- آراز آذربایجان – روزنامه خبری آذربایجان غربی - http://www.araznews.ir -
ناغیل، حیکایه…… کمپین ی
Posted By admin On اسفند ۲۱, ۱۳۹۸ @ ۱۱:۰۵ ق.ظ In آنادیلیمیز | No Comments
روحانگیز پورناصح
آنادیلیمیز :کئچمیش زامانلاردا، اوزون گئجهلرده، ایلنجهلی یئرلرین چوخ اولماماسینا گؤره، ائوده اوتورارمیشلار. آمما گئجهلری جور به جور ناغیللارلا ایلنجهلی ائیلرمیشلر.
ایندیسه عزیز یازیچیلار گئجه گوندوزوموزو اؤز ایستهدیییمیز کیمی یاراتماق ایچون »ناغیل، حیکایه… کمپین«ینه دعوتلیسینیز.
بیر گون وارایدی، بیر گون یوخویدو. »کرونا«دان باشقا هر شئی وارایدی.
چوخ اوزاق کئچمیشلرده، کرونا اولمایان چاغلار، اینسان قورخویلا، جور به جور دئولرله، ییرتیجی حئیوانلار، ویروسلارلا و … ال به یاخا اولاردی. بیر سیراسینی اؤلدوروب، بیر پاراسینی دا قوواردی. آمما اؤزونو باشقا وارلیقلارا اوستون توتمازدی، هله قالسین هم جینسلرینه. آمما آستاـ آستا بیلیمی آرتاندان سونرا داها قورخمادی. دئدی بس، آللهلار آللهی اولوب.
کیمسهیه بندهلیک ائلهمهدی. اؤلدوردویونو اؤلدوردو، اؤلدوره بیلمهدیکلرینی ده اؤلومجول ائلهدی. ائله بیلیردی هر شئی اونون اوچوندور و اونون الینده. بلکه ده بیلمیردی قارشیسینداکی اؤزونو گوجلندیریر یوخسا بیلیمینی یوکسلدیر.
کرونا گلمهمیشدن اول بیر به بیر دؤیوشچولرین یوللاییردی، اولمایا انسانین بوش دامارین اله گتیرمک اوچون چالیشیردی. سارسدان، مرسدن، ابولادان و … هرهسی بیر دؤنه گلیب انسانین جانینا قورخو سالیب، بیر آز دا قیریب، سونرا اؤلموشدولر.
آمما معلوم اولور کی هامیسی اؤلمهمیشدیر. اونلار اؤزلرینی گوجلندیریب باشقا بیر دونا گیرندهن سونرا، یئنیدن قاییدیب و بوتون دونیانی هورکوتموشدولر.
ایندیسه کرونانین آدی قولاغینا دهییب؛ هر یئرده، هر کسه حکم وئره بیلرم دئییر. نییه بس، کئچمیش زامانلاردا شاهلار هر ایش گؤره بیلردیلر. کیمیسینی حبسه سالاردیلار، کیمیسینی اؤلدوروب، کیمیسینی بوغارمیشلار…
ایندی بو کرونا اؤزونو شاهلار شاهی سانیب، هامینی حبسه سالاندان سونرا، بیرینی بوغور، بیرینی اؤلدورور، بیرینی… الیندن گلهنی اسیرگهمهییر.
او اوّلکی شاهلاردان دا چوخ بیلیر، ائله هامی آیریسیندان اؤیرنر، منیمسهیر، بیلیمینی چوخالدار. ائله بیر سیاست گؤتوروب کی، هامی کؤنوللو اولاراق ، ائشییه چیخماییم بیردن کرونا منی ده یاخالار دئیه، اؤزونو حبس ائدیر.
بو کرونانی دا دییهسن قدرت کور ائلهییب، سانکی شاهلارین آخیر عاقبتلرینی اوخوماییب، بلکه ده اوخویوب، یادیندان چیخاردیب.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d9%86%d8%a7%d8%ba%d9%8a%d9%84%d8%8c-%d8%ad%d9%8a%da%a9%d8%a7%d9%8a%d9%87-%da%a9%d9%85%d9%be%d9%8a%d9%86-%d9%8a/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.