گئجه‌لر آي ايشيغيندا

آنام حووض قيراغيندا دستناماز آلاراق ايکي گؤزو منده‌دير، مچيده ساري گئده – گئده ديل آلتي “گؤزل آغا چوخ گؤزل ايدي ووردو چيچک ده چيخارتدي‌، آللاه گؤروم او يونيسي نه‌دييم ائله‏‌مه‏‌سين” دئدي.
آنام ائشيگه چيخاراق منده تلسيک حيطين آلت قاتينا يئنيب‌، يونيس داييمين وئرديگي ايچگيدن ايچمه‌‏يه باشلاييرام‌، ترک ائله‏‌دييم سيگار قوخوسو ياديما دوشوب بئينيمين اينجه دامارلارين قاماشديرير دووارين دليک – دئشيگيندن سيگار کؤتوگو تاپيب‌، تئز آليشديريب‌، بير درين پک ووراراق ائله توستو ايله اورتا دوواري آشيب نازلي گيلين حووضلارينين قيراغينا سؤيکه‌نيب آلما آغاجينين آلتينا داليرام.
دووارين دئشيگيندن بير شئي گؤرونمه‏‌يير‌، گؤردويوم يالنيز اورتايا آتيلميش اويونجاق قاب – قاشيقلار و کرتي قيراغيندا خراب قالميش ائو‏دير.
اوشاق?ايکن حکيمه خالا (ائو بير قونشو اولدوغوموزا گؤره خالا دئيرديم) حيطين قوزئي يانيني سولاييب سوپورندن سونرا نازلي ايله من آلما آغاجين آلتيندا پالاز ساليب قوناق باجي اوينارديق‌، او، بالاجا اللري ايله اويونجاق قاب – قاشيقدا يئمک پيشيرردي منده کرتي‏دن ليغ دوزلديب ائو تيکرديم.
ياغيش ياغيب داملالاري آلما آغاجينين يارپاقلاريندان زويولده‌‏ييب تؤکولنده نازلي گؤيه باخاراق ” آي کيشي بو دامين دليک – دئشيگينه يئتيش بوگون – صاباح دام باشيميزا گلجک‌ها ” دئيردي. منده بيراليمده آينا بير اليمده ده قئيچي بيغلاريمين اوجونو ووروب سونرا ياغيش داملالاريني اونون ياناقلاريندان سيله‌رک “هه خانيم دوز دئييرسن ؛ آ‏مما بير آز دؤز. قاباقدا ياغلي بير معامله وار دوعا ائله يئرينه گئتسين‌، دام – داش کي سهلي‌دي‌، سنه ده ياخشي يئتيشمه‏‌لييم ” دئيرديم.
من آرخايينام موراد نازليني سئومير، يوخسا گونده ساواشيب اونو وورماز ايدي. گوناهلارين بير آزي حکيمه خالا بير آزيدا منيم آنامدايدي.
حکيمه خالا منيم‏له نازلينين بيري – بيريميزي سئوديگيميزي بيليردي‌، ائله اونا گؤره ده آنامي‌قيرخ بير مرثييه‏‌ده گؤروب دئميشدي‌، آنام ايسه خديجه خالايا: بونلار نه سؤزدو ” گئت قيزيوي ييغيشدير ” دئميشدي.
نازلي دانيشگاها چيخاندان بري آنامين گؤزوندن داها دا دوشموشدو. من هر زامان نازلي‌نين فيکرينه دالاندا آنام اونون ايرادلاريندان دئيردي‌، “اودور با پروين خانيم دئييردي اؤزوم بو ايکي گؤزومونن گؤردوم نازلي اوتوبوسدا چارشابين آچميشدي‌، هله تئللرينده چرقت دن چيخارديب آلنينا تؤکموشدو سونرا محله‏‌يه يئتيشنده چارشابين اؤرتموشدو. آللاه آپارسين گتيرمه‏‌سين هئچ کسي تانيماق اولمور. من بو قيزي اؤز قيزيم کيمي‌بيلرديم، آمما ايندي قاش – قاباغي يئرينن گئدير. بير قورو سلام وئرميه‌ده آرينير. ائله بير من دئميشم چارشاب اؤرتسون. هله پروين باجينين سؤزو بير يانا من اؤزوم دققت‏له نازلي‌يا باخميشام، هله قاشلارينين آلتيني دا گؤتوروب آللاه گؤرستمه‏‌سين دوغرودان آخرالزمان دئييرلر بودور”. آنام‌، نازلي‌نين چارشابينان – تئليندن قاشيندان دئينده من نازلي‌يا داها دا ماراقلانيرديم.
حکيمه خالا‌، آنامين ” گئت قيزيوي ييغيشدير ” سؤزونو نازلي‌يا دئيندن سونرا نازلي اوجا سسله گولوب ” او دئيير به من ليلي اولموشام اونون دا اوغلو مجنون ؟” دئييب ؛ منيم فيکريمي‌باشيندان آتميشدي. نه بيليم بلکه ده آتماميشدي. يوخسا اوشاغينين آدينين اوليني منيم آديمين اوليندن قويماز ايدي.
بو سيرتيق گئده کچل موراد نم‌هاردان نازلينين مندن کوسدويونو بيلميش اولمالييدي کي ائله اوچ – دؤرد گونون ايچينده اونا ائلچي يوللادي‌، نازلي دا ايستر ايسته‏‌مز اونا ” هن ” جوابي وئرميشدي.
او گوندن بري کئچل گده‌هاچان نازلي‌گيله گلنده‌، بير يوخاري مودئللي ماشيني قاپيلارينين قاباغيندا ساخلاييب حيطده اوجا سسله اونا “بيليرسن سني اله گتيرمک اوچون نلر چکميشم ؟ ” دئيردي.
يادا بير يابانجي ديلده نوستالژيک (اوگده‌‏نين دئديگينه گؤره) بير شارکي آچارکن باندلاري بيزيم حيطه ساري قويوب سسين اوجالديردي. منده سيگارين ترکيندن چيخاراق سيگاري – سيگار کؤتويونه يانديرب گؤزلريمي‌يوموب سيگارين توستو ايله دوواري آشيب ائله او شارکي ايله بير اليم نازلي نين الينده اوبيري اليم ايسه اينجه بئلينده رقص ائله ييرديم.
بير جوت پوتين باشماق دمير قاپينين دئشيگينين او تاييندا داياناراق بير آن اؤزمه گلديم. دمير قاپي جيرها جير آچيلاراق باشيما ديدي‌ سالونون ايشيغينين اثرينده سول گؤزوم ده يومولدو.
گؤزتچي “هه سيچان کيمي‌نه آختاريرسان ؟ اولمايا بو بالاجا دليکدن قاچماق ايسته‌ييرسن ” دئيه ياخامدان ياپيشيب سئللولدان ائشيگه چکه‌رک سورغوجونون اوتاغينا آپاردي.
سورغوجونون اؤنونده اوتوراراق‌، او باش بارماغيني جئب تئلفونون صفحه‌سينه چکيب ” نييه مورادي اؤلدوردون ” سوروشدو. باشيمي‌آشاغي سالاراق “نئچه دفعه دئييم من کيمسه‌ني اؤلدورمه‌ميشم”.
من من فقط ايسته‌‏ييرديم نازلي گؤورميش قول – قيچيني آلما آغاجينين آلتيندا آنا‏سينا گؤسترنده گؤرم؛ من من کيمسه‌ني اؤلدورمه‌ميشم ايناميرسيز حکيمه خالادان سوروشون. من مورادي اؤلدورمه‌ميشم. من يالنيز اورتا دوواريميزين دئشيگيندن اونلارين حيطينه باخميشام.
سورغوجو ” ائله حکيمه خالان اؤزو دئييب کي سن مورادي اؤلدورمه‌يه تهديد ائله‌ميسن.
يوخ او جور دئيير‌، من من بيليرديم حکيمه خالانين موراددان خوشو گلمه‌ييردي، حکيمه خالايا طرف اولاراق فقط بير سيرا چؤرک نوبه‌سينده مورادي اؤلدورمه‌يه تهديد ائله ميشديم.
” مگر سن خلقين وزير وکيليسن ؟ سنه نه کي سئويردي يا دا سئوميردي.
سورغوجونون جيب تئلفونو زنگ چالدي :
بلي‌، بويور، هه‌، يوخ هله ايشيم وار‌،‌هارا ؟ کيمينن ؟ يوخ من گله بيلمرم‌، ال چک دئديم گله بيلمرم‌، اؤزوز گئدين‌، ياخجي. سلام قيزيم نئجه سن بالا ؟ ساغ اول‌، ياخجي‌، ياخجي بالا گلنده آلارام خدافيض.
سورغوجو جيب تلفونونون صفحه‌سيني باش بارماغي ايله اويان بو يانا چکه‌رک ” هه بس سن دئييرسن کيمسه‌ني اؤلدورمه‌ميسن‌، دئمک اولماز بلکه ده اؤلدورمه‌ميسن‌، ائله سن دئدين منده اينانديم‌، بلي بلي کيمسه ني اؤلدورمه ميسن ” دئيه درين بير نفس آلاراق گؤزتچييه ساري باخيب ” آپار اؤتور يئرينه ” دئدي.
گؤزتچي سئللولون دمير قاپيسيني قاپاداراق من اؤز – اؤزومه ديل آلتي :
” باز، اي الهه ناز “شارکيسيني اوخوماغا باشلاديم، آمما ” ناز”ا يئتيشنده داياناراق – نازلي – نازلي دئييب گينه قاپينين دئشيگيندن سالونا باخيرام.اوچ – دؤرد گون سونرا گؤزتچي قاپيني آچاراق تئز آياغا قالخيب هيرسله ” مورادي من اؤلدورموشم داها نه ايسته‌ييرسيز ” دئديم.
گؤزتچي اوجا سس ايله گولوب ” آللاه جلاليوا چوخ شوکور دوننه جن قاتيل تاپيلماييردي ايندي ايکي – ايکي تاپيلير” دئدي. گؤزتچي‌، سورغولاما اوتاغينين قاپيسيني آچيب ايچرييه اؤتوردو. سورغوجو ” اوتورماق لازيم دئيير بوراني امضالا بورا دا بارماغيوي باس گئده بولرسن ” دئدي.
“بس قاتيل کيمدي ” سورشدوم. سورغوجو گؤز آلتي باخيب “خوش گلدين گئت اؤزون ياخشي بولورسن کيمدي” دئدي.
بو بير هفته‌ده حبس ده اولدغومدان آنام اون ايل قوجالميشدي‌، حيطه گيرهرک ” گؤردون دئديم بو قيز سنين درديوه ديمز ؟ اونو آلسايدين ايندي سني اؤلدورموشدو ” دئدي آنام. هئچ دينمه‌دن ؛ آنامين قوللاريندان سوزولن دستنماز سويونا باخيب، سونرا باشيمي‌دولانديراراق نازلي گيلين آلما آغاجينين اورتا دوواري آشيب بيزيم حيطه تؤکولن سارالميش يارپاغلارينا باخيب‌، حيطين آلت قاتينا يئنيب قالان ايچگيني بير نفسده باشيما چکديم. اوره‌گيمده‌کي آجيلار ايچگينين آجيسينا قاريشاراق گؤز ياشلاريم آخماقا باشلاديلار.
آنامين اوجا سسيني ائشيده بيليرديم ” گينه‌هارا گئديرسن ؟ داها بس دئييل ؟ سنده ايستهيييرسن مني اؤلدورهسن ؟ آللاه بو قودوغون اليندن‌هارا قاچيم ؟ “.
اورتا دووارين دئشيگينين قاباغيندا اوتوروب‌، درين بير نفس آلاراق نازلي گيلين حيطلرينه باخماق ايسته‌ديم‌، آمما دئشيگي تورآتان توخوموشدو. هر شئي تار گؤرونوردو. بير نئچه ميلچک‌ده تور آتانين توروندا اسير قاليب قوروموشدولار.
Arazazarbaijzn.anadilimiz@gmail.com