پنجره‌مين هئره‌سينده نه شمعداني وار نه ده عطير شاهي

آنباشي چيراق کيمي‌ذهنيمده ايشيلدايير. اوشاقليق چاغلاريمدا بئله بير ياشيل رنگينه سيّدي ياشيل رنگي دئيرديک. باغلينين ايکي طرفي سليقه ‌ايله آشيرما تيکيليب. اوچ‌بوجاغين باش‌بوجاغيندا ايسه، ماوي بير گؤزنظر مينجيغي وار. اسکي‌دن گؤردويوم گؤزنظر مينجيقلاريندان دئييل، تورکيه گؤزنظرلرينه تاي‌ بير مينجيقدير. سورمه‌يي بير زمينده آچيق ماوي رنگين اورتاسيندا قاپ‌قارا بير گؤزبه‌به‌يي. اسکي گؤز نظر مينجيقلاريميز دليک‌لي داشلارکيمي، اورتاسي دليک، ياشيل يا ماوي رنگده اولارديلار. اينديسه گؤزنظرلريميزين اولگوسونو ده قونشو اؤلکه‌دن کوْپي ائليريک.
دوعا باغليسيني تبريزين مدرن بيرخيابانيندا تاپديغيم گوندن بري عجيبه بير حيسّيم وار. هئچ عاغليما دا گلمزدي بير گون بورجلاري گؤيه دوْغرو يؤنلميش، پارکينگ‌لري ارس پلاک‌لي ماشينلارلا دولو بير خياباندا بئله بيردوعا باغليسينا راستلاشيم.
اونو پيادا يئرينده، کورلار اوچون دوزولموش ساري موزائيک‌ دؤشمه‌‌نين اوستونده گؤردويوم آن تعجب ائتسم ده، يولومو توتوب کئچديم.
ايکي ساعات سونرا گئري دؤندويومده هله ده دوشدويو يئرده، موزائيک دؤشمه‌نين اوستونده دوشوب قالميشدي. معلوم دئيلدي بو ايکي ساعاتدا نئچه نفر منه تاي اونو گؤروب گؤرمزدن کئچيب گئديب. ياشيل باغلي‌نين اوستونده‌کي ايزلردن بللي ايدي اونو آياقلاييب کئچن آداملارين سايي آز دئييلميش. أييليب اوچ‌بوجاقلي دوعا باغليسيني گؤتوردويومده حيس ائله‌ديم أسکي زامانلاردان قالميش بير نسنه‌ني أليمه آليرام.
اينديسه بئش گوندور قاز لوله‌سينين نارينجي شيريندن آسيلي قاليب. هر زامان باشيمي‌لپ‌تابيمدان قالديراندا دوعا باغليسينين سيّدي ياشيل رنگي قاز چيراغينين نارينجي شيرينين آلتيندان گؤزومه گليب ذهنيمي‌بوْيالانديرير. بو ياشيل‌ليقدان جان قورتارا بيلميرم. اونا زيللنديييمده قورخورام هيپنوتيزم اولام. اؤز- اؤزومه دئيرم: »بو دوعا کي حرکت ائله‌مير مني هيپنوتيزم ائله‌سين!«
بير ايچيم قهوه دمله‌ديکدن سونرا لپ‌تابيمين باشينا گئري دؤنورم. هله ده دوعا باغليسي‌ ياشيل چيراق کيمي‌ذهنيمده ايشيلدايير. قهوه‌مي‌ايچيب بير پاپيريز آليشديريرام. ياشيل رنگلي دوعا باغليسي توستو آرخاسيندان مني بويوله‌يير. يادداشلاريم پلان‌به‌پلان توستو ايله برابر دوعا باغليسيندان گئري اوچور.
بيرينجي پلاندا من پنجره‌نين هئره‌سينده عطيرشاهي ايله شمعداني گولدانلارينين کناريندا اوتورموشام. عطير شاهي‌نين اييسيندن شمعداني‌لارين چوهرايي، قيرميزي، آغ چيچکلريندن آنلاييرام کي، بايرام گونلريندن بيريسي‌دير. قونشو قيزي اوتاغين آستاناسيندا اوتوروب، آناسي ايسه تاقچا آلتينداکي ياسديقلارا دايانيب، سيّد خانيم ايله دانيشير. دفتريمين اورتاسيندان بير واراق کاغيذ جيريب، سيّد خانيما وئريرم. سيّد خانيم بيک خودکار ألينده، قيراقلاري قيرميزي خطّ ايله خط‌کئش‌لنميش کاغيذين اوستونده قونشو قيزينين باغلي بختينين آچيلماغينا دوعا يازير. قيز دا منه تاي بويلانيب کاغيذا باخير. اونو بيلميرم، آمما من سيّد خانيمين نه يازديغيني اوخويانميرام. بيلميرم قيزين آناسي دئدييي بخت ياني نمنه؟ اوسته‌ليک، باش تاپا بيلميرم بو کاغيذدا يازيلميش سؤزلر او آنلاميني بيلمه‌ديييم بختي نئجه آچا بيلر!
ايکينجي پلاندا قونشو قيزينين آچيلميش بختي شانسينا آغ چيخماييب، گاهدان قارايا چالار بختي اونون اوستونه أل قالديريب، قولاغينين ديبيني قيزديريب، گؤزونون آلتيني گؤيردير. قونشو قيزي ايسه بئله واختلار آغزي أييلير. قونشو قيزي آغيز أييلمه‌سينين عادت‌کرده‌سي اولوب. اونون آغزينين دوزه‌لمه‌سي سيّد خانيمين ألينده‌دير.
من پنجره‌نين هئره‌سينده اوتورموشام.
عطيرشاهي ايله شمعداني گولدانلاري حوْوض قيراغينا دوزولدويونه گؤره يازين ايکينجي آيي اولماليدير. قونشو قيزي آنباشي أييلميش آغزينين سويونو ألينده‌کي دستمالي ايله ده‌رير. سيّد خانيم قيزين قارشيسيندا ديزه چؤکوب، مقدس کيتابي قيزين اوزونه ياخين توتوب، دوعا اوخويور. دوعا قورتولاندان سونرا گؤزله‌نيلمزدن کيتابي برکدن بوکور. کيتابين بوکولمک سسينه قيز ديسکينير آمما هله ده آغزي أيري قاليب. سيّد خانيم کيتابي آچيب، أليني کيتابين صحيفه‌لرينه چکيب، سونرا قيزين اوزونه چکير. قيزين آغزي هله ده أيري قاليب.
سيّد خانيم مقدس کيتابي يئني‌دن آچيب أليني کيتابين صحيفه‌لرينه سورتوب، قيزين اوزونه يومشاق بير سيللي ياتيردير. قيزين أييلميش آغزي دوزه‌لير. قيز آغيز سويونا بولاشميش دستمال ايله گؤزونون ياشلاريني سيلير.
من ايسه بير سيّد خانيمين ألينه باخيرام، بير ده قيزين دوزه‌لميش آغزينا. سيّد خانيم اولماسايدي يقين کي قيزين آغزي أيري قالاجاق‌ ايميش. سيّد خانيمين ألي ايله باشقا أللرين آراسينداکي فرقي آختاريرام. باشقالارينا تاي اونون أللرينين ده بئش بارماغي وار. او دا أللري ايله يئمک پيشيريب، يئيير. اوزونو يوُيور. توالته گئدير، همن بارماقلارلا طهرات آلير. حتي بورنونو قوردالاماغيني بئله گؤرموشم. باش تاپا بيلميرم سيّد خانيمين أللري ايله آيري أللرين نه فرقي اولا بيلر؟ بلکه ده بو سوْرونلارين‌هاميسينين حکمتيني قونشو قيزينين آغزيندان آختاريب تاپماق گرک! يقين کي اونون آغزي آيري قيزلارين آغزيندان فرقيليدير!
اوچونجو پلاندا قيز گئنه آناسي ايله برابر گليب. من ايسه گئنه ده پنجره‌نين هئره‌سينده اوتورموشام. بو ده‌فه حووض قيراغينا دوزولموش عطير‌شاهي ايله شمعداني‌لارين سولوب، تؤکولموش چيچک‌لريندن بللي‌دير يايين سون آيي‌دير. قونشو قيزينين آناسي هر دؤنه گلدييي کيمي‌ياسديقلارا دايانيب‌دير. سيّد خانيم بيک خودکار ألينده، قيزين بختينين ديليني باغلاييب، محبتيني جوشدورماق اوچون منيم دفتريمدن جيريلميش کاغيذ اوسته محبّت دوعاسي يازير. من ايسه بويلانميشام، اوخويا بيلمه‌ديييم محبّت جوشدوران يازيلارا باخيرام.
باش تاپا بيلميرم بو يازيلار نئجه او قيزين بختينين ديليني باغلاييب، اوره‌يينده محبّت جوشدورا بيله‌جک!
دؤردونجو پلاندا ياديما گلمير نئچه فصيل اؤتوشوب، آنجاق من دؤردونجو کيلاسين اوچونجو ثلثونون امتحانلاريني وئريرم. قيز ايله آناسي حووض قيراغيندا دؤشنميش تختين اوستونده أيله‌شيبلر. قيزين بختينين محبّتي جوشسا دا، قيزين بئلي بوشدور، بطني نوطفه ساخلامير. سيّد خانيم ألينده بير بولوت دولو تورش آلچا، گليب قيز ايله آناسي‌نين کناريندا أيله‌شير. قيز دا منه تاي تورش آلچالاري گؤرونجه آغزينين سويو آخير. سيّد خانيم بولوتو اونا ساري ايته‌له‌ييب، قيزين آناسي وئردييي باغلي قيفلين ايچيندن بير قئيطان کئچيرديب، ديل- دوداغي آلتدا »يس« سوره‌سيني اوخويوب، »مبين« سؤزونه يئتيشنده قيفيلا پوفله‌يندن سونرا قئيطاني دويونله‌يير. من أليمده کيتاب، بير سيّد خانيمين ألينه باخيرام، بير ده قيزين خارپاخارپ آلچا چئينه‌ين آغزينا. تله‌سيرم قيز ايله آناسي دوروب گئتسينلر، منسه دوشوم آلچالارين جانينا. سونوندا سيّد خانيم يئددينجي دويونو ويريب، قيز ايسه پالتاريني يوخاري قالديرير. سيّد خانيم ايسه فرقلي أللري ايله قيفيلا دويونلنميش قئيطاني قيزين بئلينه باغلاييب، آناسينا دئيير: »سَفريسيني دوغاندا قيفيلي آچيب، آخار سويا آتاجاقسيز.«
منسه گؤزوم آلچالاردا، عاغليم سفري سؤزونه چاش‌باش قاليب. اوسته‌ليک، باش تاپا بيلميرم قيزين بطني‌هاردادي، نوطفه ياني نمنه؟ قيفيلي نييه آخار سويا آتاجاقلار؟!
بئشينجي پلاندا اودون بخاريسي‌نين چيرتاچيرت سسي ايله باغلي پنجره‌لرين ايچري اؤنونه دوزولموش چيچک‌سيز عطيرشاهي ايله شمعداني گولدانلاريندان قيش فصيلي اولدوغو معلوم اولور. سيّد خانيم توربا کيمي‌گئن بير دون گئييب، قونشو قيزينين کؤرپه‌سيني ياخاسيندان کئچيرديب، أته‌ييندن چيخاريب، نسه سؤزلر دئيير. سيّد خانيمين سسي کؤرپه‌نين ونگيلتي سسينده ايتير. سيّد خانيما باخاندا آديني اونوتدوغوم زيارتگاهدا گؤردويوم دليک‌لي داشلاري خاطيرلاييرام. اوردا دا کؤرپه‌لري داشين ده‌لييندن کئچيرمه‌سيني گؤرموشم. دييه‌سن سيّد خانيمين أللريندن علاوه، ياخاسي ايله أته‌يي ده آيري ياخا و أتک‌لردن فرقيليدي. سيّد خانيم کؤرپه‌ني اوچ ده‌فه ياخاسيندان کئچيريب أته‌ييندن چيخاراندان سونرا، اوچ‌بوجاقلي ياشيل مخمره تيکيلميش دوعاني ماوي بير مينجيق ايله برابر کؤرپه‌نين ياخاسينا سانجاقلايير. کؤرپه هله ده ونگيلده‌يير.
من ايسه چاش‌باش قالميشام. بيلميرم کؤرپه‌نين دؤشونه سانجاقلانميش دوعا باغليسي اونون بختي آچيلماق اوچوندو يوخسا محبت اوچون؟ بلکه ده اونون بئليني برکيتمک اوچون اولسون.
مين ايلدن قالميش مکتوبي آچان کيمي‌ياشيل قابيغين ايچيندن چيخارديغيم بوکولو کاغيذين لايلاريني آستا- آستا آچيرام. A4 بوْيونداکاغيذ أليمده، تعجّوبدن آغزيم آچيلا قالير. بوينوز چيخارتماسام ياخچيدي. کاغيذ اوزرينده يازيلميش دوعا بيک خودکاري ايله يازيلماييب. کامپيوترده تايپ اولونموش عربجه بير يازي‌دير.
هاوا گورولدايير. ياغيش شيديرغي ياغير. پنجره‌مين هئره‌سينده نه شمعداني گولو وار، نه ده عطير شاهي. آنجاق پنجره‌نين آياغيندا، ميز اوسته دوزولموش آفريقايي بنؤوشه‌لر بنت‌کونسول گولوندن بللي‌دير زامان گرک1396- جيايلين بيرينجي آيي‌نين 12- جي گونو اولسون.
Arazazarbaijzn.anadilimiz@gmail.com