- آراز آذربایجان – روزنامه خبری آذربایجان غربی - http://www.araznews.ir -
مینایللردن بویلانیب باخان شهر
Posted By admin On بهمن ۲۰, ۱۳۹۵ @ ۴:۵۸ ق.ظ In آنادیلیمیز | No Comments
حاضیرلایان:اکبرسعادت
بیر گئجه یاریسی تبریزین قونقاسینی
ماکیدان اورمیه یه سوره جه یم
آتلارین ترینی
گوزیاشلاریمی
آووج آووج داشییاجام
اورمو گولونو دولدوراجام…
آنادیلیمز:یامان هاوالیدیر، بئیینلر بیزیم یئرلرده. اوچورلار، اوچوش نه اوچوش، یئره یئنمک بئله دوشونمورلر. یئللر اسمهده، گاه آغ یئل اسیر، گاه مئه یئل، هردن ده فیرتینالار قوپور. اوچان بئیینلر یئللرله اویان-بویانی گزیرلر. آیاقلا گئتمهین یوللاری بئیینلرله گئدیرلر. گورموین یئرلری گوروب، دانیشمایان سوزلری دانیشیرلار. گوروشمهدیکلری کیمسهلرله گؤروشورلر. واقت قالمیر دینجلمهیه یئللندیکجه اوچوب گئدیرلر. یئللر یاتدیقدا هاوالی اولدوقلاری اوچون گؤیده قالیرلار. یئندیلر هارا یئنسینلر؟! چوخدان، اولدوقلاری یئرلردن اوچوب گئدیب، داغلاری، داشلاری دنیزلری آشیبلار. هر یئردن هاوا آلیبلار. هاوالارینی دهییشدیرمک ایستهین بئیینلر(بیر چوخ واقتلار بیر هاوادا اولماقدان چیرگیییرلر) یئره یئندیکده، سئومیرلر بیزیم یئرلرین هاواسین. چوخدان یادیرقامیشلار بورالارداکی هاوالاری.
اورمیه بیر زامانلار هئچ کیم گورمهدن یانیندان کئچه بیلمزدیلر. شرقده مدنیتین(شهرلیلیک دئمک دیر) سیمگهلرینه چئوریلن شهرلرین بیری ایدی. آذربایجاندا شهرلی یاشامین ایزلری بیر چوخ یئرلرده اوزونو گؤرسهده سون یوز ایله آغالیغینی گتیریب چاتدیران اورمو اولموشدو. بوگون اورمویا هانسی یاندان گیرمهییمیزه باخمایاراق، شهرین گیریشی، چیخیشی بللی دئییل… هانسی یاندان شهره گیریرسن، بیر چوخلو داشدان-سیماندان تیکیلن ائولر قارایوللار گوزه گیریرلر.
یاواش یاواش شهرده بینالار گویه باشقالدیریر… یوللار بینالارا گوره وورولوب شهرین چئورهسینده اولان بوتون یئرلری(کندلری، اکین یئرلری، چمنلری داغلاری) شهره قاتدیریلیر. یئنی تیکیلمیش ائولر یوللار، کورپولرین هئچ بیری شهرین سیمگهسینه چئوریلمیر. اورمودا وورولان بینالارین یاخشیسینی باشقا یئرلرده وورولار. یئنی سالدیریلمیش هئچ بیر بینا اوزل اولاراق اورمونو گورسهتمیر. بو گورونمهمزلییین ایکی آنلامی قاباریقدیر. بیرینجیسی بوتون شهرلره عایید دیر، او دا مئعمارلاریمیزین بیرینجی دهرهجهلی مئعمار اولمادیقلاری، تکجه بیر نئچهنجی درهجهلی یانسیدیجی اولمالاری دیر. ایکینجی ندن،اورمونون دورومونون دهییشمهسی دیر. داها دوغروسو اورمونو دوشوننلرین اورمودا اولماییب، اوزاقدان دوشونمهلری دیر. وطنیمین بویوکلویونو گئرچک کیمی یوخ تکجه بیر نوستالژی کیمی یاشایانلار، اورمویا بویوک دئیهرک اورمونون کوپونو آلانلار، اوزلری کیچیک اولوب بورانی کیچیدنلردیرلر.اورمونون گورمهلی، بویوکلویونو گورسهده بیلن بینالار شهرین اورتاسیندا یئرلهشیرلر.
شهرین اورتاسیندا اولان یئرلرین اوجون بوجاغینی ایستهدیکلری کیمی دهییشدیریب شهرین اوزولمهیینه باخمایاراق گئنه ووقارلی کئچمیشینی اوزه چَکیر. بازار، سردار مسجیدی اوچ گونبز، اعظم مچید، قدیم مَحلهلرین هامیسی آغداش محله سی، تندیرچیلر-چیـیینه دایاناراق کیچیک دوشورلمهیین قاباغیندا دایانیرلار. دایانمالار، شهرین گووهنجینه آرتیریلمادان نه قدر سوروله بیلهجهیینی کیمسه بیله بیلمز… دوغودا شهرلر، شهرکیمی اولمازلار. شهرلره گلنلر شهرلری یونلندیررلر. اورمو دوغوشهرلرینین ایچینده باشقا دیر. او واراولاندان شهر دیر. اورمویا گلنلر ده اورمونون خویون گورتورمهلیدیرلر. شهر هئچ زامان حاکیملرینه باغلی اولمویوب.شهره یئتیشیرلر، یئتیشسینلر یئتیشمیرلر یئتیشمهسینلر، شهر شهرلیلییینده دیر. هر کس ده، هر نه دئییر دئسین.چوخلاری بورانی بهیهنمزلر، بوردان دا واز کئچنمزلر، اونا گوره ده شهری آشالاییب، اللری چاتسا داغیدیب، آنجاق زوردا قالاندا، خلوتلرینده اورمونو آلقیشلارلار. آلقیشی گورون نه جور آلقیش دیر. اورمودا اولسان، قیوراق اولمالیسان. شوللارا یئر یوخ دیر دئیهسن بو شهرده. هر کس بورا گلیب، اوزوجه اورمودا آغالیق ائلهییب آنجاق اورموایله بویلاشانماییب.
بوردان چیخان آدلیملاری سیرالاساق، قورتولان دئییللر. بو آدلیملارین ایچینده باشقا یئرلردن ده گلنلر اولوب. آنجاق بوردا اولدوقدا بویویوبلر. آدلانیبلار. چوخلارینی(اورمونو سئونلری) بوردا آسیبلار. سسلری باتیریبلار. شهری آلیب، تالاییبلار. آنجاق هر نه کئچیجی اولوب. یئنه بورا اوز بویوکلویوله قالیب.یوز ایللردن، مینایللردن بویلانیب باخان شهر، اونلا اولانلاری بویودوب، اونو سئونلری بویودوب. اونا توخونانلار، چایقیراغیلا سوزوبلر شهردن. اورمونو باشا دوشنلر اورموایله اولوبلار، اونو باشا دوشمهینلر اوردان قوولوبلار.اینانماق یا ایناننماماق دئییل منیم مسئله م. سورون بودور کی من بورایا عایدم. بو کوکوم بورادادیر. پاییز دا آرانلیق یئرلرده کوک سوز بوتالاری یئل نئجه اویانا بویانا آپاریر. من اویله سی اولماق ایسته میرم. من بیر سویود آغاجی تک زینه بیر چای قیراغیندا سس سیز سمیر سیز بیرچول ده کولگه سالماق ایسته ییرم.
اورمو شهری ایران دا بیرنجی شهری دیر کی ۲ بهمن ده بیرنجی دفعه ایران دا قیام مسلحانه رژیم پهلوی دن ائدیب لر بو ایشین باشچی سی اورمیه شهرینده شیخ غلامرضا حسنی اورمیه الیله اداره اولونوردی. ایران انقلابیندان سونرا کوردلر سنار مامدی باشچی سی ایله اورمیه شهرینه هجوم چکیب و اورمیه شهرین توتماق ایستیرلر بو خبر اورمیه شهرینده قورخو یارالدیب و خالقین بیر چوخو ائو ائشیگین بوشاتماغا چالیشیب و شهردن چیخدیلار. کوردلر اورمیه شهرینه گیرنده حسنی امریله اولان سیلاح لی نیرولار اونلاری محاصیره ائدیب و اونلاری قایتارماغا مجبور ائله دیلر…
وطن اوچون عمر بویو چالیشماق ، وطنی تانیتماق ، وطن نین ده یرلرین قوروماق ، وطنه یئنی دیرلر قازاندیرماق ، وطن نین باشین اوجالتماق ، وطن له گلجک نسیلین باشی اوجالماسینی ساغلاماق ، ایندیکی دورمدا وطندن یازماق ، وطنه آد قازاندیر ماق هله هله مرد اوغول ، آنا قیزلار ایستر ، بو قارماقاریشیق دونیادا اینسان اوزنو ایتیرن دونیادا ، اوزونو تانییب ، اوزنو تاپیپ وطن اوچون یاشاماق ، وطن اوچون اولمک بویوک شرف دیر و یوزه یوز کی هر یئرده شرفلندیرن اینسانی وطندیر. دونیادا بویوک آدلیم، تاریخده قالان شهرلر چوخ دیرلار. بو شهرلرین بیر ایکیسیندن سونرا باشقا شهرلری گورمهمیشم. بیلمیرم ده نئجه دیرلر. آنجاق اورمونو یاخشی تانیییرام. اوزومه گوره یاخشی تانیییرام. شهر شهرلیلییین، شهره گلیب قالانلارین هامیسینا سیچرادیر. من بیر تورکم ایران باشدان باشا وطنیم ، و بو جغرافیا دا اولان ائللرو قوملار ایله برابر ، هر نقطه ده و هر یئرده یاشایان تورک ائللری و قوملاریدا وطنداشلاریم ،و دیل داشلاریم .بونون اوچون؛ روحوم بیر نقطه و بیر بو جاقدا دوستاق اولمادان ، گئنیش و سونسوز بیر اولکه ده یاشاماقدا و اونون معنوی گوگلرینده قانات چالماقدادر .
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d9%85%d9%8a%d9%86%e2%80%8c%d8%a7%d9%8a%d9%84%e2%80%8c%d9%84%d8%b1%d8%af%d9%86-%d8%a8%d9%88%d9%8a%d9%84%d8%a7%d9%86%d9%8a%d8%a8-%d8%a8%d8%a7%d8%ae%d8%a7%d9%86-%d8%b4%d9%87%d8%b1/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.