مشدی عباد فیلمی

مشدی عباد فیلمی

کوچوره ن:اکبرسعادت
آنا دیلیمیز:۱۳۷۶نجی ایل ده قیش گونلرینین بیری دیر ،آتام گون اورتا یئمه گینه ائوه گلدی
گوزلرینین قاراسی سئویندیگین دن اویناییردی آنام سوروشدو :نه اولوب بئله سئوینیرسن؟
دئدی :آرواد اوزونده ،اوشاقلاردا حاضیر اولون گئجه سیزی سینمایا آپاراجاغام آنام دئدی :دای نه اولسون بیزی گورن نه دییر ،آتام دئدی:گئجه گئده ریک هئچ کیم بیزی گورمسین،آنام دئدی :سینما دا نه خبر وار ؟اوریا نه ایچون گئدیریک؟آتام دئدی :مشدی عبادین فیلمین گتیریب لر،من اوچ یاشلی دیم آنجاق آنلادیم کی سینما یاخچی شنلیک یئری اولاجاق کی آتام اوجور سئوینیردی ،بیر آزدان سونرا آتام ایشینه گئتدی ،آمما تاپشیراجاقلارین دئدی :من ایشدن گلینجه سیزین هامینیز حاضیر اولون یوبانمیاق آنام ایسته دیر منی یاتیرتسین ،آمما قورخوردوم من یاتاندان سونرا اولار منی ائوده قویوب گئده لر اودور یاتمیردیم،
ائله بیل آنام منیم دردیمی دوشوندی منه دئدی:سن ایندیسه یاتمیاسان گئجه سینما دا یوخون گلیب اوردا یاتارسان فیلمی گوره بیلمز سن ، آنامین سوزون آنلادیم گوزومی یوموب یوخویا گئتدیم .
نئچه ساعات گئچدیگینی بیلمه دیم آنجاق ائوده های کوی سسیلن یوخودان دوردوم باجیلاریم بیرده یالنیز قارداشیم پالتارلارین گئینیردیلر ،هاوا قارانلیق لاشمیشدی ،
آنام تئز منیمده پالتاریمی گئییندیریب دئدی :اوشاقلار تئز اولون ایندی آتوز گلر ،
هامان واخت آتام قاپینی دویدی ،سونرا ائوین ایچینه کئچدی آنام اونا بیر دنه چای توکدی دئدی :سن چایی ایچنه جک بیزده حاضیرلاشاریق ،آنام یورقان دوشکلریمیزیده سالیب دئدی :گلن دن سونرا راحات اولاریق
هامیمیز باشماقلاریمیزی گئیدیک ایسته دیک ائودن چیخاق ،آنام اوزون آتاما دوتوب سوروشدی: هاچان ائوه قاییداجییق؟آتام دئدی :گئجه یاری ساعات اون بیر یادا اون ایکیه گله ریک،
آنام دئدی:لاپدان اوغرو ائویمیزه گلمه سین؟آتام دئدی :انشااللاه گلمز،اوتایدان بیوک باجیم قیشقیردی : آتا ،آنا ،بیر آز دایانین !!!!!سونرا گئتدی یوک دن بیر دنه میتککنی گوتوردی گتیریب یورقانین آلتینا ائله قویدو کی ،اوزاقدان باخان بئله باشا دوشور دیکی اوردا آدام یاتیبدیر ،
اونون ایشینه هامی گولدی منده گولدوم ،آتام اونو آلقیشلادی ،اودا گئتدی او بیریسی متککله ریده یورقانلار آلتینا دوزدی ،ائله بیلیردین هامیسینین آلتیندا آدام یاتمیشدی ،آنام دئدی : ایندیکی بئله اولدو دایانین ، سونرا گئتدی آتوشکانین پرده سینین اوجون بیر جیققانا اویانا چکدی ،آتام دئدی : دوزلدی اوغرو کوچه دن ائوین ایچینه باخسا دئیه جک بو یورقان دوشک لرده آدام یاتیب داها ائویمیزه گیرمیه جک .
آنام لامپا چیراغین خودون آشاغیا چکدی سونرا ائودن چیخدیق ،من آتامین قوجاغیندا یول گئدیردیک ،تله سیردیم سینمانی تئز گوروم ،آنام سوروشدو :سینما هاردادیر ؟
آتام دئدی :بو یاخینلیقدا.سینمایا یئتیشدیک آتام یئمه گیمیزه آیین اویون آلدی ایچری گیردیک
اولجه منیم گوزوم قاماشدی ،بیر آزدان سونرا گوزلریم عادت ائله دی،یئکه پردیه باخیردیق ،من ایسته ییردیم آتام دان سوروشام کی سینما ائله بو پرده اولاجاق؟گوردوم اوزی دئدی:بیر آز جا دوزون ،ایندی فیلمی باشلیاجاق ،
بیر آزدان سونرا پرده چکیلدی مشدی عباد یئکه بوخچاسینان گلدی ،اونو گورجه یین یادیما دوشدو کی آتامین کیتابلاریندا اونون شکیلینی گورموشدوم،
باجیلاریمنان ،قارداشیم کیپریکلرینده ویرمامیش اونا باخیردیلار من آجیخدیم آنام منه شکر چوره گی وئردی آتامین قوجاقیندا ائله شیب ییه ییه فیلمه باخیردیم ،
فیلم بیر یئره یئتیشمیشدی کی ……….
گوردوم منیم الیمه سو دامجیلئییر ،اوز اوزومه دئدیم یاغیش یاغیر ،گویه باخدیم گوردوم سینمانین دامی وار ،
لاپدان آتامین گوزلرینه گوزوم ساتاشدی او قورغا تکین گوزون دن سو اله ییردی …
آنام باشا دوشدو دئدی :کیشی بسدی دای ،آتام دئدی :آرواد جاوانلیغیم یادیما دوشدو ،بو فیلمی باکی دا نئچه یوللارلا قارداشلاریملا گئدیب گورموشدوم ایندیسه اونلار اوردا قالیبلار منده بوردا قالمیشام ،آتامین آغلاماغینا منیم ده اوره گیم دولدی ایسته دیم منده آغلیام آنام منی قوجاغینا آلدی چادراسین اوزومه چکدی ،بیر آزدان سونرا منی یوخو توتدو،بیرده اوز یاتاغیمدا گوزومی آشدیم سحر اولوب گون چیخمیشدی باجیلاریمنان ،قارداشیم مشدی عبادین فیلمین بیر بیرلرینه تعریف ائدیردیلرگولوشوردیلر ،منده اونلارا قولاق آسیب گولوردوم .

نوشته شده توسط admin در شنبه, ۲۶ دی ۱۳۹۴ ساعت ۱۱:۳۰ ق.ظ

دیدگاه


3 + هفت =