مَشقَت

مَشقَت

ایکینجی بولوم
علی اشرف درویشیان
آنادیلیمیز:بالاجا اوغلان یاغیش دان ایسلاناراق، نِی لری آوجیندا سیخیردی. ترپنمه دن، یئرینده قوروموشدو و گؤلون او الینه باخاراق حئیران قالمیشدی. گاهدان بیر تیتره ییش جانینی سیلکه لیردی .یاغیش ، میل – میل و تیکه – تیکه، فضانی کسیردی و دومان او تیکه لرین ایچینده زویولده ییردی. قارا گئییم لر، توفنگ لرینی چاکت لری نین آلتیندان چیخاریب و دیزه چؤکدولر. هر یئر یاش ایدی و گؤلون سویو چوخالیردی. اونلاردان بیری یان جیبیندن بیر کاغاذ چیخاریب و نابلد بیر دیل ایله کی بالاجا اوغلان اونلاردان هئچ نه آنلامادی ، اونو اوخودو. یئیین – یئیین و توپوق وورا – وورا اوخودو. ورقه ایسلاندی ، یوموشاندی و کیشی نین الینه یاپیشدی. کیشی زحمتله کاغاذی اللرین دن قوپاردیب و پارچا – پارچا یئره تؤکدو ، آما بیر تیکه سی چاکتی نین اته یینه یاپیشیب اوردا قالدی .
بیر گورولتو یاغیشین بولور میل لرینی ترپَتدی. سئیره لر نِیزار دا گیزلن دیلر . بیرینجی ، کی الی نوار لا باغلانمیشدی، اؤز یئریندن دبه شدی . دویونلن میش یوموراق لارینی سیخدی. گولله لرین باسقی و ضربه سی، اوچونجو و دؤردونجو نفرلری کی یئنی یئتمه جوان ایدلار اؤزوده آریق و اوزون ، نئچه قاریش هاوایا توزارلادی . اوزاق دان بیر شئی پارتلادی و یاغیش قاباقکین دان بَتَر چؤکدو . قورخان بیر سئیره بالاجا اوغلانین قیچی نین کناریندان اوچدو و تله سیک باشینی سوخدو نِی لرین آراسیندا کی اوتلارا ، آما قویروغو و ساری قیچلاری آچیلمیش قانادلاری لا ائشیک ده قالدی. سو قوشونونن تیتره ین قیچی نین تئله ک لری ، اوغلان جیقی داها آرتیق قورخوتدو .
گولله لرین گورولتوسوندان سونرا ، هر یئر سوسدو . سئیره ، زحمت له نِی لرین آراسیندان چیخدی ، آما تک – تک آچیلان گولله لرین قورخوسوندان کی هردن بیر گورولتولاری قولاغا چاتیردی ، اؤز یئریندن ترپه نن میردی . خیرداجا و باشی یون رنگینه چالان سئیره ، هر آتیلان گولله نن ترپه شیردی .تیفتیک لی کوره یی کی یاغیش داملالاری اوزه رینده ن آخیردی ، گؤرونمه ین چیلتیک لرله ، سگگیز یول تیتره دی .
سورعت له اؤزونو سویون قلبینه ووروب جومدو . یاغیش دایاندی و دومان چکیلدی . بالاجا اوغلان اؤزونه گلدی . کیریمیش و گیژ حالدا ، ائله حیس ائتدی کی کؤنلو قیزمار بیر گونش ایسته ییر . هرگون کی کیمی گؤزله دی تا قونشولاری ” خالو سیاوَخش ” نِی کسمک اوچون اورایا گله . ایسلاق سیماسینی الی نین دالی نان و کوتو نون قیراقی لا قورولوردی که خالو نون سسینی اوزاق دان ائشیتدی :
” آهای … ها … ها … هاو ! “
بالاجا اوغلانین کی سسی تیتره ییردی ، قاریشمیش و گیجه لمیش بئینی نن جاواب وئردی :
” های … هاو …هاو …هاو!”
نئچه آندان سونرا خالو سیاوخش نِی لرین آراسیندان چیخدی . اونون اؤنونده دایاندی و ایسلانمیش باش اؤرتویونو چیخاردی تا سیخسین .
“نه یئل دوماندی ! نه بیر پیس گون ! موفته یئره گلمیشیک .”
اوغلان جیق ، آغیر لانمیش و حئیران گؤزلرینی گؤل دن چکدی :
” بیردن بیره گلدیلر . یاغیشین لاپ گؤرلویونده .اوردا …”
” ایندی ایش ایش دن کئچیب دی . بوراجان گلمیشیک . یاخشی سی اودور کی ایشی میزی باشلایاق . “اؤسگوردی و نِیزارا سارای گئتدی رِیزین باشماق لاری پالچیق وسولموش اوت علفین ایچینده ، سوروندی :
” هر شئی دن قاباق گرک اود یاندیراق . اود .”
اودون دؤوره سینده اوتوردولار و پالتارلاریندان بوغ قاغزاندی . خالو پیچاغینی سورتدو دیرناغی نین دالینا. اوغلان جیق تیتره ک ال لری له ، گؤلون او تایینی گؤستردی و قورخا – قورخا دئدی: ” اوردا نیزارین دالیندا …” خالو او طرفه باخدی .
” ها ! اوردا نه اولوب ؟ “
” اوردا شیکارچی لار ، چوخ اؤلدوردولر .”
خالو بالاجا اوغلانین اوزونه باخیب مات قالدی .
” نییه رنگین چیلوار کیمی آغاریب .گل گؤستر . نه اولوب قارداشیم ؟ “
او واخت کی او نوقطه یه یئتیریلر کی اوغلان نیشان وئریردی ، آیاقلاری آلتیندا قانلی یاغیشلی بیر آرخ آخیردی . خالو اَییلدی :
” شیکارچی لار ! اودا سحرین بو تئز لی یینده !؟”اوغلان جیق اَسدی :
” گولله سسی گلدی … دالبادال ! سئیره لر و سو قوشلاری چوخ قورخدولار . اونلار …”
” حتمن مارال لاری ووردولر . بیر بؤیوک سورو ! “
اوغلانجیق هله ده حئیرانلیق ایچره ایدی .
” سگگیز نفر ایدیلر “
” کیم لر؟ “
” مارال لار . حتمن یوخو زاد گؤرموشم .”
و قیزدیرما توتموش گؤزلرینی آووشدوردی :
” بیر جور دانیشیردیلار کی هئچ قانمیردیم .”
خالو یئرده اوتوروب الی نن پالچیق لاری قاریشدیردی :
” بونلار ، آدام آیاق لاری نین ایزی دی . چوخ ایدیلار .مارال لاردان بیر ایز یوخدور .”
وشهادت بارماغی نان ، پامبوق تک آغ و گچ کیمی یوموشاق بیر شئیی آرخ دان گؤتوردو :
” باشلاریندان گولله ووردولار . یاخین دان ! “
آزجا دوشوندو و نیزارا باخیب تومدو :
” اونلاری بیردن بیره گیره سالیب لار . “
اوغلان جیق دئدی : ” حتمن “
هر ایکی سی قوجاق دولو نی له اودون کنارینا کی داها آلاوی سؤنوردی قاییتدیلار . خالو باشلادی ” دوزَله ” ** قاییرماغا و اوغلان جیق ، نی لرین باش آیاغی نی کی کسمیشدی مرتب ائتدی و چووالینا قویدی . خالو نی لرین بیرینه دقت له باخدی :
” باخ بورا نی لرین اوستونه قان سیچراییب .”
اوغلان جیق ، نی لری الینده فیرلاتدی :
” ننه م دئییردی کی هروقت نیزار دا ایلدیریم شاخسا ، نی لر دولارلار قان لکه سین دن .”
” دوز دئییب دی . منده ائشیت میشم . ” و بیر تیکه قیرمیزی اود گؤتوردی و اونو پوفله دی کی آلاولانسین و سونرا فاصیله – فاصیله نی ین صاف اوزونو یاندیردی و بیر ردیف ده اونو دلدی . دلینمیش نی لردن ایکی سینی یان یانا قویدو و موم لا بولاشان بیر ایپ له ، اونلاری محکم باغلادی . سونرا ایکی قیسا و نازیک نِیی ، پیچاق ایله قدده دی و اونلاری سالدی دلینمیش نی لرین آغزینا واِهمالجا دئدی : ” یاخشی دوزَله اولدی .” اللرینی اودون اوستونده قیزدیردی . باش اؤرتویونو کی هله نم ایدی باشینا باغلادی و ” دوزَله ” نی دوداغینا قویدو .

نوشته شده توسط admin در چهارشنبه, ۰۵ اردیبهشت ۱۳۹۷ ساعت ۱۱:۳۹ ق.ظ

دیدگاه


دو + = 6