ياغيش باشلادي يئنه اوره‌گيم سيخيلدي

آتام يابونون نوخداسين بوراخدي. نورالله ايله سالاملاشدي. آت بير آز آرالانيب اوتلاماغا باشلادي.نورالله‌نين بئزوو آرتيق وحشي جيرانا اوخشاييردي. بيرجوت زيل قارا پارلاق گؤزلري ايله بيزه همده يابويا سورغولو بير نظر ساليب اوتلاماغا داوام وئردي.
من او ديقيه کيمي سببين بيلمه‌دن کدرليديم. اونداکي نورالله‌نين دانيشيغيندان سببين بيلديم آرتيق مکدر اولدوم.دئمه آتامين پولا احتياجي اولدوغوندان نورالله ايله ايکي گون اول کليبرده قيرميزي يابونون معامله‌سين ياپموش، آل وئر اوچونده اوگونو برزوند يالين قرارلاشموشلار.
آتام اعتراض ائديردي کي: سن پول گتيرمه‌ليدين بئزو يوخ. بيز بئله دانيشماميشديق. نورالله‌نين کي سؤزلريندن بيرجور خواهيش و التماس ياغيردي دئدي: قيمتين هاميسي قدر پول الده ائده بيلمه‌ديم. سن بو بئزوو گؤتور قالانينا پولوم چاتار.آتام نورالله‌ني اوزوندن ده يازيق گؤردوکده راضيلاشدي. اونلار ال وئرديلر بير بيرينه معامله‌دن خئيير آپارماق آرزولادير.آتام آهسته قيرميزي يابويا طرف گئتدي. همان يابو کي اوزون ايللر، اوزاق يوللار ايستيده سويوقدا کليبر چايي يولوندا، آبش احمد، موتالليقدان بئله الينين عصاسي همده يول يولداشي اولموشدو. آراملا آتين بوينون قوجاخلادي.
او اوزوندن بو اوزوندن بيرده قاشقا آلنيندان اوپدو. تومارلاماق قصديله الين. بوينونا ,يالينا چکدي. سونونجي نوازش سونونجي تومار!.آت آراملا دؤندو منه طرف باخدي. سانکي نئچه آن باخيشي ايليشدي. گؤزون گؤزومدن چکه بيلمدي.
من او باخيشا تابلاشانماديم. اوزومو دوندرديم آرانا طرف. گؤز ايشله‌ديکجه مئشه‌لر چکيلميشدي. باخيشيم دوزداق‌دان علي آباد مئشه‌سيندن آشدي، آغيدان هيجران دوستدان ايکي چاي آغزي‌ناجان گؤردو. داها تارلاشدي هئچ يان گؤرونمه‌دي. گؤزومون ياشي قويمادي گؤرم. قويماديم آتام يا نورالله آغلاماغيمي گؤرسونلر. قهر بوغازيمي کسسيده ده سسيز آغلاييرديم. هم آغلاماقدان اوتانيرديم همده ايسته‌ميرديم گؤز ياشيمي اونلارين سئودالاشماسينا نحس گتيرن کيمي دوشونه‌لر.منيم اؤزومونده قيرميزي يابوينان آزماز يولداشليغيم اولموشدو. چوخ آلاتوران آخشاملار اونو مينيب بولاغدا سووارماغا آپارميشديم. اونون بئلينده بولاغدا شکيليمي گؤردوکده بؤيومک، کيشي‌لنمک حيسسي تاپارديم.
– بالا گئداق.آتامين بو سؤزو مني آييردي بوتون شيرين خاطيره‌لريمدن. امينم کي آتام اؤز گؤزيله آغلاماغيمي گؤره بيلمه‌سه ده اوره‌ک گؤزوايله گؤردي و هئچ نه دئمه‌دي. آخي بيلردي کي هيمه بندم.
باشيم آشاغي يول گئديرديم. يعني گئديرديگ. بيلميرديم هارا گئديريگ مهم ده دگيلدي. آز مدتدن سورا برزونده يتيشديگ. نورالله نين ائوينه. بللي اولدو کي نورالله بير چاي ايچمه‌يه همده قالان بورجون اؤده‌مک اوچون آتامي راضي ساليب ائوينه گئدک.بيزيم آران کندلرينده ائولر حصارسيز اولور، هاما تات کندلرينين چوخوندا ائولرين حصارديواري همده بؤيوک گيريش قاپوسو اولاردي.نورالله حيطينده بئزولا يابونو باغلاييب، قاباقلارينا بيرقوجاق اوت تؤکدي .
ايچري کئچکديک.نورالله نين من ياشدا بير بالاجا زيرنگ قيزي وارايدي. آنجاق بئش ياشي اولاردي ائله. چاينيکي سوايله دولدوردو قويدو اوجاغا.گؤزلريده ائله بيزولارينين گؤزو کيمي زيل قارا يامانجادا اورکک ايدي.
دوغروسو آرتيق معنالي. حيسس ائله‌ديم اودا من تکي آرامسيزدي. ايشلرين تله‌سيک گؤروردي. باخيشيدا بوتون سورغو سواللي.آتاملا نورالله صحبته مشغوليديلر. منسه گؤزومو کؤهنه پالازين ناخيشلارينا تيکيب يابونون اولماماقين اوزومله آراشيديريرديم.نورالله نين قيزي چاينيک الده ايچري گيردي. ايکينجي دفعه سيني ده استکان نعلبکي‌لري، صون دفعه ده بيرپارچا ايله توتدوغو چيني چايداني گتيردي.چيني چايدانا چاتلاديغينا گورا دميردن نئچه بند آتموشدولار.
مکتبه گئدندن سورا يئر کوره‌سينين مدارلارين گؤرنده او چايدان ياديما دوشردي.بيرآز قاينارسو ايله استکان نعلبکيلري ييخالادي. چيني چايداني گؤتوردي کي چاي تؤکسون. بير ملايم تبسم ايله منه باخدي. بو معناداکي :بويومون بالاجاليغينا باخما. ايشيمي بلدم. !منده او ساياق بير تبسوم ايله‌ديم.بيرينجي ايستکانا چاي عوضينه داغ سو بوشالتديقدا خجالتدن قيزاردي، سورعتله منه باخيب هؤنکوره هؤنکوره ائشييه قاچدي.من دونموش کيمي قالديم. اوشاغليق دوشونجه‌سي ايله بئله ظن ائله‌ديم کي چاي آلماغا پوللاري چاتمايير داغ سو ايچيللر بلکه. چوخ متاثثير اولدوم.سکوت حاکيم اولدو نئچه آن. نورالله اليله گؤزونون نمين سيله‌رک دئدي: باغيشلايين سيز آلله. ! اوچ آي قاباقدان کي آناسي اولوب، هردن هوشون ايتيرير. اونودوب کي چايدانا چاي آتسين. هم يتيمليک همده آناسي عوضينه ائو ائشيک ايشي! نه دئييم آخي !؟
درديم نئچه قات اولدو. بوغولوردوم سانکي. تکي نورالله دان توالت‌لرينين هاردا اولماسين سوروشوب اؤزومو ائشيگه سالديم.توالتده دويونجا آغلاييب تام يونگوللشديم. چيخيب حيطده ال اوزومو يويوب آرخاليقيمين آستاري ايله قورولاييب ايچري گيرديم.
نورالله نين قيزي چاي تؤکوردو. آتالاريميزدا ايچه ايچه صحبت ائديرديلر!.
اودا دئيه‌سن من تکي يونگوللشيب آراملاشمئشدي. بختيار وهابزاده دئميشکن: سني گوردوکده من البت ائله يونگولله شيرم بوشالير گويده بولوتلاردا دولاندان دولانا.ينه گولومسه‌يه‌رک ديققتله گؤزومه باخدي. باخيشيندان بو خواهيشي آنلاديم:هيچ يئرده بوگونکي سهويمي سؤيله‌مه لوطفن. ! من ده گولومسه‌يه‌رک اليندن چايي آليب باخيشيملا خاطرجمع اول دئديم.ال چوره‌ئي ايله قاتيقدا گتيردي. دويونجا يئيب ايچندن سورا زرنه يوردونا طرف يوللانديق.يابو حيطده باش آشاغا اوت يئييردي. نه او باشين قالديردي نه ده بيز آيريليق دردين تزه‌له‌مک ايسته‌ديک.آتام بئزوون بوينونداکي چاتيني چکيردي. بئزودا گاه گئديردي گاهدا دارتينيردي.
گوم گوما چاتاندا آرتيق گون باتيردي. قارا بولودون کؤلگه‌سي قويموردو اوزاقلار گؤرونسون. يکه دنه‌لي ياغيش بيربير باشلادي.يئنه اوره‌گيم سيخيلدي. بيرده بئزو دارتيناندا بوتون باش وئرنلرين آجيغين آوندان آچيب قارنينا موحکم بير تپيک ايليشديرديم.
بيرايلدن سورا او بئزووي ايئله ييلاقدا مئشه آراسيندا جاناوار يئدي. منده چوخلاري کيمي اون ايکي اوچ ياشيمدان شهره ک‌چدوم. ييلاق دا بير حسرته چئوريلدي. بو ياشدا هردن زرنه يوردونا اوشاقليقيمي آختارماغا گئده‌رم. صحرامايا چخارام. اوردان برزونده طرف باخيب اؤزومدن سوروشارام :گؤره‌سن ايندي نورالله‌نين قيزي هاردادي ؟!!
[email protected]