کل دویوشدورمک دبی
یازار:اکبرسعادت
عشق اوره ک آتینا مینسه
بوتون آرزولارینا چاتار
اگر اوره ک اولماسا،عشق هاردا مسکن ائده ر؟
و اگرعشق اولماسا،اوره ک نه یه گره کدیر؟؟
آنادیلیمیز:قدیم لر،پاییزین سون گونلرینده و قیش فصلی نین باشلانیشیندا،کل لری پیه یه باغلاردیلار…باهارین اورتالاریندا کلی پیه ده چیخاردیب و اول گون جوته قوشاردیلار.بو حالدا کلین بئلینی خام توپراق نان اوواردیلار.ایکینجی گون بیر ساعات یاریم….اوچونجو گون بیر ساعات یاریم و یا ایکی ساعات.و دوردونجو گون بئلنچی یئر سورردیلر…کلی خامدان چیخاردانان سونرا اوندان اویانا هاواختا کیمی ایسته ییر سن ایشلت…اصلا آخشاما کیمی اوندان ایش چک…آخ دئمه ز کی!!!!کندلی لر یاخچی بیلر،کلی خامدان چیخارتماسان قیچ قولو توتولار…کل دویوشدورمک ده اوزونه گوره بیر ماجراسی وار…و هئچ اولماسا ادبیاتیمیزدا اوزونه گوره بیر نئچه بند سوزو وار…
قیشدا کلی باغدا شنبلله چییید و قورو چمن و سامان وئرردیلر…کلین بئلینی کوهنه پالتار یا پالازنان شالاق لایاردیلار…خامدان چیخارتمامیشدان قاباق،بیر سرین واخت دا کلین یییه لری(صاحب لاری) کل لری چیخاردیب و سو قیراغیندا دویوشدورردیلر…اون اون بئش نفر چای قیراغینین بوتایندا و بیر عده ده سویون او بیری طرفینده، دوراردیلار…دویوشدورن گونون آخشامیسی دویوشه ن کله سو وئرمزدیلر…یوخسا کل شیشیب و دویوشه بیلمزدیر.اوزونه گوره بیر فلسفه سی وار!!!!بیر عده ده بئله دئییر کی:بعضا دویوشه ن کلین بورنوزلارینی شیش نن ایتیلدردیلر…غالیب کل،قاچان کلی نم هارا کیمی قووالاردی…و سوز بوردادی که قاچان کل داها نه ایش گورسه ایدین جوته گئتمزدیر.وووووو چاره قصابین یانینا گئتمه ک ایدی..!!!!
کل لر دویوشنده،صاحاب لاری گورسه ایدی که بیر بیری نین قارنین ییرتاجاقلار،هر کلین صاحابی،بیر سئجیمی دالدان کلین اومبالاری نین اوستوندن بئلینه آتیب و سئجیمین باشلارینی قارنی نین آلتیندان گئچیردیب پاچاسیندان چیخارداردیلار.هر سئجیم دن مثلن اون اون بئش نفر یاپیشار و ایکی اوش نفر ده عینی زامان دا دالدان چکیب و کل لری بیر بیریندن آییراردیلار…و بئله ایمیش کل دویوشدورمک…قدیم زامان هر کند ده هئچ اولماسا هر ائو صاحیبی نین بیر نئچه دنه کلی اولاردی…اما ایندی چوخ چتین کل تاپیلیر…
بیر کند گورونتوسو:آخشام باشیلار. الیمده کی آغاجنان، قاباقیمدا کی اینه گین بئلینه ووریب قیشقیریردیم. بیلمه ییردیم منیم سسیمدیر اونلاری قاباقا سورن یا کی وئرولماقین قورخوسو بلکه ده اینه ک لر اوزلری مندن ده یورقونیدیلار و قدملرینی سانییردیلار ائوه چاتیب دینله نه لر دیه. آخشام باشیلار. الیمده کی آغاجنان قاباقیمدا کی اینه گین بئله نه وئریب قیشقیریردیم. بؤریمده کی قولاقی کئسیک کوچوک، باشین سالیب آشاغیا یورقون یورقون اله گئدیر دی کی اله بیل هئچ دونیا خیالینا دئیر. آرادا بیر دایانیب اویان بویانا باخاندان سونرا گئنه ده باشین ساللاییردی آشاغیا، بئلکه ده اوتانیردی اینه کین یاشلارینی گؤرمه کدن.
الیمده کی آغاجی هر سئری وئریب قیشقیریردیم آخشام باشیلار کندین دوزون چیخاندا یوخاریا و بیلیردیم کی قولاقی کئسیک کوچوک و قاباقیمدا کی اینک ده بیلیر نه دن قیشقیریرام آمما بئلکه اوز اوزلرینه گئتیرمیر لر. بئلکه ده گئتیریرلر آمما من باشا دوشمورم.
آخشام باشیدی. کندین دوزون چیخیردیم. اینه ک گوزه لییردی قیشقیرتیلاریمدا کی ووروشو و کوچوک باشینی آشاغیا سالمیشدی. الیمده کی آغاج یئره سوروتله نیر دی و سئس وئریردی سورونین ایاقینین آلیندان قاچان داشلارا. منده باشیمی آشاغیا سالیب قابایمدا گئدن اینه کین قویروقینا گوز تیکمیشدیم دوزی چیخا چیخا. بویوک ماوی قاپیمیزین قاباقیندا سوشوب کندین خیابانینا گیریب دالداکی تاختا قاپیمیزی آرالایب سورونو سالیب طوله یه قاپیسین باغلادیم. هاوا بو گونلر تئز قارنلیقلاییردی. طوله نین قاپیسینین آغزیندا دایانیب ایکی ائوین آراسیندا کی بویوک توت آغاجینا گوز تیکدیم. یارپاقلارینی سارالدیب توکمیشیدی ایاقینین آلتینا آمما بیر نئچه یارپاق ائله یاپیشمیشدیلار آغاجین قانادلارینا،اله بیل یاشام بورجلارینی آغاجدان ایسته ییردیلر. گونون کؤزه رن ایشیقینین آلتیندا او جان سیز یارپاقلار، آغاجین آنا داماریندان یاپیشیب قانین سوموروردیلار. توت آغاجینین قانین سوران ساری یارپاق لار.
او ساری قیرمیزی گونون آلتیندا آغام دوغرادیقی اوتلاری گؤتوروب یئر به یئر اله ییندن سونرا، ایاقلاریما سو توتوب ائوه گیردیم. ننه مین شورباسی پوققیلداییردی پیله ته نین اوستونده، ایسیندن بیلدیم.
آلا قارنلیق ائوده، بویوک اتاقین اورتاسیندا بیر ساری لامپ کؤزه ریردی، ائله بیل پاییز گونشینین بیر تیکه سینی گئتیریب ائوه اورتاسیندان آسلایب سان، اینجیدیردی بو ایشیق منی. دهلیزین قاپیسیندان کئچدیم ننه مین بورینه بالاجا اتاقدا. تک اوتورموشدی اوردا، شورباسینین دادینا باخیب، گون ایشلریندن یورقون، مورگوله ییردی آرادا. سالام وئریب اوتوردوم. بؤرینده کی سماورین اوستوندن چاینیکین گؤتوروب قارا بیر چایی ایستیکانین یاریسیناجاق بوشالتدی. اللری تیتره ییردی سماوردن سو آلاندا چایین اوستونه. ” هاردادیلار” سوراندان سونرا، قندی آغزیما قویوب دیل دوداقیمی یاندیران چایی هورتیلدادا هورتیلدادا ایچدیم. ” آغان قئفه ده، قیزلار دا علویه نین یانیندا دیلار، چیچک بی بین گیلده “. دینمه دیم.
باشیمی آق آستارلی قیرمیزی یاستیقین اوستوندن قوزادیم ننه مین سسینن. قیزلار گئلمیشدیلر، آغامدا. بویوک اتاقدا کؤزه رن ایشیقین آلتیندا سئفرانی سئرندن سونرا ننه م هرکسین پایینی چکیب قویدو قاباقینا، ” منه آز چئک دئدیم”. کاسانی گؤتوروب قویدوم ننه مین قاباقینا. گؤز آلتی باخیب منه دئدی ” خیر اولا ؟؟ “. دینمه دیم.
آغام میس قازانی قاباقینا چئکه چئکه دئدی ” گئجه ایکی-ده سو نوبامیزدی، یادوندان کی چیخماییب؟ ” باشیمنان جوابلادیم کی ” یوخ “. دئدی ” کاظیم تیراختورنان گئله جک دالیمیزجان “. اتلری سومیکدن آیریب دووندن سونرا، ننم گینه هرکسین پاین چکنده دئدیم کی ” من یئمیرم “. کئچیب بالاجا اتاقدان قئرمزی بالینجی گؤتوروب گیردیم بالاخانایا.ساعات سککیز دؤزه سی اولاردی هله. اوزانمیشدیم.
قارداشلاریم ائوله نندن سونرا من بالاخانادا تک یاتیردیم. قیزلار بؤیوک اتاقدا و آغامنان ننه من ده بالاجا اتاقدا یاتیردیلار. بالاجا اتاق ننه مین ساغ الیدی. اتاقین بیر طرفینده یاریم مترلیک سَکی واریدی.سَکسنین آلتینا توردان پرده وئریب قوناق قابلارین اورا ییغمیشدی. سَکینین اوستینه سه، یورقان دوشه ک لرین. اتاقدان بیر کوشه سیینده، پنجره نین آلتینا، سماوارین و بئش آلتی ایستیکانین قویموشدو.ایکی دوشه جه سئریب بیر بویوک جئجیم پشتی نی دایامیشدی دیوارا. ار آرواد اوردا اوتوراردیلار. آغام همیشه بیزلری یوخو توتاندان سونرا، پنجره نی آچیب سیگارین آلیشدیریب قبرستانلیقین بؤرینده کی تپه یه باخاردی. بیر نئچه دفعه گئجه لر سودان گلنده آغامی اوجور گؤرمیشدیم. اوزاقدان، آغامین بئغینین آلتیندان قاچان توستولر، گؤزه بیر ناخیش باغیشلاییردی قارانلیقدا ساچیلان یالانچی ایشیقلارین اوزونه. ننه م ده اله راحات یاتاردی کی، باخان دیئردی گؤره سن هانسی پادیشاهین قیزی دی. هر ایکیسی ده قوجالمیشدیلار.
نوشته شده توسط admin در چهارشنبه, ۲۹ دی ۱۳۹۵ ساعت ۶:۴۲ ق.ظ
