- آراز آذربایجان – روزنامه خبری آذربایجان غربی - http://www.araznews.ir -
منیم چانتام
Posted By admin On مهر ۵, ۱۳۹۵ @ ۵:۵۷ ق.ظ In آنادیلیمیز | No Comments
حاضیرلایان:اکبرسعادت
گلدی پاییز بیزده یار،عومرون سونونا چاتدیق
دئرین دویغولاری بیز،گور نه خیاله قاتدیق
چاتمامیشدان مطلبه، گوندوز یئتدی آخشاما
نقد ائیلیب نسیه-نی ،آغی قرایه ساتدیق
آنا دیلیمیز:آه، بیر چانتام اولسا… آه، منیم ده او بیری اوشاقلار کیمی کیتابلاریم، اویونجاقلاریم اولسا! منیم ده رومانلاریم اولسا… اوندا گوررلر، نئجه چالیشیرام. هئچ بیر شئییم یوخ. بئله نئجه چالیشیم من؟
گئجه ایدی. قار یاغیردی. چایخانانین سوکوتونو آرادا بیر، یوک ماشینلارینین گل- گئدی پوزوردو. تهیرلرین آلتیندا سویومتول اولموش قارلار چایخانانین شوشهلرینه سیچرانیردی. سیماوارین سیزیلتیسی، اوجقارلاردا اولاشان ایتلرین هافیلتیسینا قاریشیردی. چایچی شیشمیش یوخولو گوزلرینی دیشارا زوللامیشدی. کنده گئتمک ایستهدییمدن گئجهیه باخمایاراق، کتاب دولوسو چانتاملا، همیشهکیلر سایاغی یولا دوشدوم. آراز قاباغیمی آلماغا چالیشیر، چایچیایسه اونونلا بیرگه: ”قوردلار، دوستوم … قوردلار، جانیندانمی بئزیبسن“ دئییردی.- ”صاباح اوشاقلارین گوزلری یولدا قالار. من اونلارا سوز وئرمیشم آخی“ دئدیم.آرازایسه: کدرلنمه، سن صاباح گون آچیلمامیشدان کنده چاتا بیلرسن. دئدی.چایچی اسنهیهرک منه سوز وئردی کی، صاباح هله منی آلا- توراندا، یوخودان آییلداجاقدیر.
چایخانانین سونن ایشیغیندان، آراز ایله منیم کولکم دیشاردا، قارلارین اوستونده دوشنمیشدی. قارین آلتیندا بوتون آغاجلار قینمیش و دیوارلارین قارا- قورخو… سایهلری هر یئره هوپموشدو. صاباح آلا- توراندا گئتمهییمه راضیلاشدیم. اوزومو سوبایا طرف چکدیم. سوبانین ایستیسینده قیزیندیم. آراز چایچینین تاختیندا یاتدی. آرازنان بیر مکتبده اوخوموشدوم. سونرالار اودا منیم کیمی معلم اولموشدو. یئرده اوزانیب یاتمیش قوجا بیر کیشی خورولداییردی. کنددن تزهگلمیشدی؛ گئجه ایدی. قار یاغیردی… چایخانانین سوکوتو، چایچینین خور- خورو- و آرازین یوخودا چئینه- توپور دانیشیغی: صاباح … آلا- توران … گئتمهلییک … قار …
بیردن قوجاکیشینین باغیرتیسی هامینی یوخودان دیک قالدیردی: آی هارای دادیما چاتین … اوغورلادیلار … دادیما …
چایچی دئیینه- دئیینه:“نه خبرین کیشی … شوکورلر کی بیز زاددا یئمهییبسن“ دئدی.
قوجا کیشی یوخولو- یوخولو:“یوخودا گوردوم کی، پوللاریمی اوغورلاییرلار“ دئدی. چایچی استهزاایله سنین پوللارین هاردایدی آی بختی قارا- جاواب وئردی. سوکوت باشلادیقدا یئنه هامی یاتدیلار. دیشاردا الکتریکا آغاجلاریندان آسیلان لامپالار دارا چکیلمیش کیمیایدلر. آنجاق هر یئر ایشیقدا جانلانیردی. قارلار، یاغا- یاغا سوزمان کیمی اویناقلاییر و الکتریکا آغاجلارینین آیاقلاریندا یئره قونوردولار، بیر دسته گویرچین کیمی، سانکی …بیریسی منی ییرغالاییردی. چایچی ایدی. هلهده قارانلیق ایدی. آنجاق لامپالار دیشاردا سؤنمهدن یانیردیلار. قار دایانمادان یاغیردی. من پوتونلاریمی آیاقلاریما گئیدیم. آراز تاختین بیر کونجونده سیغینمیشدی. اودا کنده، مندن گئج گئدهجک ایدی.چایچی:“بیر زاد یه- ایچ، اورهیینی توتسون“ دئدی.من ”یعقوب خان، اوندا گئجیشهرم“ جاواب وئردیم.یوخولو حالدا، اشارهایله:“الجکلرین قالماسین“ دئدی.چانتامی گوتوروب، وداعلاشدیم. قار دیزهجک قالخیردی. اوفوقده یالنیز، بیر ایزجه ایشیق گورونوردو. خوروز بانلاییردی. چانتام کتابلا دولو ایدی. قارایسه آیاقلاریم آلتیندا قیریچ- قیریچ ائدیردی. بیردن دایانیر، قارلارین آیاقلاریم آلتدا سینماسینی دینلهییردیم.
داها، قارا یاغمیردی. کندیولونو یاخشیجا ایزلهیه بیلیردیم. آغاجلار جیلیز قول- بوداقلارینی یولدا سرمیشدیلر. کوچهلرده گلیب- گئدنلرین اونونده، دیلنچیلره تای، باشیمی یئره سالمیشدیم. آغاجلارا: منی آرتیق اوتاندیرمایین آغاجلار، آخی وار یوخومو، بوتون کتاب آلمیشام دئییردیم، آغاجلارا.
چانتامی یوخلادیم. هاوا سویویوردو. اوزاقدان شهرین باشیندان ائله بیل کی توستو قالخیردی. یولو یارییادک گئتمیشدیم کی، اوزاقلاردا گوروندو. هامان، اوزو ایدی یعقوبخانین دئدییی. بیر آز منه ساری گلیر، قاییدار، کومالارین آرخاسیندا اوزونو گیزلهدیردی. بیر آزدان یئنه گلدی. دوز منیمله یاناشی؛ یولدان بری. اوشاقلارین های- هارایی قولاقلاریمدا دولاشیردی:“بیزه نه کتابلاری گتیرمیسینیز، آغا؟“”گئجه، سحره دک سئوینجدن یاتمامیشیق“.”صمددنمی؟! … گتیرمیشسینیز؟!“اوزونو گیزلهدر، قاییدیر، منه یاخینلاشیردی. قارین اوستونده سوروندویونو حس ائدیردیم. ایشاران گوزلرینی منه دیکمیشدی. کوکسوم آغیر اوتورولوردو. قورخو کورهییمده قالاخلانمیشدی. آیاقلاریم سوستلاشمیش، کمریمده بیرنسه ذوققولداییردی. آغزیمین سویو قوروموشدو. آغزیم آجی قوخویوردو. یئنه یولا دوشدوم. اودا منیمله گلدی هاماش- بیر ایزده.
هاوا چوخ اوزاقلاردان آچیلیر و گونشین ضعیف شعاسینین قارلارین اوسته انعکاسی گوزلریمی دویوردو. کند لاپ اوزاقلاردان چونبهلتمه وورموش، قارلارین اوستونده اوتورموشدو. یولون قیراغینداکی آغاجلار، باشلارینی یئره دیکهرک دورموشدولار. چانتامی یوخلادیم. قورد هارلانمیشدی. بوتون وار یوخ دقتینی منه دیکمیشدی. قاییتدیم، قاییتدی. اوتوروب بیر اوووج قاری اللریمده کوندهلهدیم. آنجاق قوردا طرف توللامادیم. قورخدوم کی قوردو حیرصلندیرم.
تپهنی آشاغی طرف یولا دوشدوم. کند آپ- آچیق گورونوردو. قورد دیشلرینی قیجیردی. بیر نئچه قورددا هارادان تاپیلیب- گلمیشدیلر. قورخومدان دالی- دالی گئدیردیم. چانتامی کوکسومده یوخلاییردیم. قورد جلدلشهرک منه یاخینلاشیردی. دیشلرینی بتردن قیجیردی. من بیردن کنده ساری گوتورولندیم. آرخامجا قاچیردی. چانتامی الیمه کئچیرهرک قوردا ساری دوندوم. وار گوجومله قوردا هجوم گتیردیم. کتابلاریمدان بیر نئچهسی چانتامدان آچیلیب، واراقلاناراق هنده- وریمده قارلارین اوستونه توللاندی. قورد قورخدو. دایانیب- دالی اوتوردو. منده اوتوروب کتابلاریمی ییغماق ایستهدیمسه، قورخوردوم. قوردلار ایندی داها، منی دوورهلهمیشدیلر.
قولاقلاریما نهایسه بیر آت آیاقلارینین سسی دیدی. کنددن های- هارای قاوزانمیشدی. بیر آتلی منه ساری گلیردی. جرئتلنهرک یئنی دن چانتاملا قوردلارا یوگوردوم. آیاقلاریم بیردن زویوشوب اوزوم اوسته قارلارین اوستونده سرهلندیم. اوزوم بیر داش کیمیه توخوندو. درد بوتون جانیما سوواشدی. اوز بوغولموش هاراییمی ائشیدر، هوشدان گئتدیم.
بیرینجی، نعمتین سیماسینی گوردوم. خیرداواتچی ایدی. سحر ائرکن یوکونو چاتار خیرداواتلارینی ساتیش اوچون یاخین کندلره آپاراردی. دوداقلاریم یانیر و بورونوم گوینهییردی. اوز اوتاغیمدایدیم. اوستومده یورقان سالینمیشدی. اوشاقلاردان بیر نئچهسی بیرده قونشولوقداکی خانیم، کدرلی حالدا دوورهمی آلمیشدیلار.
چتین بیر حالدا ”نعمت جان، کتابلاریم … کتابلاریم … ” دئیه- سیزلادیم.- آغا، قوردلاری دَیهنکلریمیزله قووالادیق، دئدی- نعمت.قارقا قاریلتیسی کیمی بوغازیمدا قاریلداندیم. کتابلاریم … کتابلاریم …نعمتایسه بو دونه:“باخ، اودور، اوتاغین کونجونده … هامیسی ساغلام دیر“ دئدی.راحاتلاشدیم، آستا- آستا اوزومو چئویردیم؛ اوتاغین بیر کونجونده چانتامی گؤردوم. سانکی دانیب- سینه گرمیشدی. ائلهبیل کی اورهکدن گولوردو چانتام. بیر نئچهسی کتابلاریمدان یئره دؤشهنیلمیشدی. کتابلار یئری ایسلاتمیشدی.
Article printed from آراز آذربایجان – روزنامه خبری آذربایجان غربی: http://www.araznews.ir
URL to article: http://www.araznews.ir/%d9%85%d9%86%d9%8a%d9%85-%da%86%d8%a7%d9%86%d8%aa%d8%a7%d9%85/
Click here to print.
Copyright © 2013 آراز آذربایجان - روزنامه خبری آذربایجان غربی. All rights reserved.