گئجهلر آی ایشیغیندا
بیراینجی بولوم
آنادیلیمیز: او قدر ساغ گؤزومو یوموب سول گؤزومله اورتا دووارین بیرده بو دمیر قاپینین دئشیگیندن باخمیشام کی رحمتلیک بؤیوک ددهمین تاخما آدی یادیما دوشور “بیر گؤزلو یعقوب”
گئجهلر آی ایشیغیندا آنامدان گیزلی اورتا دوواری پیچاقلا دئشدیگیم گوندن؛ بئش گون گئچیب. بو گون ایکینجی گوندور نازلیدان خبر یوخدور. یوخسا ایندی کؤرپه اوشاغی قوجاغیندا آلما آغاجینین کؤلگهسینه سیغیناراق، آناسینین قارشیسیندا اوتوروب،گؤز یاشیلارینی سیلیردی.
ساواشمیش اولا بیلرلر. آمما دئیهسن نازلی نئچه گون قاباق آناسینین نصیحتلرینه و کؤرپه اوشاغینا گؤره تصمیم توتوب کوسمهدن آناسی گیله گلمهیه. یوخسا بو ایکی گونده موراد حتما” نازلینی دؤرد دفعه دؤیوبدور.
نازلی ایله موراد ساواشاندان بری منده ایشی – گوجو بوراخاراق حیطده اوتوروب نازلینین آناسینا ائلهدیگی شیکایتلره قولاق آسمیشام. نازلی “مامان بودور با، باخ گؤر قئییشینن قیچیمینه گؤوردیب” دئیهنده اوزومو شددتله دووارا یاپیشدیریب سانکی قولاغیملا اونون گؤورمیش قول – قیچینی گؤرمک ایستهییردیم.
ایکی ایل قاباق نازلی او گئدهیه آداقلی اولاندان سونرا منده اونو اونوتماق اوچون سیگارلا ساغ الیمین ایچینه داغ باسیب هم نازلینی هم ده سیگاری ترک ائلهدیم. بوگون ده پیچاغین دستهسی الیمین ایچینده بیر بؤیوک داغ ایزی بوراخیب.
نئچه ایل قاباق داییم دئدی: “اوغول بالا یا ایندی بئکار یا دؤرد ایل سونرا، ایسترسن گل اؤز یانیما ایشلهیک”. دوز ده دئییردی محلهده چوخلو دانیشگاه قورتارمیشلار ایشسیزایدیلر، من ده ائله دانیشگاهی ایلک تئرمده بوراخاراق پول قازانماق اوچون داییم ایله باشماقچیلیغا باشلادیم. داییم مندن آلتی یاش بؤیوک اولسا دا بو اوچ – دؤرد ایلده یاخشی یوللانمیشدیق.
ایشین ایلک گونلرینده چکیش الیمین ایچینی آغریدیردی. یونس داییم دئییردی: “اولسون الیوین ایچی هله یاخشی پیشمهییب بیر نئچه آی چکیشی ایشلتسن الیوین ایچی برکییر ائله منده تازا باشماقچیلیغا گلنده الیمین ایچریسی سولوق چالدی، سولوغا اؤنم وئرمهدن چکیشین دستهسیندن داها دا گوجلو یاپیشدیم. هر زامان الیوین ایچریسینده سیگار سؤندوردون اوندا اؤزووه گؤره بیر اوستا اولموسان، باخ منیم الیمه “، سیگارین کؤزو تاسیلداییب الینین ایچینده کی قاباردا سؤنموشدو.
سحرلر نازلینین یوخوسو ایله دوروب اونو اونوتماق اوچون چؤرک آلماغا گئدیب، گون اورتا چاغی اذان سسشی ایله داریخاراق گینه نازلی یادیما دوشور. آنام حووض قیراغیندا دستناماز آلاراق ایکی گؤزو مندهدیر، مچیده ساری گئده – گئده دیل آلتی “گؤزل آغا چوخ گؤزل ایدی ووردو چیچک ده چیخارتدی، آللاه گؤروم او یونیسی نهدییم ائلهمهسین” دئدی.
آنام ائشیگه چیخاراق منده تلسیک حیطین آلت قاتینا یئنیب، یونیس داییمین وئردیگی ایچگیدن ایچمهیه باشلاییرام، ترک ائلهدییم سیگار قوخوسو یادیما دوشوب بئینیمین اینجه دامارلارین قاماشدیریر دووارین دلیک – دئشیگیندن سیگار کؤتوگو تاپیب، تئز آلیشدیریب، بیر درین پک ووراراق ائله توستو ایله اورتا دوواری آشیب نازلی گیلین حووضلارینین قیراغینا سؤیکهنیب آلما آغاجینین آلتینا دالیرام.
دووارین دئشیگیندن بیر شئی گؤرونمهییر، گؤردویوم یالنیز اورتایا آتیلمیش اویونجاق قاب – قاشیقلار و کرتی قیراغیندا خراب قالمیش ائودیر.
اوشاقایکن حکیمه خالا (ائو بیر قونشو اولدوغوموزا گؤره خالا دئیردیم) حیطین قوزئی یانینی سولاییب سوپورندن سونرا نازلی ایله من آلما آغاجین آلتیندا پالاز سالیب قوناق باجی اویناردیق، او، بالاجا اللری ایله اویونجاق قاب – قاشیقدا یئمک پیشیرردی منده کرتیدن لیغ دوزلدیب ائو تیکردیم. یاغیش یاغیب داملالاری آلما آغاجینین یارپاقلاریندان زویولدهییب تؤکولنده نازلی گؤیه باخاراق ” آی کیشی بو دامین دلیک – دئشیگینه یئتیش بوگون – صاباح دام باشیمیزا گلجکها ” دئیردی.
منده بیرالیمده آینا بیر الیمده ده قئیچی بیغلاریمین اوجونو ووروب سونرا یاغیش داملالارینی اونون یاناقلاریندان سیلهرک “هه خانیم دوز دئییرسن ؛ آمما بیر آز دؤز. قاباقدا یاغلی بیر معامله وار دوعا ائله یئرینه گئتسین، دام – داش کی سهلیدی، سنه ده یاخشی یئتیشمهلییم ” دئیردیم.
من آرخایینام موراد نازلینی سئومیر، یوخسا گونده ساواشیب اونو وورماز ایدی. گوناهلارین بیر آزی حکیمه خالا بیر آزیدا منیم آنامدایدی.
حکیمه خالا منیمله نازلینین بیری – بیریمیزی سئودیگیمیزی بیلیردی، ائله اونا گؤره ده آنامیقیرخ بیر مرثییهده گؤروب دئمیشدی، آنام ایسه خدیجه خالایا: بونلار نه سؤزدو ” گئت قیزیوی ییغیشدیر ” دئمیشدی.
نازلی دانیشگاها چیخاندان بری آنامین گؤزوندن داها دا دوشموشدو. من هر زامان نازلینین فیکرینه دالاندا آنام اونون ایرادلاریندان دئیردی، “اودور با پروین خانیم دئییردی اؤزوم بو ایکی گؤزومونن گؤردوم نازلی اوتوبوسدا چارشابین آچمیشدی، هله تئللرینده چرقت دن چیخاردیب آلنینا تؤکموشدو سونرا محلهیه یئتیشنده چارشابین اؤرتموشدو. آللاه آپارسین گتیرمهسین هئچ کسی تانیماق اولمور. من بو قیزی اؤز قیزیم کیمیبیلردیم، آمما ایندی قاش – قاباغی یئرینن گئدیر.
بیر قورو سلام وئرمیهده آرینیر. ائله بیر من دئمیشم چارشاب اؤرتسون. هله پروین باجینین سؤزو بیر یانا من اؤزوم دققتله نازلییا باخمیشام، هله قاشلارینین آلتینی دا گؤتوروب آللاه گؤرستمهسین دوغرودان آخرالزمان دئییرلر بودور”. آنام، نازلینین چارشابینان – تئلیندن قاشیندان دئینده من نازلییا داها دا ماراقلانیردیم.
حکیمه خالا، آنامین ” گئت قیزیوی ییغیشدیر ” سؤزونو نازلییا دئیندن سونرا نازلی اوجا سسله گولوب ” او دئییر به من لیلی اولموشام اونون دا اوغلو مجنون ؟” دئییب ؛ منیم فیکریمیباشیندان آتمیشدی. نه بیلیم بلکه ده آتمامیشدی. یوخسا اوشاغینین آدینین اولینی منیم آدیمین اولیندن قویماز ایدی.
بو سیرتیق گئده کچل موراد نمهاردان نازلینین مندن کوسدویونو بیلمیش اولمالییدی کی ائله اوچ – دؤرد گونون ایچینده اونا ائلچی یوللادی، نازلی دا ایستر ایستهمز اونا ” هن ” جوابی وئرمیشدی.
او گوندن بری کئچل گدههاچان نازلیگیله گلنده، بیر یوخاری مودئللی ماشینی قاپیلارینین قاباغیندا ساخلاییب حیطده اوجا سسله اونا “بیلیرسن سنی اله گتیرمک اوچون نلر چکمیشم ؟ ” دئیردی. یادا بیر یابانجی دیلده نوستالژیک (اوگدهنین دئدیگینه گؤره) بیر شارکی آچارکن باندلاری بیزیم حیطه ساری قویوب سسین اوجالدیردی.
منده سیگارین ترکیندن چیخاراق سیگاری – سیگار کؤتویونه یاندیرب گؤزلریمییوموب سیگارین توستو ایله دوواری آشیب ائله او شارکی ایله بیر الیم نازلی نین الینده اوبیری الیم ایسه اینجه بئلینده رقص ائله ییردیم.
بیر جوت پوتین باشماق دمیر قاپینین دئشیگینین او تاییندا دایاناراق بیر آن اؤزمه گلدیم. دمیر قاپی جیرها جیر آچیلاراق باشیما دیدی، سالونون ایشیغینین اثرینده سول گؤزوم ده یومولدو.
گؤزتچی “هه سیچان کیمینه آختاریرسان ؟ اولمایا بو بالاجا دلیکدن قاچماق ایستهییرسن ” دئیه یاخامدان یاپیشیب سئللولدان ائشیگه چکهرک سورغوجونون اوتاغینا آپاردی.
Arazazarbaijzn.anadilimiz@gmail.com
نوشته شده توسط admin در شنبه, ۱۹ بهمن ۱۳۹۸ ساعت ۲:۰۸ ب.ظ