شهريم ديل آچان گئجه

دوروب، قيزلارين ايچين‌ده، گؤزلريم‌له اونو آختاريرام. گيله‌نار آغاجي‌نين آلتين‌دا، يئتيشمه‌ميش تورش گيله نارلاري يئيه، يئيه منه أل ائليير. آغزيم سولانير. باشيمي ساغا-سولا ترپه‌ديب، سول أليمي، نه دئيرسن؟ دئيه آچيرام.
-تا تاا تا تاا، مين اوچ يوز يئتميش بئش، درس ايلينين سونوو. بيله‌جه، دبيرستانين ايلک صينيفين بيتيرديک. آيدا گؤيه آتيليب، قيشقيرير. هارا قاچيرسان، دئيه‌سن سون ايمتاحاني وئرميشيک ها، گل بورا ايندي قيزلار دا امتحان‌دان چيخارلار ، بيراز دئييب-گولک.
-يوخ، من قالا بيلمه‌رم، تله‌سيرم. گئدريم ائوه چمدانيمي باغلييام. آخشام چيخيريق سلماسا، خاور ننم گيله.
-ياخچي بابا گئت. سلماس دليسي. اوردا نه وار بير بئله سئوريسن اوراني.
-روحوم، عشقيم، خاور ننم. باغيريب گولدوم. و اونون صانديغي، ديل آلتي ميزيلداديم. بو ايل من اون بئش ياشيما دولموشدوم و او صانديغين قاپيسي منه آچيلاغاعيدي.
-خاور ننه دئينده گور نه گؤزلري پار-پار پاريلداير. سن الله بو دفعه خاور ننه‌ن تبريزه گلنده، منه ده دئنن گليم گؤروم بيله‌سين. بلکه اونو نيه بوقدر چوخ سئودييني بيلديم.
-ساغ أليمي قووزاييب، آيدايلا خداحافيظ له شيرم.
باقاژي چمدانلا تيخيلميش، ياشيل رنگلي دؤرد يوز بئش پژوموزدا اوتوروب سلماسا ساري يولا دوشدوک، آتام بير کاست آتدي ماشينين ضبطينه، «کوچه‌لره سو سپميشم/ يار گلنده توز اولماسين»، رشيد بهبودوفون ماشينا جالانميش يوموشاق سسييله و ماشينين نَني کيمي ييرقالاماسييلا، بئشيک‌ده لايلايلا خومارلاشان اوشاق کيمي، گؤزلريمي يوموب درين بير يوخويا دالديم، گؤزلريمي آچان‌دا، يام-ياشيل آلما باغلارينين آراسين ‌دان کئچن يول، سلماسا ياخينلاشما موشتولوغونو وئريردي بو شهره گلنده آنامين اوزونه بير آيري گؤزلليک اوتوروردو. قومرال گؤزلري داها آيدين باخيردي. گولوشو داها دادلانيردي. آغ دريسي، جانلانيب، آينا کيمي دورولاشيردي. بلکه ده آنامين بو فرحلي احوالي، اوشاقليق چاغلاريم‌دان مني بو شهره ماراقلانديريب، گؤرونمز بير ايپله مني بورا چکيردي. شهرين ايچينه گيرديک، دوم‌-دوز، گئنيش، خيابانلارين‌دان کئچديک، خيابان بويونجا دوزولموش هوندور آغاج‌لارين کؤلگه‌سي، اورتادا سرين بير تونل چکميشدي ، هردن ده ياشيل بوداق‌لارين آراسين‌دان بويلانان گونش، اوزومه دوشوب، گؤزلريمي قاماشديريردي. ميللي مسجيدين دالين‌داکي خيابانا يئتيشديک، آکاسييا آغاجي‌نين گول‌لرينين اييي، خاور ننه گيلين دربندين بوروموش. ماشين‌دان يئنيب، هر تاين‌دا بير دمير لاله گولو اولان، ماوي قاپيني چالديم.
-قاپي چالان؟ کيم‌سن؟
جواب وئرمه‌ديم. قاپي آچيلدي، خاور ننه‌نين اورتا بويلو گؤوده‌سي، آغ بنيزي، قومرال بويانميش قيسا، قيوريم ساچ‌لاري، قاپينين آراسين‌دان گؤرسندي. بوزا چالار گؤز گيله‌لري شوق دان تيتره‌دي. هميشه‌کي کيمي سليقه‌لي گئينميش. کرم کؤينک، فون ميدي أتک. قوجاليغينا رغما هله ده فرم‌دا اولان آياق‌لارينا، أت رنگي جوراب چکميش. قولاق‌لارين‌دا دا منيم چوخ سئودييم، ياقوت سيرغالاري نارين‌دان تيترييردي.
-الله‌يم، بالا گلميش، لاله‌م گلميش.
خاوو ننه مني برکدن باغيرنا باسادي. ايچري گيرديک، حيطي بوروين مور سالخيملي، ياسمن گولونون ايي بورنوما دولدو. تزه‌جه سولانيب، سوپورولن حيطين اورتاسين‌داکي فوواره‌دن هاوايا آتيلان سو داملالاري، اوز-گؤزومه سپيلب، جانيمي تزه‌له‌ييردي. خاور ننم قيرميزي پالازي، حيطين بير کؤشه‌سينه سريب، قيزيلي ساماواريني قورموش. اوتوروب، دادلي کومور چايين‌دان ايچيب، دينجيميزي آلان‌دان سونرا، ايلک ايش دوروب خاور ننه‌نين اوتاغينا گئتديم. تاريخ قوخويان او اوتاق، مني بو دونيادان قوپاران اوتاق.
توتقون کت-شلوار، آچيق رنگلي کؤينک گئيينيب، بير جيزگيلي کراوات تاخيب، باشين بير آز سول طرفه اييب. احمد بابا، ديوارداکي، آغ-قره شکيل‌ين ايچين‌دن منه باخير. دانتل پرده‌دن سوزولن گونشين ايشيغي، شکارگاه ناخيشلي لاکي قالي‌نين اوستونه سريليب. سول طرف‌ده بويوک بير کيتابخانا، کيتابخانانين اورتا رفين‌ده، خاورر ننه‌نين معليمليک دؤرونه عاييد، نئچه چرچيوه‌لنميش شکيل، يانين‌دا دا بير ايري گوللو قهوه‌اي مبل وآياق‌لاري گؤزلجه اويولموش، جئيران آياغينا اوخشار بير ماسا. ساغ طرف‌ده ده اوستو، بوتالي تيرمه‌يله اؤرتولموش أسکي بير صانديق. ايل‌لر بويو ايچين‌ده‌ نه اولدوغونو مراک ائدييم، خاور ننه‌نين خزينه آدلانديرديغي او صانديق. خاور ننه‌نين، آتاسي‌، احمد بابانين صانديغي.بئش-آلتي ياشيم اولاردي، ناهار اوستويدو، ائو اهلي ياغلي أرزيمان کوفته‌ سي‌ني يئين‌دن سونرا، هره‌سي بير طرف‌ده اوزانيب، مورگولييرديلر.داييم قيزييلا بيرليک‌ده فورصت‌دن يارارلانيب گيزليجه، خاور ننه نين اوتاغينا گيرميشديک . «صانديغين آچارينين يئرين تاپميشام» داييم قيزي سارا، دئميشدي. خاور ننه‌نين معلليم‌ليک چاغ‌لارينا عاييد اولان چرچيوه‌نين دالين‌دان، پاسلانميش، باشي گيرده بير آچار چيخارتمش. باش و شهادت بارماغي آراسين‌دا توتوب، دجلليکله گولموسه‌ييردي. آچاري ألين‌دن قاپيب، صانديغا ساري شيغيديم. صانديغي آچديم. يئريم‌ده قورودوم. همشه خياليم‌دا بو صانديغين ايچي، قيزيل، رنگ‌به‌رنگ باهالي داش‌لار، موجهرلرله دولويدو، امما ايندي قاباغيم‌دا بير يغييم روزنامه، نئچه آلبوم، بيراز دا نه اولدوغونو باش تاپماديغيم کار-کاغاذ واريدي. مدرسه‌يه گئمه‌سم‌ده الفباني اوخويا بيليرديم. روزنامه‌لرين بيرن گؤتوروب، باشين‌داکي، ايري حرف‌لرله يازيلميش سؤزجوکو اوخودوم. آژ ژ ژ ي ي ي ر.ياني بمباران اولان‌دا، بو روزنامه‌ده يازار؟ سارا دئدي.چيين‌لريمي آتيب، دوداغيمي أيديم. بيراز کارکاغاذي قوردالاييب، آيدايلا، »ائله بو« دئميشجه سينه، بير-بيريميزين اوزونه باخديق. ائله بو آن‌دا قاپي آچيليب، خاور ننه ايچري گيردي. دؤنوب، هوروت-هورت اونون اؤزونه باخديق. قاشلاريني چاتاراق، باشيني ترپتدي. او گؤزل ياقوت سيرغالاري قولاغين‌دا اوينادي. »باخ، باخ سن الله. قيزلار سيز نه ايش گؤرموسوز؟ آچميسيز صانديغي، تؤکموسوز پامبيغي«.-يوخ والله خاور ننه بيز پاميق تؤکمه‌ميشيک يئره، باخ هئچ صانديغين.ايچينده پامبيق يوخدويدو« سارا باغيرا-باغيرا دئدي.خاورننه گولومسه‌ييب. گليب اوتوردو يانيميزدا.-»هن، سونون‌دا بيلديييزي ائله‌ديز. منيم خزينه‌مي آچديز راحاتلاديز مي؟».
-»خزينه هاردايدي خاور ننه، بوردا کار-کاغاذ دان باشقا، هئچ بير شئي يوخدور. بيز دئييرديک بلکه بو صانديغين ايچي، پوللا، قيزيللا دولودور.« خاور ننه‌نين، گولومسه‌مه‌سي و يوموشاق لحنينن اورکلنميش سارا دئدي.
-بوکارکاغاذلار منه پول‌دان دا، قيزيل‌دان دا چوخ ديرليدي قيزيم. سونرا، سانکي اؤزويله دانيشيميش کيمي، يانغين‌دان قورتورولموش تاريخييميزدير بونلار، ديل آلتي ميزيلدادي. کاغاذلاري بيزيم أليميزدن آليب، صانديغا قوياراق، قاچين گئدين حيط‌ده اويناين، دئدي.
صانديغين ايچين‌ده‌کيلر سارانين هئچ ايلگيسيني چمکه‌ميش، بيزيم صحبت‌لرييزي سايمازدان گليب، دورودو، حيط‌ده توپ اويناماغا گئتدي.-خاور ننه مگر اولار؟ بو روزنامه‌لردن منيم آتام گون‌ده آليب گتيرير دا، اوخيان‌دان سونرا دا آنام اونلارلا شيشه سيلر. بونلار نجور قيزل‌دان ديرلي اولا بيلرلر؟-اولار بالا، اولار. او گون‌لردن قالان هرنه، قيزيل ديرين‌ده. بو روزنامه‌لر او سن دئديين روزنامه‌لرله، بير ترزييه قويولماز. بونلار منه هم آتا ياديگاريدير، هم ده ياشاديغيميزآجي، دادلي گون‌لرين سنديدير. ايدي دور گئت حيط‌ده سارايلا اوينا. سن بونلاري هله باشا دوشمزسن.– ننه، قوي بيراز بو آلبوم‌لارا باخيم دا نه اولار.