هئش زاددان بیر زاد
علیرضا ذیحق
اوشاق ادبیاتی: گونلرین بیرینده بیر شاه مریض اولدو. درده دؤزومو قالمادی وخبر وئردیلر دربارین حکیمینه .
شاه دئدی حالیم پریشاندی و حکیم اونو ماینا ائله دی . حکیم آمما بیر زاد تشخیص وئره نمه دی . قورخودان دا شاها بیر زاد دئیه نمه دی و اؤز – اؤزونه دئدی گل بیر سؤز دئه ائله اؤزون قورتار . دئدی: ” قوربان سنین دردین من تاپدیم نمنه دی . بیر سَفئه تاپاجاقسان بیر عَقیللی. بونلاری اؤلدوروب بئیین لرین بیر – بیرینه قاتیب یئیه جک سن و دردین ساغالاجاق. ” شاه دئدی نئجه یانی اینسان بئینی من یئییم کی. حکیم دئدی سنین داوان ائله اودی. شاه گؤردو ایش چتین یئره دایانیب مریضچی لییی لاپ بیله سین آیاقدان سالیر. وزیره دستور وئردی بو ایکی نفری تاپ گتیر. وزیر بینوا دوشدو چؤللره. کیمه دئسین اخی گل سنی ائله آیین شایین گوناهسیز وئریم اؤلومه. بئله یولدان رد اولوردی گؤردو بیر چوبان گلیری. کئچه کپه نک چیگنینده دی و تیفتیک بؤرکوده باسیب باشینا. دولامالاری دا دولاییب بدنینه قیللی بیر زاددی. دئدی ائله بونو آپاریم اؤزومو قورتاریم. دئدی چوبان قارداش سنی آپاراجایام شاهین یانینا. چوبان دئدی آخی منیم شاهلیق ایشیم یوخدی! دئدی شاه شاه دی حؤکم ائیله سه سنی اؤلدورتدوره ده بیلَر. وزیر چوبانی اؤزوینن گؤتوروب گئتدی دربارا . شاها خبر وئردیلر وزیر بیر سَفئه آدام لا تاپیلیب گلیب. وزیر شاها دئدی دا بوندان خالیصین تاپا بیلمه دیم . عقیللی ده کی هر یاندا وار کیمی دئسه ز توتاق گتیره ک. شاه دستور وئردی دارآغاجی قورولسون. چوبان دا ایشین قیلیغینی آنلادی کی نه منظورونان اونو دربارا گتیریبلر. ایستیرلر چوبانی اؤلدورسون لر کی چوبان دئدی نییه منی اؤلدوروسوز. شاه دئدی سنین بئینین داوادی. دئدی یانی من سَفئه یم. دئدی آخی بیر نفر عقیللی ده گرک اولا آخی او کیم اولا ؟ دئدی اونودا تاپاجاییق. دئدی من دئسم اولار. دئدی به نییه اولمور بویوردا .دئدی بو وزیردن عقیللی سینی تاپا بیلمزسیز. لاپ عقیللی اولماسایدی کی وزیر اولمازدی . شاه دئدی وزیری ده توتون آسین کی اوننان عقیللیسی بوردا یوخدی. وزیر گؤردو بو چوباننان فلک ده چالانماز و اون دنه منیم کیمی آدامی قویار دال جیبینه. منی قورتارا دا بیلسه ائله او قورتارا بیلر. وزیر دوشدو شاهین اَل آیاغینا کی بیرگون مهلت وئر صاباح اؤلدور کی شاه قبول ائله دی. سورا باشلادی چوبانا یالوارماغا کی سن منی قورتارماسان فلک منی قورتارانماز. چوبان دئدی شرطی وار اودا اوکی دونیا مالیندان نه یین وار هامی سینی وئره سن منه. وزیر گؤردو چاره یوخ دی و بیر کاغاذ یازیب ایمضلادی کی وار دؤولتیم چوبانین دیر. سحری گینه دار آغاجلاری قورولدولار و چوبان شاها دئدی قوربان چوخ فیکیرلشدیم گؤردوم وزیردن عقیللیسی ده وار اودا حکیم باشی دیر. شاهین دا بئینینه باتدی و دئدی وزیری اؤتورون حکیمی توتون. حکیم ده باشلادی هارای داد قیامت کی بو نه ایشدی وزیر دئدی متوسل اول چوبانا کی سنی فقط او قورتارا بیلر. حکیم ده نئیله سین نئیله مه سین زور گوج ایله شاه دان بیرگون مهلت آلدی و دوشَندی چوبانین اَل – آیاغینا. وزیردئدی به نولاجاق کی چوبان دئدی هئش زاددان بیر زاد اولاجاق، بیرزاددان هئش زاد . وزیر بو سؤزدن هئش نه آنلامادی و حکیمه دئدی من وار – یوخومو وئردیم قورتولدوم؛ سن ده گؤر بلکه مال ثروتین وئرمه یی نن قورتولاسان. حکیم باشی چوبانا یالوارماقدایْدی کی چوبان دئدی گؤتور بیر کاغاذ یاز و دونیا مالیندان نه یین وار هامیسینی وئرمنه کی بلکه سنی ده قورتاردیم. اوچونجو گون دو کی گینه دار اغاجلاری قورولدی و شاه دئدی سؤز ساویز اولسا دئیین. چوبان دئدی: ” قوربان من نن ائشیت سن اینسان بئینین دن اینسانا داوا اولماز.
بو حکیم سیزین مریض چی لی ییزدن باش آچماییب ائله بئله نکی بیر سؤز دئییب کی اؤزونو قورتارا. سن اجازه وئر من کی داغلارین دامنینده و طبیعتین قوینوندا بؤیوموشَم و بوتون اوت علف لری تانی یارام گئدیم سنین مریضچی لیین اویغون اوت علف گتیریم کی توختایاسان. اگر توختادین کی هئچ ، اگر توختامادین اوندا بیزیم ایکی میزی ده اؤلدور. ” شاه دئدی لاپ دا قشنگ سؤزدی. اوردا ایدی کی چوبانی آزاد ائلی ییب چوبان گئتدی داغ لاردان داش لاردان اوت علف ییغماغا. چوبان اوت علف لری نن قئییتدی و شاه اونلاری دملی ییب ایچندن سورا گؤردو آنادان دوغما اولوب. توختاییب و هئچ دردی آغری سی قالماییب.
شاه دئدی چوبان پالتارلارین سویون. وزیره دئدی سن ده سویون. چوبانا دئدی وزیرین پالتارلارین گئی وزیره ده دئدی چوبانین پالتارلارین گئی. وزیر دئدی آی داد بیداد نییه بئله اولدی کی چوبان دئدی به سنه بیه دئمه میشدیم بیرزاددان هئش زاد اولاجاق، هئش زاددان بیر زاد. من کی چوبان ایدیم اولدوم وزیر سن کی وزیر ایدین اولدون چوبان.
نوشته شده توسط admin در دوشنبه, ۲۰ فروردین ۱۳۹۷ ساعت ۵:۳۰ ق.ظ
