“هارایلی “بیر خاطیره
حاضیرلایان:اکبر سعادت
سئوگیلیم…سنی گورمک اوچون قیزیل گول،یوخ بیر قوجاق باهانا درمیشم..
آنا دیلیمیز:او گئجه نی سئوگیلیم گیلده قوناق ایدیم . ائولرینی تانیمیردیم . الیم ده تکجه بیر آدرس وار ایدی. اوز دئدی یی کیمی دوغوم گونو اوچون بالاجا بیر شادلیق توره نی ایدی. فایزه ینن بیر فاکولته ده درس اوخودوغوموز اوچون ، ایسته ر – ایسته مز هردن گوزلری میز بیر – بیرینه ساتاشیب زامان اوتدوک جه آرامیزدا بیر تانیش لیق یارانمیشدی. ایلک دانیشیغی میزدا بیر سینما سالونون دا اولموشدی. ” تولستوی ” ون ” آناکارنینا ” آدلی رومانیندان چکیلمیش فیلمی بیاض پرده ده ایز له مک اوچون چوخ تصادوفی حالدا بیر – بیریمیزه راس لاشماق کیمی بیر زاد .فایزه، یونیوئرسیته ده تئاتر یونه تمن لی یی اوخویارکن من ده یوکسک لیسانس اویره نجی سی اولاراق ادبیات اوخویوردوم . ندنسه فایزه نی هر گوردوک ده اوره ک دویونتولریمی توتا بیلمیردیم و اونون باخیش لارینا گوز تیکه رکن، اودا مجبور اولمادان دوردوغو یئردن چکیلمیردی. من اوزومو اونا واله و وورغون حیس ائده رک فایزه له دانیشماغا نه بیر سوز تاپا بیلیردیم نه ده بیر باهانا . آمما او ، سینما سالونوندا فیلمین باشلانماسی نا خاطیر اینتیظار چکی ییمیز آنلاردا ، آرامیزدا سوکوتو سیندیریب گولر اوزله ” گوزلرین دانیشسادا هئش واخ سسینی ائشیتمه می شه م ” دییه الیم دن یاپیشیب آدیمی سوروشدی. آدیمین ” هارای ” اولدوغونو بیله رکن اودا آدینی ، سوی آدینی ، سئودی یی رنگ لری ، گول لری و عقرب بورجوندا دوغولدوغونو آنلادارکن دوسجا یاشاماغیمیزی ایسته دی :
” یولداش اولاراق یالنیز لیق لاری پایلاشاق کی سونوندا یا ائوله نه ریک یادا عشقین و سئوگی نین دادینی چیخارداراق گوله – گوله هره اوز یولوموزاگئده ریک ”
فایزه بیر نئچه آن ایچره اوره یینده هر نه وارسا بوشالدارکن اونون جسارتینه حئیران قالاراق تئلفون نومره سینی وئردی.
فایزه نی آرتیق تانیدیق جا حیس ائتدیم او منیم آیریلماز بیر پارچام ایدی کی ایندی یه جان اونسوز کامیل دئییل دیم . من اوز ایچیمه جومان ، غم لی کدرلی ، استرس لی ، اوتانجاق و خلوتی سئوه ن بیر آدام ایدیم و او بیر یاشام بومباسی کی هیجان و سئوینجی له منی اوز دونیام دان آییریردی.
سئوگیم قاپینی اوزومه آچدیق دا الیم ده کی گول دسته سینی آلیب قوخلارکن هئچ بیر قالابالیق گورمه دن دورو خوب شاشدیم . آنجاق اونا ” اییی کی دوغدون ” دییه ائو سکوت ایچره جانسیز ایشیق لار لا دالغالانیردی. او منی گورجک پیانویا ساری گئدیب نغمه لر قاناد آچدی . سئوگیم له باش باشا یالنیز اولاراق ، اونون پیلَک لی مونجوق لی ماوی بیر دون ایچره نه قدر گوزل گورونمه سی منه بیر رویا کیمی گلیردی. او یام یاشیل گوزلری له منه اورمان لاری خاطیر لادارکن سانکی آیاقلاریم یئردن اوزولموش کیمی ایدی. فایزه نین بئله نکی بیر سورپیرز له منی قارشیلاماسی و بئله بیر شاعیرانه حیسِ لری ایچیمه آخیتماسی ، منه داهادا چوخ عجیب گلیردی. دوغوم گونو اوچون آی اولدوز لی بیر کئیکی منیم ال لریم دن یاپیشاراق بیرگه کسمه میز و ییرمی ایلی گوسته ره ن عطیرلی یانان شام لارین آلاوینی وار گوج ایله بیر آندا پوفله مه سی ، منه سعادت دولو آنلار یاشاداراق باشلادیق رقص ائتمه یه . سئوگیمین گوزلرین ده دنیز لرین درین لی یینی و اونلارین چئشیدلی رنگ لره دوشمه سی نی دویارکن ، عشقی دوشونوردوم کی بیر آن دا هر یئر ایشیقلاندی و اوزه ری میزه چیچک سپی له رک ، ایکی نفر ال چالاراق ایره لی گلدیلر. سئوگیمین آتا آناسی ایدیلار و منی اوپوپ باغری لارینا باساراق فایزه یه تبریک دئییب بیر کادو وئردیلر . قیزیل لی الماس لی بیر آغ قوش ایدی کی اونوبیر زنجیردن آساراق بوینونا سالدیلار . بو آندا بیر پارا جوان اوغلان و قیزدا ایچری گیریب سئوگیم له منی دووره لر کن چال چاغیر و شن لیک سسی ائوی بورودی. سونرا هامینی یئمه یه دعوت ائدیب کئچدیک دال حیط ده کی صفالی بیر باغچا یا . سئوگیم منی قرارسیز گوره رک دئدی :
” آرادا بیر آزچیلغین لیق یاشا سادا منی باغیشلارسان .”
سونرا اوغلان لی قیزلی دانسا گیریب جینسئل جاذیبه لرله اَل آیاق اوینادارکن بیر دن بیره سئوگیمی اوزون دن چیخمیش گوروب چکدیم کنارا . الکل ، توستو وکریستال تک پارلایان شیشه توزلاری اَل اَله گزه رکن قافام ائله قاریشمیشدی کی سانکی بو دونیا دا دئییله م . آنجاق هله سئوگیم ایله بیرگه او دوروم دان بیر نئچه آددیم اوزاقلاشمامیشدیق کی بیر دن بیره باشیم دا بیر شوشه سینیب گیجه لر گن اوتوردوم یئره اوزومو تاپدیقدا باشیم دا بولور بیر گولدان سینسادا قان آخماسینا باخمادان اوردان آیریلدیم . دئمه کی من فایزه نین بیر اوغلان لا دانس ائتمه سینه مانع اولونجا اونو ن حالین توتموشام و اودا بئله نکی بیر ایشه اَل آتیبدی.
فایزه دفعه لرجه گوروشومه گلسه ده ، اونو بیرسئوگیلی کیمی یوخ بلکه بیر دوست کیمی قارشیلاییب صمیمی باغلانتی لاریما سون وئرمک ایستیردیم . فایزه له منیم فرق لی دونیالاریمیز وارایدی. عائیله طرزیمیز و چئوره لریمیز فرق لی اولاراق بیز ادب ، تربیت و شرف سایدیغی میز شئی لر اونلارین گوزون ده بیرتهر کوهنه عادت لر ایدیلر .
عشقه ، گوزل لی یه، کولتوره ، هنره و بیر پارا دویغولارا دیر وئردی ییم حالدا ، فایزه نی گورمک دن چکیندیم و یونیورسیته نی بتیردیکده چیخدیم گئتدیم سربازلیقا. آنجاق هر نئیله سم ده سئوگیمین یاشیل گوزلری اوجسوز بوجاقسیز اسرار انگیز بیر جنگل کیمی هئی یادیما دوشوردی. آنا کارنینا فیلمینی ایزله دی ییمیز آنلار یادیما دوشوردی و سئوگیمین دئدی یی سوزلر ظولمته چئوریلمیش دونیاما ایشیق ساچیردی:
“دوغرو عشق و محبت،قیغیلجیم قدر سیجاق و اینجه اولسادا، یئنه کونول لری مقدس آلاولار کیمی قیزیشدیرا بیله ر. ”
آنلامیشدیم کی اینسان سئوگی اوغروندا اوزاق لارا قاچسادا ، اوزون دن و کونلون دن قاچابیلمه ز.
بیر گون آنام تئلفون آچیب داریخدیغینی دییه رک من دن ایسته دی کی بیر نئچه گون مرخص لیک آلیب گله م ائوه . بیر ایکی گون کئچمیش دی کی بیر گئجه اوتوبوس لا یولا چیخیب صوبح اذانی اولدقدا چاتدیم شهریمیزه . عائیله دن نیگران اولورسام دا اونلاری ساغ سلامت گوردوک ده اوره ییم یئرینه گلدی. آمما هاننان گئژدن ائشیتدیم کی فایزه کسیک دامارلاری ایله خسته خانادادی و اینتحار دان قورتولونجا ایلک ایسته یی منی گورمک اولوبدور.سئوگیمین سولغون باخیشلارینی گورجک ،ال لرینی الیمه آلیب گوزلریمین یاشینی توتا بیلمه دیم . سونرا اونو هله ده سئودی ییمی آنلادیب بو عشقی یاشایاراق یاشاتما غا سوز وئردیم. بو آن دا سئوگیمین بستری اولدوغو اوتاغا بیر داهادونوب باخاراق گوردوم کی تکجه ایکی میز قالمیشیق و نه دن سه ، هامی قویوب گئدیب لر…
نوشته شده توسط admin در چهارشنبه, ۱۰ دی ۱۳۹۳ ساعت ۵:۳۴ ق.ظ
