- آراز آذربایجان – روزنامه خبری آذربایجان غربی - http://www.araznews.ir -

ناماز یوخ قلبیم تمیزدیر

Posted By admin On تیر ۲۴, ۱۳۹۴ @ ۴:۴۰ ق.ظ In آنادیلیمیز | No Comments

حاضیرلایان :اکبرسعادت
آنا دیلیمیز: باش سوز،الله قورآن آیه‌لرینده بیزه سحر و آخشام اونو خاتیرلاماغامیزی امر ائدیر. پئیغمبریمیزین حدیثلرینده ایسه نامازدان اول اوتوز اوچ دفعه‌ “صوبحن اللاه”، “الحمدو لیلله” و “الله اکبر” دئمه‌ییمیز توصیه‌ اولونور. دئمه‌لی، بورادا مومینلر اوچون ذکر ائتمک مسئله‌سی واردیر. اونلار اوتوز اوچ دفعه‌ رببلرینی الله رسولونون بیلدیردیگی کیمی خاتیرلایاجاقلار. بس بو سای نئجه معلوم اولوب، موعیینلشه‌جکدی؟ بیز بونون جاوابینی حدیث کیتابلاریندا تاپیریق.
ناماز ایسه ایسلامین امر ائتدیگی ان بویوک و اهمیتلی عبادتلردن بیریدیر. بیر چوخ فایداسی و حیکمتی اولماقلا یاناشی ناماز اولا اینسانا، اوجا و بویوک اولان اللهین راضیلیغینی قازاندیران، اینسانی یارادیجیسی اولان اللها یاخینلاشدیران و مومینین مئراجی اولان بیر دعادیر. بوندان باشقا ناماز -ایسلام دینینین بئش اساسیندان بیری، پئیغمبرلرین یولو، ملکلرین سئوگیسینه نایل ائدن بیر عبادتدیر. عینی زاماندا ناماز ایمانین ایشاره‌سی، دعانین قبولونا واسطه‌، ریزقه برکت گتیرن، اینسان ووجودونا راحتلیق وئرن صالح بیر عملدیر. ناماز همچی‌نین دوشمنلر اوزرینه بیر سلاح اولان، شیطانی اینساندان اوزاقلاشدیران، اولوم ملیی ایله ناماز قیلان آراسیندا بیر شفاعتچیدیر.
تئز-تئز بئله بیر سوز ائشیدیریک: “اوره ک گرک صاف اولسون…”
سیز بئله بیر شئی ائشیتدیگینیز زامان اونو سویله‌ینلره جاواب اولاراق “قلبلری تمیزله‌ین عبادتدیر!” دئیین. اوزو ده بونو هئچ چکینمه‌دن سویله‌یین! هله بو هاراسیدیر!
جمعیتیمیزده بضا ائله ایفاده‌لره (مثلا، “من ناماز قیلان بیر چوخ اینساندان داها یاخشییام” و س.) ایفاده‌لره راست گلیریک کی، اینسان اونلار قارشیسیندا سوسمایا بیلمیر. بو جور ایفاده‌لر آخماقلیغین سون حددینده نامازین فرض اولدوغونو اونوداراق دئییلن آجی کلمه‌لردیر…
اصلینده بو، بیر آز دا بیزدن قایناقلانیر. میناره‌نی اوغورلایان اونو گیزلتمه‌یه چالیشدیغی کیمی بیز ده، چوخ تأسف کی، بو جور فایداسیز شئیلره باش وورور، بهانه‌لر اویدوروروق. خاهیش ائدیرم، سهو باشا دوشمه‌یین. مقصدیم اخلاقی جیلیزلاشدیرماق دئییل. “قلبیم تمیزدیر” دئیه‌رک عبادتی ترک ائدنلره بیر-ایکی کلمه سوز دئمک ایسته‌ییرم. من اخلاقین ایمان و عبادتین یاریسی اولدوغونون فرقینه واریرام.
اونوتمایاق کی، پئیغمبری (س) پئیغمبر ائدن اونون یوکسک اخلاقی و عبادتی ایدی. دئمه‌لی، اخلاقین اوجالماسینا سبب عبادتدیر. اللها قارشی بورجونو یئرینه یئتیرمه‌ین، اونا تشککور ائتمیی اوزونه چوخ بیلن اینسانین قلبی نئجه تمیز اولا بیلر؟! حیات نه قریبه‌دیر؟
آنامیز هز. آیشه‌دن “بیز هاچان یاخشی، خئییرخاه حساب ائدیله بیلریک؟” سوروشولدوغو زامان “پیس اولدوغوموزو حیسس ائتدیگیمیز زامان” دئیر، “نه زامان پیس اولدوغوموزو درک ائدریک؟” دئیه سوروشولدوقدا ایسه “یاخشی اولدوغوموزو زنن ائتدیگیمیز زامان” جاوابینی وئرردی.
بو مثال قئید ائتدیگیمیز پروبلئمه – “من یاخشییام” دئینلره چوخ موکممل بیر جاوابدیر. بلی، بیز موسلمانیق و اطرافیمیز بیزی دیندار کیمی تانیییر. اوزریمیزده تر-تمیز بیر پالتار – دیندارلیق صیفتی وار. اگر او، تر-تمیز، آغاپپاق پالتاردا کیچیک بیر لکه اولسا “گوز چیخارار”. بیز نظرلر آلتینداییق. گلین، ایسلامین یوکسک اخلاقینی احاطه‌میزده اولانلارا، موسلمان اولمایانلارا و سونرادان ایسلاما داخیل اولمالارینا وصیله اولاجاق شخصلره گوسته‌رک.
اگر بیز ایسلام اخلاقینی و ایمانین حقیقتینی اوز عمللریمیزله نوماییش ائتدیرسک، دیگر دینلرین منسوبلاری دا، طبیعی کی، ایسلاما مئیل ائده‌جکلر. بلکه ده یئر کوره‌سی‌نین بیر چوخ دولتی ایسلاملا شرفلنه‌جکدیر.
بلی، بیزیم اخلاقیمیز پئیغمبرین (س) اخلاقینا بنزه‌مه‌لیدیر. چونکی، اونون اخلاقی قوران اخلاقی ایدی. قورانین گوستردیگی اخلاق ایسه رببین ایسته‌دیگی کیمی اولماقدیر:
“ائی نفسیم! سنی یارادانین ایسته‌دیگی کیمی بیر قول اولماق ایسته‌مزسنمی؟”
بعضی اینسانلاردان “ناماز قیلیرسانمی؟”، “اوروج توتورسانمی؟” – دئیه سوروشدوغوموزدا “خئیر” جاوابینی وئریر و بونون موقابیلینده ایسه “بیزیم قلبیمیز تمیزدیر، بیزیم هئچ کیمین مالیندا، ناموسومدا گوزوموز یوخدور” دئییرلر.
سیزجه “قلبیم تمیزدیر” دئمک کیفایتدیرمی؟
بیر شئیی یاددا ساخلاماق لازیمدیر: اینسان هئچ بیر شئی ائتمه‌مکله مسئولیتدن یاخا قورتارا بیلمز.
توتاق کی، سیز آوتوبوس سوروجوسوسونوز. یول سولا دوغرولدوقدا سوکانی سولا، ساغا دوغرولدوقدا ساغا هرلتمک، یول بیتدیکده و یا قارشینیزا مانعه چیخدیقدا ایسه دایانماق زروریدیر. اگر سوروجو کیمی “منیم قلبیم تمیزدیر” دئیه‌رک هئچ بیر شئی ائتمه‌سه‌نیز، یا بیرباشا دیوارا توققوشاجاقسینیز، یاخود دا آوتوبوسو قضایا اوغرادیب بیرباشا جهنمه واصیل اولاجاقسینیز.
“قلبیم تمیزدیر” دئیه‌رک عبادت ائتمه‌ین موسلمانلار نظره آلمالیدیرلار کی، اونلارین قلبی پئیغمبرین (س) قلبیندن تمیز دئییلدیر. آنجاق پئیغمبر (س) هئچ واخت بوندان ایستیفاده ائده‌رک عبادتدن ایمتینا ائتمه‌میشدیر.
الله تعالی قوراندا عبادتی (ناماز قیلماق، اوروج توتماق و س.) امر ائتدیکده اینسانلارین قلبلری‌نین تمیز اولوب-اولماماسی کیمی شرط قویماییب. ایلاهی امر هامییا شامیلدیر. “قلبیم تمیزدیر” دئینلر اؤزلری بیلمه‌دن اللهین ایراده‌سینه قارشی چیخدیقلارینی هئچ دوشونورلرمی؟
ناماز قیلمایانلار اصلینده محمّد پئیغمبری ده اینکار ائتمیشدیر. چونکی پئیغمبریمیز هئچ بیر زامان نامازلارینی ترک ائتمه‌میش، ان چتین حاللاردا بئله نامازینی ادا ائتمیشدیر. پئیغمبریمیزین یولو محض بو یول ایدی. یعنی ان چتین آنلاردا بئله نامازی ترک ائله‌مه‌مک ایدی اونون یولو. پئیغمبریمیزه و اونون یولونا تابع اولمایانلار ایسه عمللرینی پوچا چیخارتمیشدیر.
اینسانین دونیوی چالیشمالاری‌نین عبادت ساییلماسی‌نین سیرری، نامازین اینسانلارا فایدالی اولاجاق خیدمتلر گوسترمه‌یه جدی بیر زؤوق و هیجان میدانا گتیرمه‌سیدیر. بونا گوره، اینسان قوجالسا بئله، عائله سی‌نین میشتی اوچون ایشله‌مه‌لیدیر. “آرتیق یاشلاندیم دئیه‌رک، بیر کنارا چکیلیب ساده‌جه آخیرتیم اوچون چالیشیم”، دئمه‌مه‌لیدیر.


Article printed from آراز آذربایجان – روزنامه خبری آذربایجان غربی: http://www.araznews.ir

URL to article: http://www.araznews.ir/%d9%86%d8%a7%d9%85%d8%a7%d8%b2-%d9%8a%d9%88%d8%ae-%d9%82%d9%84%d8%a8%d9%8a%d9%85-%d8%aa%d9%85%d9%8a%d8%b2%d8%af%d9%8a%d8%b1/

Copyright © 2013 آراز آذربایجان - روزنامه خبری آذربایجان غربی. All rights reserved.