- آراز آذربایجان – روزنامه خبری آذربایجان غربی - http://www.araznews.ir -
گونشین ناغیلی
Posted By admin On دی ۱۶, ۱۳۹۲ @ ۵:۳۹ ق.ظ In آنادیلیمیز | No Comments
حاضرلایان: معصومه اسدی
بیری وارمیش، بیری یوخموش. بیر دفعه گونش برک یورولدو. داها یاتاقدان قالخماق ایستمهدی. دونیایا قارانلیق چؤکدو. یئرین ساکینلری – آداملار، حیوانلار، قوشلار بیر یئره ییغیشیب مصلحتلشدیلر. چوخ گؤتور-قویدان سونرا گونشین یانینا قاسید گؤندرمیی قرارا آلدیلار. دئدیلر:
- قوی گئدیب گونشه یالوارسین، بلکه اونون سؤزونه باخیب یاتاقدان قالخدی. گونشین ائوی سیخ مئشهنین اوجا داغین آخیرینجی دنیزین آرخاسیندا ایدی. اورا یالنیز قوشلار گئدیب چیخیردی. یئرین ساکینلری توووزقوشونو سئچدیلر. دئدیلر:
- او، چوخ گؤزلدیر. گونش اونون سؤزونو یئره سالماز.
توووزقوشو یولا دوشدو. مئشنی کئچدی داغدان آشدی، دنیزین اوزریندن اوچوب گونشین پنجرهسینه قوندو. اونو اویاتماغا باشلادی. گونش گؤزونو آچمادان سوروشدو:
- کیمسن، نه ایستییرسن؟
- من توووزقوشویام. سنی اویاتماغا گلمیشم. تئز چیخ ایشلر چتینه دوشوب.
- کیمین ایشیدیر، چتینه دوشن؟
- لاپ ائله منیم. قارانلیقدا قارغادان سئچیلمیرم. الوان قویروغومو هئچ کس گؤرمور.
گونش هیرسلندی.
- دئمهلی من سنین قویروغونا لازیمام. رد اول بوردان. بیر قویروغا گؤره بوتون دونیانی ایشیقلاندیرماق ایستمیرم.
توووزقوشو الیبوش قاییتدی. سونرا گونشین یانینا بولبولو گؤندردیلر. هامی دوشونوردو اونون قشنگ سسی وار. گونشی بیرتهر راضی سالار.
دوغرودان دا گونش بولبولون نغمهسینی ائشیدنده هیهجانلاندی، کؤکس اوتوردو یوخولو-یوخولو دئدی:
- سسین اورییمی یئریندن اویناتدی. نه آرزون وارسا، سؤیله، سنینچون هر شئیه هازیرام.
- خاهیش ائدیرم، دونیانی ایشیقلاندیرین. قوی گئجه قورتارسین.
گونش ماراقلا سوروشدو:
- مگر سن گئجهلر ماهنی اوخویا بیلمیرسن؟
- عکسینه، من هر گئجه اوخویورام. بیر-ایکی گون ده سحر آچیلماسا، سسیم توتولاجاق.
گونش اونون سؤزوندن پرت اولدو. دئمهلی من یالنیز اوندان اؤتری یئریمدن قالخمالییام کی سن دینجهلهسن، بوغازین آغریماسین، هه؟ بس اؤز استراحتیم نئجه اولسون؟ رد اول، بوردان.
بولبول ده کور-پئشیمان گئری قاییتدی.
بو دفعه گونشین یانینا توتوقوشونو گؤندردیلر. او، دنیزین آرخاسینداکی ائوه چاتار-چاتماز قیشقیردی:
- بسدیر، تنبللیک ائلدین، اویانماق واختیدیر. چونکی من قارانلیقدا یامسیلادیغیم آداملارین نئجه هیرسلندیگینی گؤرمورم.
گونش جاواب وئرمهدی. قورخدو کی توتوقوشو اونون اؤزونو ده یامسیلایار.
توتوقوشو دا یئره الیبوش قاییتدی. ائله بو واخت خوروز خاهیش ائتدی کی، گونشی اویاتماغا اونو گؤندرسینلر. یئر ساکینلری آراسیندا هئچ کس اونا اینانمیردی.
دئییردیلر کی، خوروز گؤزل دئییل، سدی کوبوددور. اما اوندان باشقا گئتمک ایستهین یوخ ایدی. الاجسیز قالیب راضیلاشدیلار. خوروز اوچا-اوچا دنیزین آرخاسینداکی ائوه گلدی.
گونش شیرین یوخودا ایدی. خوروز اونا یاخینلاشیب دریندن نفس آلدی. اؤز نغمهسینی اوخوماغا باشلادی. گونش سکسنیب آییلدی. آز قالا ییخیلاجاغدی. یورغانی اوستوندن دوشدو بوتون دونیا ایشیقلاندی. گونش گؤزلرینی اوووشدورا-اوووشدور قیشقیردی:
- بو کیمدیر؟ مئنیم ائویمده نه گزیرسن؟
- قوققولو قو، قوققولو قو، اویان، آی تنبل، اؤز وظیفنی بیلمیرسن؟
گونش گرنشدی.- نه وظیفه؟
- آخی سنین وظیفن ایشیق ساچماق، یئری قیزدیرماقدیر. سنسیز یئر اوزوندو حیات اولماز. هر یانا زولمت چؤکر. اوندا اؤز حیاتین دا معناسیز کئچر.
گونشین گؤزلری دولدو.
- من اونسوز دا اؤمروم بویو ابس ایشلمیشم هئچ کس قدریمی بیلمیر. منه قیمت وئرمیر. توووزقوشو آنجاق قویروغونو خیدمت ائدیر بولبول اؤز نغمهلرینه قولاق آسیر، توتوقوشو دا عقلسیزین بیریدیر.
خوروز اونونلا رازیلاشمادی. دئدی:
- ائی، تنبل گونش، سن آداملاری اونوتموسان. آخی اونلار سنسیز یاشایا بیلمز
گونش تعجبلندی.
- آداملار نییمه گرکدیر؟ گویا اونلار اولماسا ایشیغیم، هرارتیم آزالاجاق.
- بس نئجه؟ آداملار اولماسا، رنگین سولار. سحر چاغی سنین شوالارین شئهلی اوتلارین سونبوللرین، چمنلرین اوزرینه دوشوب برک وورور، چوخالیر. بس، تورپاغی اکیب بئجرن یاشیللاشدیران کیمدیر؟
گونش دئدی:
- البته آداملار.- دئ گؤرک، سو گؤتورمک اوچون یئردکی قویولاری کیم قازیب؟ – آداملار قازیب. بوندان نه اولسون کی؟
- سن مشهور بیر مسهلی اونوتموسان. قولاق آس، گؤر اوردا نه دئییلیر؟ آیین عکسی گؤللره دوشور، اولدوزلار سایریشیر، هر قویودا گونشین شکلی گؤرونور.v گونش اونون سؤزلری ایله راضیلاشدی. خوروز دئدی:
- قادینلار بولاق باشیندا توپلاشاندا سن اونلارین کوزهسینده (بارداغ) عکس ائدیرسن. یاخشی دئییبلر، گؤیده بیر گونش وار، یاخشی ائو صاحبینین ایسه کوزهسی بیر گونشدیر.
گونش اونونلا راضیلاشدی.
- نه دئییم، بلکه ده سن حاقلیسان، آنجاق یئریمدن قالخماغا هوسیم گلمیر.
- اوندا رنگین سولاجاق، سؤنوب گئدهجکسن. لاپ کوتان کیمی. یادیندادیر کندلینین کوتانی دا ایشسیز قالدیقیندان تامام پاس آتمیشدی.
- ائلهدیر، ائلهدیر، سن حاقلیسان.
- ایندی گؤردون، آداملار اولماسا، دونیایا زولمت چؤکر. سن ایسه اینسان علی ایله دوزلدیلن هر شئیده برق ووران مینلرله گونشی گؤره بیلمزسن.v گونش فیکره گئتدی:
- آی خوروزز، نغمهلرین چوخ شیریندیر آنجاق باشا دوش کی، من اؤزومچون یاشاماق دینجلمک ایستییرم.
- ائ، ائ، ائ، تنبل گونش، یالنیز اؤزو اوچون یاشایان هر کس، باشقالاری اوچون اؤلموش کیمیدیر. یالنیز یاخشی ایشلهینلر، یاخشی دا دینجلیر.گونش یاتاقدان قالخدی، وار-قوهسی ایله یئری ایشیقلاندیردی. او واختدان بری خوروز هر سحر گون دوغمامیش یاتاقدان قالخیب اؤز نغمهسینی اوخویور. او، اولجه اوزونو گونشه توتوب دئییر:
- قوققولو قو، قوققولو قو، اویان، ایشه باشلاماق واختیدیر. سونرا او، تورپاغا مراجعت ائدیر. اویان، اؤز شیرنله توخوملارا و کؤکلره قوت وئر. خوروز اوچونجو ماهنیسینی آداملار اوچوم اوخویور. یئرینیزدن قالخین، اویانین، گون چیخیب، تورپاق سیزی گؤزلییر، اویانین.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%da%af%d9%88%d9%86%d8%b4%d9%8a%d9%86-%d9%86%d8%a7%d8%ba%d9%8a%d9%84%d9%8a/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.