ماشاا… بیزیم مارشال حاجی لارا
حاضیرلایان:اکبرسعادت
گئدیسیز مکه یه تکمیل اولا ایمان حاجیلار
وئره آللاه سیزه مین هوری قلمان حاجیلار
هئچ اولوب بیر گئجه سیز باش ووراسیز قونشولارا
سیز دوغوردان حاجیسیز یا کی یالاننان حاجبلار
آنا دیلیمیز: قونشوسو آجیندان قیریلارکن ایکینجی دفعه و داها چوخ حجه گئدنلره حضرت پئیغمبرین بو حدیسینی خاطیرلاداق: »قونشوسو آج ایکن یاتانلار بیزدن دئییل«. تانرینی چاغیرماق اوزوموزو چاغیرماق دئمکدیر.
حج کی ،الله ائوین و اونون پیغمبرین زیارت ائتمه سی دیر،باشلاییب. بو زیارتی بعضیلری بیزنئس یا تجارت، بعضیلری توریست، بعضیلری کئف و دلخوشلوق اوچون…یا همن بو افکارنان کی خوش گئچسین… بعضیلری ده حقیقتن اللهین امری کیمی قبول ائدیب یئرینه یئتیریر. ایسلامین ۵ اساس شرطیندن بیری اولان حجی یئرینه یئتیرمک اوچون موسلمانین موعیین مبلغده وسایطی اولمالی و دیگر شرطلره ده عمل ائتمه‌لیدیر. چونکی ایسلامداکی عبادتلر باشقاسینا گوستریش مقصدیله دئییل، تکجه اللهین راضیلیغینی قازانماق اوچون ایجرا ائدیل(ملید)ایر. قورآنین ۲۲-جی سوره‌سی‌نین آدی اولان حج اللهین ایمکانلی موسلمانلارا عومورلرینده بیر دفعه زیارت ائتمیی واجیب سایدیغی امریدیر.
الله قورآندا حجله باغلی بئله بویورور: »اونون یولونا گوجو چاتان هر بیر کسین حجه گئدیب او ائوی زیارت ائتمه‌سی اینسانلارین الله قارشیسیندا بورجودور» (»آلی-عمران« سوره‌سی، ۹۷)، »اللهدان اؤترو حج و اومره عمللرینی تام یئرینه یئتیرین« (»بقره« سوره‌سی، ۱۹۶).
حج عبادتی بوتون موسلمانلاری بیر یئره ییغیر. اینسانلارا حیاتین اکثر آنلاریندا آرخاسینجا قاچدیقلاری دونیا منفعتی‌نین معناسیزلیغینی، ایینلرینده‌کی ایهراملا دونیادان ماکزیموم نه آپاراجاقلاری آشیلانیر.
حج صمیمیت، تواضعکارلیق طلب ائدن عبادتدیر. اما حجدن قاییدان بعضی »هاجی«لارا یاخین گئتمک اولورمو؟
زیارته تییاره ایله گئدنلر اوللر آزال-دان ایستیفاده ائدیردیسه، حاضردا بو ایشی ایرانین »ماهان« آویاشیرکتی ایجرا ائدیر. رسمی آچیقلامایا گوره، بو ایل اولکمیزه ۴۵۰۰ یئر آیریلیب. اولکمیزده یاشایان خاریجیلر اوچون ده ۲۰۰ علاوه یئر آیریلیب. زووارلارین ۲۰۰۰ نفری تییاره، ۲۵۰۰ نفری ایسه آوتوبوسلا گئدیر. تییاره ایله گئدنلر ۲۲۰۰، آوتوبوسلا گئدنلر ایسه ۱۳۵۰ دوللار اوده‌ییر. بئله‌لیکله، آذربایجاندان گئدن «حاجی»لیغا نامیزدلر قمی و شیرکتلره (اونلارا ۷۰۰ نفرلیک کووتا وئریلیب) ۷ میلیون ۷۷۵ مین دوللار اؤده‌ییب. اما زووارلارین یئمک خرجی، قوربانلیق حئیوانین آلینیب کسیلمه‌سی داخیل دئییل. بونون اوچون حجه گئدنلر اؤزلری ایله علاوه اولاراق آزی ۷۰۰-۱۰۰۰دوللار گؤتورمه‌لیدیر.حجه گئتمک عومورده بیرجه دفعه اللهین امری اولدوغو حالدا بیزده بعضیلری نه‌دنسه هر ایل نئچنجی دفعه زیارته گئدیر. سونرا بئله ری فورمالاشیر کی، فیلان کس آلتی و یا یئددی دفعه حجه گئدیب دئیه اونون ایمتییازی داها چوخدور، او، »مارشال حاجی« ساییلمالیدیر.
ایسلامی اینسانلارا چاتدیرماق اوچون سئچیلن حضرت محمّد ۶۳ایل هیجاز بولگه‌سینده یاشاییب. و جمعیسی بیرجه دفعه حجه گئدیب. رسولوللاهین حیاتی ایله باغلی یازیلمیش هئچ بیر منبع‌ده »حاجی محمّد« ایفاده‌سینه راست گله بیلمزسینیز. بونو حضرت محمّدین پئیغمبر اولماسی ایله علاقه‌لندیرنلر وار. آنجاق صحابه‌لردن، خلیفه‌لردن، حتی ایسلام عالیملریندن ده هئچ بیری‌نین آدینین قارشیسیندا »حاجی« سوزونون علاوه ائدیلدیگینی گوره بیلمزسینیز. ایکینجی دفعه حجه گئدنلرین عملی حج ساییلمیر، بو، نافیله عبادت حساب اولونور.
بو گون ایسلامین دیگر شرطلرینی موختلیف بهانه‌لرله یئرینه یئتیرمه‌ینلر ایسلامین آخیرینجی شرطی اولان حجله باغلی جانفشانلیق ائتمه‌لری موعیین قدر باشادوشولندیر. چونکی ناماز قیلانلارا »ناماز فیلان کس«، اوروج توتانلارا «اوروج فیلان کس» دئییلمه‌دیگی حالدا حجه گئدیب-گلنلر ائله یولداجا بیر-بیرینی »حاجی« آدلاندیرماغا باشلاییر. ایسلام دینینده هئچ کیم بیر-بیرینی »حاجی« آدلاندیرمادیغی حالدا بیزیمکیلر باشقالارینا اوزلرینی ترتمیز گوسترمک اوچون بو »اولدوزسوز روتبه«دن ایستیفاده ائدیر.
بیر چوخ زووارلار بوردا ناماز قیلمادیقلاری کیمی زیارت اسناسیندا دا صاباح نامازینا قالخماغا ارینیر، بعضیلری بیر اتک پول توکوب گئتدیکلری زیارتده نامازلارینی اوتئلین هاواسیز اوتاقلاریندا قیلماقلا کیفایتله‌نیر. تزه »حاجی«لاریمیز اونلارا باش چکنلره هدیه اولاراق همین یئردن زمزم سویو، چینین ایستئهسالی اولان تسبئحلر، سجاده‌لر (جاناماز) گتیریر. بیر نئچه دفعه تجروبه‌سی اولانلار ایسه مککه‌ده باها قییمته ساتیلان تسبئحلرله باکیدا ساتیلان تسبئحلرین عینی منبع‌دن گلدیگینی بیلندن سونرا اونلاری ائله بورادان آلیب »مقدس هدیه» کیمی پایلاییر.
بعضیلری حجین بوتون گوناهلاری یودوغونو زنن ائدیر، بو زامان الله رسولونون حدیسینه ایستیناد ائدیرلر. آنجاق بئله‌لری اونودور کی، حدیسده قئید اولونانلار، آنجاق کیچیک گوناهلارلا باغلیدیر. بویوک گوناهلارین باغیشلانماسی اوچون توبه و حاقی تاپدانانین حاقینی حالال ائتمه‌سی لازیمدیر. حتی پئیغمبرلرین قیبته ائتدیگی شهیدلر ده اینسان حاقینا گوره جاواب وئره‌جک. ساده‌جه اولاراق الله ایستسه، اوز حاقینی باغیشلایا بیلر.
قونشوسو آجیندان قیریلارکن ایکینجی دفعه و داها چوخ حجه گئدنلره حضرت پئیغمبرین بو حدیسینی خاتیرلاداق: »قونشوسو آج ایکن یاتانلار بیزدن دئییل«.
نوشته شده توسط admin در چهارشنبه, ۲۶ فروردین ۱۳۹۴ ساعت ۴:۱۱ ق.ظ
