ايچيمده طوفانا بنزر بير حس دولاشير

ايش يئريم شهردن کنار اولدوغوندان ايش زاماني اوزون اولور. سحر ساعات يئديدن آخشام بئشه قدر گوجلو ايش رژيمينده چاليشماقدان، ائوه چوخ يورغون گليرم. بير-ايکي ساعات دينجلندن سونرا اؤزومه گله ‌بيليرم.
چاي استکانين آغزيما آپاريرديم، جيب تلفونوما زنگ گلدي. باخديم، نومره تانيش دئييلدي. تماس دويمه‌ني اشاره‌له‌ديم:
– بويورون!– سيزسيز؟– بلي، اؤزومم، ائشيديرم سيزي. بويورون!– ائله بيل تانيمادينيز.– يوخ! مگر بيز تانيشيق؟ بس اوندا نومره‌نيز نييه تانيش گلمه‌دي.– تانيشليغميز ايندي دئييل، لاپ قديم تانيشلاردانيق.
قالدي تلفون نومره‌سينه، بو نومره ائله ايلک دفعه‌دير کي سيزين تلفونوزا دوشور.– ياخشي، ايندي من سيزي نئجه خاطرلامالييام؟ سسينيزين‌هاراسينداسا بير دوغماليق دويورام. بلکه بير ايپ اوجو وئرسه‌نيز.– ايپ اوجو…. »نار آغاجي«.
– دوزونو دئييم. بير شئي آنلاماديم. خواهش ائديرم مني بوندان آرتيق اينجيتمه، آپ-آيدين دئيين گؤروم کيمسينيز ؟– ناراحات ائتمک فکريم يوخدور. سني ده قيناميرام. گؤر نئچه ايلدير گؤروشموروک.
ايچيمده نسه بير هيجان، دئمه‌لي طوفانا بنزر بير حس دولاشير. »بو، کيمدير؟« سوالي بوتون هوجئيرلريمه هوپدو….– مني باغيشلايين. آخي قوجالميشام. يادداشيمدا ضعيفله ييب. مني بوندان آرتيق اذيت ائلهمه. دئه گؤروم کيمسن؟–
يوخ…. سني اينجتمک منيم بئله هئچ آغليما دا گلمز و بوندان آرتيق ايسته‌ميرم نگران دا قالاسان. من فلانکسم. ايندي ده آتامگيلدن سنه زنگ آچميشام. گل گؤروشک.– واي….واي….جانيم سنه قوربان اولسون….! اورهييمه نور سپه‌لندي. گليرم… ايندي گليرم….
***
اوشاقليق يولداشي ايديق. ابتدايي و اورتا مکتبي بير يئرده باشا وورموشدوق. آراميزدا دايم رقابت آپاريرديق. مکتبده بيرينجيليک قازانماقدان اؤتري دريدن-قابيغدان چيخارديق. درسلريميزي بير يئرده حاضرلايارديق. چوخ واخت معلملريميزده بيزه شبهه ايله ياناشارديلار. امتحان سالونوندا بيزي آييريب، آرالي اوتوردارديلار.
اورتا مکتبين سونونجو صينيفينده اوخويوردوق. عذابلي گونلر باشلانميشدي. ارديبهشت آيي‌ايدي. ايشچيلر گونو مناسبتيله قورولان مراسيمده بير چوخ‌لاري کيمي‌توتوقلانميشديم.
يولداشيم ايسه بير مدت گيزلي حيات سوردوکدن سونرا نهايت اؤلکه‌دن چيخيب، سونو گؤرونمه‌ين بير مجبوري مهاجرته اوز قويموشدو. ايندي اوتوز ايلدن سونرا او وطنه قاييتميشدي. آتاسينين ائوي ياخينليقدا ايدي.
تئز پالتاريمي‌دييشيب، اؤزومو اورا يئتيرديم. ايچري گيرديکده قوناقدان يئر يوخ ايدي. اوتورانلاردان ساوايي آياق اوسته دايانانلار دا وار ايدي. بوتون اورادا اولانلارلا تانيش ايديم. ايره‌لي گئديب قول-بويون اولدوق. اوتوز ايلين حسرتيني جانيميزدان چيخاريرديق. سئوينجدن گؤزلريميز ياشارميشدي. بو عاطفي منظره مجليسه تاثيريني بوراخميشدي.‌
هامي‌کؤورلميشدي.گئجه چوخدان ياريني کئچميشدي. قوناقلاردان گئدني اولسا دا، قالانلار دا وار ايدي. هله من ياخيندان، ايستکلريمدن، سئوينج و کدريمدن اونا دانيشا بيلمه‌ميشديم. دوستومو يورماييم دئيه، اياغا قالخديم.
يئنه قول-بويون اولدوق. صاباح منه خصوصي بير واخت آييرماغيني اوندان خواهش ائتديم. ايسته‌ديم کي يالنيز ايکيميز اولاق.
***
سحر يوخودان آييلديم. ايش يئريمه زنگ ائديب، اجازه آلديم. دوستوما زنگ آچيب، گؤروشمهييميزي ايسته‌ديم. آخشام اوستو ساعات بئش‌ده قرارلاشديق. واختا بئش دقيقه قالان اونون آتاسينين قاپيسيندايديم.
شهري راحات دولانيب و راحات دانيشماغيميز اوچون ماشينلا گئتميشديم. قاپينين زنگيني ووروب، خبر وئرديم، کوچه‌ده گؤزلهديم. تئز حاضرلاشيب، کوچهيه چيخدي. ماشيندا اوتوروب اورادان-بورادان صحبت ائديب، کئچميش خاطره‌لريميزي الک-ولک ائديرديک.
شهر بالاجا، يئني قورولموش اولدوغوندان، بير ساعات مدتينده، بوتون کوچه و ميدانلاريني دولاشديق. او شهرين بؤيومه‌سيني وورغولادي. منسه دئديم: »هه، شهر بؤيويوب، گؤر نئچه ايلدير گؤرمه‌ميسن. ائله من ده قوجالميشام«. شهرين کنار ميدانيندا بيردن-بيره آغليما بير فيکير گلدي. ماشيني کنارا وئريب، ساخلاديم.
دؤنوب اونون دوز گؤزلرينين ايچينه باخديم. ممنونلوغونو دويدوم. دئديم: »بسدير شهري دولانديق. گل سني بير يئره آپاريم. آنجاق سوروشما‌هارا، اؤزون هرنهيي باشا دوشه‌جکسن«. او ياخشي دئييب، راضيليغيني بيلديردي. شهردن چيخديق.
کنديميز شهردن آرالي ايدي. او وقت‌لر، يئني-يئتمه چاغلاريميزدا کندده اورتا مکتب اولماديغيندان شهره گئديرديک. کندله شهرين آراسي بوم-بوش واديليک ايدي. پاييز و قيش فصللري کنده قاييداندا قارانليق دوشردي و بو واديليک بيزيم جانيمزا قورخولار سالاردي. بير-بيريميزدن آيريلمازديق.
چاليشارديق بو واديليگي بير يئرده يول گئدک. يول بويو اوجادان دانيشار و بعضاًده ماهنيلار اوخويارديق. ايندي بو واديليک آسفالت يول و هر ايکي طرفدن شهره بيرلشيب. کنده چاتديق. بوتون کند اونون نظرينده غريبه ‌ايدي.
»بيلميرم من قوجالميشام، يا کند دييشيليب. هئچ بورالار منه تانيش گلمير.« -دئييب کؤکس اؤتوردو. منسه اونون دئديگيني باشا دوشوردوم. بو اوتوز ايل مدتينده کندين قديم ائولري و حيط-باجالاري سؤکولوب، يئنيدن تيکيلميشدي. کوچه‌لرين اَيري-اويرولويو، دوز ائديليب، سليقهيه سالينميشدي.
دئديم: »تلسمه، سني بير يئره آپاريرام، بو اوتوز ايلده هئچ نه دييشمهييب. سنين و منيم اوشاقليق و يئني-يئتمه‌ليک خاطره‌لريميزين چوخو ائله اورادا قاليب«.
کندين اصلي يولوندان سولا بورولدوم. بيرآز گئدندن سونرا بيردن-بيره اوشاق کيمي‌قيشقيردي:– باخ اورا… قدير آغانين ائويدير. ائله حيط قاپيسي دا، قاپينين بوياسي دا… هئچ دييشمهييب.منسه يولا داوام ائديرديم.
آز کئچمه‌دن اونلارين حيط قاپيسيندا ماشيني ساخلاديم.– بورا دا او دئدييم يئر و بيزيم اوشاق و يئني-يئتمه‌ليک دؤروموزون، آجيلي-شيرينلي گونلريميزين شاهدي.
دروازا قاپيسينا طرف ياخينلاشيب بالاجا بير حرکتله قاپيني آچديم. دروازانين يان-يؤره‌سي شيطان تورو باغلاديغيندان بير آز دا اورپشديم. ايچري کئچديک.
يئيه‌سيزليک و ساکتليک حاکيم کسيلميشدي. قاپي-باجاني اوت باسميش، بوتون پنجره‌لر و بور-بوجاقلار شيطان تورونا بورونموشدو.
حيطين اوجقاريندا اولان باغلي باغاتلي ساحه‌دن اثر-علامت قالماميشدي.
او باغلي-باغاتلي و بيزيم اوشاقليق خاطره‌لريميزين مکاني، بؤيوک بير کؤشني خاطيرلاديري. ايللرله انسان آياغي بورايا ديمه‌ديگيندن، وحشي طبيعت گؤرکمي‌آلميشدي. بينالار سالخاق-سؤکوک وضعيته دوشموشدو. او حيرت ايچينده گؤزلري بره‌لي منه باخيردي…
حيطين کونجونده اولان کؤهنه کتيلي گتيرديم. اليمده اولان قزئتي کتيلين اوستونه سرديم. تکليف ائتديم اوتورسون. اؤزوم اونونلا اوز به ‌اوز بير داش اوستونده اوتوروب، سيگارتيمي‌چيخاريب، يانديرديم. بير قوللاب ووروب دئديم:
– سن گئده‌ني آنان چوخ اوزولدو. صبر-قراري توکندي. گئجه-گوندوز آغلاماقدان گؤزلرينده ياش قالمادي. آخيردا آتان مجبور قاليب شهره کؤچدو. بورا دا ائله گؤرورسن نئچه ايلليکلرين توزو آلتيندا قاليب، حسرت مکانينا دؤنوب.
او بيردن آياغا دوردو. حيطين اورتاسينا طرف يئريدي. قوروموش، اتکلريني کول-کوس باسميش بير آغاجين يانيندا دايانيب منه اوز توتدو:– بو آغاج ياديندادير؟–
هه… او قدر اونون ناريندان يئميشيک کي. حيف قورويوب، يوخسا ايندي گول وقتيدير. قوروماسايدي، بو وحشي طبيعتي گؤزللشديريب و بيزيم گؤزوموزو اوخشاردي.– داها نهيي يادينا سالير؟–
اونون آلتينا پالاز سريب، اوتوروب درسلريميزي حاضرلاماقدان ساوايي بير آيري فيکير ياديما گلمير.يئنيدن قاييديب، کتيلين اوستونده اوتوردو. مندن بير سيگارت آليب يانديردي. ايلک نفسي سيگارتدن آليب اوفوردو. اوزاقلارا ذيلله‌نرک:– سنين توتولما خبريني خليل منه دئدي. ائوده ايديم، حاضرلاشيرديم خالام گيله گئديم. سوروشدوم نه واخت؟
ائله بيرآز بوندان قاباق، گون باتار-باتماز بير ماشين گلدي. کندين اورتاسيندا ايلشديريب آپارديلار.
من ده دايانمادان گلديم سنه خبر وئريم -دئدي. تئز آياغا قالخديم. آتامين موتورو قاپيدا ايدي. ايشه ساليب، سيزه يوللانديم.
خبر هله سيزين ائوه چاتماميشدي. آناني نگران سالماماق اوچون، گلديم کتابلاري آپاريم -دئييب، ايچري گيرديم. باشلاديم کتابلاري سئچمهيه. اوچ کيسه کتابلاردان آييريب، موتورون ترکينه مؤحکمجه‌سينه باغلاديم. قالان کتابلاري دا آپارديم تنديرخانايا، تنديره تؤکوب اود ووردوم.
بو زامان آنان هر نهيي باشا دوشموشدو. مندن سوروشاندا، »ناراحات اولما! اللرينده اساس يوخ دور. بير ايش گؤره بيلمزلر. دؤزوملو اولون. منيم ده بورا گلمهييمي‌هئچ کيم بيلمه‌مه‌ليدير.« -دئييب، ساغوللاشديم.
کندين کناري ايله ائوه گلديم. ائوده هئچ کيم يوخ ايدي. آنام، آتام و اوشاقلار خالام گيله قوناق گئتميشديلر. من ده گئتمه‌لي ايديم. فکريمي‌بير يئره توپلايا بيلميرديم. بيليرديم سندن سونرا منيم آرخامجا گلمه‌ليديرلر.
بيردن-بيره حيطين کونجونده، کولونگ گؤزومه ساتاشدي. تئز گؤتوروب همن بو نار آغاجينين ديبين قازماغا باشلاديم.
درين بير چالا قازاندان سونرا کتابلاري اورادا قويلاييب اوستونو تورپاقلاييب چر-چپرله اؤرتدوم. ال-اوزومو يويوب خالام گيله گئديب، ياتماغا دا ائوه دؤنمه‌ديم. دوشوندويوم کيمي‌مني ده آختاريرديلار…..او دانيشيردي.
منسه »ايکي دفعه معاصر تاريخده کتابلاري يانديريب، محو ائديبلر. ايلک دفعه ملي حؤکومت دئوريلندن سونرا شاه اصول اداره‌سي طرفيندن، و بو دفعه ده ملتين ائولادلارينين اؤز الي ايله.« قناعتينه گليرديم….
Arazazarbaijzn.anadilimiz@gmail.com