آنا! جومله‌لريمي آرد- آردا قوشا بيلميرم سؤزسوز قاليرام

چونکي بورجونو، اذيتيني اؤده‌يه بيلمه‌يه‌جه‌ييميز انسان‌ين حاقيندا يازماق‌لا، عوض اؤده‌نمير.
ايندييه قدر چوخ ده‌يرلي شخصيت‌لر آنا حاقيندا يازيب. شعر يازان، مقاله يازان، رُمان يازان، ماهني بَـسته‌له‌ين و باشقا…
سانکي يازا بيلن، يازماق ايسته‌ين هر کس ياراديجيليغيندان موطلق بو باشليق‌دا يازي ايسته‌يير.
منده يازمالي‌يديم. يازديم. دوزدور، اولا بيلر کي، گئج اولسون آما سندن يازماق اوچون، آنام اؤزومو حاضير حيس ائتمه‌ليديم. اؤزومو ده قلميمي ده، سؤزومو ده!
کيمي بو يازيني آناسيني چوخ سئوديييندن يازير، کيمي‌سي آناسي‌نين يوخلوغوندان اينجي‌ديييندن، کيمي‌سي آناسينا اؤزونو بورجلو حيس ائتديييندن يازير. من ده سني ايتيرمک تهلوکه‌سيني ياشاياراق يازماغا باشلاديم.
آنا! يگانه سؤزدور کي، دئديکدن سونرا ايستر – ايسته‌مز سوسارسان. حياتين گؤزونون اؤنونده آني اولاراق جانلانير.
حياتيني اونا بورجلو اولدوغونو بيرده آنلاييرسان.
ايسته‌ييرسن وارلي‌، ايسته‌ييرسن کاسيب گوجلو يا دا، گوجسوز آنانين دوعاسي‌نين صداسي قولاغيندا وارسا، آنانين وارليغيني حيس ائديرسن‌سَـه، دئمک سندن گوجلوسو يوخدور.
اوچ حرف اؤزونده نه قدر درين معناني بيرلشديرير.
منيم جومله‌لريم چوخ واخت دولاشيق اولور، درين اولور، مرکّـب اولور.
آما سندن يازاندا اوشاق‌ليغيما گئري قاييديرام ائله بيل. بيلميرم نييه!
غريبه‌دير، جومله‌لريمي آرد – آردا قوشا بيلميرم سؤزسوز قاليرام. سنه لاييق ايفاده، سؤز، جومله – هئچ نه تاپا بيلميرم.
هر بيريميز آنالارا قوربان اولاق. آنا بيزه حيات وئريب و بيزيم ده بورجوموزدور کي، بو ابديتي قيمت‌لنديرک.
بوتون آنالار وار اولسونلار، اؤولادي‌نين يانيندا اولسون. اؤولاد اونون وارليغيني حيس ائتسين. هئچ بير اؤولاد آناسيز قالماسين. چونکي آناسيز بير طرفين هميشه يالان‌دير.
بير قولونا نه گئيينيرسن گئيين، آما او بيري قولون هميشه اوشويه‌جک.
اونو هئچ نه ايسينديرا بيلمه‌يه‌جک، آنا وارليغين‌دان باشقا. هئچ بير اؤولاد بو حياتدا باخ بئله اوشومه‌سين.
يامان پيس اولور. عزيز وارليغيميز، ده‌يرليميز آناميز. هميشه اؤزوموزو سنه بورجلو بيلديم.
اوشاق‌ليقدا حيه‌طده اويناياندا، حيه‌طدن گول گتيرمک‌له، مکتب‌ده اوخوياندا اعلا قيمت‌لر آلماق‌لا، درس‌ده ساکيت اوتورماق‌لا عالي مکتبه داخيل اولماق‌لا، عالي مکتبي بيتيرمک‌له ايشله‌مک‌له عايله قورماق‌لا… داها دوشونموردوم کي، بونلارين هاميسي‌ني اؤزوم اوچون ائديرم هر شئيي اؤز گله‌جه‌ييم اوچون ائديرم.
حياتدا چوخ ايتکي‌لرين آجيسي زامان‌لا يونگول‌لشير، آما آنا يوخلوغو اينجي‌دير.
بو حياتدا هانسي ياشدا، هانسي وظيفه‌ده هانسي محيط‌ده اولماغيندان آسيلي اولماياراق، آنا حاققيني، آنا وضعيتيني چاليشاق ايتيرمه‌يک. آنالارين حؤرمتيني، آنا يولونو هميشه ساخلاياق.
آنانين دوعاسيني آل کي، خئيير تاپاسان. آنا دوعاسي، اؤولادا تام باشقادير.
هئچ بير آنا اؤولاد ايتکيسي‌ني، هئچ بير اؤولاد دا آنا ايتکيسي‌ني ياشاماسين. چونکي بو ايتکي دؤزولمز حيس‌دير. حياتي‌نين هر آنيني سئوديييني ايتيرمک قورخوسويلا ياشاماق قدر، شکنجه‌لي باشقا حيس يوخدور.
تکجه اؤز آناما دئييل، بوتون آنالارا حؤرمت ائديرم. بوتون آنالارين آدي دا، اؤزو ده، وارليغي دا اؤزلدير.
فرقي يوخدور کيمين آناسي‌دير. اونا حؤرمت ائديلمه‌لي‌دير.
آنانين ساچينداکي آغ توکون نه قدر درين معناسي وار.
او ساچ نييه آغاردي؟! نه واخت آغاردي؟ بيليريک مـي؟ يوخ!..
آنانين اوزونه باخاندا، داواملي گولمه‌سيني ايسته‌ييرسن. چونکي گولنده، آنا اوشاق کيمي اولور. اينانيلما بير شئي‌دير، سانکي بالاجا کؤرپه‌يه چئوريلير. ياناغينا توخونورسان يوموشاق‌دير. حيات‌دا سنين اوچون اوندان باشقا هئچ نه اولماياجاقميش کيمي!
آنا، سنين خئيير – دوعان سانکي، بوتون چتين ايشلري آسان ائدير.
هر دفعه دئييرلر کي بؤيوک‌لرين خئيير – دوعاسيني آل.
بلي، آنانين دوعالاري اؤولادي‌نين حياتيندا چوخ اؤنملي يئر توتور. مکتبـه گئدنده، اوزون يولا چيخاندا امتحان وئرنده، عايله قوراندا، ايشه قبول اولاندا آناميزين دوعاسي‌ني آليب گئديريک. اؤولادا آنانين دوعاسي دا، اؤزو ده، خوش سؤزو ده، پيس سؤزو ده هاميسي گرکلي‌دير. آنانين زحمتيني يئره ووران، ايتيرن، ده‌يرسيزلشديرن اؤولاد هئچ واخت ايره‌لي گئديب، اوغور قازانا بيلمز. بيليرم والدين‌لر آراسيندا آيري- سئچکي‌ليک ائتمک دوز دئييل.
آما اوشاق‌ليقدا، “آتاني چوخ ايسته‌ييرسن يوخسا آناني؟” سواليني تکجه منه وئرمه‌ييبلر. من ده او زامان‌لار بو سوالا “آتامي” جاوابيني وئريرديم. هه، سون 3 ايله قدر آنام‌دان دا باجيم‌دان دا داها چوخ آتامي ايسته‌ييرديم.
لاکين سون 3 ايلده، هر شئي ده‌ييشدي.
و ايندي بو حيات‌دا اؤزومدن ده ده‌يرلي، منيم اوچون آنام‌دير.
ياشاديغيم هر گون آنامي ايتيرمک قورخوسويلا کئچيرديييم ساعات‌لاردير. بو ساعات نه واخت داياناجاق، نه واختا کيمي داوام ائده‌جک اونو بيلميرم.
آما خسته‌ده اولسا دا، يانيمدا اولماغي منيم اوچون کفايت‌دير. اساس اودور کي وار مؤوجوددور و منيم يانيمدادير. آما هر دفعه ائودن چيخاندا دئييرم کي، آللاه سني قوروسون آنام
اوره‌ييمده ايسه پيچيلداييرام کي، گئري قاييداندا سني گؤرمک اومودو ايله گئديرم. اؤولادلارا سؤزوم اودور کي، اونسوز دا نه ائتسه‌نيز، آنا زحمتي‌نين قارشي‌ليغيني وئره بيلمه‌يه‌جکسينيز.
اونا گؤره ده آنايا ناز ائتمک، آناني اينجيتمک سؤزونو يئره وورماق، حؤرمت‌سيزليک ائتمک سونرا أن چوخ سيزي اينجيده‌جک.
اونا گؤره‌ده سونرادان پيس اولماماق اوچون، پئشمانليق ياشاماماق اوچون آنا يولونو، حاق يولونو توتان.
آنانين بؤيوکلويونو درک ائدن و اونوتمايان اؤولاد اولون کي، گؤردويونوز هر ايشدن خئيير قازانا بيله‌سينيز. عايله‌ده آنا اولماياندا، او ائوده روزي ده برکت ده بوُل اولمور. آنا اولان ائوين برکتي هميشه وار.
والدين‌ين يولونو ساخلايين حؤرمتيني گؤزله‌يين کي، گله‌جکده اؤولادلارينيز سيزين يولونوزو ساخلاييب، آدينيزا و اؤزونوزه حؤرمت ائتسينلر.
Arazazarbaijzn.anadilimiz@gmail.com