گون باتيب قاش قاراليب

بو قوجا آرواد‌هاردا قاليب؟ اولمايا يوخو درمانلاري يئنه اونو آغير يوخويا باتيريب؟ اولمايا يئنه تئلفون خطي حيطده‌کي سيمدن قيريليب اونو تئلفونسوز بوراخيب. اولا بيلمز بو سس‌هاردان باغيرير بس؟ دئمک اولماز قاپيدا قونشولارلا قونوشا بيلر! قاپينين اؤنونده بير يئر آلتي سالاراق توخونما توخويور. قونشولاردا ايستر-ايسته‌مز باشينا توپلاشارلار. چانتاسيندان بير مين تومنليک چيخاريب قونشو اوشاغينا دئيير گئت‌هامييا آيين-اويون آل گتير. قونشو اوشاغي‌ايسه: آخي آي آبا بونا نه وئررلر کي؟
آبا: نيه بالا اون مين تومن دي‌ها؟– : يوخ آبا بو تکجه مين تومندير!– : ويييييي…من دئديم به اون ميندي…– : بالاجا چانتاني بير داها اويان بويان ائله‌ييب بير اون مين تومنليک وئرير اوشاغا.– : وار يوخوم بوايدي، قالانين گتير ساباح چؤره‌ک‌ آلاجاغام.کوچه ده اوتورماق چاغي اؤتوشوب. گون باتيب، قاش قاراليب. اولا بيلر کوچه‌نين باشيندا اولان مسجيده گئتسين. گئديب، قاييتماسيدا اونون يئريشيايله بو چاغادک چکر. نه بيليم اوشاقلارينين ائوينه‌ده گئده بيلر. هردن بو ايش باشينا وورار. آنجاق سون زامانلاردا گئت-گلينين چتين اولدوغوندان بو ايشي آزاراق ائدير. هردن داريخما جانيني سيخاندا قونشولارين ائوينه گئدير. تئلفون دورمادان زنگ چالير. سسي ائوي آليب باشينا. تئلفون داليسيندا بو اوزدن گئتمه‌ين آدام کيمدير؟ کسين اوشاقلاريندان بيريدير. بو بير آنادان نيگاران اوشاغين زنگيدير.
اؤزگه‌سينه نه گره‌کير بئله ديره‌نيش؟ بو جوابسيز تئلفونون ندنيني بيلمک اوچون اينديجه اوشاقلارين ماشيني قاپينين اؤنونده دايانار.-: آي آبا تئلفونا نيه جواب وئرميرسن، اؤلودوک نيگارانچيليقدان…!
آبا توخونما الينده چاشقين باخيشلا- : آي بالا‌هاني؟ بو من، بو دا تئلفون!‌هاني آخي؟-: يئنه سودان، چايدان تؤکموسن اوستونه، ايشدن ساليبسان دا اونو.سايمازيانا باشيني توخونما توخومايا قاتيب دئيير- :يوخ آبا جاني، سحردن اؤزومده هئچ کسي توتا بيلميرم.
بو زنگين سسي، بو زنگين اييه‌سي اوزدن گئدهسي دئييل. آردي کسيلمه‌دن بو ائوين نومره‌سيني توتور. جانيم اؤرپه‌شير بو دهشتلي سسدن. سانکي قارانليق بير اوچورمدان قالخاراق ائوين تاوانيندا گزيشيب، سونوندا بيتير. سانکي آبا بئينيمده توخونما توخويور. دويون-دويون دويونله‌يير بئينيمي. توخونما ميليني بئينميه سوخاراق بئينيمين ايپلريني هؤرور. توخويوب-توخويوب مني دار آغاجيندان آسلايير. آبا جاني داها بوغولدوم. داها يئتر…
قارانليق دوشورسه‌ده بو ائوين چيراقلاري ياناسي دئييل. ايلک دئدييم کيمي‌هانچي يوخو درماني آباني درين يوخويا آپاريب. يوخسا بو آرواد نامازسيز باش ياستيغا قويمازدي. اوتوروب دورماغي چتين اولورسادا بير صندلده نامازيني قيلاردي. ندن آخي بو ائوين چيراغي بئله يانماز اولوب بو گئجه. حيطده‌کي اَريک آغاجي ياز يئلي‌ايله اَسينير. بو ايل ايلک دؤنه آغاج چاققالا گتيريب. آبا اونلاري گؤزلري اوسته ساخلايير. ياپراقلار آي ايشيغيندا پير-پير پيريلدايير…
اَه…داها يورولدوم بوش –بوشونا يازماقدان. بوش بوغازليغا گوجوم قالماييب. تئلفونون سَسيني کَسيرم. داها يئتر بو اويونبازليق. داها يئتر ظارافات ائتديين. ندن زنگ ائله‌ييرسن او ائوه. اليمده‌کي موبايل يورولدو بو ايشدن. کوچه‌لرده گزيشيب تکرار، تکرار . ?? 041422397نومره سيني ندن توتورسان. قينامايين منيم بو دليلييمي. بير نوه ندن بويوک آناسينا زنگ ائله‌ير؟ ايسته‌ييرم تکجه بير داهادا دئسين: قاداسي نئجه‌سن، گيلم قوربانين اولوم….نه يازيق آرتيق بير هفته اؤنجه اونو قبريستانليقدا باسديرميشيق…
Arazazarbaijzn.anadilimiz@gmail.com