گئجه لرآی ایشیغیندا
محمد سرافراز قراملکی
سون بولوم
آنادیلیمیز: سحرلر نازلینین یوخوسو ایله دوروب اونو اونوتماق اوچون چؤرک آلماغا گئدیب، گون اورتا چاغی اذان سسی ایله داریخاراق گینه نازلی یادیما دوشور.
آنام حووض قیراغیندا دستناماز آلاراق ایکی گؤزو منده‌دیر، مچیده ساری گئده – گئده دیل آلتی “گؤزل آغا چوخ گؤزل ایدی ووردو چیچک ده چیخارتدی، آللاه گؤروم او یونیسی نه‌دییم ائلهمهسین” دئدی.
آنام ائشیگه چیخاراق منده تلسیک حیطین آلت قاتینا یئنیب، یونیس داییمین وئردیگی ایچگیدن ایچمهیه باشلاییرام، ترک ائلهدییم سیگار قوخوسو یادیما دوشوب بئینیمین اینجه دامارلارین قاماشدیریر دووارین دلیک – دئشیگیندن سیگار کؤتوگو تاپیب، تئز آلیشدیریب، بیر درین پک ووراراق ائله توستو ایله اورتا دوواری آشیب نازلی گیلین حووضلارینین قیراغینا سؤیکه‌نیب آلما آغاجینین آلتینا دالیرام.
دووارین دئشیگیندن بیر شئی گؤرونمهییر، گؤردویوم یالنیز اورتایا آتیلمیش اویونجاق قاب – قاشیقلار و کرتی قیراغیندا خراب قالمیش ائودیر.
اوشاق?ایکن حکیمه خالا (ائو بیر قونشو اولدوغوموزا گؤره خالا دئیردیم) حیطین قوزئی یانینی سولاییب سوپورندن سونرا نازلی ایله من آلما آغاجین آلتیندا پالاز سالیب قوناق باجی اویناردیق، او، بالاجا اللری ایله اویونجاق قاب – قاشیقدا یئمک پیشیرردی منده کرتیدن لیغ دوزلدیب ائو تیکردیم.
یاغیش یاغیب داملالاری آلما آغاجینین یارپاقلاریندان زویولدهییب تؤکولنده نازلی گؤیه باخاراق ” آی کیشی بو دامین دلیک – دئشیگینه یئتیش بوگون – صاباح دام باشیمیزا گلجک‌ها ” دئیردی. منده بیرالیمده آینا بیر الیمده ده قئیچی بیغلاریمین اوجونو ووروب سونرا یاغیش داملالارینی اونون یاناقلاریندان سیله‌رک “هه خانیم دوز دئییرسن ؛ آمما بیر آز دؤز. قاباقدا یاغلی بیر معامله وار دوعا ائله یئرینه گئتسین، دام – داش کی سهلی‌دی، سنه ده یاخشی یئتیشمهلییم ” دئیردیم.
من آرخایینام موراد نازلینی سئومیر، یوخسا گونده ساواشیب اونو وورماز ایدی. گوناهلارین بیر آزی حکیمه خالا بیر آزیدا منیم آنامدایدی.
حکیمه خالا منیمله نازلینین بیری – بیریمیزی سئودیگیمیزی بیلیردی، ائله اونا گؤره ده آنامی‌قیرخ بیر مرثییهده گؤروب دئمیشدی، آنام ایسه خدیجه خالایا: بونلار نه سؤزدو ” گئت قیزیوی ییغیشدیر ” دئمیشدی.
نازلی دانیشگاها چیخاندان بری آنامین گؤزوندن داها دا دوشموشدو. من هر زامان نازلینین فیکرینه دالاندا آنام اونون ایرادلاریندان دئیردی، “اودور با پروین خانیم دئییردی اؤزوم بو ایکی گؤزومونن گؤردوم نازلی اوتوبوسدا چارشابین آچمیشدی، هله تئللرینده چرقت دن چیخاردیب آلنینا تؤکموشدو سونرا محلهیه یئتیشنده چارشابین اؤرتموشدو. آللاه آپارسین گتیرمهسین هئچ کسی تانیماق اولمور. من بو قیزی اؤز قیزیم کیمی‌بیلردیم، آمما ایندی قاش – قاباغی یئرینن گئدیر. بیر قورو سلام وئرمیه‌ده آرینیر. ائله بیر من دئمیشم چارشاب اؤرتسون. هله پروین باجینین سؤزو بیر یانا من اؤزوم دققتله نازلی‌یا باخمیشام، هله قاشلارینین آلتینی دا گؤتوروب آللاه گؤرستمهسین دوغرودان آخرالزمان دئییرلر بودور”. آنام، نازلینین چارشابینان – تئلیندن قاشیندان دئینده من نازلی‌یا داها دا ماراقلانیردیم.
حکیمه خالا، آنامین ” گئت قیزیوی ییغیشدیر ” سؤزونو نازلی‌یا دئیندن سونرا نازلی اوجا سسله گولوب ” او دئییر به من لیلی اولموشام اونون دا اوغلو مجنون ؟” دئییب ؛ منیم فیکریمی‌باشیندان آتمیشدی. نه بیلیم بلکه ده آتمامیشدی. یوخسا اوشاغینین آدینین اولینی منیم آدیمین اولیندن قویماز ایدی.
بو سیرتیق گئده کچل موراد نم‌هاردان نازلینین مندن کوسدویونو بیلمیش اولمالییدی کی ائله اوچ – دؤرد گونون ایچینده اونا ائلچی یوللادی، نازلی دا ایستر ایستهمز اونا ” هن ” جوابی وئرمیشدی.
او گوندن بری کئچل گده‌هاچان نازلی‌گیله گلنده، بیر یوخاری مودئللی ماشینی قاپیلارینین قاباغیندا ساخلاییب حیطده اوجا سسله اونا “بیلیرسن سنی اله گتیرمک اوچون نلر چکمیشم ؟ ” دئیردی.
یادا بیر یابانجی دیلده نوستالژیک (اوگدهنین دئدیگینه گؤره) بیر شارکی آچارکن باندلاری بیزیم حیطه ساری قویوب سسین اوجالدیردی. منده سیگارین ترکیندن چیخاراق سیگاری – سیگار کؤتویونه یاندیرب گؤزلریمی‌یوموب سیگارین توستو ایله دوواری آشیب ائله او شارکی ایله بیر الیم نازلی نین الینده اوبیری الیم ایسه اینجه بئلینده رقص ائله ییردیم.
بیر جوت پوتین باشماق دمیر قاپینین دئشیگینین او تاییندا دایاناراق بیر آن اؤزمه گلدیم. دمیر قاپی جیرها جیر آچیلاراق باشیما دیدی سالونون ایشیغینین اثرینده سول گؤزوم ده یومولدو.
گؤزتچی “هه سیچان کیمی‌نه آختاریرسان ؟ اولمایا بو بالاجا دلیکدن قاچماق ایسته‌ییرسن ” دئیه یاخامدان یاپیشیب سئللولدان ائشیگه چکه‌رک سورغوجونون اوتاغینا آپاردی.
سورغوجونون اؤنونده اوتوراراق، او باش بارماغینی جئب تئلفونون صفحه‌سینه چکیب ” نییه مورادی اؤلدوردون ” سوروشدو. باشیمی‌آشاغی سالاراق “نئچه دفعه دئییم من کیمسه‌نی اؤلدورمه‌میشم”.
من من فقط ایستهییردیم نازلی گؤورمیش قول – قیچینی آلما آغاجینین آلتیندا آناسینا گؤسترنده گؤرم؛ من من کیمسه‌نی اؤلدورمه‌میشم اینامیرسیز حکیمه خالادان سوروشون. من مورادی اؤلدورمه‌میشم. من یالنیز اورتا دوواریمیزین دئشیگیندن اونلارین حیطینه باخمیشام.
سورغوجو ” ائله حکیمه خالان اؤزو دئییب کی سن مورادی اؤلدورمه‌یه تهدید ائله‌میسن.
یوخ او جور دئییر، من من بیلیردیم حکیمه خالانین موراددان خوشو گلمه‌ییردی، حکیمه خالایا طرف اولاراق فقط بیر سیرا چؤرک نوبه‌سینده مورادی اؤلدورمه‌یه تهدید ائله میشدیم.
” مگر سن خلقین وزیر وکیلیسن ؟ سنه نه کی سئویردی یا دا سئومیردی.
سورغوجونون جیب تئلفونو زنگ چالدی :
بلی، بویور، هه، یوخ هله ایشیم وار،هارا ؟ کیمینن ؟ یوخ من گله بیلمرم، ال چک دئدیم گله بیلمرم، اؤزوز گئدین، یاخجی. سلام قیزیم نئجه سن بالا ؟ ساغ اول، یاخجی، یاخجی بالا گلنده آلارام خدافیض.
سورغوجو جیب تلفونونون صفحه‌سینی باش بارماغی ایله اویان بو یانا چکه‌رک ” هه بس سن دئییرسن کیمسه‌نی اؤلدورمه‌میسن، دئمک اولماز بلکه ده اؤلدورمه‌میسن، ائله سن دئدین منده ایناندیم، بلی بلی کیمسه نی اؤلدورمه میسن ” دئیه درین بیر نفس آلاراق گؤزتچییه ساری باخیب ” آپار اؤتور یئرینه ” دئدی.
گؤزتچی سئللولون دمیر قاپیسینی قاپاداراق من اؤز – اؤزومه دیل آلتی :
” باز، ای الهه ناز “شارکیسینی اوخوماغا باشلادیم، آمما ” ناز”ا یئتیشنده دایاناراق – نازلی – نازلی دئییب گینه قاپینین دئشیگیندن سالونا باخیرام.
اوچ – دؤرد گون سونرا گؤزتچی قاپینی آچاراق تئز آیاغا قالخیب هیرسله ” مورادی من اؤلدورموشم داها نه ایسته‌ییرسیز ” دئدیم.
گؤزتچی اوجا سس ایله گولوب ” آللاه جلالیوا چوخ شوکور دوننه جن قاتیل تاپیلماییردی ایندی ایکی – ایکی تاپیلیر” دئدی. گؤزتچی، سورغولاما اوتاغینین قاپیسینی آچیب ایچرییه اؤتوردو. سورغوجو ” اوتورماق لازیم دئییر بورانی امضالا بورا دا بارماغیوی باس گئده بولرسن ” دئدی.
“بس قاتیل کیمدی ” سورشدوم. سورغوجو گؤز آلتی باخیب “خوش گلدین گئت اؤزون یاخشی بولورسن کیمدی” دئدی.
بو بیر هفته‌ده حبس ده اولدغومدان آنام اون ایل قوجالمیشدی، حیطه گیرهرک ” گؤردون دئدیم بو قیز سنین دردیوه دیمز ؟ اونو آلسایدین ایندی سنی اؤلدورموشدو ” دئدی آنام. هئچ دینمه‌دن ؛ آنامین قوللاریندان سوزولن دستنماز سویونا باخیب، سونرا باشیمی‌دولاندیراراق نازلی گیلین آلما آغاجینین اورتا دوواری آشیب بیزیم حیطه تؤکولن سارالمیش یارپاغلارینا باخیب، حیطین آلت قاتینا یئنیب قالان ایچگینی بیر نفسده باشیما چکدیم. اوره‌گیمده‌کی آجیلار ایچگینین آجیسینا قاریشاراق گؤز یاشلاریم آخماقا باشلادیلار.
آنامین اوجا سسینی ائشیده بیلیردیم ” گینه‌هارا گئدیرسن ؟ داها بس دئییل ؟ سنده ایستهیییرسن منی اؤلدورهسن ؟ آللاه بو قودوغون الیندن‌هارا قاچیم ؟ “.
اورتا دووارین دئشیگینین قاباغیندا اوتوروب، درین بیر نفس آلاراق نازلی گیلین حیطلرینه باخماق ایسته‌دیم، آمما دئشیگی تورآتان توخوموشدو. هر شئی تار گؤرونوردو. بیر نئچه میلچک‌ده تور آتانین توروندا اسیر قالیب قوروموشدولار.
نوشته شده توسط admin در چهارشنبه, ۲۳ بهمن ۱۳۹۸ ساعت ۱۱:۱۷ ق.ظ
