یاشیل یاغیش
حاضیرلایان:اکبرسعادت
آنا دیلیمیز:یاغیشی سئویردی، چونکی یاغیش یاغاندا دالدالانماغا یئر تاپمایان ان اعتیناسیز اوشاقلار اونون یانینا آخیشیردی. باسیریق اولسا دا، سئیرچیلر ادب- ارکانلا تاختادان حاضیرلانمیش اوتوراجاقلاردا ایلشیب اویون نووبه لرینی گوزله ییردیلر.او،بو کنده اوچ ایل اول گلمیشدی. آریق،چلیمسیز بیریسی ایدی. دونیاسینی چوخدان دییشن قاری نین ائوینه دوشدو؛ مرحوم آناسی نین اوزاق قوهومو ایدی، ائو ده یولون کناریندا یئرلشیردی.
بوتون اشیالاری ایکی ایری چامادانا قابلاشدیریلمیشدی. سول آیاغینی برک چکیردی، دئییلنه گوره، عالی تحصیللی اولسا دا، اوزون مودت مبل فابریکینده کاراچی ایشله میشدی، واقوندان دسپ بوشالدارکن احتیاطسیزلیقدان آغیر یوکو آیاقلارینا سالمیشدی، سول آیاغی تامام خورد- خشیل اولموش، یئددی آی معالیجه آلمیشدی. ساغالاندان سونرا ایشله یه بیلمه میش، تقاعوده چیخمیشدی…پلی استیشن اویونلاری آچیلاندان اوخشار حاللار بیر نئچه دفعه تکرارلانمیشدی. اوشاقلار سببینی سوروشاندا “خسته لنمیشم”، “واجیب ایشیم چیخیب”، “تعمیره احتییاج وار” کیمی قیسا جاوابلار سسلندیریردی.
آما کند اوشاقلاری دا او ساعاتجا ال چکمیردی، گورنده کی، سوزونده قطعیدیر، قاپی آغزینا ییغیشیردیلار، سونرا هووسله سیزلر ایکی بیر، اوچ بیر اوزاقلاشیردیلار. ان سیتال اویونچولار تکرار گوروشمک اوچون دیل توکسه ده نه اونو گوره بیلیردی، نه ده زوراکی حرکتلر ائدیردی. هر کسه بللییدی کی، بوردا بو واختا کیمی آرتیق، یئرسیز چیغیر- باغیر اولماییب.
خبر ده ایلدیریم سورعتی ایله بوتون کنده، قونشو کندلرین اویون هوسکارلارینا چاتیردی، جیب تئلئفونو کشف ائدیلندن خبرلری بیر نئچه آنین ایچینده چاتدیرماق ساده لشمیشدی. آنجاق بو دفعه اوزو، آلچاق ائوین یاغیشدان- ایستیدن رنگی چاتلامیش پنجره سینی آچیب ال چکمه یه ن، ان عینادجیل اوشاقلارلا دیالوقا گیریردی: – آچمارام داها، بیر یئردن هامیسینی ساتارام… – بس بیز نه ائدریک؟.- اومیدسیز اوشاقلار دیرشیردیلر. – اوللر نه ائدیردینیز اونو…- نیسبتا ایری یاشلیلارین ایچینده پیق ها پیق دوشوردو. آزیاشلیلار چاش- باش قالیردیلار. اونلارین سوروشماغا جسارتلری چاتمازدی. دوداقلاری نین اسدیگینی، رنگی نین گویردیگینی گوروب دایانیردیلار.
بو گؤرکمی ده بورا کوچوب گلندن، اویون ایشینه باش قاتاندان سونرا تاپمیشدی. اونا قدر چوخ اولموشدو بئله حاللار، چوخ تکرارلانمیشدی، سوندا یئنه “داشی اتگیندن تؤکوب” یومشالمیشدی. آما، دئیه سن، بو حنا او حنادان دئییلدی. – دوستلار، بو، ایش دئییل، عصبلریم دوزمور، جاوان آدامچیندیر…- گل کی، هئچ کسین وئجینه دئییلدی، هامی اویون ماراغیندا ایدی. – بیر یئردن ایسته ین اولسا، اوجوز وئررم، اوشاقلار، سیز ده ائوده دئیین… – بو دفعه وضعیت اومیدسیز ایدی. آنجاق اوشاقلارین هئچ جور آسانلیقلا ال چکمک فیکیرلری یوخدو. بیر دسته الی بوش، کور- پئشمان قاییداندان سونرا ایکینجی دسته نی تعلیماتلاندیریب یوللاییردی. – بئزدیردینیز منی، ظالیم اوشاقلاری…- مجبور اولوب دمیر داروازانین بالا قاپیسینی آرخادان باغلاییردی. بو حالدا دا ییغیشانلار داغیلیشمیر، کوچه ده وار- گل ائدیردیلر. کندین ایشیقلاری گون عرضینده فاصیله لرله وئریلیردی. ایشینی آسانلاشدیرماق اوچون قرافیک توتموشدو. اصلینده ایشیقلار سوننده ان چوخ سئوینن او، اوزو اولوردو؛ پوزولموش عصبلرینی ساکیتلشدیرمک اوچون بالاجا اوتاغینا چکیلیردی، ساعاتا باخیب درمانلاردان قبول ائدیردی. گونورتادان سونرا “چیتا” لقبلی کند آغساققالی قاپیدا گوروندو: – سالام، نه وار، نه یوخ، موعلیم، نئجه سینیز؟- هامی اونا اوشاقلارین دیلی ایله “موعلیم” دئییردی. – علیک السالام، مین شوکور…- ایستر- ایسته مز چاتیلمیش قارا قاشلاری نین اوستونه قاتی بیر کولگه دوشدو. – گئدک بیر سنین تالواری نین آلتینا، اورا سرین اولار، صوحبتیم وار… – اعتیراض ائتمه دی، سو کرانی نین یانیندا، ایکی نار آغاجی نین آراسیندا یئگانه کولگه لیک یئره گلدیلر. اوستو اورتولو اولدوغوندان کولگی یاخشی چکیردی. – تخمین ائدرسن گلمگیمین سببینی… – یووخ، فالاباخان دئییلم، نه بیلیم،- چیگینلرینی چکدی.
- دئیرسن، بیلرم…- – اویونا گوره… دایاندیرمیسان، اوشاقلار دا ایکی گوندور اوزوموزون سویونو توکوبلر… – ایلک اول بو ایشی قوراندا ائللیکله منی سویوردونوز…- سوچلو- سوچلو گولومسوندو. – بوشلا گئتسین، آللاه اولنلرینی رحمت ائلسین، ایندی- ایندی جانیمیز راحاتلانیب. نئجه قیییرسان؟! بیلیریک کی، اوشاقلار سنین یانیندادیر، قورخوسوز- هورکوسوز… اوزو ده ائشیتمیشیک، بورا سیقارئت چکن، سویوش سوین، باشقا نالاییق حرکت ائدن بوراخیلمیر. – سهو ائله میشم… – یووخ، نه دانیشیرسان، ثاواب ایش گورورسن. منه باخ، اونسوز دا او پوللاری بیز اوشاقلارا وئریریک، هارا خرجلمه لری اونلارلیقدیر. سن دئییلنه گوره ساعاتینی رایون قییمتیندن ده اوجوز ائله میسن. اولنلرین بئهیشتلیک… – من بونو پول قازانماق اوچون آچمامیشدیم، آغساققال. آلدیغیم تقاعود منه بس ائدیر،- یئرسیز سوز اورگی نین بیر جینگنه سیمینی دیللندیردی، کوورلدیگینی گیزلتمک اوچون اوزونو یانا چئویردی. – هر نسه… سندن قاباق اوشاقلار چایا گئدیردی، یا بوغولوردو، یا دا خستله نیردی. استادیوما گئدیردی، قول- قیچینی ازیردی. کلوبدا دا بیر آز یئکه اوشاقلار آت اوینادیرلار. ائشیدرسن، باشقا ایشلر ده اولوردو… او حادیثه دن سونرا اوغلان اوشاقلارینی مال- قویون اوتارماغا یوللاماغی یادیرغادیق. ائوده ده یای اوزونو نه قدر اوتورماق اولار. – جانیم ال وئرمیر… – جان دئینده کی، ایندی سنین ایشینی ایشیقچیلار تنظیمله ییبلر. سوتکادا بئش ساعات سونور فاصیله لرله، دینجل ده… – مووققتیدیر… عصبلریم تامام پوزولوب… – صبرینی باس، درمان آت، قوردون، قولاقلارینی تیخا، دور کناردان تاماشا ائله… – آغساققال، بوتون اینجه لیکلری بیلیرسن، گل راضیلاشاق آوادانلیقلاری بیر یئردن ساتیم سنه، حیطینده یئرین ده وار، مشغول اول. – باشینا آت تپیب، ندیر، منده ساواد دئییلن شئی وار؟ صبر وار؟ – اویره ده رم، سنه گوره بیر مودت یوبانارام، بو یاشدا “یاسین”ی نئجه اویرندین، بوردا دا چتین بیر شئی یوخدور.- جانین حاقی منلیک دئییل، ائوده اوچ نفر دولاناممیریق، کئیوه نی ده خسته دیر، باشی سس- کوی گوتورمور. منی دیری گوزلو اولدورمک ایسته ییرسن؟ – نه اوچون؟- دئدی و درحال توتقونلاشدی.- من ده اولمه لی دئییلم. – کژدیگین توتماسین، موعلیم، مکتب واختینا بیر آی قالیر، داشی توک اتگیندن.
اوشاقلار یئنه پیس یولا دوشر… بونون اولینی گورموشوک آخی… دوردو هله ده تورمه ده دیر. – هر کس ائوده اوز اوشاغیینان جیدی مشغول اولسون، بوردا نه وار آخی… – کند جاماعاتی اکیننن، مال- قاراینان دولانیر. بیر تیکه چورک داشدان چیخیر. آداملار سحر ائودن چیخیر، گون باتاندا ائوه قاییدیر. بیلیرسن، ایندیکی اوشاقلار بیزیم دوورون اوشاقلاری دئییل، زمانه اوشاقلاریدیر. بیزی چکیندیگیمیز شئیلرله حدله ییرلر… – ائله اولاندا کندین آغساققالیسان، مصلحتلشیب بیر آدام تاپین، یا دا هر کس آلسین، اوشاق ائوده مشغول اولسون. منیمکی داها بیتدی… – سن لاپ جیدی دئییرسن؟.. – البتته… باشا دوشون، من اوچ ایلدیر اونلارلا بیر یئره ده یم، اویون اوینایاندا دا، نووبه یه دوروب سئیر ائدنده ده اوخودوقلاریمدان، باشیما گلنلردن، عیبرت آمیز شئیلردن دانیشدیم، آما تعجوبلندیم: هر شئی اونلارا بایاغی، غئیری- جیدی تاثیر باغیشلادی، اوزومه قارانلیقدی، نئجه اولاجاق بونلارین آخیری… هر یئرده چاتیشمازلیغین یئنی نوسخه سینی گورورسن، آما یوزده بیر فایض باشقا جور دوشونن یوخدور. بوتون گونو بئینیمده اوغولتو گزیر. سون گونلر نه درمان، نه تمیز هاوا باش آغریسینی گوتورور. نییه ایندیکی اوشاقلار بئله دیر، بئینین دئشیلسه ده، جاوابینی تاپا بیلمیرسن. دوزدور، دئیه جکسن بو سواللار معناسیزدیر. بو سواللارا نینکی جاواب وئرمک اولماز، حتّی سوال کیمی سسلندیرمک ده یاراماز. سواللارین دا سرحددی اولور.- بیزدن نه طلب اولونور، اونو دا ائدریک،- “چیتا” چاش- باش دانیشیردی. – نه طلب اولونور کی؟!.- سول الی نین آرخاسینی سون گونلر توکلشمیش اوزونده گزدیردی.- هردن سحر یوخودان دورورسان، تام و ساغلام، آما یاشاماغا هوسین یوخ. نورمال آداملاردا بئله شئیلر اولمور. کنده گلدیم کی، بوردا دینجلیک اولاجاق، سون ایللر پوزولموش عصبلریمی برپا ائده بیلجم. او حادیثه نی ائشیدیب، بونو بیلدیگیمی بیرینجی دفعه سیزه اعتیراف ائدیرم، اوشاقلارا بیلگی سایار درسلری کئچمک ایسته دیم. ایشله ده بیلمه دیم، بوتون قیشی ایکیسی ده نملی اوتاقدا قالیب خاراب اولدو، گلن اولمادی. سونرا اوشاقلارین تاکیدی ایله ایندیکی آپاراتلاری آلدیم.
ایلک واختلار اونلارین سئوینجی نین حددی- حودودو یوخدو. من ده سئوینیردیم کی، هله هر شئیی ایتیرمه میشم، نیسه یاراییرام. تئزلیکله بایقوش یئرینه چئوریله جک فابریک چوخلارینی محو ائله دی، منی ده یاریمچیق.اوردان اوزاقلاشاندان بیر دفعه ده اولسون طالعییمله ماراقلانماییبلار.- دریندن آه چکدی، اللری ایله آغارمیش ساچلارینا دارتیشدیردی.- اونا گوره تزه دن شهره قاییدیرام. ائویم وار، عاییله م وار، خانیمیم وار، دوزدور کی، اوشاغیم یوخدور. گوزله ییریک!
بونا گوره ده اوز وورمایین، دئییر؛ “آللاه بیر طرفدن باغلایاندا، بیر طرفدن آچار”، گؤررسیز یاخشی اولاجاق. “چیتا” کور- پئشمان دوردو. آما ائوینه گئتمه دی، کندین ایچریسیندن کئچن چایین اوستوندن سالینمیش تورپاق یولا دوزلدی. آنجاق گون قوروبا اییلنده ائوینه قاییتدی. قاپیدان آیاغینی ایچری باسان کیمی نوه سی اوستونه آتیلدی. اوشاق گوز یاشلارینی ساخلایا بیلمیردی: – برک گئدن کنددن “لئخسوس”لا (کامیون آدی) گلمیشدیلر، اوز گوزلریمله گوردوم، هامیسینی ماشینا داشیییردیلار. موعلیم ده یانلاریندا دورموشدو، ساغ الی باشیندا ایدی، وورهای توکلرینی دارتیشدیریردی… خاصیتینه بله دیک، عصبیلشنده همیشه بئله ائدیردی. – آغلاما، منیم بالام، سحر رایون مرکزیندن سنه آلارام… لاپ یاخشیسینی،- اونو ساکیتلشدیرمه یه چالیشیردی.
- نئینیرم، – آغلاماغا داوام ائدیردی،- هامی بیر یئرده اولاندا یاخشی ایدی. موعلیمدن ده یوخدو، هر شئیدن معلوماتلییدی، اورگیمیزه ائله گیرمیشدی کی… ایندی بیز نه ائدریک؟ دئییردی: اوشاقلار ساتا بیلسم، دوز بیر آی موعالیجه یه گئدجم. قاپییا یئکه قیفیل وورولوب،- اللرینی آیاقلارینا چیرپا- چیرپا ائوه گوتورولدو. آخشاما یاخین گویون اوزو قارا بولودلارلا اورتولموشدو: یاغیش دا یاغماق اوچون حاضیرلانمیشدی و گوزله نیلیردی. بیر آزدان یاغیش یاغدی، آغاپپاق، ایری دامجیلار توزلو، قورو دام اورتویونو دؤیجله دی. یایدا یاغان قفیل یاغیش اوزون چکمیر، آما دایاناندان سونرا بورکوسونه دؤزمک اولمور. بلکه بو، اونا ایشاره دیر کی، پاییز کوچونو ائرکن سالاجاق.
نوشته شده توسط admin در شنبه, ۳۱ مرداد ۱۳۹۴ ساعت ۹:۱۷ ق.ظ
