ناغيل شيرينليگي، چؤره‌ک عطري

گونلرين بير گونونده تنديريميزين تؤکولوب داغيلان بير چاغيندا، آنام دئدي:
– آي منيم نازلي بالام، آرتيق داها تنديريميز تؤکولوب، داغيليبدير. گل گئده‌ک تندير تورپاغي گتيره‌ک و يئني‌دن بير تندير قوياق!
دئديم :
– آي آناجان، تندير تورپاغي نه‌دير؟
آنام دئدي:
– گول بالام، بير قيرميزي تورپاغدير. ياخشي بير پالچيغي اولار و اوندان گؤزه‌ل تندير قوروب قويماق اولار. بونون اوچون ده بو تورپاغا تندير تورپاغي دئييريک.
اوزون سؤزون قيساسي؛ يولا دوشدوک. کندين شمال تاييندا بير تپه وارييدي. تپه‌يه دوغرو يوللانديق؛ يئتيشديک مقصده.
تپه‌نين چوخلو يئرلري قازيق _ قازيق ايدي، من سوروشدوم:
– آناجان ! بو تپه نه‌دن بؤيله قازيليبدير؟
آنام سؤيله‌دي:– دوزلو بالام، بو تپه‌نين تورپاغي چوخ ياخشي قيرميزي تورپاق اولدوغو اوچون کندين هاميسي بوردان تورپاق آپاريرلار.
آنام‌لا بيرليکده يئري قازيب، بير اوزون قولاق ايله بير قاتير يوکي قده‌ر تورپاق گؤتوروب، ائوه قاييتديق! باشلاديق پالچيق توتماغا و پالچيغي بوللو آياقلاماغا.
بيرگون پالچيق يئتيشديکدن سونرا آنام باشلادي تنديري قويماغا.
نهايت تنديريميز دوزه‌ليب، بيتدي. سونرا آنام تنديرده اود يانديريب، اونون پالچيغيني تام پيشيريب، ساخسي‌دک برکيتدي. بير نئچه گون کئچدي. آنام خمير دوزلديب، يئني قورولموش تنديريميزده چؤره‌ک ياپدي.
آنام يئددي نؤوع چؤره‌ک پيشيرمه‌ني چوخ ياخشي باشاريردي: »ساج لاواشي«، »تندير لاواشي« و بئش نؤوع قالين چؤره‌ک: »يالين قالين« (خميرايله پيشيريلن قالين چؤره‌ک)، »ياغلي فتير« (ساري ياغ ايله مايالانميش خميردن پيشيريلن قالين چؤره‌ک) »سوت فتيري« (سوت ايله مايالانميش خميردن پيشيريلن قالين چؤره‌ک) »قاتيق فتيري« (اوزونه قاتيق ياخيلميش خميردن پيشيريلن چؤره‌ک.
بو فتير هاميسيندان آرتيق قيزاراردي)، »ته‌ته« (ياز چاغيندا داغ تره‌سي، او جومله‌دن: ياغليجا قاز آياغي، ماندا، سيغيرديلي و باشقا دادلي _ يئملي بيتگي‌لردن قاتيلميش خميردن پيشيريلن قالين چؤره‌ک.
آنام بو بيتگي‌لري داغدان توپلاياردي.)
بو چؤره‌ک نؤوع‌لري کنديميزين ده‌ييرمانيندا دارتيلان کپک‌لي اون‌دان حاضيرلانديغي و تندير ياناجاقلاري آغاج و تزه‌ک (مال- داوار فضولاتي) اولدوغو اوچون چوخ دادلي اولاردي.
آنامين تنديرينده چوخلو شيرين آن‌لاريم اولوبدور. ياز ايله ياي دا مکه، ات کابابي، يئرآلما کابابي پيشيررديک؛ پاييز و قيش‌دا ايسه چؤره‌ک ياپاندان سونرا هاميميز بيرليکده آياقلاريميزي تنديره ساللاييب، آنام ايسه بيزه ناغيل دئيردي! ناغيل شيرينليگي چؤره‌ک عطرينه قاريشاردي.
او گونلر بيرده قاييتسايدي… کاش!!!
.Arazazarbaijzn.anadilimiz@gmail.com