نوغول قابيندا ايکي باليق

 بير هفته اؤنجه سئل گلميشدي، اوتاق هله ده شئح ايدي. آتام کورسو توووندا ياتميشدي. گونش حَيَطين پالچيق ديواري اوستونده جان وئريردي. گونشين باتماسيني سئوميرديم. کاش هئچ واخت باتماسين، درسلريم اؤزـ اؤزونه يازيلسين، آتام يوخلاسين، آييلماسين. هر زامان آييلاردي بير باهانا تاپيب، بيزي دؤيردي.
شنبه‌نين هؤووشنه‌سي اورييمده ايدي. او قدر درس يازماق، چالما جدو‌لي ازبرله‌مک، داش اورکلي معليم، بير ده کوچه‌ده الده قاتيق ساتان کيشي‌نين سسي. ندن بيزي سئو‌ن بير کيمسه يوخ ايدي؟
اما وار ايدي. بعضي پيشي بالالار وار ايدي. گئجه‌لر گيزليجه ياتاق يئريميزه گتيررديلر. اللريميزي يالاييب، بيزه خورولدايارديلار. آنجاق اونلاري گؤزدن جايديراندا گئديب، آتانين آياغيني يالاييب، جيرماقلارديلار. آتا دا اونلاري توتوب حَيَطه توللاردي.
کوزه‌سي سينان يئتيم بير اوشاغين شعريني ميزيلداشيرديق. نئچه گون اؤنجه اؤلن سئرچه‌مي خاطيرلاديم. مکتبدن قاييداندا اؤلدو. يقين دؤزموشدو مکتب‌دن قاييدام، سونرا اؤلسون. من گلديکده بوزوشوب قالميشدي. فيشقا چاليب، چاغيرديم گلمه‌دي. يانينا گئتديم، باشيني قويدو يئره اؤلدو.گونش سؤزاليردي. آشورايا گئتسَيديم گونشين چؤرکچي‌نين ديواريندان يوخاري قالخماسيني دا گؤررديم. ائشييه چيخماغا حاليم يوخ ايدي.کورسو مني اؤزونه ياپيشديرميش‌ ايدي. آتام خورولداييردي. آج ايديم. اما آنا من ايله اکبري آندا وئرميشدي قابداکي چؤره‌يه ال وورماياق. آنا يالوارارکن دئميشدي:
ـ پيره، پيغمبره آند اولسون، بير داها چؤرک آلماغا پولوم يوخدور.
سونرا آرتيرميشدي:ـ دئيين امام رضايا آند اولسون چؤرک يئمَريک!بيز ده چؤرک قابي‌نين قيراغيندا دوروب، دئميشديک:ـ آنا جاني، امام رضايا آند اولسون چؤرک يئمَريک.
آنا توخودوغو گيوه‌لري ايش ييه‌سينه وئريب، موزدو ايله گئجه يئمه‌ييميزه يول اوستونده مال آياق‌ـ باشي آلماق اوچون فتير پيشير‌نلر بازارينا گئتميشدي. آنانين ايش ييه‌سي‌نين دوکاني باغلي اولسايدي اورَيي چوخ سيخيلاردي، ائوه کيمي آغلاردي.قاپي تايي‌نين اوزرينه ياپيشميش قزئته صحيفه‌سي يئلله‌نيردي. قزئته ده اوچ اوشاغين شکيلي گؤرونوردو. اونلار بير بؤيوک آييني قوجاقلاميشديلار. گؤزل کؤک بير آيي ايدي.
يئنه ده درس کيتابيميز دا شکيلي اولان يئتيم اوشاغين شعري ياديما دوشدو، اورَييم سيخيلدي.
بوغازيمين ايچينده بير زاد آشاغي‌ـ يوخاري گئديب، گليردي. بوغازيمدان يوخاري گلدي. سونرا اوزومده، هابئله گؤزلريمه اوتوردو. آرديجا گؤزلريمدن چيخيب، ياناقلاريمي قيزديردي. اليمين داليسي ايله اوزومو سيلديم. گؤز ياشلاريمين شورلوغو اليمين چاتلاقلارينا سيزدي، اليم آجيشدي.
قاپي آچيلدي. اکبر باشيني اوتاغا اوزاتدي، سونرا آياقلارينين اوجو ايله اؤنه يئريدي. آغزيني قولاغيما ياخينلاديب، پيچيلدادي:
ـ ايکي دَنه باليق آشورانين قيراغينداکي چشمه‌يه گليب‌لر. گليرسن گئدک اونلاري توتاق؟کؤنولسوز گئدک، گئدک، سس‌سيز اول آتا آييلماسين ـ دئديم.
يئريمدن ترپشديکده، کورسو يامان جيريلدادي. آتانين خورولداماسي کسيلدي. آز قاليردي باغريميز چاتلاسين. آتا يئره داياديغي چيينيني دَييشدي. قيريق‌ـ قيريق سسله اينيلده‌دي:
ـ آي الله، غضبيني بيزدن اوزاق ائله!
او حالدا اوتوروب، گؤزلريميزي کورسونون يوخاريسينا زيلله‌ديک. کورسونون اوستونه بير کلف گيوه ايپي ايله بير ايينه دوشموشدو. آتا خورولداماسي‌نين آرديني توتدو.
آياقلاريمي دره‌ـ دره گئديب، تاخچانين قيراغيندا اولان کيچيک نوغول قابيني گؤتوردوم. نوغول قابي‌نين بوغازي سينميشدي. اونو آشورادان تاپميشديم. اکبرله گئتديک. چشمه‌يه، يئتيشديکده باليقلاردان بير ايز گؤرمه‌ديک. اورييم توتولدو.اکبره: هارادادير؟ يئنه ده يالان دئدين اَيرينين بيري اَيري! ـ دئديم.
اکبر: اَيري اؤزون‌سن، يوزه‌ـ يوز، ليغين آلتينا گئديبلرـ دئدي.
اليمي ليغين ايچينه ساليب، آختارماغا باشلاديم. بير باليق ساري قويروغو ايله شاللاق ووردو.
اکبر سئوينجک يا امام زامان، اودو باخ!- دئدي.
نوغول قابيني سو ايله دولدوردوق. ايکيميزده چاليشيب، باليقلاري توتدوق.
گونش چؤرکچي‌نين دامي اوستونه چاتميشدي. ايکيندي چاغي‌نين کسيجي سويوغو اللريميزي کئييتميشدي.
سس‌سيزجه اوتاغا گلديک. آنا گلمه‌ميشدي. اوتاق بير آز قارانليقلاميشدي. آتا هله ده خورولداييردي. قزئته‌ اوزرينده اولان اوشاقلار ايتيب‌، يوخ اوموش ايديلر. سس‌سيزجه کورسونون تووونا تپيلديک. اوزوقويلو اوزانيب، نوغول قابيني قارشيميزا قويدوق.
باليقلار ديرنميش گؤزلري ايله بيزه باخيرديلار. اکبر اليني اوزاديب، نوغول قابيني اؤز قاباغينا چکدي. من بير داها اونو اؤزومه دوغرو چکديم. اکبر ازيله‌ـ ازيله: اؤزوموندو ها!- دئدي.
اوندان اينجييه‌رک: نوغول قابي منيمدي. اؤزو ده اونلاري سنه من توتموشام – دئديم.
قيوراق دئدي: – اؤزوموندو، اؤزوموندو. اوّل من تاپميشام.ياواش دئديم: – اوندا منيم نوغول قابيم‌مي نه اولسون؟»ايندي گئديب، بير کاسا گتيرر‌م« دئيه جاواب وئردي.
آياغا قالخماق ايسته‌ديکده آياغي مانقالين کؤزونه توخوندو. آتانين خورولتوسو ياريچيق قالدي. آجيغيمدان اکبرين يومشاق، قانسيز دوداغيني توتوب، سيخديم. حيرصيمدن تيتره‌ييرديم.اکبر بوغاناقلي باغيرتي ايله: آي، آي…! – دئدي.کورسو ترپشدي. آتا باشيميزين اوستونده دورموشدو. گؤزلري باليقلارين گؤزلرينه تاي اولموشدو. قورخومدان کورسويه تپيليب، آلتدان يورغاني برکدن چنگله‌ديم. يورغانين اوستوندن ايکي يومروق باشيميزا ائنديريلدي. يورغاني بوراخيب، چيغيراـ چيغيرا ائشييه قاچديق.
نوغول‌قابي آتانين الينده ايدي. قاپيني آچيب، اونلاري حَيَطه توللادي. باليقلار يئر اوزرينده چيرپينيرديلار. دام اوستونده بير قارقار قاريلداياراق حَيَطه قونوب، باليقلاري بيرـ بير گؤتوروب، آپاردي.
اوزاقلاردا گؤيده‌کي بولودلار قاراليرديلار. قارانليقدا دام يولونون پيللکن‌لرين‌ده چؤمبه‌ليب، اوتورموشدوق. بوغازيمدا دويونلنميش قَهَر دولو پيچيلتيلاريميز قارانليغين درينليينه آخيردي.
– سنين تقصيرين ايدي./– سنين سوچون ايدي./– سنين گوناهين ايدي./– سنين آخماقليغين ايدي.
اورَييم سيخيليردي. آشورادان دؤيولموش بير تولانين سسي گليردي. آنا گلمه‌ميشدي اولا بيلردي ايش ييه‌سي‌نين دوکاني باغلي اولدوغو اوچون دوکانين اؤنونده هله ده اونو گؤزله‌يَرک، اورادا اوتورموش اولسون.
Arazazarbaijzn.anadilimiz@gmail.com