کوراوغلو دا قوجالارمیش
رقیه کبیری
آنا دیلیمیز:قارا پوسه‌ک آستا-آستا چیله‌ییردی. چوخ کئچمه‌دن چیله‌مه یاغیش اوتاغیمین پنجره‌سینه دؤیور. توزلو جاملاردا یاغیش گیله‌لری‌نین ایزی قالیر.من جیغیردا دایانمیشام. بولودلارین گؤز یاشلاری داملا-داملا ساچلاریمی، یاناغیمی ایسلادیر. سانکی منی یوخودان اویادیر. آیاغیمی بؤیوک بیر داشین اوستونه قویورام. آیاغیم یاغیشدان ایسلانمیش مامیر ناخیشلی داش اوستونده سویروشور، بودره‌ییرم. سازین سرلی-سئحیرلی سسینه دلی اولموشام. چوخداندیر کی یاخیندان ساز دینله‌مه‌میشم. گره‌ک یاخیندان اوتوروب دینله‌ییم اونو.بیر واختلار اژدر عمی‌نین سازینا واله ایدیم. او دوروشوقلو، یاراشیقلی، شستلی قدّی-قامتی ایله سازی ائله چالاردی کی، دئیردین بس، کوراوغلو ایندی‌جه قاپیدان گیریب دئیه‌جک: »چونکی اولدون دییرمانچی/چاغیر گلسین دن کوراوغلو.« حاییف اولسون کی، اژدر عمی قوجالیب. بئلی بوکولوب، دیشلری تؤکولوب، سازی ایسه…. ایندیسه کوراوغلو سازی‌نین شاقراق سسی، سیس‌لی هاوادا قایالاری بورویوب. من‌سه اونو یاخیندان دینله‌مه‌یه دری‌دن-قابیقدان چیخیر، ال-آیاقدان گئدیرم. آنجاق یوخاری قالخماغا نه قدر جان آتیرام بیر او قدر ده اذیّت چکیرم. جیغیردا دایانیب، قالمیشام. بیر یانیم قورخولو سیلدیریم، او بیری یانیم ایسه بولودلاری باغرینا قوجان یالچین قایالار. یوخاری قالخیم دئیه، اوشاقلار کیمی ایمکله‌ییرم. داهار یئرین چینقیل‌لاری، خیر داشلاری دیزلریمه، اللریمین آیاسینا توخونوبان اینجیدیر منی. اوغرون-اوغرون آددیملاییرام. بیر آز یوخاری قالخیرام. آیاغیمین بودره‌مه‌سیندن قورخورام. ائله اولورسا، تپه‌م اوسته یارقانا دوشه‌جه‌یم. اؤز اؤزومه توختالیق وئریر، ایره‌لی آددیملاییرام. نه قدر چالیشیرام یوخاری قالخا بیلمیرم. چاره‌سیز قالیب بیر داشین اوستونده اوتورورام. هردن قوللاریمی داراقلاییر، هرد‌ن‌سه قولتوقلاریمی قوجاقلاییرام. کوراوغلو سازی‌نین یئلتمه هاواسیلا دان یئرینه یول آلیرام.کوراوغلو طؤیله دامیندا هویوخموش، فیکره دالمیش، نه‌سه بیر شئیی ماددیم-ماددیم سوزور. »نییه تله‌سدین ؟!« دئییرم. »روشن! بیر آزجا دؤزوملو اولسایدین، قیرآت قاناد آچمیشدی«.آلی‌کیشی دئییر: »بلکه قیسمت بئله‌یمیش!«. کوراوغلو اؤزونو لعنت‌له‌یه‌رک، »نییه قیسمتی دَییشه بیلمه‌دیم !« دئییر.من‌سه دوشونورم؛ کوراوغلو قیسمتی دییشمیش اولسایدی، اوندا دور‌آیغیر بلکه ده قیرآتین قانادلارینی قیسقاناردی.گورشاد شیدیرغی شیغاییر. آت‌قویروغو ، آت‌قولاغی داملالار کوراوغلونون سازیندان قوپان جینگیلی‌لرله بیرگه پنجره‌مه چیرپلیر. باشیمی کیتابدان قالدیریب، باییرا باخیرام. یاغیش گیله‌لری سو بومباسی‌دیر سانکی، جاملارین اوزه‌رینده پارتلاییب، آشاغی سوزولور. ساچلاریم ایسلانیب. ایسلاق گئجه‌لیییم جانیما سوواشیر. کوره‌ییم اوشویور. یئریمدن قالخیب شالیمی چیگین‌لریمه سالیرام.کیتابی قوجاقلاییرام. قایالارین باشیندان گلن سازسسی دامارلایمدا آخان ایستی قان‌دیر سانکی. کوراوغونون آوازی نیگارخانیمی ایستانبولدان قاچیرماق ماجراسینی قایالاردا سس‌لندیریر.کوراوغلو قیرآت بئلینده، نیگار ایسه ترکینده، من ده نیگاردان اجازه‌سیز، قوللاریمی اونون بئلینه دولامیشام. بارماقلاریم آز قالیر کوراوغلویا چاتسین. قیرآت دؤرد‌نالا چاپیر. نیگارین شوه ساچلاری هاوادا یئل‌له‌نیر. کولک‌له دالغالانان ساچلار، اوزو-گؤزومه ساریلیر. گؤزلریم قارالیر.
قارانلیق آستا-آستا پنجره‌دن اوتاغیمین اورتاسینا اوزانیر. قالخیب میز اوستو چیراغیمی یاندیریرام.هله آخشاما چوخ قالیر. گلیرم…گلیرم…گلیرم؛ قایالارین دیبینده، داش اوستونده اوتوردوغوم یئرده، اوتورورام. بیریسی یاغیشین آغزینا پیچاق آتمیش دئیه‌سن، یاغیش کسیب. بلن‌لری، یاماجلاری بوروین چن، بولودلارا قاریشیب. گونش بولودلاری ایشقلاندیرمیش. سازین دا سسی کسیلیب. باشیمی یوخاری قالدیریب گوموشو دونقار قایالارا باخیرام.قیریشلی آلنی، ائشمه بیغلاری، ایچینی اوزونده عکس ائتدیریر. آنجاق آردیج قامتی آزجا اییلمیش؛ کوراوغلونون گؤزو اوزاقلاردا، آستا-آستا داغدان ائنیر. قوشا بولاقدان گلیر. آتاسی مزاریندن. منه چاتان کیمی داش اوستونده اوتورور. اونا یاخین‌لاشیرام. یورولمایاسان کوراوغلو! دئییرم. نیگار خانیم یوخدور. الیمی، الی‌نین اوستونه قویورام. اللری پوللانمیش دمیر کیمی‌دیر. اطرافیمی سوزه‌رک بارماقلاریمی آغارمیش ساچلاریندا گزدیریرم. بارماقلاریمین اوجو کؤز کیمی‌دیر. باشیمی دیزلرینه قویورام. ایستی اویلوقلاری یاناقلاریمی ایسیندیریر. اللریندن توتوب ساچلاریمدا گزدیرمک ایسته‌ییرم. او ایسه سازینی دؤشوندن آلیب، بیر قیراغا قویور. قیلینجی‌نین اوجو یئرده‌کی داشلارا دَییر. »کوراوغلو! منه بیر یانیق کرمی چال!« دئییرم. ائشیتمیر. گؤزلرینی یومور. بارماغیمی سازی‌نین تئل‌لرینه چکیرم.
جینقیدی….جینقیدی…جینقیدی….
کوراوغلو گؤزلرین آچیر. منه باخیر. آنجاق منی گؤرمور. باشینی قالدیریب بولودلارا چکیلمیش هوندور قایالارا باخیر. من ده گؤزلریمی بولودلارا زیلله‌ییرم. باشیم دؤنور. بیر پارچا کؤز کیمی‌یم. باشیمی اونون دیزیندن گؤتورورم.کوراوغلو سازی دؤشونه آلیب، یولونا دوام ائدیر. هر آددیم آتدیقدا ساز، توْولاما بئشیک کیمی دؤشونده ییرقالانیر. بئلینه قورشانمیش میصری قیلینجی، سانکی اونونلا قوشا آددیم‌لاییر. اونون آرخاسینجا چنلی‌بئله گئدیرم. اوزاقدان نیگار خانیمی گؤرورم. کوراوغلو دا اونو گؤرور. »کئشگه من او داش اوستونده اوتوراردیم« دئییرم.
نیگار، تک-تنها اوتوروب، آغ قایالارا باخیر. ساچلاری چیگین‌لریندن بئلینه شلاله‌لنیب. هؤله‌سک بیر شکیلده، کوراوغلودان قاباق، نیگارا یاناشیرام. امّا کوراوغلو یاخین‌لاشدیقجا، نیگارین قاشلاری چاتیلیر، گؤزلری توتقون بولودلار کیمی دولور، بیر هیمه بنددیر، دیندیره‌ن اولورسا نئیسان یاغیشی تک یاغاسی‌دیر. کوراوغلو نیگارین یانیندا اوتورور. من‌سه او بیری یانیندا اوتورورام. کوراوغلونون قولو نیگارین بئلینه دولاشیرکن منیم ده قولوما توخونور. قازان دولوسو قاینار سو، باشیمدان آشاغی تؤکولور سانکی.گؤزلریمی یومورام. کیتابی میز اوستونه بوراخیرام. چیراق، کوراوغلویلا نیگارین اوتوردوغو داشین اوستونو ایشیق‌لاندیریر. نیگارین باشی کوراوغلونون دؤشونده‌کی سازا سؤیکه‌نیب. ساچلاری ایسه اونون دیزلرینه توکولوب. هنده‌وریمه گؤز گزدیریرم. کیتابخانامدا سیرایلا دوزولن کیتابلار ائله‌بیل بوز قالیب‌لاری‌دیر، کیتابلارین سویوغو ایچیمی اریدیر. اوشویورم، اوشونورم، دوشونورم. کیتابی باغریما باسیرام. نیگار خانیمین سسی گلیر:»قوچ ایگیدیم! کئچن گونلر یادیما دوشور. چنلی‌بئلده آت کیشنرتی‌سیندن، دلی‌لرین نعره‌سیندن، قیلینج‌لارین سسیندن قولاق توتولاردی. اورایا بئله، قوش قوشلوغوندا قانادلانمازدی. سن نعره چکدیکده، داغلار، داشلار سسینه سس وئرردی. ایندی هانی او گونلر!؟ ایندی چنلی بئلده قوو ووروسان قولاق توتولور.«
کوراوغلو قاراقاباق سیماسیلا دینمز-سؤیلمز قییا تؤکوبن اوزاقلارا باخیر. بارماقلاری نیگارین ساچلاریندا گزیشیر. الیمی ساچلاریما چکیرم. کوراوغلویا یاخین‌لاشیرام، الیمی ساچلارینا آپاردیقدا، نیگار، قارا خومار‌گؤزلریله، سیگیرمه باخیشی‌لا منه باخیر. گؤزلری منه گئت دئییر سانکی. اوتانیرام. بوینو بوکولو، ائنر-قالخار چنلی بئلین بان ائولرینه ، بینه‌‌لرینه ساری گئدیرم. بویلانیب بیر به بیر ایچه‌ری‌لرینه باخیرام. تاوانلارین ویغالینی قوروم باسمیش. تندیرلر سؤنوک، ارسین‌لر ایسه تندیرلرین پییه‌سینه بوراخیلمیش. تاخیل کندیلری اوزوقویلو یئره سریلیب. اوجاقلاردا یاریمچیق یانمیش اودونلار کول‌توپاسینا قویلانیب. تونلوکدن تؤکولن یاغیش ایزلری کولون اوستونده خال-خال گؤرونور. چالی-چیرپی، گون، تیکان‌کوللاری بوش ائولرین بوجاغیندا تلله‌نیب. کلوولار دا بوشدور کاغا‌لار دا. غفیلدن آیاغیم چارداغین قاباغیندا دؤشه‌مه‌یه ایلیشیر. اودون قالاغیندان توتماسایدیم، ییخیلاجاقدیم. دؤندرمه‌نین آلتیندا چیغ سبد ایچره سامانا قویلانمیش بیر نئچه یومورتا وار. نه بیلیم ، بلکه بو یومورتالار کوت‌تویوغون فالاسی‌دیر.ائولرین بیریسی دؤشه‌نک‌لیدیر. بیر بوجاقدا چیچک ناخیشلی اویماصاندیق، او بیری‌سینده ایسه یورغان-دؤشک باغلیسی. باغلی اوزه‌رینده ایسه ایکی یاستیق گؤرونور. کوراوغلونون میخدان آسیلان، قاراگول بؤرکو، یارغاق کورکو، قارساق دری‌سیندن تیکیلمیش چکمنی اؤزونه چکیر منی. دوواردا، کورکون یانیدا سینق بیر گوزگو وار. ایچه‌ری گیریرم. الیمی کورکه چکیرم. سینیق گوزگوده، اؤزومه باخیرام. سیر-صیفتیم پارچا-پارچا گؤرونور. گؤزوم صاندیقدا قالیب. یاخین‌لاشیب. قیفیلینی یوخلاییرام. الیم هاوادا قورویور. گئری چکیلیرم. نیگارخانیمین صاندیغیندا نه وار دئیه دوشونورم. ائشیگه چیخمادان کوراوغلونون کورکونو میخدان آلیرام. قوخوللاییب، باغریما باسیرام. ائشیگه چیخارکن آیاق ایزلریم دؤشه‌مه‌نین اوستونده قالیر.
نوشته شده توسط admin در شنبه, ۱۸ بهمن ۱۳۹۳ ساعت ۷:۳۲ ق.ظ
