کند یا شهر آرزیسی
اکبرسعادت
آنا دیلیمیز:اورمونون آدی گلنده، جانیما جان گلیر دئسم بلکه اینانمایاسیز.وطن منیم اوچون گاهدان ال چاتیلماز اولوبدور. بیلیرم، وطنین ال چاتیلمازلیغی تکجه منه یوخ، منه تای بیر چوخلارینا دیر. ال چاتیلماز دئدیکده، اورمودا یاشاماغی دئییرم. یوخسا ایستهدیـییم هر بیر دیارا گئدیب، بیر ائونهلیک، ایکی ائونهلیک، بیر گئجهلیک قالا بیلرم. آمما بیر شهرلی کیمی شهری یاشایانمارام.
کندلیلر، اوشاقلیقدان چول-باییرلا ایلگیلنیرلر. کندلیلرین دوروملارینا گوره ایشلمکلری فرقلی اولور. هر کس گون چیخاندان ایشه گئدیر. آروادلی-کیشیلی، قیزلی-اوغلانلی هر کس ایشلمهلیدیر. اولا بیلسین ایشه تزه باشلایان اوشاقلار ایش اوچون زورلانسینلار، اونلاردان باشقا هر کس ایشین بیر اوجوندان یاپیشیب ایشلهییرلر. گرکن یئمکلر، نسنهلری اوزلری یئتیشدیریرلر(ایندیلیکده بیر آز دهییشیبلر، بیر آز شهرلیلشیبلر.)
یالان دانیشماقدان آجیقلاری گلر، قوناغی سئوهرلر. بیر سوفرا باشیندا اوتورسالار، دوز-چورک یئدیکلرینه گوره دالدان خنچر وورماقدان چکیلرلر. ایش چئویرمهیی دوشونمزلر. بویوک-کیچیک حورمتی ساخلانیلار. دوستلوقدا سونونا قدر اولورلار، دوشمان اولدوقدا دوشمانلیغی اوزلرینده یانسیدارلار. تئز ائولهنرلر، تئز ائولندیکلری اوچون گوزلری اونون-بونون ناموسونون دالیسیندا اولماز. آرواد-کیشی بیر-بیریندن چکیلمزلر. قیزلار اوغلانلاردان قاچمازلار. بیری بیرین سئوسه، تئز اوزه چیخارارلار. گیزلی سئوگینی اوزاتمازلار. قیزی وئرمهدیلر قاچیردارلار. کندلیلرین سیخینتیلار درساوخویان اوشاقلارینین چتینلییه دوشدوکلری اولور. درسی اوخویوب بیتیرن کندلیلر داها کنده قاییتمازلار. شهرلیلری اوز یئرلرینده(کندلرده) سئورلر، شهره گئتدیکده شهرلیلرله خوشلانمازلار(شهرلیلرین کندلیلره توخوندوقلاری اوچون). شهره گلدیکده جالیشارلار شهرلیلرین دبلریله داورانالار. کندلیلر ساغلام یاشایارلار. هر کس کندلیلری گوردوکده سوت-قاتیقلا سارییاغی ساغلاملیقلاری اوچون ائتگیلی بیلیرلر. ایشلمهیی، دوغادا یاشاماغی، دوز یاشاماغی ائتگیلی بیلمزلر. کندده کاسیب، دئولتلی او قدر سئچیلمزلر(تویدا- یاسدا)
ایندیکی شهرلرین یوزه دوخسانینی کندلی شهرلیلر توتورلار. کندلی شهرلیلر کندین یاشاییشیندان قورتولسون دئیه شهرلره قاچدیلار. گوزلری شهرین بوشلوغو توتان کندلیلر شهرده یاشاماغی هر قیمته سئچدیلر. یئرلرین(زمیلر، یایلاقلار، چایلاقلار) بوراخیب، شهرلرده فهلهلییه باشلادیلار.)
شهرده یئرلری اولمادیقلاری اوچون(آتا-بابالارینین یئرلری کندلرده ایدی)، شهرین قیراق یئرلرین قانباهاسینا آلیب، بیر کولوخ دوزلدیب، آرواد-اوشاقلارینی یئرلشدیردیلر. شهرلیلرین فیریلداقلیغین اویرنمهدیکلری اوچون هر جاناوارا یئم اولدولار.
اوشاقلاری درسه گئتدیکده کندلیلیکلرین گیزلتسین دئیه کند غرورلارینی ایتیردیکلری اوچون شهرلیلره بوتونلوکله ازیلدیلر. بیر نفر سحردن گئجهیه دایانمادان چالیشیر، سونوندا بئش-اون تومن آلیب، گلهجهیی دوشونمهدن او گونو زور کئچیردیرلر. کیشی ایشلهییر، بیر بوللو خیزان یئییر (یئمک نه یئمک!). اوشاقلاری یییهلنمهدیکلری اوچون اوشاقلار اوزباشینا اولورلار. بئله بیر شهرلیلر هر ندن قالیرلار. کنددن ده شهردن ده. کندلیلیکدن ده شهرلیلیکدن ده شهرلی کندلیلر، کندلری شهر اولان کندلی-شهرلیلره دئییلیر. بئله بیر شهرلیلر شهرلیلییی قازانماق اوچون ائله واقتلار اولور ساواشیب، قان توکورلر. هر نه اولسا، یئرلری بویویوب، اوزونه بولوار، خیاوان، پارک، بیلیمیوردو، خستهخانا، بلدیه باشقانی و… ایستهییر. شهرلی کندلیلر کند ایشلرینین بوتونونو گورورلر. بو ایش گورنلرین ایچینده شهرلیلره تای آداملار دا وار. بیری توکان دولاندیریر، بیری دئولت ایشینه گیریر. بیرلری ده بوش-بوش گزیب پول توپلاماغی بهیهنیرلر(بئله پول قازانماق ایندیلیکده کندلره ده گیریب). سوموکلری آغیرلانانلار، آتا-بابالاریندان قالان یئرلری(شهر اولدوقدا مئتیره دوشور، اکین اکمک یئرینه بولوب مئتیرینی ایستهدییی پولا ساتیر) ساتیب-ساویریرلار. ائنینه-بولونا خرجلهییب سسینی گورولدهدیرلر. شهرلیکندلیلر باشلار ایچینده باش چیخارتماغی بهیهنیرلر. شهرلر آراسی هر یاریشمایا قاتیلیرلار. اوزلرینی چوخ بهیهنمکلرینه باخمایاراق گوزلری باشقا شهرلرده گزیر. داها دوغروسو باشقا شهرلری اوزلرینه اورنک گوتوروب گلیشدیریرلر. بیلمیرلر اورنک گوتوردوکلری شهر، باشقا شهری اوزلرینه اورنک گوتوروب. بو شهرلرین اوزلرینه مجلیس وکیللری اولمادیقلاری اوچون گوزلری باشقا بویوک شهردن چیخان وکیلده اولور. هردن مجلیسه وکیل یوللاماق اوچون بوتون گوجلرین وورورلار، اولمور کی اولمور. شهرلیلیک نه زاماندان تاپیلیب، بیر سوزلر دئمک اولار. آمما بو کی ایندیکی شهرلیلر نه زاماندان شهرلی اولوبلار اونو بیلمک چتین دیر. بیر سیرا شهرلیلر زیر شهرلیدیرلر. بئله شهرلیلرین آتا-بابالاری یادلارینا گلن شهرده اولوبلار، آتا-بابادان شهرده ائو قالیب. شهرلیلرین ائولری ییغجام اولور، ائولری بیر زامان یئکه اولموشدوسا، سونرا ائولر اوشاقلارین آراسیندا بولونوب، گئتدیکجه کیچیلیب. شهرلیلرین بویوک ایشلری ایشدن قاچماق، ایشلرینی باشقالارین باشینا سالماق دیر. شهرلیلرین گوزلری باشقالارینین الینده دیر. قوناقدان خوشلانمازلار. هر زامان بیر شئلرین گیزلهدرلر. بازاردا اولماقلا دئولته ایشلمهیی بهیهنرلر. آرالاریند ایشآداملاری اولور، بو ایش آداملاری ایسه ایشلرینی هر کسین اوزونه چکیر. شهرلیلر درس اوخوماغا اؤنم وئریرلر، دئولت ایشینه گیرمک اوچون(کئچمیشده نئجهایدیلر بیلمیرم.)
هر آداملا یاخینلاشمازلار، باشاردیقجا بیر کسی قوناق ائلهمزلر. اللریندن گلن هر کسه قوناق اولارلار، قوناقاولدوقلارینی ایفتیخارلا دئیرلر. هر زامان بورکلریندن برک توتارلار. یئری گلسه هر کسی ساتارلار(قارداش، یولداش، باجی، آنا.)
نوشته شده توسط admin در دوشنبه, ۰۶ اردیبهشت ۱۳۹۵ ساعت ۴:۳۷ ق.ظ