وارلیق و یوخلوق باره سینده قضاوتیمیز

وارلیق و یوخلوق باره سینده قضاوتیمیز

کوچوره ن:اکبرسعادت
حیات یئنیش یوخوش بیر یؤلا بنزر
عاریفده عاقیلده نادانده گئدیر
بیزه نعمت وئرن تورپاق آلتینا
یوز یوزمین مین انسان بیرآندا گئدیر
آنا دیلیمیز:وارلیقدان دانیشاندا بوتون دونیا عظمتی ایله گوزلریمیزین قارشی سینداجالانیر. قالاکسیلاردان،اولدوزلاردان و پلانئتلردن توتدو تا بو یئر کوره سینه تک کی نئچه میلیارد انسان ، او جمله دن حیوانلار، بیتگی لر و چئشیدلی آغاجلار ، اوکئانلار، ده نیزلر، دریاچه لر، داغلار، چوللر، صحرالار ، شهرلر، کندلر…
تا بو شهر کی من اوندا یاشاییرام ، ائولر، خیاوانلار، اداره لر، پارکلاری ایلا…
و همن بو ائو کی مثلن من بو گئجه اونون بیر اوداسیندا میز دالیسیندا اوتوروب و بو مطلب لری یازیرام، هامیسی ، دووار ساعاتینین تیک تاکیندان تا منیم اوره ییمین چیرپینان آهنگی ، وارلیقدان و حیاتدان دانیشیرلار و حیات چتینلیک لری و دردلری و عذابلاری اولا- اولا بیزه شیریندیر ، آمما بیزیم چالیشمامیز بیلمک اوچون و بیلمه مزلیکدن قاچماق اوچون داها شیریندیر.
سنینله تانری‌نین باخیشلاری‌نین اوست- اوسته دوشمه‌سی، اولماق، وارماق، یئتیشمک، ساغلیق، خوشبختلیک، سئوینج، لذت و نعمت دئمکدیر… یعنی، سنی آرزولارینا یئتیشدیرن ده سنسن، آرزولارینا یئتیشمه‌یه انگل اولان دا سن. دئمک معجزه‌نین قیفیلی دا سنسن، آچاری دا سن.
اینسان هر زامان آرزیلارینا ال تاپاندا،اوزونو خوشبخت بیلیر.
چوخلاری خوشبخت‌چیلییی گونده‌لیک مسئله‌لرده راحات اولماق ایله یاشاما گویول وئرمکده بیلیرلر.
و تکجه اوزو اوچون چالیشیرلار. بیزیم اونلارین دوز یا یانلیش (غلط) دوشوندوک‌لری ایله ایشیمیز یوخدور. بیز، هر کیمسه فیکر ائدیرسه خوشبخت دیر، لاپ آزی (حداقل) یاخشی دویغوسو (احساسی) اولاجاق‌‌دیر و هئچ کیم یوخدور خوشبخت چیلیگی راحاتجا اله گتیرسین.
دئدیک وارلیقدان دانیشیریق . او واخت کی وارلیق کلمه سینی عنوان ائله ییریک ایستر ایسته مز یوخلوق اونون قارشی سیندا اوتورور و بیر آچیلماز سر کیمی بیزیم ذهنیمیزی مشغول ائله ییر .آیا یوخلوق دونیاسی بو بویوک دونیادان باشقا بیر دونیادیر یا این کی یالنیز وارلیغین داغیلمیش بیر شکلی و اورگانیزمی دیر و یا اصلن وارلیغین بیر شکلی دیر یا سانکی بیر بارماغیمیز ایلا هاوادابیر شکلی چکیریک و بو شکلین اصلن وجودو یوخدور .
او زامان کی اولومو یوخلوغون بیر شکلی سانیریق بیزیم اونون باره سینده قضاوتیمیز نه جوردور ؟ آیا اولوم بیر قورخولو کلمه دیر؟
چون خسته لیک ، درد، یارا،قان، جان وئرمک ، دار و قارانلیق قبری گورموشوک و آغلاماق و سیزیلتی سسینی ائشیتمیشیک ، اولاری اؤلومون نشانه لری سانمیشیق .
آیا اولوم بیر اسکلتدیر کی بیزدن قالیر یا بیر بدندیر کی اوندا قوردلار ترپه شیر؟
بونلار بیر سانماقلاردیرلار کی بیزیم ذهنیمیزی یولدان چیخاردیر .
او شئی لر کی منی تعریف و مشخص ائله ییر و کاراکتر باغیشلاییر اوزون ایللرین عکسلری ، اطلاعاتی، خاطره لری، تجربه لری و چئشیدلی دویغولاری دیرلار کی بئینیمیزین میلیاردلار عصب سلوللاریندا ییغیشیب .
او شئی کی بیزه کاراکتر باغیشلاییر و بیز اوزوموزدن تانیشلیق تاپیریق، بیزیم بئینیمیزدیر. بیز واریق تا او زامانا تک کی بئینیمیزین نئچه میلیارد عصب سلوللاری بیزیم اولماغیمیزی بیزه اعلام ائله ییر.
بئینیمیزین عصب سلوللارینین اولوموایله و اوندا اطلاعاتین داغیلماسی ایلا ، بیزیم حیات و وارلیغیمیز سونا چاتیر و اوندان سونرا داها هئچ دویغو، هئچ درد و هئچ قورخونون معناسی یوخدور و اولوم اولومدور.
پس گره ک اولومدن قورخوموز اولماسین .بیزیم درددن، خسته لیکدن و باشقا شئی لردن قورخوموز گره ک باعث اولمایا تا بیز اولومون اوزوندن قورخاق و اوندان بیر قورخولو شکل چکک.و بوتون اولوملر بئینین اولومودور.
بئینین اولوموایله انسانین واقعی اولومو باشلانیر.یوخ اولومدن قورخمایاق.ا
ولوم معناسیز بیر شئی دیر.اونا بیر صفت وئرمه یک.اولوم اولومدور.وارلیغین دردیندن آزاد اولماق،دینجلیک ابدیت دویغوسوندان اوزاق.
آمما بو ابدیت دینجلیگی بیزیم فرهنگمیزده بیزیم دردیمیزه ده یمز او واخت کی ائله یه بیلمه یک اونو دویاق.
یوخ!اولومدن قورخمایاق.اگر بیزیم بئینیمیزده ضبط اولونان اطلاعاتی باشقا بیر بئیینه یا بیر هوشلی بیلگی سایارا کپی و ضبط ائله سه لر، بیز هله دیری ییک، اگر چی بیزیم بدنیمیز بیر اوووج تورپاغا و کوله دونسه ده، اگرچی بیزیم سجلی میزه اولوم دامغاسی وورولسا دا، بو شرط ایله کی ائله یه بیلک او بیلگی سایاردا اوزوموزو تانییاق.
تصور ائله یین اوندا دونیایا نه جور فیکیرله شه جه ییک و وارلیق و یوخلوق باره سینده قضاوتیمیز نه جور اولاجاق؟
اگر بیر گون بو اولای بیزه اوز وئرسه اصلن گره ک قورخمایاق .او گون یالنیز دویاجاغیق و بیزیم حیاتیمیز بوسبوتون دویغولو اولاجاق و قاباقکی حیاتیمیز کیمی اولمایاجاق.
بیر شئیی دادمایاجاغیق ، ائشیتمه یه جه ییک، لمس ائله مه یه جه ییک، اییله مه یه جه ییک آمما هربیر شئیی دویاجاغیق ، ائشیده جه ییک، گوره جه ییک ، اییله یه جه ییک ، لمس ائله جه ییک، داداجاغیق، دوشونه جه ییک، رویا گوره جه ییک ، موسیقی، فیلم، تئاتر، اوپرا، باله …
چئشیدلی یئمکلر، ده نیزده اوزمک، گونش حامامی، داغچی لیق … هر ایشی کی بو دونیادا ائله یه بیلردیک و ائله یه بیلمزدیک ، کاملن دویاجاغیق کی ائله ییریک، سانکی دوغرودان اولور.
نه عجیبه اولاجاق.بونلار یالنیز بیزیم بوتون قادراولدوغوموز شئی لرین بیر گوشه سی دیر کی بیزیم اختیاریمیزدا قویاجاقلار.مطالعه، اسپورت،فیکیرلشمه، اویون، تفریح، اویره نمه امکداشلیق، دانیشیق، مهربانلیق، عشق… ایش، دینجلمک، یوخو، رویا…
حیاتین ایکینجی فرمی ، اولومدن سونرا دویغولو یاشاییش کی عنوان ائله دیک آیا حقیقتی واردیر؟
من ده بیلمه ییرم.آمما انسانین تخیلاتی بیر گون واقعیت تاپیر.نه اولومدن قورخاق و نه ناامید اولاق.او جور کی گونه اوزوموزو همیشه حاضر ساخلایاق و چالیشاق انسانلارین بو بویوک ابتکار و ظفرینده بیز ده اورتاق اولاق.

نوشته شده توسط admin در چهارشنبه, ۱۱ شهریور ۱۳۹۴ ساعت ۴:۴۳ ق.ظ

دیدگاه


− شش = 2