سولماز جمالي
بيرنجي بولوم
آناديليميز: دانيشکدهنين اوچونجو قاتيندا سون کيلاسيمين بيتمهسيني صبيرسيزليکله گؤزلهييرم.
قولومداکي ساعاتا باخديقجا اوستادين معنالي باخيشلاري آني اولاراق گؤزلريمه سانجيلير.
ديک پنجرهنين يانينداکي نيمکتده اوتوروب تاقلاريني تايباتاي آچميشام. جانيمي ديشيمه توتوب کيلاسدا قالسام دا اؤزومو ساخلايا بيلميرم؛ آچيق پنجرهدن تئز-تئز بويلانيب سيرا ايله دوزولموش چيلپاق آغاجلاري گؤزدن کئچيريرم.
هر خيردا ترپهنيشيمله نيمکت جيريلدايير بيلرکدن بو ايشي داوام ائديرم. قلمه آغاجلارينين ايريلي-خيردالي خول-بوداقلاري اوچونجو قاتا کيمي اوزانيبدير. پنجرهدن ايچري دولان خفيف کولک مقنعهمدن چيخان توکلريمي آستاجا ترپهدير. ايسلاق تورپاغين اييسي بورنوما دولدوقجا مني داريخديرير. آز اؤنجه گورولتو ايله باشلايان ياغيش تئز ده اؤتوب کئچميشدي؛ ايري داملالي ياغيش خيردالانيب چيسکينه چئوريلميشدي.
پنجرهنين شوشهسي ترلهميشدي؛ چيسک شوشهده بيرلهشيب گيلهلنميشدي؛ سوزولوب داملا-داملا آخيردي ...
اللريم قوينومدا، کورهييمي نيمکته سؤيکهييب سئللهمه پاييز ياغيشينا زيللنميشديم. اوزبه اوزدهکي دانيشکدهنين تاواني آلتيندا ياغيشدان ايسلانيب تير-تير اسن پيشيکلره گؤزوم ساتاشير؛ ايسلاق بدنلريني قوروتماق اوچون توکلريني پيرپيزلانديريب چيرپينيرلار.
يولون آغيمسوو دؤشهمهسي يويولموشدو.
پاييز يئلي سارالميش يارپاقلاري گاه يونگولجه هاوادا اوينادير، گاه خيشيلتيلا او باشدان بو باشا سووورور.
يوزلرجه قارقا توپا-توپا چيلپاق بوداقلارا شيغيييب بيرآز قاريلداشيب يئنه توپا-توپا پررر ائلهييب هاوايا قالخيرلار. گؤيون اوزوندهکي قارا بولودلار سئيرهلسه ده هاوا هله ده توتقوندور. خيابان بويو سپهلنميش دانيشکدهلرين سولغون ايشيقلاري ياواش-ياواش يانير.کيلاس بيتينجه دانيشکدهدن چيخيرام گؤزلريمي يوموب دهريندن نفس آليرام. ياغيشين سهرين هاواسي اوزومه وورور؛ قاشيما، کيرپيکلريمه چيسک قونور؛ اوزومو يالايان نارين ياغيشدان لذت آليرام.
گؤزلريمي آچيب گؤيدهکي قارا بولودلارين سئيرهليب هاوانين ايشيقلاشديغي سمته آغاجلارايله آغيمسوو گؤيون بيرلشدييي يئره زيللهنيرم.
اللريمي ياغمورلوغومون جيبلرينه ساليب ياواش-ياواش بيليم يوردوندان چيخيرام. هر يئره شئح چيلهنميشدي؛ گؤزلريم بيليم يوردونون شئح باسميش نردهلرينه ساتاشديقدا سول اليمي قالديريب نردهلره سورته-سورته آدديملاييرام؛ اوووجوم ايسلانير …
يئل نردهلرين آراسيندان آدلاييب آغاجلارين باشينا بورولغان کيمي فيرلانيب شههري دولاشير. يئره تؤکولموش يارپاقلاري قاباغينا قاتيب خيشيلدادير؛ سانکي سوپورگه چکيرلر شههره …
نئچه مئتير ايرهليدهکي دککهيه دوغرو آدديملاييرام. يئکه سماورلر پيققاپيقلا قاينايير. دککهنين اوستونو بوروين بوغ اتهييني ساللاياراق آستا-آستا اطرافا ياييليب ارييير. هردن بير آخشام چاغينين کولهيي اسيب آغ، نازيک بوغو قوووب چيلپاق آغاجلارا دوغرو آپارير. دککهنين قاباغي دولودور قيز اوغلانلارلا. ايستکان-نعلبکي شاققيلدايير. چئورهيه هورتولتو دوشوب. قندلر ديشين آلتيندا ازيليب خيرچيلدايير. جاوانلاردان نئچهسي بوغلانان چايلاريني هورتهاهورتلا ايچيب گولورلر. بير جاوان اوغلان پاپريزيني توستولهده-توستولهده آغير سکوت ايچينده نئچه آنليق قارشيسيندا دايانان قيزا باخير. سونرا موبايللا دانيشا-دانيشا هندهورينده گزينيب وورنوخور. گؤيومسوو توستو جاوان اوغلانين بوينونون آردينجا بورولور، سونرا دا دومان کيمي چؤکوب هاوادا ايتير. قادين اؤزوندن راضي حالدا گوجله سئزيله بيلهجک طرزده گولومسونوردو.
اوغلانين سير-صيفتيندن زهريمار ياغديغيني گؤردويو آن گولوشلري خيرپ کسيلير.
پاپريزيني سوموروب يئره توللايير؛ توستو آغزيندان، بورنوندان فيسقيريب لاي-لاي هاوايا قالخير. کؤزهرن پاپريز هاواني جيزيب سارالميش نم چيمنلرين آراسيندا سؤنور. گؤزونو هارايا ايسه زيللهيير.
آنجاق سانکي هئچ يئره باخمير، هئچ يئري گؤرمور. گؤزلري قايير-قايير قاينايير: من چؤرهيي قولاغيما يئميرم ... بيليرم کيم هانسي يووانين قوشودو...
قادين اونون اوزونه باخماغا جسارت ائتمهديييندن سسسيزجه کؤلگه کيمي چکيليب آغاجلارين آرخاسيندا ارييير ...
دککهنين خيردا باجاسينا ساري اهييليب بير استکان چاي ايستهديييمي بيلديريرم.بؤيرومدهکي جاوان اوغلان چؤنوب اورهيي ايستهدييي کيمي آلتدان-آلتدان سوزور مني؛ گؤزلريمه يئتيشديينده ايسه گؤز ووروب گولومسونور.
دککهنين قاباغيندا سو بيريکيمينه گؤزوم ساتاشير. بيرآز اهييليب اؤزومه باخيرام.
مقنعهمين باش طرفيني اليمله ساهمانلاييب قهوهيي ياغمورلوغومون اوست دويمهسيني ده باغلاييرام. قارا پوتونومون دابانيني سويا ياخينلاديب اورتاسينا آياق باسيرام. سو شاپبيلداييب دامجيلاري اطرافا سيچرايير. سو دالغالانديقجا گؤرونتوم ده دالغالانير. آياغيمي قالديريب اسن سويون اوزهرينده تيترک گؤرونتومه باخيرام؛ توکلريمين اوزهرينه قونان چيسکلر مونجوق کيمي پاريلدايير …
چاييمي ايچندن سونرا ياواش-ياواش »فلکه دانشگاه«ا ساري آدديملاييرام. هر بير خيردا سو بيريکيميني گؤردوکجه هوپپانير سويو شاپپيلداديرام.آياقلاريني شاپپيلدادا-شاپپيلدادا هاي-کويله يانيمدان اؤتوب کئچن جاوان اوغلانلارا باخيرام. اونلاردان بيري شالواريني ديزينه قدر چيرمالاميشدي.
-ماما ... ماما ... بيز ده هوپپاناق ...
گؤزلريمي منيمله ياناشي يئريين قادينلا بالاجا قيز اوشاغينا ديکيرم. آناسينين اليندن ياپيشاراق پاريلدايان گيلهلريله يالوارير: ماما ... سن الله ... بيز ده آتيلاق ...قادين گؤزلريني آغاردير: عاييبدي شيرين ... بورا خياباندي ... خانيملار آتيلمازلار ... آغير اول بيرآز ... قيزينين اليندن ياپيشيب زورلا دالينجا سورويور: قابيرغا وئرمه سؤزه … ائله اؤزوم دئييب اؤزوم ائشيديرم ….هر ايکيسينين چادرالارينين اتکلريني دؤشهمهنين اوزهرينده بيريکميش سولار ايسلاديردي ….
سو بيريکيملرينين اوزو آستا-آستا آتيليب-دوشور. ياغيش شئحلهييردي ….
قارشي خيابانا کئچرکن قاباغيمدان بير ماشين سوووشور؛ شئح باسميش شوشهسينده ياستيلانميش اوزومه باخارکن، شوشه آشاغي ائنيب بير باش چيخير چؤله: سن نه يامان بير شئيسن قيززز … بلليدي داغ داليندان گليبسن …
ديکسينيب گئري سيچراييرام. اوزاقلاشارکن شاققيلداييب گولمکلريني ائشيديرم.
هاوا قارالديقجا سويوق کولک ده اسمهيه باشلايير. »آبرسان«ا يئتيشدييمده کؤرپونون آلتيندان کئچيب سولا ساري يؤنومو دهييشيرم. »مارالان«ا دوغرو ائهمال-ائهمال آدديملاييرام. آغ چلييي الينده قارشي خيابانا کئچمک اوچون بير ايکي آدديم اؤنه آتيب ماشينلارين سيقنال سسيله گئري قاييديب يئنه نئچه آنليق خيابان قيراغيندا گيرينج قالان بير جاوان اوغلاني گؤرور. يازيق قارغ اولوب قالميشدي.
ايسلانميش ساچي داغيليب، آلنينا تؤکولموشدو. کؤينهيي ايسلانيب بدنينه ياپيشميشدي.نفس آلديقجا سينهسي قالخيب-ائنير، گئنيشلنميش بورون پرهلريندن نفسي فيسقيريردي. گؤزلريندن حياتدان اوسانميش بير آدامين يورغونلوغو تؤکولوردو. چلييي برک-برک توتموش بارماقلاري خفيفجه تيترهييردي. او اوزونو گؤيه ساري توتموشدو. قارا ساققالينين سئيرک توکلري آراسيندان حولقومونون بير نئچه دفعه قالخيب ائنديييني گؤرور.»هامي کيمي من ده يانيندان سوووشوب گئديم مي؟!« دئيه دوشوندوکده آناسينين تاپشيريقلاريني خاطيرلايير: سن کتدن دوروب گئديبسن شههره … هئچ کيمنن ايشين اولماسين، سنه لاپ چلتيک آتسالار دا دينمه … باشيني آشاغي سال فقط درسيني اوخو … مبادا سني آللاديب آلاهي يئرلره آپارالار؟!!
… شههرين آداملاريندان بيجي ائله بير ده اؤزلريدي يئر آلتيندان ياسا گئدنلري چوخ اولور … فقط خوابگاهنان دانشگاه يولونو گئديب گلهجکسن … بير سؤزون ده اولسا منه دئيهجکسن … ايشدي بيردن يولدا گئديب گلنده بيري سني چاغيردي ايستهدي بير سؤز دئيه يا بير کؤمک ايستييه مبادا دوراسان هاااا … اصلا … آرا يئرده گودازا گئدهرسن … نفسين ايستي يئردن چيخماسين کي آي نم زيرنگم فيلانام بهمانام … بئله دبر آخيردا »آغزين تؤکولسون گئديب باش چيخاردا بيلمهدي« سؤزونو ائشيتمييک …يانيندان آستاجا سووشوب يولونا داوام ائدير …او آدامي ائله اوجور قويوب يانيندان سووشدوغو اوچون اورهيينده ييغيليب قالميش نگرانچيليغينين آغيرليغي سيخير اونو.
تيکان اوستونده اوتورموش کيمي راحات دئييلدي.آني اولاراق داباني اوسته فيرلانيب گئري قاييدير؛ گؤزلريني دولانديرير. ائنلي پيادا يولوندا اينسانلارين آراسيندان اونا ياخينلاشير. اونونلا ياناشي دورور؛ بوينونو يانا دوغرو اييب اوزونه باخير: يارديم ايستهييرسيز؟
جاوان اوغلان اوزونو سس ائشيتدييي يؤنه چئويرير؛ قولاقلاريني شکلهييب گؤزلريني گزديرير. خيابانين گور لامپا ايشيقلاريندا اونون آغ گيلهلريني گؤردوکده هورکوب بير ايکي آدديم گئري آتيلير.-الله مني بو دونيايا گتيردييي گونه داش ياغديرايدي. آردي وار
کشاورزان را بدبخت کرديم
افزايش تلفات تصادفات جادهاي در آذربايجانغربي
فقط يک نام از طرح نهضت ملي مسکن باقي مانده است
ما مردم مجبوريم گول مافياي کنکور را بخوريم!
وحدت شيعه و سني بهترين سرمايه در آذربايجانغربي است
دليل کاهش مستندهاي انتقادي چيست
راهکارهايي براي افزايش صميميت در خانواده
تکرار جراحي اقتصادي بنزين در ايران
دانشگاهها و مدارس آذربایجان غربی ۱۹ آذر غیرحضوری است
قفل نقدينگي به نفع توليد و خانوار ميشکند
درباره آراز آذربایجان