هِیوا

داود_پیرعلیلو
آنادیلیمیز:بالابگیم آناسی هِیوانین آدینی گتیرنده قوجا قادین گؤردو بالابگیم‌دیر. بوینونو قوجاقلاییب اوزوندن اؤپوپ دئدی:
– بالابگیم، قیزیم منی تانیمادین؟
بالابگیم بیر آز فکره گئدیب، باخاندان سونرا گؤردو همان قونشولاریدیر کی، آناسیله آتاسی اؤلنده بو گلین گلمیشدی.
اوردا بیراز دردلشندن سونرا، بالابگیم بابک اوغلونا دییر:
– اوغول گئدک قبر اوستده بیر فاتحه وئرک. اوردان دا یاواش- یاواش چیخیب گئدک. بابک ایله بالابگیم قبر اوستونه گئدیب اوزاقدان قبرلرین داشلاریندا آدلارا باخا- باخا گئدیرلر کی قبرلری تاپالار.
بابک اوزاقدان گؤرور بیر خانیم بیر قبرین اوستوندن دوروب بونلارا ساری گلدی. یاخینلاشاندا گؤرور باجیسیدیر. دئمه بالا بگیمین قیزینی او کنده معلم وئریبلر. گلیب گؤرسون نئجه بیر کنددیر. اوردان دا سوروشوب گلیب بؤیوک آنا- آتاسینین قبری اوسته فاتحه وئره.
اوردا یئنه آناسی و قارداشی ایله گؤروشوب و اونلاری بؤیوک آتاسینین وآناسینین قبری اوسته آپاریب فاتحه‌لرینی اوخویوب قبیرلرینی یویوب، خویا گئدیرلر. خوی- دا بالابگیم- ین قیزی ال چیکمیر، کی:
– آنا، بو گئجه‌نی قالین بیزده، ساباح گئدین ائوینیزه.
آناسی قبول ائتمه‌دی چونکی داوارا- مالا یئتیشمه‌یه هئچ کیم یوخدور. کنده قاییدیرلار.
او گئجه، بابک یاتیب یوخودا گؤرور، داغدا بیر داشین اوستونده دوروب، او یاندان ایکی دنه بؤیوک قوش گلدی. قوشلاردان بیری بابکین قارشیندا یئره قونوب قانادلارینی ییغیب دئدی:
– اوغول داها سیز ایله بیزیم دوشمنلیغیمیز قورتاردی!
بوگوندن سیزین عائله‌نیز هر قضا و قدردن اماندا قالاجاق. نئچه ایل نفرین ائتمیشدیک، باغیشلادیق! بوندان بئله سیزه دعا ائده‌جگیک.
بوسؤزو دییب، ایکیسی ده اوچوب گئتدیلر. لاپ آخرده گؤیون اوزنده کی اوج آلیردیلار، ایکیسی ده حاجی لِیلک اولوب بیردن گؤزدن ایتدیلر.
بابک سحر یوخودان دوروب گؤردوگو یوخونو آناسینا دئدی.
آناسی بیر فکره گئدیب دئدی:
– بالا ایندی بیلدیم نیه منیم باشیما بیر بئله اویونلار گلیبدیر!
بیزی سن قورتاردین، بوندان بئله آللاه دیین اولسا ایشلریمیز راست گلیب، گونلریمیز خوش اولاجاق. او گوندن بالابگیم الینی داشا آتاندا داش قیزیل اولوردو. گون به گون مال- داوار آرتیردی، برکت برکتین اوستونه گلیردی.
نئچه ایل اوستوندن گئچندن سونرا آللاه بالابگیمه او قدر وار وئردی کی، آناسیز- آتاسیز اوشاقلاری آختاریب تاپیردی و اونلارا یاردیم ائدردی، اونلارا تئز- تئز باش ووروب گؤیوللرینی آلیردی بیر مهربان آنا کیمی…
*##سون