قیامت اولاجاق

قیامت اولاجاق

محمد صبحدل
بیراینجی بولوم
آنادیلیمیز: سو دامجی‌لار‌ی‌نین سسی گئجه‌ده؛ داها آیدین ائشیدیلیر. گوندوزایسه، هرنه‌یی اؤرت-باسدیر ائدیر. ساعات سسینه قاریشان دامجی سسی، مطبخ‌دن آخیب، ائوین قیراق-بوجاغینا دولور. سونرا قولاقدان، بئییندن کئچیب، جانیمیزا، روحوموزا قونور.
– بلکه بیر جینیم اولسایدی.- رؤیا دئییر و‌هانسی نامعلوم یوزومدان‌سا آرینماغا چالیشیر.- ایش‌لره چاتا بیلمیرم اوندان. جانینا بیر اینه کئچیریب، ایش‌لریمی‌گؤردورردیم.
پیچیلتی‌لا دانیشیر. بللی اولان ایشغین آزلیغی سسه ده تأثیر ائدیرمیش. ائله بیر بویوموز چاتیشمیردی. ساعاتا باخیرام. اوغلوموز شاهین اوتاقدا یاتیر.
– ایندی روبوت سازلاییرلار. جینه احتیاج قالمیر. واختیم اولسا اؤزوم شیرلره باخارام.
‌رؤیا آغزینی آچیر آمما سونرا واز کئچیر. گولومسه‌ییر و آجی خط‌لر اوزه چیخیر. بو واز کئچمه بوتون دئییله‌سی سؤزلردن آغیردیر.
سونرا یئنه او قوخولار گلیر. قوورولموش تره ایی‌سی و بئییینین‌هاراسینداسا گیزلنمیش الوان توزلارین هجومو. قارانلیق؛ رنگلی توزلارلا، ایشیقلانیر. آرادا الوان گئییملی باش اؤرتولو بیر قیز اویناییر. «عالم دولانیر باشیما. گل بری. گل بری. گل بری». قیامت اولاجاق. کؤلگه‌لر سماعا کئچیرلر. هرنه فیریلدانیر و دنده‌لی چرخ‌لر کیمی، دایره‌لرین توخونما نؤقطه‌لری، بیربیرینی ایشه سالیرلار. شپه؛ قیزین ساغ الی‌نین بارماقلاری اوجوندان باشلاییر، بیلک‌دن، دیرسک‌دن آخیر و چییینده دالغالانیر. دالغا سول چیییندن بوشالماغا باشلاییر، دیرسک‌دن بیله‌یه و بیلک‌دن بارماقلارین اوجونا ساری. بوراخیلان شپه‌نین گوجونو ترپه‌نن‌هاوادان دویماق اولار. بارماقلارین استقامتینده اولسان سنی حتی بوغا بیله‌جه‌یینی ده دویا بیلرسن. بونلار‌هارادان گلیر؟
موحاریبه چاغی، بیز اوشاقلارا اویون کیمی‌بیر شئی گلیردی. قول‌لاریمیزی آچیب طیاره‎لر کیمی‌اوچوردوق. اؤزوموزدن کیچیک اوشاقلارین، اوینادیقلاری یئره چاتاندا اوووجوموزو آچیب قومو بوشالدیردیق. بمباردیمان ائدیردیک. سونرا اوجایا چیخیب، هلی‌کوپترلره ال ترپه‌دیب سس چیخاریردیق. وضعیت قیرمیز اولاندا دا زئرزمی‌یه قاچیردیق. بو، اویونوموزون بؤیوک‌لرین بیزه قاریشدیقلاری حیصه‌سی ایدی. ائله بو اویونلارین ایچینده درس دوستلاریمین نئچه‌سی‌نین آتاسی جبهه‌دن قاییتمادی. شهنازخالاگیلین ائولرینه بمب دوشدو و اری اؤلدو. شهناز خالانین چنه‌سی‌نین یاری‌سینی ایسه قلپه آپاردی. سونسوز ایدی و یاخیندان تانیدیغیم ایلک اوخویان قادین او ایدی. قلپه، سسینی و گؤزل‌لییینی بیر یئرده آپارمیشدی.
سونرا ایت‌لرین هوروشمه سسی گلیر. جیرتدان دئییر:
– ایت سسی گلن طرفه یوخ ایشیق یولا دوغرو گئتمه‌لی‌ییک.
شاهین- دئوین ائوی اولان طرفه؟- دئیه سوروشور.
– هه دئوین ائوی اولان طرفه.
– بیردن بو دئو آخماق دئو اولماسا؟
قورخونو اوشاق گؤزلریندن جانیما توشلاییر.
– آخماق دئو اولاجاق.
–هاردان بیلیرسن؟
– همیشه آخماق دئو اولوب. اوندان.
– هرنه همیشه عینی جور اولور؟
«یوخ هردن فرق ائدیر.» بونو شاهینه دئمیرم. شاهین بؤیویور. اؤز علاقه‌لرینی تاپیر و دانیشگاها گئدیر.
بیر جینیم اولسایدی نه ایستردیم اوندان؟ جین نه ائده بیلردی کی بیزه؟
رؤیا دئییر:
– بیریسی بو تلوزیونو ائودن چیخاراردی. دلی اولدوق اؤلوم خبری ائشیتمک‌دن.
سون واختلار تلوزیونا دا سس‌سیز باخیرام.‌هاراداسا موحاریبه وار و آداملار ایستر سسلی، ایستر سس‌سیز، اؤلورلر.
شاهین بؤیویه‌ندن بری دئییشمه‌ییمیز چوخالیب. هر نه اوسته سؤزلشمک اولور. چوخو پول اوسته اولور، آمما پولون باهانا اولماسینی ایکیمیز ده بیلیریک. بو سیمیتنلیک‌هارادان یاراندی منده؟ هرنه‌یین دیبینه گئدن دئییلدیم آخی.– بلکه بو قدر اوشاغی اوزمویه‌سن. –رؤیا دئییر.-دوستونون ایتی‌دیر. بیر ایکی گون ساخلاییب حؤصله‌دن دوشر.
گؤزونون یورغون ایشارتی‌سی هله ده گؤزل‌دیر. ایل‌لر آداملاری گؤزل‌له‌ده بیلرمیش. ایشین آغیرطرفی اونا دوشوب. ائو ایشی، ائشیک ایشی و شاهینین ده قایغی‌سی. سو سسی ساعات سسینه قاریشیر. هئچ ایشه چاتا بیلمیرم. نه‌یی‌سه ایتیرمیشم.
رؤیا:– چوخ سؤزه باخانیدیق بیز؟-دئیه سوروشور.یوخ دئییلدیک.‌هامی‌دئدی اولماز. بیز دئدیک اولار و ائولندیک.‌هامی‌نی محضره چاغیرساق دا هئچ کیم گلمه‌دی. شاهیدلری کیرایه توتمالی اولدوم. ایش قورتارانا یاخین شهناز خالا گلدی. خالا؛ اصلینده خالام یوخ، آنامین باجیلیغیدی. بوینوندان بویون باغی‌سینی آچیب رؤیانین بوینونا کئچیرتدی. ایکیمیزی تبریکله‌یه‌نده فیسیلتی‌لی پاسلی سس آرخاسیندا اوزاق زامانلاردا ایتیردییم سئحیرلی بیر سسی آختاریردیم. چادراسین بئلینه دویونله‌دی چیلتیک چالدی و اوینادی، آمما اوخومادی. اوخوماسی موحاریبه ایله گئتمیشدی.
– په‌ی توْهوندا آهلاماز اوْهول. هَحمَتلیح‌هانان دا هوْلسایدی…
آغلامیردیم. تکجه بو قادینین اوره‌یینه گؤره کؤوره‌لمیشدیم.
سونرا هرنه، هرنه‌یی ایشه سالدی. حیات داملا-داملا ساعاتا قاریشدی و آداملاری یویوب آپاردی. هرنه همیشه عینی جور اولمور آمما الوان توزلارین هجومو وار و دونیا فیرلانیر. رنگ‌لر، قوخولار و خاطره‌لر احاطه‌سینده‌ کؤلگه‌لر سماعا کئچیرلر. «عالم دولانیر باشیما. گل بری. گل بری. گل بری». قیامت اولاجاق.
– بلکه بیر ایکی گون ایتی ساخلاسین.- دئیه رؤیا منه باخیر.- گؤزله‌رم ائوی باتیرماز.
بو نئچه ایلده نه قدر یورموشام بو قیزی. هرنه‌یی اؤزو اوچون یوخ باشقالاری اوچون ایسته‌ییب. سن وارسان جینی نئیلیرم کی. رؤیانین اؤزونه بونو ایضاحلاییرام. گولور:
– پس ساخلاسین؟هردن قلبیری گؤتوروب ناغیلداکی دئو کیمی‌سو گتیرمه‌یه گئتمه‌ییمیز لازیم اولور. بو؛ بیزه چوخ واجیب‌دیر. بئله اولماسا ناغیل‌لارین دویونو آچیلماز. دنده‌لی چرخ‌لر دولانماز و دونیا دایانار. قوی دونیا دایانماسین.
– اولدو. ساخلاسین.رؤیا سئوینیر و داها گؤزل‌له‌شیر.
– آدی جینی‌دیر- شاهین دئییر- یوخ یوخ اوندان وئرمه. قوورولموش تره یاخشی‌دی آمما بونون سوغانی‌دا وار. سوغان ایته زیان‌دی. عؤمرونو آزالدار.
– نه بیله‌یدیم آخی. نئجه ده بالاجادی.‌ ایندی بو ائرککدی یوخسا دیشی؟
– جینی ده ائرکک آدی اولار؟- دئیه تام اینام‌لا رؤیایا باخیر.
-نه بیلیم؟ ایندی یئمه‌یینه نه وئره‌جه‌ییک؟- رؤیا سوروشور.
– حیوان یئمه‌ییی ده. بازاردا توکانی وار. هله بیر ایکی گونلویه وار.
بیزلرده ایت ساخلییان اولماییب. ائله بیر بویوموز چاتیشمیردی. رؤیا گؤزآلتی منه باخیر. بیرجوره‌لر دئمک اولار کی گؤزونو آغاردیر. بیر سؤز دئمیرم.
ایشیغین یایدیغی معلومات اساسیندا آرازآذربایجان راپورونا گوره ،– سونرا بولودلو بیر‌هاوادیر. شاهین درسده‌دیر، رؤیا ایشه گئدیب و من بازارا گئتمکده‌یم. ائوه بیر شئی‌لر آلمالی اولاجاغام. ماشینی بولواردا ساخلاییرام. بازاردا درس دوستلاریمین بیری‌له تاپیشیرام. باهالیقدان، سیاست‌دن و قدیم‌لردن دانیشیریق. همیشه عینی سؤزلری تکرار ائدیریک. خوداحافیظ‌له‌شیریک و هئچ واخت گؤروشمه‌ین عایله‌لریمیزه سالام گؤندریریک.‌هاوا چیسه‌له‌مه‌یه باشلاییر. آداملار تله‌سیرلر. آلدیقلاریمی‌ماشینا ییغیب یولا دوشمه‌یه باشلاییرام. بیر ایت هوروشمه‌سی گلیر.
اویان-بویانی آختاریرام. اؤزودور. جینی. شاهین، ایتی ایسلانماقدان قوروماق اوچون پالتوسونا کئچیریب و تلسه-تلسه تانیمادیغیم بیر قیزلا آددیملاییر. سیقنالی سسلندیریرم. توولو گئدیرلر و ائشیتمیرلر.
ایره‌لی سوروب یئنه سیقنالی سسلندیریرم. دوروخوب آختاریرلار. شاهینین اورکک باخیشلارینی تانییرام. شیشه‌نی یئندیریرم.ایسلانارسیز. سیزی بیر یئرلره چاتدیرا بیله‌رم.
سس‌سیز-سمیزسیز ماشینا مینیرلر.
EMAIL.agazadeh1@gmail.com

نوشته شده توسط admin در شنبه, ۲۵ آذر ۱۳۹۶ ساعت ۸:۴۸ ق.ظ

دیدگاه


− چهار = 5