن بیره یورقون دیزلرینده تزه قووه حسّ ائتدی. اومودلاندی. دیزه چؤکدو و بیرآز دینلن مه¬ک ایسته¬دی.
***
قاپی آچیلدی.فنارین بولوتلو ایشیغیندا آغانین اؤغلونو تانیدی.
– سن سن؟»بلی« دئدی. ماوی گؤزلو اؤنو باغرینا باسارکن » منم«.
-گل ایچری.آغا اوتاغین پنجره سیندن باشینی دیشاری چیخاردی» کیمدی« دئدی.
آغایا ساری یئریدیلر. اوچ کیشی بیربیرینه باخدی.
ایچری گیریب اوتاقین یوخاریسیندا قالین تشکچه اوستونده یئر وئردی اونا آغا.
اوتوردولار.-سیزی راحاتسیز ائتدیم . باغیشلایین.
– بو نه سؤزدور اوغول. بورا سنین اؤز ائویندیر.
آغا اوزونو اؤغلونا توتوب دئدی:
– دئنه تئز شامی گتیرسینلر. قوناغیمیز آجدی.
سونرا « سنده ال ایاغینی یو. یولدان گلمیسن» دئدی آغا.
هر ایکیسی اوتاقدان خارج اؤلدولار.
ال ایاغینی یوماقدان سونرا ااوتاغا دؤندی. آغادان آشاغی اَیلشدی. آغا یاواش سوروشدی:
– خئیر اولا. نه عجب گئجه¬نین بو واقتی؟
آغانین اوزونه باخیب » او تایا کئچمه¬لی¬یم« دئدی.
– بیرینی وورموسان؟
باشینی یوخ نشانه¬سی اولاراق ساغا سؤلا تَرپَتدی.
-قاچاق ایشی¬نن مشغولسان؟
-یوخ. زینداندان قاچمیشام.
-زینداندان؟ سنین زندانلا نه ایشین وارایدی.
-سیاسی ایشلرله مشغولدوم.
آغا» هه… آنلادیم« دئدی و سکوت ائله دی. بیر آزدان سونرا » سوچون آغیر دئییلدی کی؟« سوروشدو.-اعدام!
آغانین گؤزلری گئنه¬لدی. باغداشین تَزَلَرکن »نه…؟ اعدام؟ نیه؟ نه ائتمیشدین مگر؟« سوروشدی..»جانین ساغ اولسون« دئدی آغا قوناغین دالینا ال چالارکن. » آنانین حاققی چؤخدی بوینوموزدا. کیمسه آلابیلمز سنی الیمیزدن« آرتیردی »آنان نئجه دی؟«
– آلتی آی قاباق دونیاسین دئییشدی.
بیر الده چیراققاز او بیری الده سوفرا ایچری گیردی آغانین اؤغلی. قاپینی یاواشجا اؤرتدی. ایره لی یئریرکن چراغین نوری اوتاقداکی اشیانین هوندور کولگه لرین دیوارا سالیردی.
***
نئچه مدت¬دن سؤنرا ایلک دفعه¬یدی یوموشاق یاتاقدا یاتیردی. اینجه بیر راحاتلیق جانینا داغیلیردی و ایپک یوخونون قوینونا ساریلیردی. بونلارین اصل سببی ایکی اوتاق اویاندا اونو قؤروماغا سؤز وئرن آغایدی داها دؤغروسو. بو ماحالدا هامی آغانین آغزیندان چیخان سؤزون دالی قاییتماماسینی بیلیردی. آغانین باشی گئدر سؤزو گئتمزدی. نئجه دییرلر توپوردویون یالامامیشدی. یاتاقدا بدنینی گه¬وشدی نارینجا. اؤزونو یوخولارین ان شیرین قانادینا بوراخدی…
***
آز سؤنرا قاپینی آچدی آغانین اوغلو. باشینی ایچری اوزاردیب قوناغا باخدی. اونون یوخلاماسیندان مطمئن اؤلونجا قاییدیب آتاسینین دیزلری دیبینده دیزه چؤکوب اوتوردو.
-یاتمیش!
آغا توتون تورباسین قاباغینا چکدی و سیگارت بوکمه¬یه باشلادی و بوکرکن دانیشدی:
» من اؤلندن سؤنرا یئریمه کیم گله¬جک؟ هن…« دئدی و گؤز آلتی باشینی یئره تیکن اوغلونا باخدی.
اوغولون اوتانجاغیندان جواب وئره نمه¬ مه سی اوزونا چکدی.
»سن« دئدی آغا و »بونو بیلمه¬ک چتین بیر شیء دئییل، چونکی تک بیر اوغلوم سن¬سن« آرتیردی سؤزونه.اؤغلو » الله بیرگونوموزوده سنسیز ائله¬مسین آغا« دئدی و اوتانا اوتانا گئچیجی اؤلاراق آتاسینین گؤزلرینه باخدی.
-»بؤینومداکی شاهداماریمدان یاخیندیر اؤلوم منه. حاضیرسان آغالیغیمی سنه وئرمه¬یه؟…هه؟…«
» قوربان اولوم سنه آغا. بیردن بیره ندیر بئله دانیشماغین؟« اوتانا اوتانا دئدی اؤغلو.
آغا »سنی سیناماق ایسته¬دیم« – دئدی و آرتیردی: »گؤروم امکلریم بو گیزلی اویونلار زمانه¬سینده ایتیب گئده¬جک یا قات قات اوستونه گله¬جک وار دولتیمیز؟«
اؤغلو یاری آچیق گؤزلریله آتاسینا چئویردی باشینی.
»سینا« دئدی: »اعتمادین یوخسا سینا…بیربئله ایلدن سونرا سنین کیمی آغانین اوغلو اولماق یئتمیرسه…«
تشکچه اوسته یاریمچیق اوزاندی آغا بالیشی دیرسه¬یی آلتینا چکه چکه.
– ایچَردَکی سینیری کئچمک ایستییر.
– قاچاق ایشینده؟– یوخ.
– آدام اؤلدورموش؟
-اودا دئییل.– اوندا پس نییه کئچمک ایستییر؟
اوزاندیغی یئرده بدنینی ایکیه قاتلادی آغا.
» سن آغا اولا بیلمزسن بو کیچیک قافانلا« دئدی و دورومسادی » ایندی مملکتده باشقا ایشلر اوز وئریر آما سن آنلامازسان هله اونلاری«
» نئجه ایشلر قوربان اؤلدوغوم آغا« سوروشدی اؤغول.
»– ایچه رید ه کی¬نین کیم اولوب اولمادیغینی بیلمه¬لیسن اوّل«
– لله¬مین اؤغلی.– لله¬ن داها نئچه مدت¬دیر حیاتینی دئییشیب.
– یؤخ آتا. نئجه خبریمیز اؤلمویوب ؟
– شانس بیرده قاپیمیزی دؤیوب، قیسمت اؤز آیاغییلا بختیمیزه دوشوب.
– آناسینین سوتو سنی قورتارمیش. ایندی ایسه اوغلونون باشی شانیمیزا شان قاتاجاق.
اوغول اوتوردوغو یئردن یاریمچیک قالخیب آغاسینا ساری سوروندو بلکه ائشیدیکلرینی یاخشی آنلاسین.
» بویور آغا« دئدی اؤغلان »قولاغیم عاغلیم سنی ائشیدیر«
آغا بالیشی دیرسه¬یی آلتیندا جابجا ائله¬دی.
» ویر اونو«
» نیه آغا؟«
آغا تشکچه¬اوستوندن ایاغا فالخدی. اتاقدا یئریمه¬یه باشلادی.
اؤغولدا یئریندنآایاقا قالخدی. آغا آیاق اوسته اولارکن اوغولا اوتورماق یاراشمازدی.
» دوولتله آرامیزدا اولان ایلیشیک بللیدیر« آغا دوردی و سؤزلرینه داوام ائتدی» بونو بیر جوره دوزلتمک گرگ«.
– سوت قارداشیمین باشیلا؟
– هه. دِ گؤروم اونو وورماغا اَن یاخشی یئر هارادیر؟– ائویمیزین ایچی؟
– دئدیم دا سن آغا اؤلاممازسان اولان… امدیین سوت حرامین اولسون. سوتون یئره گیرسین گؤروم. سوتون بیر قاپی قوللوچونون سوتویدی ، آما منیم وئردییم چوره¬یه نه دئییرسن؟ بونجا امکلریمه نه دئییرسن؟
دوداقلارینی آغاسینین اللرینه یاپیشدیردی.
» باغیشلا سنی عصبلندیردییم اوچون. هاردان تاپیلیب گلدی بو لعنته گلمیش سوت قارداشیم گؤرَسَن؟ سنی بئله کئفسیز ائله¬دی«.
» یوخ اؤغلوم بو سؤزو دئمه. اؤزو اؤز آیاقیلا قیسمتینه گلمیشدی«
» اؤندا بس هاردا وورماغیم یاخشی¬دیر آغا؟ دِ سن آللاه .هر ایشین یاخشی¬سین سن بیلیرسن«
ساکت اولدولار. آرالاریندا سکوتو حیطده اولان قویو باشینداکی قورباغالارین قورولتوسو داها درینلشدیرمیشدیر. ایکیسی¬ده درین فیکره جوموب ائشیکده¬کی سسلره قولاق آسیردیلار. نفسلری ائله دریندن چیخیردی کی هاوانین آغیرلیغینی مین قات چوخالدیردی. بو وضعیت بیر آزدا دوام ائله دی. اؤغلان، اؤبیری اتاقلاردا یاتان باجیلارینی، آناسی و آغانین تزه آلدیغی جاوان آروادینی دوشوندی. کنار اتاقدا یاتان سوت قارداشیندا دوشوندی.
»باخ« آغا دئدی بو ایش کندیمیز و بوتون یئرلریمیزین خاریجینده باش وئرمه¬لیدیر. صاباح قوهوم قارداش، کندلی¬لر و اونون دوستلاری دالیمیزدا سؤز چیخارماسینلار. قوناق اؤلدورن آدی اوستوموزده اولماسین. مرزین یاخینلیغیندا ووراندان سؤنرا باشینی پاسگاها آپاریب اولانلاری آنلات. دِکی حکومتین تهلوکه¬لی دوشمانین اؤلدورموسن. منیم عوضیم دن اونلارا دِکی سؤز اؤز آرامیزدا قالسین. بویاندادا دییریک کی تورک عسگرلری ووروبلار اونی. آنلادین آغالیغین یولونو اوغول؟
***
گؤزلرینی آچدی. ایستی و یوموشاق یورقانین آلتیندا یورقونلوغو آزالمیش ضعیف بدنینی قیوریمسادی. یاواش یاواش هوشو باشینا گلدی. بو یئره نئجه گلیب چاتماسینی دوشوندی. نئچه ایللر بوندان قاباق آنا¬سیله کؤچموشدولر بو کنددن بلکه شهرده بیر تیکه چؤرک تاپا بیلسینلر. کندده کئچینمه لری یامان پیس اولموشدی. ایندی ایللر سونرا اعدام حؤکمی آلتیندا زینداندان قاچاراق یئنه¬ده دؤغما کندینه گلمیشدی. وطندن باشقا سیغینماغا هارا اولابیلیر؟
***
قاپی تیققیلدادی. تئز گؤزلرینی آچدی. آتا گؤزویله باخان آغا و سوت قارداشینین ائوینده اولماغا باخمایاراق همیشه بیر گیزلی نگرانچیلیق جانیندا یووا سالمیشدی. اؤزونو ییغیشدیردی.
– کیمدیر؟» منم « دئدی آغانین اؤغلو.
» گلدیم« دئدی و قاپیا ساری گئدیب سورگویو دالییا چکدی.آغانین اؤغلو اتاغا گیردی و قاپینی اؤرتدی.
» آتامدان بیر شیء ایسته¬میش¬سن قارداشیم« مهربانجا دئدی و آرتیردی» هاوا ایشیقلانمادان یؤلا دوشک دئییرم. سنی سینیردان کئچیرمک بوینومدا اولان وظیفه¬دیر. آخی سنه جان بورجلویام قارداش«
» ساغ اول قارداشیم« – دئدی: » ایندی گئیینه¬ریم«
آغانین اوغلو اوتاقدان خارج اؤلدی.
Arazazarbaijzn.anadilimiz@gmail.com