محرم گونلرینده خطابه لر

محرم گونلرینده خطابه لر

حاضیرلایان:اکبرسعادت
محرم گلدى محنتدن پریشانم حسین جانم آخیر رخساره گؤزیاشیم نواخوانم حسین جانم
حسین جانم حسین جانم‏….
جهاندا روح ایثارى ائدر احیا حسین عشقى
هر ایل بو آیدا دنیایه سالار غوغا حسین عشقى
حسین عاشقلرین یکسر ائدر شیدا حسین عشقى هامى دیلده نوا سسلر حسین جانم حسین جانم
آنادیلیمیز: محرم آیی، عشق آیی‏دیر. بو آیدا عاشقلرین قانی جوشه گلر و عاشقلر اوز ارادت‏لرینی »گوزیاشلار شهیدی« و »سوسوز جان وئرن« مولالرینه گوستره‏رک کربلا شهیدلری‏ایله پیمان باغالایارلار کی دین و اسلام یولوندا باش و جاندان کئچسینلر و امام حسینین یولونون دوام ائدن‏لریندن اولسونلار…
عمر بن سعد قوشونونا خطاب قیشقیردی: »بو انزع البطین اوغلودور (حضرت علی‌نین (ع)لقبلریندن، شرکدن اوزاق اولان معناسیندا) و بو عرب قاتلی‌نین اوغلودور. هر یاندان اونا حمله ائدین.« بیر آندا دؤرد اوخ آتان آتلی امامی محاصره ائله‌ییب اماملا خیمه‌لر آراسیندا فاصله سالدیلار.
امام اونلارا خطاب دئدی: »ای ابوسفیان خاندانی‌نین مریدلری! دینیز اولماسا دا قیامت گونوندن قورخماساز دا، هئچ اولماسا دنیادا مرد اولون و عرب اولساز –کی بئله دوشونورسوز- اوز اجدادیزین یولونا قاییدین«.
شمر قیشقیردی: »ای فاطمه اوغلو! نه دئییرسن؟« امام بویوردو: »سیزینله من ساواشیرام آروادلارین گناهی یوخدور. من دیری اولانا قدر نادانلاری و عصیانچیلاری حرمیمدن اوزاق ساخلایین«.
عاشورا سحری چاتماقلا، امام کومکلری ایله صبح نمازینی قیلدی. نمازدان سونرا، حضرت ۳۲ نفر آتلی و ۴۰ نفر پیاده‌دن عبارت اولان قوشونون منظم ائله‌دی.
»زهیر بن قین«-ی قوشونون ساغ قانادی و »حبیب بن مظاهر«-ی قوشونون سول قانادی‌نین امیری ائله‌دی.
جنگ بایراغینی‌دا قارداشی حضرت عباسه (ع) تاپیشیردی. امامین امر ایله کومکلر خیمه‌لری دالیدا قویوب اونون اطرافیندان قازدیقلاری خندقی قمیش و اودونونان دولدوروب اودلادیلار کی دوشمن حمله‌سیندن آماندا قالسین.
میدانین او بیری اوجوندا دا عمر بن سعد صبح نمازین قیلیب قوشون امیرلرینی معین ائدیب امام حسین ایله (ع) ساواشماغا حاضرلاشدی.
امام دوشمن قوشونونون چوخلوغونو گورنده اللرینی گویه قووزاییب بئله دعا بویوردو: »اللّهمّ انت ثقتی فی کلّ کرب و رجائی فی کلّ شدّة، و انت لی فی کل امر نزل بی ثقة وعدّة، کم من همّ یضعف فیه الفؤاد و تقل فیه الحیلة و یخذل فیه الصدیق و یشمت فیه العدوّ بک و شکوته الیک رغبة منّی الیک عمّن سواک ففرّجته و کشفته فانت ولیّ کلّ نعمة و صاحب کلّ حسنة و منتهی کلّ رغبة؛ الله، بوتون چتینلیقلاردا و بلادا اومیدیم و دایاغیم سنسن.
بوتون مشکل‌لرده اومیدیم فقط سنه‌دیر، نه چوخ غم کی اورگی تابدان سالار و اونو آرادان آپارماغا یول اولماز. نه چوخ غصه‌لرده کی دوستلاریمیز بیزی بوراخار و دوشمن شماتت ائلر. اوز رغبتیمله سنه و نه آیریسینا شکایتیمی گتیرمیشم و سن اوندا منیم اوچون فرج قویوبسان و اونو منه هامار ائدیبسن.
هر نعمتین ولیسی سنسن و بوتون یاخشیلیقلار سنه عایددیر و هر مقصدین هدفی سنسن«. عمر بن سعدین قوشونو جنگه حاضرلاشدی.
دوشمنین بیر دسته‌سی آتلارینی امام حسینین (ع) خیمه‌لری اطرافیندا، چاپدیردیلار و دالیدان خیمه‌لره یاخینلاشدیلار.
اونلارین بیری یاخینلاشیب بیر خیمه‌لره و بیر یانار اودا باخدی. آما خندق و اود آلوولارینی گورنده قاییتماقدان ساوای چاره گورمه‌دی. بو آندا اوجادان قیشقیردی: »ای حسین (ع)! قیامت چاتمامیشدان اودا طرف گئدیبسن«.
امام بویوردو: »بو کیمدی؟ دئیه‌سن شمر بن ذی الجوشندی«. دئدیلر: »الله سنین ایشینی صلاحا گتیرسین، اوزودور«.
امام بویوردو: »ای کئچی اوتاران آروادین اوغلو ! سن اوددا قالماغا داها لایقسن». بو آندا «مسلم بن عوسجه« یایینا بیر اوخ قویوب حضرته عرض ائله‌دی: »بو فاسق الله دوشمنلریندن و ظالملرین یئکه‌سیدیر، ایندی الله سیزه اونا مسلط ائدیب [اجازه ‌وئرین اونو ایندیجه اولدوروم]« آما امام اونو بو ایشدن ساخلاییب بویوردو: »بئله ائله‌مه چونکی ایسته‌میرم جنگی باشلایان من اولام«.
عاشورا سحرینده بُرَیرین خطابه‌سی:جنگین باشلاماسنیدان اول، امام حسین (ع) بیر عده کومکلری ایله، حجتی تمام ائله‌ماق اوچون آتا مینیب دوشمن لشکرینه طرف گئتدی. امام، بریر بن خضیره بویوردو: »ای بریر! بونلارا دانیش و نصیحت ائله«.
بریر، عمر بن سعد قوشونونون قاباغیندا دایانیب بئله دئدی: »ای جماعت، الله-دان قورخون. ایندی پیغمبر خاندانی سیزین آرازا گلیب و بونلار پیغمبرین اوشاقلاری، خاندانی قیزلاری و اونون حرمی (یاخینلاری) دیلار. اورگیزده اولانی دیلیزه گتیرین و اونلارلا نه ائلیه‌جگیزی دئیین«.
دئدیلر: »ایستیریک اونلاری امیر عبیداللّه بن زیادین اختیاریندا قویاق کی اونلار باره‌ده نظر وئرسین«.
بریر دئدی: »راضی اولماسیزمی کی گلدیکلری یئره قاییتسینلار؟ وای اولسون سیزه، ای کوفه‌لیلر! اونلارا یوللادیغیز نامه‌لری، اونلارا وئردیگیز تعهدلری یاددان چیخاردیبسیز؟ الله-ین شاهدلیغی یئتر.
وای اولسون سیزه! پیغمبر خاندانینی چاغیردیز و بئله گمان ائله‌دیز کی جانیزی اونلارین یولوندا قربان وئره‌جکسیز، آما سیزین یانیزا چاتاندان سونرا اونلاری عبیدالله-ـا تسلیم ائله‌دیز و اونلارلا یهود و نصارانین ایچدیگی، و ایتلرین و دونوزلارین اوندا یووارلاندیغی، فرات چایی آراسیندا فاصله سالدیز.
محمددن (ص) سونرا اونون خاندانی ایله نه پیس رفتارلار کی ائله‌مه‌دیز. سیزه نه اولوب؟ الله سیزی قیامت گونو سیراب ائله‌مه‌سین نه پیس جماعتسیز«.بو آندا قوشوندان بیر عده اونا دئدی: »ای بریر! بیز سنین نه دئدیگینی بیلمیریک«. بریر دئدی: »حمد اولسون الله- کی منیم معرفتیمی سیزدن چوخ ائله‌ییب. پروردگارا! من بو قومون رفتاریندان بیزارام، سن اوزون اونلارین ایچینه ائله اوخلار آت کی اونلاردان غضبلی اولدوغون آندا، سنی ملاقات ائله‌سینلر«. بو آندا، عمر بن سعد قوشونو اونا طرف اوخ آتدیلار و بریر دالی قاییتماغا مجبور قالدی.
عاشورا سحرینده امام حسینین (ع) خطابه‌سی:امام، دوه‌سینی ایسته‌ییب اونا میندی و دوشمن قوشونو اوز به اوزونده اوجا سسینن اونلارا دانیشماغا باشلادی: » ای جماعت سوزومه قولاق آسین و جنگه تلسمه‌یین کی سیزی، منه اداسی واجب اولان شئیه و سیزین منیم بوینومدا اولان حقیزه موعظه ائله‌یم و حقیقتی سیزه دانیشام.
انصافیز اولسا سعادتلی اولاجاقسیز آما عدالت و انصافدان اوزاق اولساز قراریزا عمل ائله‌یین و منله جنگ ائله‌یین. البته منیم ولی‌م قرآنی گوندرن الله-دی و او لایق انسانلارین کومگی و ولیسیدیر«.
سونرا، الله-ین حمد و ثناسینی دئدی و پیغمبره (ص) و ملکلره و الهی پیغمبرلره سلام گوندردی. حرم اهلی، امامین سؤزلرینی ائشیدنده آغلاشدیلار. امام (ع) حضرت عباس(ع) و علی اکبری(ع) اونلاری آراملاشدیرماغا گوندردی.
سونرا بویوردو: ای جماعت منیم نسبیمی یادیزا سالین و گورون من کیمم. اوزوزه گلین و اوزوزو دانلایین.
باخین گورون منی اولدورمک و حرمتیمی سیندیرماق جایزدیر؟ مگر من سیزین پیغمیریزین قیزی‌ و خلیفه‌سی و عمی اوغلوسونون اوغلو دئییلم؟ همان کس کی هامیدان اول ایمان گتیریب پیغمبری (ص) الله طرفیندن گتیردیگینه تصدیقله‌دی؟
مگر سید الشهداء حمزه، منیم عمیم دئییل؟ مگر ایکی قانادی ایله جنتده اوچات جعفر طیار منیم عمیم دئیی؟ بیلمیرسیز کی پیغمبر (ص) قارداشیملا منیم باره‌مده بویوروب: بو ایکیسی جنّت جوانلاری‌نین آغاسیدیلار؟ منیم سوزلریمی تصدیقله‌سیز حق هماندیر. آند اولسون الله-ها یالانچی‌نین الله دوشمنی اولدوغونون بیلن گوندن، یالان دانیشمامیشام.
آما منه اینانماساز دا، ایچیزده بعضیلریندن سوروشساز سوزلریمی تصدقله‌یرلر، جابر بن عبدالله انصاری، ابوسعید خدری، سهل بن سعد ساعدی، زید بن ارقم و انس بن مالک‌دن سوروشون کی پیغمبرین، قارداشیم و منیم باره‌ده دئدیقلارینی سیزه دانیشسینلار و منیم سوزومون دوزلوغو سیزه اثبات اولسون. بو شاهدلر منیم قانیمی توکمگه مانع اولمور؟یازیب کوچوره ن دین خادیمی..

نوشته شده توسط admin در شنبه, ۱۰ مهر ۱۳۹۵ ساعت ۱۰:۴۴ ق.ظ

دیدگاه


پنج + 3 =