یاشام طرزی

یاشام طرزی

اکبرسعادت
آنادیلیمیز:”من نه قدر تیکرار ائله ییم هئچ زاد بیلمیرم! نچه دونه تیکرار ائله ییم هئچ کیم هئچ زاد بیلمیر، چون بیر کس بیر زاد بیلسیدی بوراکیمی بوتون بیلمه لی لری هامییا دئیردیلر، هامی اینسانلاردا سیررلریندن آگاه اولاردیلار. بیز یارانیشدان، دونیانین سیرلریندن فیکریمیزه گلنلری بیلیریک.” موریس مترلینگ
دونیانین سونون بو دونیانین سونوندا گورن‌لر یاشاماق سوره‌جینده چتینلی‌یه دوشورلر. هر یانا دونوب اوزلرینی تک گورورلر. دونیانین سونونا اینانمایان‌لار، بو دونیادان اوته بیر دونیا، دوشونوب یاشاییرلار. اونلار یاشاییش‌لاریندا گله‌جه‌یی فرقلی چیزیرلر. ایلاهی دین‌لر گله‌جک ساوچی‌سی اولوب، اومودلاندیریرلار. هئچ اولماسا اوزومه تای چوخلارینی بئله تانی‌ییرام.اوته‌کی دونیانین اومودولا یاشایان‌لار، اوزلرینی دوشونورکن، هر ایشی اوزلرینین بیرئیسل چیخارلارینی دوشونورلر. هر بیر یاخشی‌لیغی ده‌یه‌رینی باشقا دونیادا آلدیق‌لارینی دوشوندوک‌ده گله‌جک‌ قازانیرلار. توپلوملارین ایچینده باشقالارینا یاشایان کیمسه‌لر ده اولور. باشقالارینا یاشایان کیمسه‌لر، (توپلوما یاشایان‌لار) توپلوم‌لاری یونلدیب، تاریخه دامغالارینی وورورلار. توپلوم گوج قایناغی اولماغیندان اوترو، اوزلرینه دوشونن کیمسه‌لر، چوخ گوج قازانسین‌لار دئیه، توپلومون ایش‌لرینه قاریشیرلار. بئله آدام‌لار، هئچ زامان یاخشی بیر آد قازانا بیلمیرلر. گوجده اولدوق‌لاری زامان آدلاری هر یئرده دئییلیر، گوجدن دوشدوک‌لری آن هر کسین طرفیندن دیش‌لانیرلار. اوزلرینی اونلارا یاپیش‌دیران‌لار تئز قوپوب ال‌لریندن گلدی‌یی قدر سوز دال‌لاریجا دئییرلر.
باشقا جور گله‌جه‌یه یاشاماق، بیر نسیلدن باشقا نسیله دورومو یاخشی‌لاندیریب، اونلارا یاخشی دوروم ساغلاماق‌لار اولور. بو یاشاماغا یاخشی گورمک گره‌کیر. ال‌لریمیزده اولان‌لاری ساخلاییب، اونلارا آرتیریب اوشاق‌لاریمیزا پای وئرمک اولور. بو جور گله‌جه‌یی دوشونن‌لر میللت‌لرینین آغالیق‌لارینی ساغلایا بیلرلر.
ایندیلیک‌ده بئله بیر یاشاماق دب اولوب. داها دوغروسو شرقی اولکه‌لرده دب اولوب. دئمه‌یی، دب اولوب دئسم دوز اولار. بیزه گلیب چاتان‌لاری قورویوب ساخلایا بیلمه‌ییمیز، البت ایسته‌دیگیمیز کیمی، چوخ دا راحات اولمور. وارلیق‌لاریمیزین بیر چوخونو الدن وئرمه‌یه او قدر ده آجیشمیریق، آمما هردن الدن گئدن نسنه، وارلیغیمیز قدر اونملی اولور. الدن وئرمه‌یی، اولمه‌ییمیز اولور. اورمو گولو؛ یوخلوغو، یوخلوغوموز اولوب بیزه چاتان وارلیق‌لاردان بیری دیر. اونون اونه‌می تکجه گول اولدوغوندا دا یئترلی ایدی. آمما گولون دوزلو گول اولدوغو، دوزون باشیمیزا ساوورولدوغو، هاوانین قیزماغی، یئرلرین بوشالدیلماغین، وئریملی اکین یئرلرینین بوزقیرا چئوریلمه‌یی‌نی نظره آلدیق‌دا، گولو قوروماقدان قورتارا بیلمه‌سک، گله‌جه‌یه یاشامامیشیق.بو گله‌جک تکجه بیزیم اوچون یوخ بلکه بولگه اوچون دیر، یاخشی باخا بیلسک دونیا اوچون دیر.قالماق؛ خوشوموز گلن یئر، واقت، دورومدا اولور. ایستیریک اولدوغوموز یئرده قالاق. اوزوموزه خوش کئچیردیریک. زامانی دایاندیرا بیلسک، قالا بیله‌ریک. قالماغیمیز، بیر یئره کیمی اوز الیمیزده اولور. اوندان اویانا، بیزلیک‌دن چیخیر. قالماغیمیز اوچون بیرلرینی قاندیرمالی‌ییق. ائله یئرلر ده وار، قاندیرماق یئترلی اولمور. تکجه یول گئتمک‌دیر. گئتمک؛ قالمادیغیمیزدا اولور. قالماقدان یورولدوغوموزدا اولور. بیر یئرده دایانماقدان یورولوروق، باش گوتوروروک گئدک، هارا بیلمیریک. تکجه بیلدیـییمیز گئتمه‌ییمیز دیر. قالماقدان یورولدوغوموزدا گئتدی‌ییمیز یئری بیلمه‌دیـییمیزه باخمایاراق، گئتمه‌یی سئویریک. گئتمک‌دن سوز سالیریق، بلکه بیری دئیه گئتمه. بیری دئمیر، هامی بیلیر گئتمه‌لی‌ییک. قالماغیمیزا سوز آلانمیریق.هئچ کیم، اوز گویلونا حایاتا آیاق قویمویوب. هرکس باشقالارینین ایسته‌ایله دوغولوب. حایاتدا اولان‌لار ایسه، اوز ایسته‌دیک‌لری‌ایله حایاتدان آیریلماق ایسته‌میرلر. بو آیریلیق ایسته‌مه‌دن اولور. اینسان‌لارین هاردا دوغولدوق‌لاریندان آسیلی اولاراق، یاشام طرزلری اولور. توپلوم، قات، یئر، آغ-قارالیق، جینسل‌لیک، بویون اوجالیغی، پای وئریلیر. اینسانا قالان، نئجه یاشماق دیر. نئجه یاشاماق ایسه، دوروموندان آسیلی اولور. هر نه دورومدا اولور اولسون، یئنه، بیر بالاجا نئجه یاشاماق سئچیمی اونا قالیر. یاشاماغی سئچدی‌یی سورج عومروندن سوووشور. عومرونون بیر قیسمی‌نی، حالسیز‌لیق‌لا اوغراشان‌لارا، یاشام طرزی سئچیمی قالمیر. ایسته‌مه‌دیی واقت، یاشام طرزینین سئچیمی سونوج‌لانمادان حایات بیتیر. گئری‌یه قالان سئچیمی اولمایان بیرلری‌نین خاطیره‌لری قالیر دئمک ایستیردیم کی قالمیر. تکجه سئچیم‌لری‌نی بللندیرن‌لرین خاطیره‌لری قالیر. دوغولماق‌لاری‌لا اؤلمک‌لرینی بللندیرن‌مه‌سه‌لر ده، نئجه یاشادیق‌لارینی بللندیریرلر، نئچه ایل یاشادیق‌لارینا باخمایاراق!
اوشاقلیقدان یادیمدان قالان، اولوم، نازلار عمی قیزی چاغیردیغیم، عمیمین خانیمینین اولومودو. اونون یاس مجلیسینه گئتمه میشدیم، آما یاس حاضیرلیقلاری بیزیم ائوده گئتمیشدی. جووانازن ایدی دئدیکلره گوره! من ده گورموشدوم. او زامان هئچ بیر باخیشیم یوخودو اولومه. اویون کیمی بیر زاد گلیردی نظریمه(قوناق-باجی اوینونونا قبیر اوستونه گئتمک آرتیریلیردی. ایلک یاخیندان گوردویوم اولو، آتامین آتاسینین اولوسودو. بیز شهردن، کنده یئتیرَنه، بابامین اولوسونو اوزالتمیشدیلار، تاختانین اوستونه یویوردولار. بیز یئتیشن کیمی، بویوک آنام آتاما اوز توتاراق باشلامیشدی، اوخشاییب، ساچلارین یولوب، آغلاماغا (گئچن ایل اونون اولومون ده یاخین گورنمه دیم!) بابا دئیردیک، بیز نوه لر اونا، آتام گیل عموغلانلارینین دیلیله عمی، دئیردیلر, باباما. بابامی، چوخ-چوخ ایستردیم، کنده گئتدیکده یانیندان آیریلمازدیم(ناماز باشیندا دا یانیندا فیرلاناردیم، تکجه کوشنه گئتدیکده، یانیندا اولمازدیم. سویوق گونلرین، گون چیخان گونلرینده، کورَیینی گونه وئردیگی آنلار، من ده اونلا یان-یانا اوتوروب گونه وئرردیم آغلیمجا کورَییمی.. یادیمدا قالان اوچونجو اؤلو، آنامین آناسینین اولومودو. اونا آبا ننه دئیردیم. آباننه دئدیگیم، شهردکی قونشو اوشاقلارینا آنایین گلیب، آغیزلارینین ازبرینه چئوریلردی. قوجالیب، بئلی قاتلانمیشدی. الینی بئلینه ووروب گلردی بیزه. اولمَمیشدن اوچ گون قاباق، اونا قارداشیمین اولدوغونون موشتولوغونو آپارمیشدیم. اونون یانینا یئتیشنده، داییم گیلین دال اوتاقلاریندا بیر دوشک اوستونده اوزانمیشدی. خالالاریمدان دا بیر-ایکی سی یانیندایدیلار.اوخولا گئتدیییمیزده اولونو کیتابلاردا اوخوماغا باشلامیشدیم. اینسان بیر گون گلیب، بیر گون گئده جک. دینی کیتابلار، اولومدن یوخودان یازیردیلار. اوشاقلیق، گنجلیک تَکَرینه دوشدویوموزدن، هر نه یی تئز-تئز ائشیدیب، یاددان چیخاریردیق. اونوموزده اوزون بیر یول واریدی. یولون نه اولدوغونو، بیلمیردیک. دونیا گوروشوموز، یوخودو. جنگ اولدوغوندان دولایی، گون یوخودو شهید خبری گلمییه. گنج اوغلانلارین اولومه قوجاق آچمالاری، قوجا یاشلیلارلا، اورتا یاشلیلاری اوتاندیریردی. شهیدلر اولومدن قورخمویوب، اولومه جان دئییردیلر. آنجاق شهیدلری قویلادیقدا هر کس آغلاییردی، قره پالتار گئییب، ساققال ساخلاییردیلار! باشا دویوب، آغلاماق، عاشورا ایله تاسوعادا دا جانلانیردی.اولوم، چئورَمیزده دولانماغینا باخمایارق، هله گورنمیردیم. اولوم دئیه سن تاس آتیردی. هر آن بیرینی توتوردو. اوخول ایللرینی بیتیرمه ده، جان یولداشیم اولان خالا اوغلومون اولوم خبری، منی آغلادا بیلمیشدی. نئچه گونلر اوزومه گَلَنمیردیم. ایلک گونلر، اولمادیغینا اینانانمیردیم، سونرالار خاطیرَلر گزیردی منله. خالا اوغلونو اولومو، اولومونون نه اولدوغونو بیر آز آچمیشدی منیم اوچون. او ایل، اوخول بیریم، احد سرخابی، آدیندا یاراشیقلی یولداشیمیز، اوزونو اولدورموشدو، بیزیم اوخولدا او، هر کسدن فرقلی بیریدی.بیلیم یوردونا گئدیب، ائویمیزدن اوزاقلاشیب، باشقا یئرلرده اولدوغوم، یاتاقلاردا گئدن دوشونجه دارتیشمالاری، فیکیرلشدیرمه یه یونلندیریردی اینسانی. اولوم آنلامینی، گئت-گئده بویویوردو. بعضی گونلر، بوتون آنلاملارین یئرین توتوردو. دینلرله، اوسطوره لر، بیر-بیر اوخونوردو، بو آنلامی چؤزمک اوچون. هئچ بیری چوزنمیردی، منیم اوچون اولوم آنلامینی. اولومون آنلامی چوزولمک یئرینه، ایچریدن داغیدیردی منی. گئجه-گوندوزومون قاریشمیشدی. هئچ زامان تک قالانمیردیم. بیلیم یوردون سون ایللرینده چوزولمه یه باشلامیشدی. هر نه دوزَنه گیریردی. اولوم حاق ایدی. چوخلاری اونجه دن دئییردیلر، اینانمیردیم. آما ایندی اینانمیشدیم، اولومون حاق اولدوغونا. اونون یانیندا یاشادیغیمیز سورَجده یاشاماغیمیزین دا حاق اولدوغونا اینانمیشدیم. اونون اوچون ده، اولومله یاشاییشی، بیر شئیین ایکی اوزو اولدوغونو، دوشونوردوم. اولومو، اولوم تکین، یاشاییشی دا یاشاییش تکین گورمه لیدیم. یاشاماق اوچون زامانیمیزین، نه قدر اولدوغونو بیلمیرم، بیلدیگیم، بیر گون سونا چاتماغی دیر. اونون اوچون، زامانی یاخشی دَیرلندیرمک گرکیر. یوخسا اولوم، وار. تکجه قالیب، نه زامان قاپیمیزی چالا. دونیادا سئودییمیز، هر کیمی الیمیزدن آلا بیلمک سهل دیر، دونیانین اوزون ده الیمیزدن آلان دیر. اولوم دونیانی الیمیزدن آلدیغی آن، حئییفسنمه دن قویوب گئتمَلیییک. اونون اوچون آرزیلاریمیز گلدیکده، دوغرولتماغینا، چوخ تئز آددیم آتمالییق.

نوشته شده توسط admin در چهارشنبه, ۰۳ آذر ۱۳۹۵ ساعت ۵:۵۸ ق.ظ

دیدگاه


7 × هفت =