هؤرومچک کیشی

هؤرومچک کیشی

سحر خیاوی
آنادیلیمیز:آتا، من اوچون یئللنجک آسیرسان؟
کیشی سکسه‌نیب، لاپبادان ایکینجی قات اجاره ائولرینین ایوانینا باخدی. اؤزونو ایتیردی. اللری اسیب، بیر یوماق ایپ الیندن دوشدو. باخیشینی بیر آن آلتی یاشلی قیزیندان قاچیریب، قابارلی الی‌نین دالی ایله گؤزلرینده گیله‌لنمیش یاشی سیلدی. قَهَر بوغازینی کَسیردی. بیر شکیل اؤزونو توپارلاییب یئنی‌دن یوخاری باخدی:
– ه….هه، سنه یئللنجک آسیردیم بانو چیچه‌ییم! نه تئز یوخودان اویانمیسان بیر ده‌نم؟!
قیزین ساریشین، یومشاجیق ساچلاری سحر یئلینده، آغ اوزونده اویناقلاییردی. ماوی گؤزلری گؤیو، گؤزلرینده کی قیغیلجیملار ایسه اولدوزلاری یاریشا چاغیریردی. اوشاق بیر پارچا یاشام ایدی.کیشی سانکی بیرینجی دفعه گؤره‌ن کیمی قیزین اوزونه دونوخموشدو. او نه‌دن ایندییه کیمی تانریدان بخش اولان بو گؤزل- گؤیچک، ساغلام وارلیغی گؤرمه‌میشدی؟! یوخسا اوندان اعتناسیز کئچمیشدی؟!دوغرو کی، او یاشامین سَرت اوزوندن بئزمیشدی؛ چیر- چینقیللاردا یئریمک آیاقلارینی یارالاییب، اونو طاقتدن سالمیشدی. ایشسیزلیک، پولسوزلوق، ائو صاحیبی‌نین شماتتلی سؤزلری، آرواد- اوشاق شرمنده‌لیگی …..! بیر جیلیز گؤوده‌ده داها نه قده‌ر طاقت اولار کی؟!نه واخت ایدی سینیرلاری پوزولموشدو. گئجه‌لر فیکیردن، غصه‌دن یاتا بیلمیردی. پولسوزلوقدان عصب دوختورونا دا گئده بیلمیردی. چوخ فیکیرلشیب اؤزونو خلاص ائتمک ایسته‌ییردی. بونا گؤره ده ایپ حاضیرلیغی گؤرموشدو. بو گون عائیله‌سی آییلمامیشدان قاباق اؤزونو گیلانار آغاجیندان آساجاقدی؛ بیر کره‌لیک یاشامین همی- غمین‌دن قورتاراجاقدی؛ آمما قیزی‌نین گؤرونوشو اَل- قولونو سوستالتمیشدی.
– من آخماق هئچ مندن سونرا عائله‌مین باشینا نه گله‌جه‌یینه فیکیرلشمه‌میشم؟! بو کؤرپه مندن سونرا نئجه اولاجاقمی؟! او یازیق قادینی مگر سئوگی دولو اوره‌کله کنددن قاچیرمادیم می؟! اونو خوشبخت ائتمه‌یه سؤز وئرمه‌دیم می؟! کیشی ده بو قدر آلاخ- بولاخ، ایراده‌سیز اولار؟! من هله گنجم، قوللاریمین شیر کیمی گوجو وار. شوکورلر اولسون، عائله‌مین چوره‌یینی داشدان بئله چیخارا بیله‌رم.اؤزونده یئنی بیر گوج حیس ائدیب، قیزینا یئللنجک آسدی. سونرا ایسه اونلا باش- باشا قویسون دئیه، بئلینده کی قالین کئش قاییشی آچدی. او قاییشی، آغیر داش‌لار، کرپیج‌لر، یوک‌لر بئلینی سَرپمه‌سین دئیه، ایش واختی بئلینه باغلاییردی.کئش قاییشی دا او بیری آغاجا دویونله‌ییب، ایکی اللی یاپیشیب، قیزینا ساری هوووو…. هووووو دئیه یئللندی.
قیز دؤرد گؤز آتاسی‌نین اویونبازلیغینا حئیرتله باخیردی. بالاجا اللرینی آغزینا توتوب، نارین- نارین گولوردو. دهلیزین قاپیسینی آچیب: -»آنا…. آنا…. گَل باخ، آتام «هورومچک کیشی»اولوب…. آتام »هورومچک کیشین« اولوب…»چیغیریردی. کیشی یئلله‌نرکن اوره‌کله‌نیب: – «آتان کیچیجیک گولوشلرینه قوربان چیچه‌ییم!»دئییردی. بلکه یاریم ساعات دلی‌بازلیغی داوام ائتدی.« اؤزونو ده گولمک توتموشدو. سونرا آشاغی ائندی:
– من تزه چؤره‌ک آلماغا گئدیرم. آنانا دئه سماوری یاندیرسین. قالانینا دا آللاه کریم‌دیر.الینی آغزینا آپاریب قیزینا ساری شیپ- شیرین بیر اؤپوجوک گؤندردی.قیز آتاسی‌نین »آللاه نئجه کریم‌دیر« دئدیگینی دوشونمه‌دی، آمما کیچیک آددیملارلا، سئوینجک، آناسینی اویاتماق اوچون ائوه ساری قاچدی… یول اوزونو گؤزونده دونیا سانکی تزه‌لنمیشدی. قارانلیق اوره‌ییندن کؤچوب اومود گونشی کؤکسونده پارلاییردی. داغی داغ اوستونه قویماغا قادیر اولدوغونو سانیردی..ایندی ده هردن او سحرده کی آخماق‌یانا تصمیمی یادینا دوشنده، اؤزونو دانلاییر، هم ده دلیجه اویونبازلیغینی خاطیرلایارکن گولومسه‌ییر. او دوشونوب: »حیات بیر صاف یول دئییل،«چالا- چوخورو، ائنیش- یوخوشو دانیلمازدیر، آمما یاشام او قده‌ر گوزلدیر کی، یاشاماغا و یاشاتماغا ده‌یر. بیزلر یارانمیشیق‌سا، هر نمنه‌نین رغمینه، تانری، آناطبیعت بیزیم وارلیغیمیزی ایسته‌ییب، بو وارلیغی زده‌لمک بؤیوک سوچ‌دور. هر موشکوله اؤلومدن باشقا چاره وار. یالنیز اؤلوم چاره‌سیزدیر.

نوشته شده توسط admin در شنبه, ۳۱ اردیبهشت ۱۴۰۱ ساعت ۹:۰۱ ق.ظ

دیدگاه


+ هشت = 14