- آراز آذربایجان – روزنامه خبری آذربایجان غربی - http://www.araznews.ir -
یانیق ماوی
Posted By admin On دی ۲۴, ۱۴۰۱ @ ۸:۰۷ ق.ظ In آنادیلیمیز | No Comments
رضا جوان
آنادیلیمیز: ایستمیرم قالانین دوشونوم. تتو سالونون دیبینده دومانلارا قاریشیب یوخ اولور. اودادان اوزون هیریلداما سَسلری گلیر.
گؤزلرینین گؤیو آزالیب. بو رنگه آد قویماییبلار هله. دئییر. ”صینیفداشلاریم دئیردیلر سنین گؤزلرین هر فصیلده بیر رنگه چالار. گؤی، تورکوواز، -آچیق گؤی، توتقون گؤی. ” دئییرم: “یانیق گؤی. ”هامیدان چوخ یانیق گؤیه چالیر. گولومسهییر. ”او نه رنگدی. اوغلانلار گؤرن رنگلردندی ؟ “ . دیلی ایله قامیشین اوجون یالیییر. یالان دئییرم آما. تکجه گولپنبهنین گؤزلرینده گؤرموشدوم یانیق ماوینی. ایلک دَفه من سئزمیشدیم او رنگی. پاییز قفیلدن گلمیشدی. پنجرهدن باخدیغیندا ایکی گؤیرچین اوچوشوردو گؤزلریندن گؤیه.
بیلیم یوردوندان پیادا قاییتمیشدیق او آخشام. قالدیریملار اوزانیردی آددیملاریمزلا. چینار یارپاقلاریندا گیزلهنن او پاییز، یئره یامسینیب گؤزلریندهکی گؤزلویون پردهسینه دوشوردو. او گئجه، نه قدر یولداشلاریما دئدیم اینانمادیلار. درگینین توپلانتیسی اولان گون بئله گؤرستدیم. اونلاردا سئزمدیلر دئدیم هر فصیل دییشیر گؤیو. توتوشان اودون آلوولارینین ایچیندهکی گؤی. دلیسو گؤی.
عاصی گؤی. گؤی دئییب گئچمهیین دئدیم. گولدولر. یوخسا قاروولوق توتموشدو گؤزلریم؟ دئییرلر بیر طئیف بویالاری گؤرمک اوچون، بیر سیراسینی گؤرمهمهلیدیر گؤز. منده باشقا بویالار، کور اولموشدولار. گولپنبه دئدی: “هانی ماوی! سادهجه ایشیقدی بیرآز گؤزلریم. ” نه قدر زامان کئچیب بیلمیرم. صفحه- صفخه بیر آلبوما باخیرام سانکی. باخیشلاریمیز توش گلدیینده، قاچیردیر گؤزلرین، سانکی بوردان قوپوب اوزاق بیر اورماندا ایتیلیر گؤزلری. قامیشی باتیریر لیوانین دیبینه، منه باخیب بیردن اؤزونه گلیب گولور. گولوشون دوندوروب ساخلییاسیم گلیر. بو سئری ده گولسه، گولوشون امهجم. کاش آداملاری اولماسا دا، گولوشلری دونداریب بیر الکل شوشهسینده ساخلاماق اولاردی. ایلانلار کیمی.
گولپنبه-نین گولرکن، بورخولان دوداقلارین ساخلاردیم اوندا. یادا ایشیق گؤزلرین. یئتردی منه. بوجور بئینیمده دوروب بیر سس کیمی داشیمازدیم. ایچیمدهکی سسلری ائشیدیر دئیه قاشلارین دویونلور. – “ بورداسان سن؟ هارا گئتدین؟ اؤزونده دئییلسن! سو وئریم؟ قییامت اولماییب کی، دنیزلر کؤچور گئدیر بو شهردن، آداملارا نه وار کی. گلندن بوزوبسن دوداقلارین. ” دوشونورم نه جور بئینیمی اوخویوب بو قیز. یوخسا اؤزوم دئمیشم گولپنبهنی.
بیلمیرم. خاطیرلامیرام. بو سالونا گیرندن بئینیم کئیهلیب. هاوایا بیر شئی قاتیبلار کسین. زامان دوروب. کلهرا یازمیشام نئچه وقتی بوردایام؟ گونلرین سایی الیمدن چیخیب. جاواب گلمییب. یوخسا بورادا زنداندی می؟ او اونلارجا گیزلتدیکلری زیندانلاردان بیری. زامان یئریمیر. دئییرم: “یاتمیشدیم؟ “ دئییر: “هه یاتاندان بری باغیریسان”یوخسا ایچیب دانیشمیشام. اورتامی دئییشسین دئیه دوداقلارین یووارلاق ائدیب قامیشی باتیریر اوزون لیوانین دیبینه. ”من دیبینهجن ایچهرم.
قالسا قیجیغیم گلر” دئییر. قیجیغین نه اولدوغونو دوشونورم. سوروشمورام. لیوانیمدا اولان بوزلارین بیرین گؤتوروب، بوینوما سورتورم. الیمده اَریییر. ایچیمه داملیر بو هاوالار. ماوی گؤزلر خورما رنگلی توکلر. هاواداکی سیس. آجی آدکولونلارین قاریشیق قوخولاری. ایچینده SHE وار. شی آدکولونو بوردان آلیر منی. گؤتورور کئچمیش گونلره. یانمیش روس آغاجی، وانیل، بلوط، هامیسی تامسینیر بورنوما. کاش قوخولار سیلینردی بئینیمدن. اونلار سیلینسه، قارالتیلاردا یوخ اولار. اؤلموش بیر دیلین سؤزجوکلرینه بنزیر، اوزاقدان گلن بو ماهنی سسی . هردن یادیمنان چیخیر بوردا اولدوغومون ندنین. اوتورانمیرام آرتیق. او آما راحت اوتوروب. دئییرم: “تزه یازدیغین رپی اوخو. ” دئییر: “بوردا اولماز، او سئری گؤرمدین نولدی” بارماقلاریلا نوتلاری، بیرده دیلینده هوججولهین سؤزجوکلری توتوشدورور. یاواش اوخویور.
دوداق آلتی پیچیلدیر. ائشیتمیرم. باشا چاتدیغیندا گؤزلرینین ایچی ایله سوزور منی. گؤزلری چوخ دریندی. هر سئریسینده بیرآزدا ییغیشیرام. بارماقلاری میزده اوینارکن، لا ر می فا ررر لا لا سی. . . ”چوخ پیس باخیسان آداما” دئییر. بیراز دا ییغیشیرام اؤزومه. یئنه هاوادان بیر شئیلر داملیر ایچیمه. چیسکین هاواسی وار سالوندا. اؤزومو وورورام او یولا. ”من؟ یا سن؟ “دوداغین قاچیردیر. بارماقلاری سی لابئمول اوسته دورور. “اوزه باخ! “ دئییر. لیوانیمداکی بوز چاتدیر. –”بیده قولاق آس گؤر بیرینجی خوشدی یوخسا ایکینجی؟ “الیمی قویورام میز اوسته، بارماقلاریمی آییریرام. دیشلری ایله بیچاغی آچیر.
”قورخسان گؤزلرین یوم. ” یومورام. چیلیک بارماغیمدان سولو بارماغیمین آراسیندا دوروب بیچاق. بارماقلاریمین آراسیندا دؤرد یئره دییر بیچاغین اوجو. یئیینلشیر، گؤروشمور بیچاق. آغریلا- قان ایلا قورتولان بو سؤزجوکلر دریمده تامسینیر. قیزدیرمام بارماقلاریمنان ائشییه فیشقیریر.
گؤزلریمی قورخا – قورخا آچیرام. صندلده کیمسه یوخ. یوخ اولوب یئنه. سرکرده آریقاناق، اوزونسوو چیرکین، اورتا یاش بیر کیشی دی. بوزومتول کوت شالوارایلا باشقالاریندان سئچیلمیر. سول قیچی آخسییا- آخسییا، ایفاده ایله پیلله لری یئنیر. اؤنجه وئرنی باشماقلاری گؤرونور، سورا آیاقلاری، سورا توپ ساققال اوزو.
یانینداکی هوققا بورون اوغلان آیریلمیر یانیندان. ساغ الینده دوروب. بیر ساهات سوراسین دوشونوب، گولماغیم توتور بو بویدا ایفادهیه. کلهرا کد ?? یازیرام مئساژدا. آما گؤندری وورمورام. ارینیرم.
بیر شئی دور دئییر ایچیمده. ایکی یول آیریجیندایام. بو ایشده هر شئیدن قاباق، اوز وئره بیلهجک ایمکانلاری دوشونمهلییم. بئینیمده خریطهلر دولانیر. گولپنبه اولسایدی دئیجکدی: “چوخ تنبلسن. آغزین آی آپاریب یئنه؟” دوز دئییردی. آغزیمی آی آپاریردی، گؤزلریمی ایسه بویالار، قوخولار، ایمگهلر، آجیلار. بونلاری کیمسه ایله دانیشانمیردیم.
ائشیک چوخ یئیین ایدی من ایسه یاواش. ایچیمدهکی ساهاتلا ائشیکده آخان زامان توتوشموردو. همیشه گئجیکیردیم. همیشه آی آپاریردی منی. ایچیمده بو زامان ایچیندن قورتولماغا، بیر چابا چکیردی اؤزونه منی. بیلمیردیم هاچانداندیر یئرآلتیندایام. آرتیق منده دونیانی او چنگ چالان گؤزلری چکیلی قیزین گؤزلریندن گؤروردوم. ایکیمیزده بیر تَتودا دوستاغا چکیلمیشدیک بلکه ده. بارماغیم گؤندر اوستونده.
وورسام، آنسیزین تؤکولجکلر بورا اوشاقلار. هامینی توتاجاقلار، کیملیییمی باشقالاری بیلمسین دئیه، منی ده توتاجاقلار یالاندان. چاتیشسالار آدام دا اؤله بیلر. ایچریدن گولوشمه سسلری دورمادان گلیر. بیری گئچینیر گولمکدن. ایکی نفر حوکم اوینور. سالونون دیبینده بیلیارد توپلاری توققوشورلار، سورا داغیلیرلار میزه. توستوده اوخونمور توپلارین نومرهلری. یورقونام.
بو ماموریت قورتولسا مرخصی آلاجام. صاباح کلهروینان تیراسدا اوتوراندا، دئیجک: امنیت چؤرکدن واجیبدی. بیز توپلومو قورویوروق. ایشیمیز امنییتدی. ایکینجی پئیکیده ایشیمیزین قوتسال اولدوغوندان دانیشیب، خائنلری سایاجاق اولدن. منیم ده یادیمنان چیخاجاق گؤیومسوو او درین گؤزلر، یئنیجه بسلدیغی و تکجه منه اوخودوغو سون رپی خاطیرلامییاجام. بارماقلاریمین آراسینداکی بیچاغین ایتیلیغی. تتوسونداکی چنگ چالان گؤزلری چَکیلی قیز. هامیسین اونوداجام. آما چیخماسا؟ هر سئری هاچان حبسدن قورتولاجاق دئیه سوروشاجام.
سون بسلدیغی رپی، هئی گلیب بئینیمده دوروب، بارماقلاریمین آراسیندان آخیب گونده لیکلریمده یوخ اولاجاق. کسین او اون بیردندی هر شئی. یوخولاریما گیرجک اون بیر. نه قدر نحس بیر سای ایمیش دئیه دوشونهجم. بیلیرم ??-ی یوللاماسام دا، آنسیزین گَلَجک لر. ها بوگون، ها صاباح. صاباحا ساخلاسام، گئجه بیرده کئفله نریک. سون یازدیغی رَپی منه ده اوخویار. اوتوروب ائدیت ائدهریک. یامانلارینا گولریک.
کلهر دئییر: “نییه بو قدر یوبالدیسان؟ ایستخاره ائلیسن؟ بیر لحظه شوبهه لنیب، وورسایدی او بوش بئینیندن. اوندا بیلردین! سن هاچان توجیه اولاجاقسان؟ فیکر ائلیسن رحم ائلرلر سنه ؟ اوتوروب خاطیره دانیشیسان اونا.
او رپر دئییل. او بو قاچاق چتهلرین، اَن اؤنملی رابیطیدی، هئچ دوشونموسن بو یاشدا قیز، بوردا، بو دییوثلارین ایچینده . . . ” ایچینده . . . ” دانلاییب-دانسیماقدان دویمایاجاق کلهر. دالبادال ایچیب کئفلهنیب دئیینجک. بلکه ده کلهر دوز دئییر دئیه دوشونوب اورییم اوشویه-جک. منه رحم ائلردی می؟…….
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d9%8a%d8%a7%d9%86%d9%8a%d9%82-%d9%85%d8%a7%d9%88%d9%8a/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.