یول یولداشی

فرانک انصاری
آنا دیلیمیز:رحمتلیک ننه¬م دئییردی یول یولداشی اولماق چتین¬دی، هر آدامین ایشی دئییل. یازیق آرواد دوز دئییرمیش، اوندا من باشا دوشموردوم.ایندی¬نین سؤزو دئییل، نئچه ایلدن سونرا قبول ائله من¬نن یولا گلمه¬ییب¬سن! گَلدییین واخت هله منیم چوخ ایشیم وار ایدی گؤرمه¬یه. او بیری اوشاق¬لار کیمی عراقلی¬لارین دَده¬سینی یاندیرماق ایسته¬ییردیم؛ آنجاق سنین پیس واختدا گلمه¬یین هر نه-یی کورلادی. بلکه ده گلمه¬یین اؤز الینده دئییلدی، گئتمه¬یین نئجه؟ او کی اؤز الینده ایدی. اوندا نییه یئرینی بَرکیدیب قالدین؟ دوکتورلر دئدیلر خطری وار، اؤزون نئجه؟ ایسته¬سه¬یدین ائله¬یه بیلردین. دوز دئییرم یا یوخ…
گؤردویون ایش¬لرین منه گؤره اولدوغونا اینانمیرام. منه گؤره اولسایدی، ایندی¬یه چوخدان منی اؤزوینن آپارمیشدین او دونیایا. ایندی قالیبسان بوغازیمدا، نه آتا بیلیرم، نه اودا بیلیرم. آللاها ناشوکور بنده دئییلم، آنجاق بورا گَلندن بَری گونده اؤز – اؤزومه دئییرم: بو یولداشی منه وئرمکدن اؤترو، بو گونه قالمیشام ها؟!
الینی قویدو بوینونون دالینا، اؤوکه¬لدی. سونرا دونوخدو الینده¬کی قدیمی شکیله. بیر عکسه باخ گؤر همن آدامام؟ اوندا شیر تکین ایدیم. جبهه¬دن گلنده ننه¬م بیر توربا اوزَرلیک یاندیراردی. دئییردی: بالا! گؤز دَیر.
قونشولارین منه گؤز وورماغینی بیلمیرم، آنجاق یولا چیخاندا قیزلارین جومالاشماغینی یولومون اوسته گؤروردوم. یاشلی گؤزلرینی منه تیکیب دالیمجاق دوعا ائله¬یَردیلر. بیلمه¬دیم اؤزومه گؤره ایدی، یا قد – قامتیمه گؤره. منیم اورَییم اونلارنان دئییلدی. بونلار هامیسی سؤز ایدی. بورا گلندن سونرا بیلدیم دونیا هئچ کیمه وفاسی یوخدو. نئجه¬کی من “جئیران”ـا وفالی اولمادیم.الینی آپاردی بالیشی¬نین آلتینا، آیری بیر شکیل چیخارتدی. گؤرورسن جئیران¬دی. چارشاب باشیندا منه باخیب گولور. اردبیلده دوستوم “محمود”ـون تویوندا اونو گؤردوم. هنده¬وَردن سوروشاندان سونرا، بیلدیم گلین خانیمین باجیسی¬دی.
اورَییم چیرپیندی. کَپنک¬لرین قاناد چالماق¬لاری یادیما دوشدو. فیکر ائله¬دیم: سینه¬م کپنک¬نن دولوب¬دو. ائلچی¬لیکدن سونرا بیر سویوق قارلی هاوادا توی توتدوق. یادیمدادی قار دیزدن ایدی. بیزیم تویوموز سنین یادینا گلمز. اوندا هله بیر – بیریمیزنن تانیش اولمامیشدیق. او گون قانادلانیب اوچوردوم.
بئله فیکیرلَشیردیم: قوجالاندا جئیران¬نان چَلیک وورا – وورا، اوشاق¬لاریمیزین ائوینه گئده¬جه¬ییک. سونرا اؤله¬نه¬جک بیرلیکده یاشایاجاییق. حئیف کی او جور اولمادی، یعنی سن قویمادین.
اورَکدن بیر آه چکیب آتوشگه¬دن گؤزونو حَیه¬طه تیکدی. او کیشینی گؤرورسن؟ سن بورا گلندن اونو گونده بو جور گؤرورم. آسایشگاه پالتاری¬نین اوستوندن کراوات تاخیب حَیه¬طده دولانیر. الینی بئلینه ووروب شاخ – شاخ یول یئریییر. آدی “صَفر”دی. جنگ زامانی اونو گؤرموشدوم. بئله دئییلدی هئچ. او دا جنگده موجی اولوب¬دی. هئچ کیم¬نن یولا گئتمیر. اوندا منه دئیَردی: دَده¬م خان ایمیش. الینی ووراردی بئلینه، شاخ – شاخ یول یئریییب دستور وئره¬ردی. یازیق بیلمیر ایندی اؤزو ده دَده-سی کیمی اولوب¬دور.
الینی پنچره¬نین سویوق نرده¬سیندن چکدی کنارا. تخت اوسته بارداشینی قوروب اودقوندو. دوز دئییرسن… هامیدان یازیغی اؤزومَم. یازیق آرواد گؤره¬سن نئجه¬دی؟ گؤره¬سن جورلاناجاق؟ دونوخدو اوستونه کاغیذ بیر تقویم آسیلمیش رنگی – روفو قاچمیش دیوارا. گون آتوشگه¬دن شاخیردی یئره. اوتاغین قاپیسی قورو سس¬نن آچیلیب “عباسی” آدیندا بیر پرستار الینده غذا گیردی ایچَری. ـ »بیزیم آغا “موراد”یمز نه قاییریر؟حالی سازدی؟«
اودقونوب دئدی: ـ »یئنه نه گتیریب¬سن؟ شوربا؟ بیر نعلبکی داواینان؟ شوربا اولسا یئیه¬رم آنجاق نعلبکیده¬کی¬لره یئریم یوخدو!«
پرستار سینی¬نی قویدو قاباغینا. ـ »یوخ بئله اولماز. ائوه گئتمک اوچون هر ایکیسی لازیم¬دی.«
الینی اوزاتدی قاشیغا. اونو کاسانین ایچینده دولاندیریب آپاردی آغزینا ساری. الی گؤیده قورودو. ـ »دوغرودان خانیم پرستار نئجه¬دی؟«
عباسی دستگیره¬نی اویناتدی. ـ »یاخشی¬دی… اوزو بیر آز گؤیه¬ریب. اؤزوموزوک آ، الین یامان گوجلودو.« سونرا قاپینی اؤرتدو. قاشیق الیندن دوشدو کاسایا. شوربا لکه¬لری سیچرادی پالتارینا.
الیم سینیردی. بو نه ایش ایدی گؤردوم؟ یازیق قیز منه نه پیسلیک ائله¬میشدی. گلمیشدی داوالاریمی وئرسین. بیلمیرم نه اولدو، یوموروغوم گلدی اوزونه. هامیسی دا سنین ایشین¬دی. یولداش دئییلسن کی، اولوبسان جانیمین قَنیمی. جئیران بس دئییلدی، بو قیزین دا اوزونو بو گونه سالدیم؟… دوغرودان، نئچه واخت¬دی جئیران¬ـدان خبریم یوخدو. آییلماسا، هارانین تورپاغینی باشیما تؤکه¬جه¬یَم؟ یازیق منیم ائویمده بیر گون گؤرمه¬دی. اول¬لر من تئی جبهه¬ده ایدیم، سونرا دا بو جور اولوب قالدیم الینده. ننه¬مین اوزَرلییی¬نن دوکتورلارین داوا – درمانی دا اثر ائله¬مدی. گوللـه¬لرین سسی باشیمدا قالدی. عراقلی هواپیمالار یئنه بئینیمده ویراژ وئردیلر. جنگدن سونرا دا ائویمیزده گولـله سسی گلیردی. توللادیغیم آر.پی.جی¬لر عراقلی تانک¬لارینی بیر – بیر پارتلادیردی. جئیراندان سونرا هئچ کس یان¬ – یؤره¬مه دولانمیردی. “جواد”ی دا قویموردو چوخ سس سالسین. لازیم اولان شئی¬لری اؤزو آلیردی. منه گؤره چوخ قوناقلیق¬لاردان، توی¬لاردان واز کئچیب قالیردی ائوده. داوا – درمانیمی واختیندا یئتیریب، پالتارلاریمی یویوب، ایسته¬دیییم غذانی پیشیریردی. واخت اولاندا بؤیرومده اوتوروب منی دیندیریب دانیشدیریردی. اونا گؤره ده بیلمه¬دیم جواد هاچان بؤیودو. اؤزونو اودا سویا ووروردو، هئچ کیم اینجیمه¬سین دئیه. آنجاق من اونون قَدرینی بیلمه¬دیم.
جوادنان سؤزوم اولاندا، منی دانلاییب دئییردی: اوننان باش باشا وئریب اؤزووو ناراحات ائلمه، جاوان¬دی.
به¬یَم اؤزون جاوان دئییلدین؟ قوی نه دئییر دئسین. اوزووه گَتیرمه. هر نه دئییر جوابینی وئرمه. بیلیرم اوره-یینده هئچ زاد یوخدو، بالاندی، اونو چوخ ایسته¬ییرسن. هر نه باشینداکی گوللـه¬نین ایشی¬دی. بیلدین؟ سنی دئییردی. ائله بیل بیلیرمیش سن بیر گون هر نه¬یی قاتاجاقسان بیر – بیرینه.
همیشه بالاجا بیر سس¬نن حالیم خاراب اولاردی. اوندا، قالاردی کناردا. من حالیمی بیلمَزدیم. قان گؤزومو توتاردی. الیمه گلن هر شئیی توللاردیم دوشمنین اوسته. بوشقابدان توتوب رادیو، و آلاهی (آیری) شئیی¬لر. اؤزومه گلندن سونرا سینیق وساییلی گؤروب اؤزومدن آجیغیم گلَردی. بئله واخت¬لار جئیران ائوی تمیزله¬ییب دئیه¬ردی: جانین ساغ اولسون، عئیبی یوخدو.
یازیق آرواد! یاخشی زحمت¬لری¬نین جوابینی وئردیم. کئش الیم چولاق اولایدی. جئیران قاباغا گلیب من¬نن جوادین آراسیندا قالماسایدی، بلکه ده بو جور اولمازدی. قویسایدی من او اوشاغی باشا سالام، بئله اولمازدی. اؤزون کی بیلیرسن، من سسدن اینجیییرم. جواد دا او گون ضبطین آخیر خودونو وئرمیشدی. یئنه ائودن گولـله سسی گلدی. اوره¬ییم چیرپیندی، اوزوم آلوولاندی، باشیمداکی نبض دؤیونمه¬یه باشلادی. جئیران گلدی قاباغیما، دئدی: موراد! منه گؤره باغیشلا… ایندی آزالدار…
گوللـه¬لرنن خومپارالارین گورولتوسوندا اونون سسی¬نین قالانینی ائشیتمه¬دیم. جئیران قاباغیمدان چکیلمه¬دی، اونو بیر قیراغا ایتله¬ییب جوادی شاپالاقلادیم. جوادین قیشقیراغی¬نان جئیرانین حالدان گئتمه¬یینی باشا دوشدوم. باشی دَیمیشدی دیوارا. اؤزومه گَلدیییمده بیماریستاندایدیم. جئیران آی.سی.یوـدا. دوکتور دئدی: جئیرانین بئینی خونریزی ائله¬ییب کُمایا گئدیب. اونون توختاماغی دا قالیب آللاها.
بو سؤزو ائشیدندن سونرا بیلدیم باشیما نه گلیب. او گوندن سونرا جواد اؤزگه آدام کیمی من¬نن کئچینیردی.
داها اوزومه باخیب من¬نن دانیشمیردی. هر گون بیماریستانا باش چکیردی. نه قدَر دئدیم اؤز اَلیمده دئییلدی، اینانمادی. قاپینی چیرپیب ائودن چیخیردی. من قالیردیم، دام – دیوارلارنان. بیر ده سن. یادیمدان چیخیردی داوالاریمین آتماغی. آخی جئیران یوخ ایدی؛ کیم واختینی یادیما سالاجاقدی یا داوالاری بیر لیوان سوینان وئره¬جکدی الیمه.
جئیران کُمایا گئدندن بَری منیم ده حالیم یاوالاشدی. اؤزوم آسایشگاها گلمه¬ییمی ایسته¬دیم. بونو جوادا دئدیم. بیلیرسن اورَییم نه ایسته¬ییر؟ توختاییب، گئده¬م جئیرانی گؤرمه¬یه. جورلاندیییمی اؤزوم اونا دئیه¬م… آنجاق بیلمیرم منی باغیشلایاجاق یا یوخ. دونن او بیری اوتاقداکی¬¬لارین بیری اؤزونو اؤلدوردو. اوشاق¬لار دئییرلر، پرستارلارین گؤزوندن ایراق اؤزونو اوتاغی¬نین ائیوانیندان آتیبدی یئره. بلکه ده یاخشی ایشی او گؤروبدو. اؤزونو راحاتلادی، دوز دئمیرم؟!
من ده بو ایشی گؤرسَم، سنین الیندن قورتاررام. جئیران¬نان جواد دا دینجه¬لرلر. بورداکی دوکتورلار، پرستارلار دا. گؤره¬سن خانیم پرستارین اوزو جورلاندی؟ اینانما، جورلانسا دا، اوره¬ییندن چیخماز. قولاق آس، ائله¬ بیل آیاق سسی گلیر. خانیم پرستارین سسی¬دی. یئنه داوالاریمی گتیریب¬دی. من گئتدیم ملَفه¬نین آلتینا. آخی اوزونه باخماغا اوزوم گلمیر.